İkitərəfli əməkdaşlıq məsələləri müzakirə olunub

Azərbaycanla Səudiyyə Ərəbistanı arasında enerji sahəsində ikitərəfli əməkdaşlıq məsələləri müzakirə olunub.Energetika Nazirliyindən Azərtac-a bildirilib ki, Vyanada Neft İxrac Edən Ölkələr Təşkilatına (OPEC) üzv və qeyri-üzv dövlətlərin üçüncü görüşü çərçivəsində Azərbaycanın energetika naziri Pərviz Şahbazovla OPEC Konfransının prezidenti və Səudiyyə Ərəbistanının energetika, sənaye və təbii sərvətlər naziri Xalid Əbdüləziz Əl Falih arasında görüş keçirilib. Görüşdə neft hasilatının azaldılmasına dair sazişin nəticələri, neft bazarında mövcud vəziyyət, eləcə də Azərbaycanla OPEC+ çərçivəsində əməkdaşlıq məsələləri müzakirə edilib.Xalid Əbdüləziz Əl Falih OPEC və kartelə daxil olmayan ölkələrin əməkdaşlığının ardıcıl nailiyyətlərlə müşayiət olunduğunu deyərək, neftin qiymətinin sabitləşməsi istiqamətində müsbət meyilləri birgə fəaliyyətin bəhrələri kimi qiymətləndirib. O, Azərbaycanın bu prosesə davamlı dəstəyinin və öhdəliyə əməl etməsinin ümumi məqsəd naminə vacibliyini qeyd edib. Görüşdə neftin dünya enerji balansında mövqeyinə də toxunulub. Bildirilib ki, enerji sektorunda yeni tendensiyaların güclənməsinə baxmayaraq, neft yanacaq növü kimi hələ uzun müddət aktuallığını saxlayacaq.Müzakirələr Azərbaycanla Səudiyyə Ərəbistanı arasında enerji sahəsində ikitərəfli əməkdaşlıq məsələlərini də əhatə edib. Səudiyyə Ərəbistanının Azərbaycanın neft-kimya və neft emalı sənayesinə maraq göstərdiyi qeyd edilib və bu istiqamətdə əməkdaşlıq imkanları nəzərdən keçirilib.xeber100.com

“Azərsu” Açıq Səhmdar Cəmiyyətinin məlumatı

Bakının Nizami rayonunun bir hissəsinə içməli suyun verilməsində məhdudiyyətlər olacaq.“Azərsu” Açıq Səhmdar Cəmiyyətindən Azərtac-a bildirilib ki, Nizami rayonu ərazisində inşa edilmiş kəmərin mövcud su təchizatı sistemlərinə qoşulması ilə əlaqədar noyabrın 30-da gün ərzində rayonun bir hissəsinə içməli suyun verilməsində məhdudiyyətlər olacaq. Yaranan narahatlıqla əlaqədar “Azərsu” ASC abonentlərdən üzr istəyir.xeber100.com

“AzəriLayt” markalı neftin qiyməti ucuzlaşıb

Dünya birjalarında neftin qiyməti müxtəlif istiqamətlərdə dəyişib.Azərtac xəbər verir ki, “AzəriLayt” markalı neftin bir barrelinin qiyməti 0,42 dollar ucuzlaşaraq 64,50 dollar olub.Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,30 dollar bahalaşaraq 63,41 dollar, Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti isə 0,17 dollar artaraq 57,57 dollar təşkil edib.xeber100.com  

OPEC ölkələrin nazirlərinin 3-cü iclası keçiriləcək

Bu gün Vyanada Neft İxrac edən Ölkələr Təşkilatı (OPEC) Nazirlər Şurasının 173-cü, OPEC və qeyri-OPEC ölkələrin nazirlərinin 3-cü iclası keçiriləcək.Azərtac xəbər verir ki, OPEC+ ölkələrin nazirlərinin 3-cü iclasında dünya neft bazarında hazırkı vəziyyətə dair OPEC-in təqdimatı, Birgə Monitorinq Komitəsinin hesabatının təhlili, kartelə daxil olmayan ölkələrin nümayəndələrinin öhdəliklərin icrası ilə bağlı çıxışları olacaq, həmçinin neftin qiymət sabitliyinin dayanıqlı olması üçün yeni təkliflər müzakirə ediləcək. Azərbaycanı energetika naziri Pərviz Şahbazovun təmsil edəcəyi nazirlərin toplantısında OPEC+ sazişinə daha 10-nadək ölkənin qoşulması nəzərdən keçiriləcək.OPEC Nazirlər Şurasının 173-cü iclasında isə hasilat kvotasının artırılması və ya mövcud OPEC+ sazişinin müddətinin 6, 9, həmçinin də 1 ilədək uzadılması əsas müzakirə mövzusu olacaq.Qeyd edək ki, Azərbaycan Vyana sazişi çərçivəsində üzərinə düşən öhdəlikləri tam yerinə yetirib. Ölkə üzrə gündəlik neft hasilatının 834 min barrel həcmində saxlanmasına dair razılaşma müqabilində bu ilin 10 ayı ərzində ölkəmizdə orta sutkalıq neft hasilatı 785 min barrel təşkil edib.Xatırladaq ki, ötən il noyabrın 30-da OPEC üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb. Bu il mayın 25-də OPEC Nazirlər Şurasının 172-ci iclası çərçivəsində OPEC-ə üzv və qeyri-üzv dövlətlər arasında neft hasilatının azaldılmasına dair sazişin müddətinin 2018-ci ilin birinci rübünün sonunadək uzadılması barədə razılıq əldə olunmuşdu. Mövcud OPEC+ sazişinin müddəti gələn il martın 31-də sona çatır.xeber100.com  

