İnzibati Xətalar Məcəlləsində dəyişikliklər…

Azərbaycanda ilk dəfə yalançı sahibkarlıqla məşğul olanlar inzibati xəta nəticəsində vurulmuş ziyanı tamamilə ödədikdə, yaxud inzibati xəta nəticəsində əldə etdiyi gəliri tamamilə dövlət büdcəsinə köçürdükdə, inzibati məsuliyyətdən azad olunacaq. Apa-nın məlumatına görə, bu, bu gün Milli Məclisdə qəbul edilən İnzibati Xətalar Məcəlləsinə dəyişikliklərdə əksini tapıb. Qeyd edək ki, İnzibati Xətalar Məcəlləsində yalançı sahibkarlıq, yəni kredit almaq, rüsumlardan azad olmaq və ya digər əmlak mənfəəti əldə etmək, yaxud qadağan edilmiş fəaliyyəti gizlətmək məqsədi ilə sahibkarlıq fəaliyyəti həyata keçirmək niyyəti olmadan müəssisə və digər hüquqi şəxsin yaradılmasına görə inzibati xəta nəticəsində vurulmuş ziyanın (əldə edilmiş gəlirin) iki mislindən dörd mislinədək cərimə nəzərdə tutulub. Məcəlləyə əlavə edilən müddəa isə ilk dəfə bu inzibati xətalara yol verənlərə ziyanı tamamilə ödədikdə, yaxud əldə etdiyi gəliri büdcəyə köçürdükdə güzəşti nəzərdə tutur.xeber100.com  

Şirvan şəhərində keçirilmiş pilot layihə başa çatdırılıb

Azərbaycan prezidentinin paytaxt və iri şəhərlərin şəhərsalma kadastrının hazırlanması ilə bağlı müvafiq göstərişinə uyğun olaraq Şirvan şəhərində keçirilmiş pilot layihə başa çatdırılıb. Dövlət Şəhərsalma və Arxitektura Komitəsindən “Apa-Economics”ə verilən məlumata görə, Şirvan şəhərinin şəhərsalma kadastrını komitənin keçirdiyi tenderin qalibi olmuş Litvanın “Hnit Baltic” şirkəti və onun ölkəmizdəki tərəfdaşı “İntegris” MMC aparıb. Dövlət Şəhərsalma və Arxitektura Komitəsi sədrinin müavini Dövlətxan Dövlətxanov layihə barədə ətraflı məlumat verib, gələcəkdə şəhərsalma kadastrı məlumatlarından istifadə perspektivlərindən bəhs edib. Bunun ölkəmizdə şəhərsalma kadastrının yaradılması sahəsində ilk belə layihə olduğunu diqqətə çatdıran D.Dövlətxanov Şirvan şəhərinin pilot layihə ərazisi kimi təsadüfi seçilmədiyini qeyd edib. Şirvan Azərbaycanın əhali sayına görə 5-ci şəhəridir. Bura ölkəmizin mühüm iqtisadi mərkəzlərindən sayılır. Ona görə də pilot layihə ərazisi kimi ilk məhz bu şəhər seçilib. Şirvanın şəhərsalma kadastrının hazırlanması üzrə işlər bir neçə il çəkib. Bu pilot layihə əsasında növbəti belə tədbirlər üçün də lazımi təcrübə toplanıb. Qeyd edək ki, növbəti illərdə  Sumqayıt, Gəncə və Mingəçevir şəhərlərinin də elektron şəhərsalma kadastrının hazırlanması nəzərdə tutulur. Layihə rəhbəri Raivaras Klypsas də şəhərsalma kadastrının müasir tələblərə uyğun olduğunu bildirib. Onun sözlərinə görə, layihənin icrasında kartoqrafiya, coğrafiya kadastr, coğrafi informasiya sistemləri və informasiya texnologiyaları sahəsində 80-dən artıq yüksək ixtisaslı işçi heyəti iştirak edib. Burada əsas diqqət Avropa modellərinə yönəlib. Şəhərsalma kadastrı güclü informasiya sistemlərinə tam inteqrasiya edilərək tam avtomatlaşdırılıb. “İntegris” MMC-nin direktoru Ceyhun Zeynalov isə bildirib ki? layihənin hazırlanmasında 3 əsas prinsip qarşıya qoyulub: coğrafi informasiya sistemi əsasında Şirvan şəhərinin baş planının hazırlanması, şəhər ərazisinin zonalaşdırma sxeminin tərtibi və şəhərin baş planı əsasında müəyyən edilmiş 50 hektar ərazinin müfəssəl planının hazırlanması.xeber100.com  

334 nəfərin ölkədən kənara çıxmasına qadağa qoyulub

Ölkədən getmək hüququnun məhdudlaşdırılması yalnız fiziki şəxslərə şamil olunurdusa, Vergi Məcəlləsinə edilən dəyişikliklərə əsasən yanvarın 1-dən etibarən hüquqi şəxslərin icra qurumlarının rəhbərlərinə də bu qadağalar şamil edilib.Azərtac Vergilər.az saytına istinadla bildirir ki, ölkə qanunvericiliyi vergi borcunu tam ödəməyənə kimi belə şəxslərin ölkədən kənara çıxmasına icazə vermir. Məlumata görə, vergi öhdəliklərini yerinə yetirməyən və vergi borcuna görə ölkədən çıxışına qadağa qoyulan vergi ödəyiciləri az deyil. Vergilər Nazirliyinin rəsmi internet səhifəsində vergi borcuna görə ölkədən getmək hüququ müvəqqəti məhdudlaşdırılmış vergi ödəyicilərinin siyahısına əsasən, ölkədən getmək hüququ məhdudlaşdırılmış fiziki şəxslərin sayı 219, hüquqi şəxslərin icra orqanlarının rəhbərləri isə 115 nəfərdir. Bu rəqəmlər borcun ödənilib-ödənilməməsinə uyğun olaraq mütəmadi dəyişir.xeber100.com    

