Səyahət Festivalı başlayıb

“Qatar Airways”in məşhur Səyahət Festivalı başlayıb. Artıq səyahətçilər müxtəlif istiqamətlərə xüsusi qiymətlərdən faydalanacaqlar. “Qatar Airways”in Bakı nümayəndəliyindən Azərtac-a bildirilib ki, avqustun 29-dan sentyabrın 5-dək davam edəcək Qatar Airways Səyahət Festivalı 2 al 1 ödə, 50 faizə qədər endirim, uşaqlar üçün pulsuz səyahət imkanı kimi təkliflərlə bu il sentyabrın 15-dən 2017-ci ilin iyunun 30-dək səyahət imkanı verəcək. Festival həmçinin otellərdə xüsusi təkliflər, avtomobil icarəsinə endirim və s. kimi üstünlüklərlə də səyahətçiləri sevindirəcək. Müştərilər Bakıdan Amerikaya 632 manatdan, Hindistan Subkontinentinə 777 manatdan, Afrikaya 1042 manatdan və Yaxın Şərqə 350 manatdan başlayaraq səyahət edə biləcəklər. Qatar Airways Privilege Club üzləri Səyahət Festivalı zamanı edilən bronlar üçün üçqat Qmiles qazanacaqlar.xeber100.com

Əmanətlərin Sığortalanması Fondunun məlumatına görə…

Əmanətlərin Sığortalanması Fondu tərəfindən "Parabank" ASC-nin qorunan əmanətçilərinə 20 milyon 854 min manat, "Zaminbank" ASC-nin əmanətçilərinə 36 milyon 980 min manat, "Kredobank" ASC-nin əmanətçilərinə 11 milyon 483 min manat, "Dekabank" ASC-nin əmanətçilərinə isə 2 milyon 477 min manatdan artıq kompensasiya ödənilib. Əmanətlərin Sığortalanması Fondundan Azərtac-a bildiriblər ki, 4 bank üzrə ödənilən kompensasiyanın ümumi məbləği 71 milyon 794 min manatdan artıqdır. Eyni zamanda, "Atrabank" ASC-nin və “Qafqaz İnkişaf Bankı" ASC-nin qorunan əmanətçilərinə 5 milyon 826 min manatdan artıq kompensasiya ödənilib ki, bunun 4 milyon 894 min manatı "Atrabank"ın, 932 min manatı "Qafqaz İnkişaf Bankı"nın payına düşür. "Bank of Azerbaijan" ASC-nin qorunan əmanətçilərinə 24 milyon 052 min, "Gəncəbank" ASC-nin əmanətçilərinə 895 min 554 min manat, "Texnikabank" ASC-nin əmanətçilərinə isə 119 milyon 534 min manatdan artıq kompensasiya ödənilib. Üç bank üzrə ödənilən kompensasiyanın ümumi məbləği 144 milyon 481 min manatdan çoxdur. Ümumilikdə Əmanətlərin Sığortalanması Fondu tərəfindən 9 bank üzrə 222 milyon 101 min manatdan artıq kompensasiya ödənişi həyata keçirilib.xeber100.com

Onlayn-yenilənmə sistemi tətbiq edilib

"Bank VTB (Azərbaycan)" kart balansının onlayn-yenilənmə sistemini tətbiq edib. Bankdan Azərtac-a bildiriblər ki, yenilik sayəsində kart hesabı üzrə həyata keçirilən bütün əməliyyatlar kartın balansında dərhal əks olunacaq. Bu texnologiyanın tətbiqindən əvvəl kart hesabının yenilənməsi üçün bir neçə saat vaxt tələb olunurdu. Onlayn-yenilənmə sistemi mədaxil zamanı gözləmə müddətini minimuma endirib. İndi bank kartlarına pul köçürüldükdə əməliyyat ani həyata keçir və nəticədə bir neçə dəqiqədən sonra kart sahibi daxil olan vəsaitlərdən istifadə etmək imkanı qazanır. Ani yenilənmə sxeminin tətbiqi "Bank VTB (Azərbaycan)"ın plastik kartlar biznesinin inkişaf etdirilməsi istiqamətində növbəti yeniliyidir. Bank müştərilərini müasir və effektiv məhsullarla təmin etmək məqsədilə qabaqcıl texnologiyaların tətbiqi siyasətini gələcəkdə də davam etdirmək niyyətindədir.xeber100.com