Mərkəzi Bankda hərrac keçirilib

Noyabrın 30-da Mərkəzi Bankda Dövlət Neft Fondunun da iştirakı ilə hərrac keçirilib.Bankdan Azərtac-a bildiriblər ki, hərracda manatın ortaçəkili məzənnəsi 1,7001 səviyyəsində formalaşıb.xeber100.com

İqtisadiyyat nazirlərinin 7-ci iclası işə başlayıb

İstanbulda Türkdilli Dövlətlərin Əməkdaşlıq Şurasına (Türk Şurası) üzv ölkələrin iqtisadiyyat nazirlərinin 7-ci iclası işə başlayıb. Toplantıda Azərbaycanı iqtisadiyyat naziri Şahin Mustafayevin rəhbərlik etdiyi nümayəndə heyəti təmsil edir.Azərtac xəbər verir ki, Türkiyənin İqtisadiyyat Nazirliyinin ev sahibliyi ilə keçirilən iclasda Türk Şurasına üzv ölkələr arasında iqtisadi əlaqələrin daha da genişləndirilməsinə dair aktual məsələlər müzakirə edilir. Gündəliyə ticarət əlaqələrinin artırılması, ortaq sərmayə qoyuluşuna dair imkanların araşdırılması, birgə iqtisadi layihələrə dair təkliflər və s. məsələlər daxildir.İclasda Türk Şurasının baş katibi Ramil Həsənov, Azərbaycanın iqtisadiyyat naziri Şahin Mustafayev, Türkiyənin iqtisadiyyat naziri Nihat Zeybekci, Qazaxıstanın milli iqtisadiyyat nazirinin müavini Baurzhan Bekishev, Qırğızıstanın iqtisadiyyat nazirinin birinci müavini Daniyar İmanaliyev və Özbəkistanın iqtisadiyyat nazirinin birinci müavini Sanutalla Bekenov çıxış ediblər.Natiqlər türkdilli ölkələrin yerləşdikləri coğrafi ərazilərin geosiyasi əhəmiyyəti, bu yerlərin beynəlxalq yükdaşımada yeri və rolu, təbii zənginlik, fəaliyyət göstərən və həyata keçirilməkdə olan beynəlxalq iqtisadi layihələr, iqtisadi yüksəlişi dinamik həddə gətirmək üçün digər imkanlara dair fikir və mülahizələrini bölüşüblər.xeber100.com

“Brent” markalı neftin qiyməti ucuzlaşıb

Dünya birjalarında neftin qiyməti ucuzlaşmaqda davam edir.Azərtac xəbər verir ki, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,45 dollar ucuzlaşaraq 63,16 dollar, Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti isə 0,30 dollar azalaraq 57,69 dollar təşkil edib.xeber100.com

“Made in Azerbaijan” brendinin təşviqi məqsədilə

"Made in Azerbaijan" brendinin təşviqi məqsədilə İqtisadiyyat Nazirliyi tərəfindən növbəti ixrac missiyası dekabrın 3-7-də Birləşmiş Ərəb Əmirliyinin Dubay şəhərinə təşkil olunacaq.Nazirliyin mətbuat xidmətindən bildiriblər ki, ixrac missiyasında təmsil olunan meyvə-tərəvəz istehsalçıları dekabrın 5-7-də Dubayda keçiriləcək Yaxın Şərq ölkələrində ən iri meyvə-tərəvəz sərgisi olan "WOP Dubai"da da iştirak edəcəklər. Azərbaycan məhsullarının da nümayiş olunacağı sərgi çərçivəsində seminar və ikitərəfli görüşlər təşkil ediləcək.Dubay şəhərinə təşkil olunan ixrac missiyasına müsabiqə əsasında seçilmiş və Azərbaycanda meyvə şirələri, təbii mineral sular, meyvə-tərəvəz məhsulları, quru meyvə, konservləşdirilmiş məhsullar, ət və ət məhsulları, bal, çay, süd və süd məhsullarının istehsalı sahəsində fəaliyyət göstərən 20 şirkət daxildir.xeber100.com

