Azərbaycan ilə Belarus arasında ticarət dövriyyəsi 424,5 milyon ABŞ dolları olub

Bu ilin yanvar-fevral aylarında Azərbaycan ilə Belarus arasında ticarət dövriyyəsi 78 milyon dollara yaxın olub.Hesabat dövründə Azərbaycandan Belarusa ixracın dəyəri 62,8 milyon dollar, idxalın dəyəri isə 14,9 milyon dollar təşkil edib.Qeyd edək ki, ötən ilin yanvar-dekabr aylarında Azərbaycan ilə Belarus arasında ticarət dövriyyəsi 424,5 milyon ABŞ dolları olub.xeber100.com  

Xarici İşlər Nazirliyinin məlumatına görə…

Martın 21-də Azərbaycan Respublikasının xarici işlər nazirinin müavini Elnur Məmmədov İslamabadda keçiriləcək İslam Əməkdaşlıq Təşkilatının Xarici İşlər Nazirləri Şurasının 48-ci iclasında iştirak etmək üçün Pakistana səfəri çərçivəsində bu ölkənin müdafiə istehsalı naziri, Azərbaycan-Pakistan Hökumətlərarası Birgə Komissiyasının həmsədri xanım Zubeyda Cəlal ilə görüşüb.Xarici İşlər Nazirliyinin mətbuat xidmətinin məlumatına görə, Elnur Məmmədov bu ilin iyununda Azərbaycan və Pakistan arasında diplomatik əlaqələrin qurulmasının 30 illiyinin qeyd olunacağını və bu münasibətlə silsilə tədbirlərin keçiriləcəyini bildirib. Azərbaycan ilə Pakistanın səmimi münasibətlərindən bəhs edən nazir müavini əlaqələrimizin bütün istiqamətlər üzrə yüksələn xətlə inkişaf etməsində hər iki ölkə rəhbərliyinin rolunu xüsusi vurğulayıb. Ölkələrimiz arasında iqtisadi-ticari əlaqələrin daha da genişləndirilməsinin vacibliyi vurğulanıb. Bu istiqamətdə aparılan işlər, xüsusilə, Hökumətlərarası Birgə Komissiyanın fəaliyyəti, birgə işçi qruplarının iclasları və birbaşa uçuşların əhəmiyyəti diqqətə çatdırılıb.Pakistanın müdafiə istehsalı naziri, Azərbaycan-Pakistan Hökumətlərarası Birgə Komissiyasının həmsədri xanım Zubeyda Cəlal 2021-ci ildə keçirilmiş Hökumətlərarası Birgə Komissiyanın 7-ci iclası ilə bağlı Azərbaycana səfər etdiyini xatırlayıb, ölkəmizlə bağlı xoş təəssüratlarını bölüşüb. Azərbaycan – Pakistan arasındakı yüksək səviyyəli münasibətlərdən söz açan xanım Zubeyda Cəlal bütün sahələr üzrə əlaqələrimizin bundan sonra da genişləndiriləcəyinə əminliyini bildirib.Həmin gün Elnur Məmmədov İndoneziya xarici işlər nazirinin müavini Abdul Kadir Jailani ilə də görüşüb.Görüş zamanı Azərbaycan – İndoneziya münasibətlərindən söz açan Elnur Məmmədov 44 günlük Vətən müharibəsi zamanı ölkəmizin haqlı mövqeyini dəstəklədiyinə görə İndoneziya Hökumətinə təşəkkürünü ifadə edib. O, ikitərəfli münasibətlərin bütün sahələr üzrə daha da inkişafının, eləcə də beynəlxalq təşkilatlar çərçivəsində əməkdaşlığın genişləndirilməsinin vacibliyini diqqətə çatdırıb.xebver100.com  

“Azərsu” ASC gücləndirilmiş iş rejimində fəaliyyət göstərəcək

Novruz bayramı ilə əlaqədar qeyri-iş günlərində “Azərsu” ASC gücləndirilmiş iş rejimində fəaliyyət göstərəcək.ASC-dənbildirilib ki, bayram günlərində mərkəzi idarə aparatında, regional, yerli sukanal idarələri və sahələrində 24 saatlıq növbətçilik təmin olunacaq. Bu məqsədlə “Azərsu” ASC-nin sədr müavinləri, departament və şöbə rəisləri səviyyəsində növbətçilik cədvəli təsdiq edilib.Abonentlərin diqqətinə çatdırılır ki, bayram və qeyri-iş günlərində əhalinin içməli su ilə təchizatında dayanıqlılığın təmin olunması məqsədilə bütün təşkilatı və texniki tədbirlər görüləcək, qəza xidmətləri fasiləsiz fəaliyyət göstərəcək. Bayram günlərində hidrotexniki qurğularda, anbarlarda və magistral xətlərdə hər hansı planlı təmir-bərpa, qoşulma və profilaktik işlər aparılmayacaq.İstehlakçılardan xahiş olunur ki, içməli su təchizatı və kanalizasiya xidmətlərində yaranacaq problemlərlə əlaqədar “Azərsu” ASC-nin “955” Zəng Mərkəzinə müraciət etsinlər.xeber100.com

Əmlak Məsələləri Dövlət Xidmətinin məlumatına görə…

Cari ilin fevral ayında qeydiyyata alınan ipoteka müqaviləsinin sayı ötən ilin eyni dövrü ilə müqayisədə 32,6 faiz artaraq 4723 olub.Əmlak Məsələləri Dövlət Xidmətindən Azərtac-a bildirilib ki, fevral ayı ərzində 20 min 948 daşınmaz əmlakın texniki inventarlaşdırılması aparılıb və texniki pasportu tərtib edilib. Bu isə ötən ilin eyni dövrü ilə müqayisədə 7,8 faiz çoxdur.xeber100.com