“Rabitəbank” pulköçürmə sistemini tətbiq edib

“Rabitəbank” ASC “Barat” daxili pulköçürmə sistemini tətbiq edib. Bankdan AZƏRTAC-a verilən məlumata görə, istənilən şəxs “Rabitəbank” ASC–nin “Barat” daxili pul köçürmələrini eManat terminallarının geniş şəbəkəsi vasitəsilə bir neçə dəqiqə ərzində həyata keçirə bilər. Ölkə daxilində pul köçürmək üçün artıq banka gəlib hesab açmağa ehtiyac qalmadı. Çünki “Rabitəbank” əhalinin rahatlığını təmin etmək məqsədilə ölkə daxilində 24 saat istәnilәn eManat terminalları vasitəsilə pul vəsaitlərini təcili köçürmək imkanı verir. İstənilən fiziki şəxs eManat terminalından manat valyutası ilә Bakı və ölkə üzrə 14 şəhərə pul köçürmәsini həyata keçirə bilər.xeber100.com

Bakıya birbaşa aviareys açılacaq

Rusiyanın “Pobeda” aviaşirkətinə Rostov-Dondan Bakıya birbaşa aviareys açmağa icazə verilib. Bu barədə Rusiya Federal Hava Nəqliyyatı Agentliyi məlumat yayıb. Qeyd edək ki, Rostov-Don-Bakı istiqamətində aviareyslərin həftədə 4 dəfə həyata keçirilməsi mümkündür.xeber100.com

Sahibkarlar üçün maarifləndirmə tədbirləri təşkil ediləcək

İqtisadiyyat Nazirliyi Azərbaycanda fəaliyyət göstərən sənaye parkları və məhəllələrinin idarəedici təşkilatı və orada fəaliyyət göstərən sahibkarlar üçün təlimlər və digər maarifləndirmə tədbirləri təşkil edəcək. İqtisadiyyat Nazirliyinin mətbuat xidmətindən Azərtac-a bildiriblər ki, sentyabr ayında başlayacaq təlimlər nazirliyin müvafiq şöbələrinin və Bakı Biznes Tədris Mərkəzinin əməkdaşları tərəfindən keçiriləcək. Təlimlərdə sənaye parklarının və məhəllələrinin idarəedici təşkilatları və sahibkarlar özəl bölmənin inkişafına göstərilən dövlət dəstəyi tədbirləri, investisiya təşviqi mexanizminin tətbiqi qaydaları, lisenziyalaşdırma sahəsində həyata keçirilmiş islahatlar, sahibkarlara elektron xidmətlərin göstərilməsi, insan resurslarının idarə olunması və digər mövzularda məlumatlandırılacaq. Qeyri-neft sənayesinin davamlı inkişafında, regionlarda sahibkarlıq fəaliyyətinin genişləndirilməsində, xüsusilə kiçik və orta sahibkarlığın inkişafında, məşğulluqda sənayenin xüsusi çəkisinin artırılmasında sənaye parkları və məhəllələri xüsusi rol oynayır. Artıq Sumqayıt Kimya Sənaye Parkı, Balaxanı Sənaye Parkı və Qaradağ Sənaye Parkı fəaliyyət göstərir, Neftçala Sənaye Məhəlləsində istehsal sahələrində avadanlıqların yerləşdirilməsi və digər hazırlıq işləri aparılır. Mingəçevir Sənaye Parkının və Masallı Sənaye Məhəlləsinin təşkili istiqamətində tədbirlər davam etdirilir. Sənaye parklarının və məhəllələrinin rezidentlərinin sayı da gündən-günə artır.xeber100.com