İkinci İpək Yolu beynəlxalq konfransı başa çatıb

Gürcüstan paytaxtında keçirilən İkinci İpək Yolu beynəlxalq konfransı başa çatıb.Azərtac xəbər verir ki, panel iclaslarında davam edən müzakirələrdə Gürcüstanın Baş naziri Giorgi Kvirikaşvili iştirak edib.Konfransda böyük İpək Yolunun inkişafı, regional təhlükəsizlik, iqtisadi, enerji, infrastruktur layihələri, logistika, regional əməkdaşlıq məsələləri müzakirə olunub. Çıxışlarda Cənubi Qafqaz ölkələrinin, xüsusən Azərbaycanın, Türkiyənin və Gürcüstanın Avropanın enerji təhlükəsizliyindəki rolu xüsusi qeyd olunub. Eyni zamanda, hər üç ölkənin iştirakı ilə reallaşdırılan nəqliyyat layihələri, yaradılan nəqliyyat infrastrukturları, logistik mərkəzlərin əhəmiyyəti vurğulanıb. Bildirilib ki, iki gün davam edən müzakirələr zamanı Asiya ilə Avropanı birləşdirən nəqliyyat dəhlizlərinin inkişafı, yeni mərkəzlərin yaradılması və s. təkliflər olduqca əhəmiyyətlidir. İştirakçı ölkələr bu təkliflərin reallaşdırılması istiqamətində səmərəli iş aparmalıdırlar.Müzakirələr zamanı vurğulanıb ki, yeni layihələr həm də geniş investisiya imkanları açır. Beynəlxalq maliyyə qurumları, eləcə də ayrı-ayrı dövlətlər bundan səmərəli istifadə edəcəklər. Bu da xalqların və ölkələrin inkişafında mühüm rol oynayacaq.xeber100.com

“Recexpo III” sərgisi çərçivəsində

Noyabrın 29-da “Recexpo III” sərgisi çərçivəsində Əmlak Məsələləri Dövlət Komitəsi (ƏMDK) tərəfindən "Daşınnaz əmlak, özəlləşdirmə və investisiyalar" mövzusunda beynəlxalq konfrans keçirilir.Azərtac xəbər verir ki, Bakı Ekspo Mərkəzində təşkil olunan konfransda Almaniya, Yunanıstan, Türkiyə, Birləşmiş Ərəb Əmirlikləri (BƏƏ), Belarus, Birləşmiş Krallıq, Polşa, Macarıstan, Portuqaliya, İspaniya və digər ölkələrin dövlət qurumlarının, eləcə də xarici ölkələrin ölkəmizdəki səfirliklərinin, beynəlxalq təşkilatların 100-dən çox nümayəndəsi iştirak edir.Konfransın məqsədi daşınmaz əmlak idarəçiliyi və özəlləşdirmə, o cümlədən ölkəmizdə daşınmaz əmlak bazarının formalaşdırılması sahəsində xarici ölkələrin aidiyyəti dövlət, qeyri-hökumət və özəl qurumları ilə əlaqələrin qurulmasıdır. Eyni zamanda, beynəlxalq təşkilatlarla qarşılıqlı əməkdaşlığın inkişafı, habelə bu sahələrdə birgə fəaliyyət imkanları və beynəlxalq təcrübə haqqında geniş müzakirələrin aparılması da əsas vəzifələrdəndir. Həmçinin ölkəmizdəki özəlləşmə imkanlarının və perspektivlərinin nümayişi, yerli və xarici investor kütləsinin özəlləşmə prosesinə cəlb edilməsi də tədbirin məqsədlərindəndir.Əmlak Məsələləri Dövlət Komitəsinin sədri Kərəm Həsənov bildirib ki, Azərbaycanda əsası ümummilli lider Heydər Əliyev tərəfindən qoyulan iqtisadi siyasət hazırda Prezident İlham Əliyev tərəfindən uğurla davam etdirilir. Ölkə başçısının rəhbərliyi ilə aparılan iqtisadi islahatlar son nəticədə makroiqtisadi göstəricilərin, habelə ölkə iqtisadiyyatına daxil olan xarici investisiyaların artmasına səbəb olub. Bu məqsədlə genişmiqyaslı islahatlar həyata keçirilir. Nəticədə investorların hüquq və mənafelərinin qorunması, mülkiyyətin toxunulmazlığı, yerli və xarici sahibkarlara bərabər şəraitin yaradılması təmin edilib.xeber100.com