“Bakı Metropoliteni”: Bayram tədbirləri martın 19-u və 20-si keçiriləcək

“Bakı Metropoliteni” QSC ənənəsinə sadiq qalaraq, bu il də bahar təravətli Novruz bayramı ilə bağlı rəngarəng tədbirləri ilə sərnişinlərə xoş ovqat bəxş edəcək.“Bakı Metropoliteni” QSC-dən Azərtac-a bildirilib ki, bayram tədbirləri martın 19-u və 20-si keçiriləcək. İki gün ərzində “İçərişəhər” (10:30-12:30), “Sahil” (11:30-13:00), “28 May” (12:30-14:00), “Elmlər Akademiyası” (13:30-15:00) stansiyalarında konsert proqramları təşkil olunacaq.Qeyd edilən stansiyaların vestibüllərində peşəkar musiqiçilərdən ibarət simli kvartetin və daha sonra milli muğam üçlüyünün canlı ifasında Azərbaycan və dünya musiqi sənətinin inciləri, bayram ovqatına uyğun musiqi parçaları səsləndiriləcək.Azyaşlı sərnişinlər üçün kitabların müəllifi kimi də tanınan məşhur mədəniyyət siması Bəhram Bağırzadə “İçərişəhər” stansiyasında iki gün ərzində qələmə aldığı bayram ovqatı ilə səsləşən yeni nəşrlərini öz imzası ilə təqdim edəcək.Bu iki gün ərzində Novruz personajlarının iştirakı ilə teatrallaşdırılmış səhnələr də nümayiş olunacaq. Bayramın əsatir qəhrəmanları Keçəl və Kosa Bahar qızının müşayiəti ilə sərnişinlərə unudulmaz əyləncəli anlar bəxş edəcəklər. Bayram tədbirində sehrbaz və sirk ustaları, eləcə də nəhəng personajlar sərnişinlərə xoş dəqiqələr yaşadacaq. Balaca sərnişinlərə Novruz hədiyyələri də təqdim olunacaq.Bayram günlərinin davam etdiyi martın 19-22-də “İçərişəhər” stansiyasının birinci baş yolunda sərnişinlər muzey eksponatı kimi nümayiş etdiriləcək retro vaqonlara tamaşa edə, salonlarda xatirə şəkilləri çəkdirə biləcəklər.

TANAP boru kəməri ilə ümumilikdə 16,2 milyard kubmetr qazın nəqli planlaşdırılır

Cari ilin sonunadək TANAP boru kəməri ilə ümumilikdə 16,2 milyard kubmetr qazın nəqli planlaşdırılır.SOCAR-dan Azərtac-a bildirilib ki, bu da ötən illə müqayisədə 18 faiz artım deməkdir.Xatırladaq ki, TANAP boru kəməri ilə 2021-ci ildə Türkiyə və Avropaya ümumilikdə 13,73 milyard kubmetr Azərbaycan qazı nəql olunub.xeber100.com

“Azeri Light” markalı neftin bir barelinin qiyməti 9,93 dollar artıb

Azərbaycan neftinin qiyməti bahalaşıb.“Azeri Light” markalı neftin bir barelinin qiyməti 9,93 dollar artaraq 128,71 dollar olub.Xatırladaq ki, Azərbaycan neftinin bir barelinin bu il ərzində maksimum qiyməti martın 5-də (118,78) qeydə alınmışdı.xeber100.com

Rusiyanın “Ural Airlines” şirkəti Azərbaycana uçuşları dayandırır

Rusiyanın “Ural Airlines” şirkəti Azərbaycana uçuşları dayandırır.Şirkət martın 26-dək Azərbaycan, BƏƏ, Ermənistan və İsrailə uçuşları dayandırır. Bu barədə aviaşirkətin mətbuat xidməti məlumat verib.Məlumatda deyilir ki, yaranmış geosiyasi vəziyyətlə əlaqədar “Ural Airlines” şirkəti martın 5-dən 26-dək Azərbaycana uçuşları dayandırır. BƏƏ, İsrail və Ermənistana uçuşlar martın 4-dən 26-dək həyata keçirilməyəcək.xeber100.com

“Buta Airways” aviaşirkəti Bakı-Həştərxan-Bakı reysini ləğv edib

“Buta Airways” aviaşirkəti Rusiyanın cənubunda hava məkanından istifadədə müvəqqəti rejimin yaradılması ilə əlaqədar martın 3-ü cümə axşamına planlaşdırılan Bakı-Həştərxan-Bakı reysini ləğv edib.Aviaşirkətdən Azərtac-a bildirilib ki, mövcud vəziyyətlə əlaqədar olaraq ləğv edilmiş reysin sərnişinləri biletləri digər tarixlərə dəyişdirə və ya cərimələr tətbiq edilmədən geri qaytara bilərlər.Bütün sərnişinlərdən ən son uçuş məlumatlarını aviaşirkətin rəsmi sosial şəbəkə səhifələrində izləmələri xahiş edilir.xeber100.com

“Light” markalı neftin bir barelinin qiyməti 4,85 dollar artıb

Dünyada baş verən hadisələr fonunda birjalarda neft qiymətləri bahalaşıb.Londonun ICE (“InterContinental Exchange Futures”) birjasında “Brent” markalı neftin bir barelinin qiyməti 4,88 dollar artaraq 109,85 dollar, Nyu-Yorkun NYMEX (“New York Mercantile Exchange”) birjasında “Light” markalı neftin bir barelinin qiyməti isə 4,85 dollar artaraq 108,26 dollar olub.xeber100.com