Şərabçılar Assosiasiyası yaradılır

Azərbaycanda  Azərbaycanda İxracın və İnvestisiyaların Təşviqi Fondundan (AZPROMO) azərtac-a bildiriblər ki, qurumun şərab istehsalı və satışı ilə məşğul olan yerli şirkətlərin nümayəndələri ilə görüşündə ölkəmizdə Şərabçılar Assosiasiyasının yaradılması qərara alınıb. Görüşdə, həmçinin Azərbaycan istehsalı olan şərabın ixracının təşviqi üçün görülən işlər, eləcə də şərab istehsalı və satışı ilə məşğul olan şirkətlərin bu sahədə təklifləri müzakirə olunub.xeber100.com

Nizamnamə kapitalının artırılması məsələsi müzakirə olunub

“Muğanbank” ASC-nin səhmdarların ümumi yığıncağında bankın nizamnamə kapitalının artırılması məsələsi müzakirə olunub. Bankdan Azərtac-a bildiriblər ki, yetkin qərarla nizamnamə kapitalının 10 milyon manat artırılmasına qərar verilib.xeber100.com

Rabitə və Yüksək Texnologiyalar Nazirliyinin məlumatına əsasən…

Rabitə və Yüksək Texnologiyalar Nazirliyinin telekommunikasiya sahəsində apardığı islahatların nəticəsi olaraq, Bakı Telefon Rabitəsi İstehsalat Birliyi (BTRİB) cari il sentyabrın 1-dən etibarən internet və İPTV xidmətləri üzrə “öncədən ödəmə” sisteminin tətbiqinə başlayır. Nazirlikdən Azərtac-a bildirilib ki, bundan sonra, BTRİB-in təqdim etdiyi internet və İPTV xidmətlərdən istifadə edən abunəçilərin debitor borcu yaranmayacaq. Belə ki, əvvəllər istifadəçilər göstərilən xidmətlərə görə sonradan ödəniş etdiyi üçün debitor borcu yaranırdı. Bəzi hallarda xidmətlərdən istifadə edən abunəçilər xidmət haqqını ödəməkdən yayınırdılar. Nəticədə abunəçiyə göstərilən xidmət dayandırılırdı. İndi isə, “öncədən ödəmə” sisteminin tətbiqi ilə abunəçi müvafiq qaydada öncədən ödədiyi məbləğə uyğun xidmət alacaq və göstərilən xidmətdə fasilə yaranmayacaq. Bu da müxtəlif səbəblərdən ünvanı tərk edən və ya xidmət haqqını ödəyə bilməyən istifadəçilərin borclanması kimi problemləri aradan qaldıracaq. Qeyd edək ki, Bakı Telefon Rabitəsi İstehsalat Birliyinin təqdim etdiyi telefon və internet xidmətləri üzrə aylıq abunə haqları üzrə onlayn və ödəmə terminalları vasitəsilə ödəniş etmək mümkündür.xeber100.com

“DəmirBank” aksiya keçirir

“DəmirBank” KFC restoranlar şəbəkəsi ilə birlikdə aksiya həyata keçirir. Bankdan Azərtac-a bildiriblər ki, “DəmirBank”ın istənilən plastik kartları ilə KFC restoranlarında ödəniş etdikdə "kiçik fri kartof" hədiyyə qazanmaq mümkündür. Aksiya 6 KFC restoranında keçərlidir – 28 May, 28 Mall, İnşaatçılar, Park Bulvar, Həzi Aslanov, Fəvvarələr meydanı. “DəmirBank”ın plastik kartları ilə Azərbaycanda, eləcə də dünyanın 200-dək ölkəsində ticarət və xidmət müəssisələrində məhsul və xidmətlərin qiymətinin heç bir komissiya tutulmadan nağdsız ödənişini həyata keçirmək mümkündür. Müştəri istədiyi zaman ATM və bank filialları vasitəsilə kartdan vəsaiti nağd şəklində çıxara, eyni zamanda müxtəlif onlayn ödənişlərini həyata keçirə bilər.xeber100.com