Avtokredit üzrə yeni “Yay Kampaniyası” başlayır

"Bank Respublika" avtokredit üzrə "Yay Kampaniyası"na başlayır. Bankdan Azərtac-a bildiriblər ki, iyunun 30-dək davam edən kampaniya müştərilərə may və iyun aylarında aldıqları avtomobilin kredit ödənişinə payızda başlamaq imkanı yaradacaq. Kampaniya müddətində "Mazda", "Honda", "Subaru" və "Mitsubishi" modellərini manatla kreditə alan müştərilərə ilk 3 aylıq ödəniş hədiyyə edilir. Avtomobillər ilkin ödənişi 50 faiz olmaqla 2 illik kredit şərtləri ilə təklif olunur. Nağd ödəniş etmək istəyənlər isə kampaniya çərçivəsində xüsusi qiymətlərdən faydalana biləcəklər.xeber100.com

Gömrük rəsmiləşdirilməsi elektron qaydada aparılacaq

Bu gündən etibarən gömrük rəsmiləşdirilməsi elektron bəyanetmə sistemi vasitəsilə həyata keçirilir. Dövlət Gömrük Komitəsindən “APA-Economics”ə verilən məlumata görə, komitə sahibkarların nəzərinə çatdırır ki, gömrük sərhədindən keçirilən malların və nəqliyyat vasitələrinin gömrük orqanlarına bəyan edilməsi ilə bağlı prosedurların sadələşdirilməsi, gömrük xidmətlərinin göstərilməsində şəffaflığın təmin edilməsi, sahibkarlar üçün əlverişli biznes mühitinin yaradılması və xarici ticarət əməliyyatlarının daha da stimullaşdırılması məqsədilə malların və nəqliyyat vasitələrinin gömrük rəsmiləşdirilməsi bu gündən etibarən elektron bəyanetmə sistemi vasitəsilə həyata keçirilir. Xüsusilə diqqətə çatdırılır ki, bəyannaməçi təqdim etdiyi sənədlərin və təqdim olunmuş sənədlər əsasında gömrük bəyannaməsinin düzgün tərtib olunmasına görə gömrük qanunvericiliyinə əsasən birbaşa məsuliyyət daşıyır. Elektron bəyannamə “Elektron imza” ilə imzalanıb gömrük orqanına göndərilərək gömrük orqanları tərəfindən qəbul edilməsi təsdiq olunduqdan sonra hüquqi əhəmiyyətə malik sənəd sayılır və həmin bəyannamələrdə hər hansı bir məlumatın dəyişdirilməsi yolverilməzdir. Bu səbəbdən təqdim edilmiş bəyannamədə buraxılmış hər hansı bir səhv gömrük orqanları tərəfindən ciddi tədqiq olunaraq, gömrük işi sahəsində hüquqpozma faktının müəyyən edilməsi məqsədilə xüsusi araşdırmalara göndəriləcək.  

Rus turistlərinin ən çox səyahət etdiyi şəhərlərin reytinqi açıqlanıb

Rus turistlərinin cari ilin may ayının əvvəlində ən çox səyahət etdiyi şəhərlərin reytinqi açıqlanıb. travel.ru saytı xəbər verir ki, reytinq 30 aprel - 4 may tarixlərində otel və hostellərdə bronlaşdırmaya əsaslanıb. Sayt yazır ki, rus turistlər Bakıda 1 sutka ərzində orta hesabla 3 min rubl və ya 68 manat xərcləyiblər. Müqayisə üçün qeyd edək ki, qonşu ölkənin turistləri 1 sutka ərzində  Belarus və Polşada 2 min rubl və ya 45 manat, Sinqapur və Londonda isə 10 min rubl və ya 227 manat xərcə düşüblər. Ümumiyyətlə, rus turistlərinin qeyd edilən vaxt kəsiyində ən çox axın etdiyi şəhərlərin ilk onluğu bu cürdür: Minsk, Riqa, Praqa, Tallin, Bakı, Vilnüs, Tbilisi, Roma, Helsinki, və Belqrad.xeber100.com

Dünya birjalarında neftin qiyməti ucuzlaşmaqda davam edir

Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,67 dollar ucuzlaşaraq 44,92 dollar, Londonun İCE (“İnterContinental Exchange Futures”) birjasında “Brent” markalı neftin bir barrelinin qiyməti 0,99 dollar azalaraq 46,07 dollar olub. Azərtac xəbər verir ki, “AzəriLayt” markalı neftin bir barrelinin qiyməti isə ötən həftənin sonunda 47,94 dollar təşkil edib.xeber100.com  

“WSIS -2016” – İnformasiya Cəmiyyəti üzrə Ümumdünya Sammiti işə başlayıb

Cenevrədə “WSIS -2016” - İnformasiya Cəmiyyəti üzrə Ümumdünya Sammiti (World Summit on the Information Society) işə başlayıb. Tədbirin təşkilatçıları qismində BMT-nin bir sıra təsisatları, o cümlədən Beynəlxalq Telekommunikasiya İttifaqı (BTİ), Ticarət və İnkişaf üzrə Konfransı (UNCTAD), İnkişaf Proqramı (UNDP), Təhsil, Elm və Mədəniyyət Təşkilatı (UNESCO) çıxış edir. Rabitə və Yüksək Texnologiyalar Nazirliyindən Azərtac-a bildirilib ki, informasiya-kommunikasiya texnologiyaları sahəsində dünyanın ən böyük illik yığıncağı olan “WSIS -2016”da Azərbaycan nümayəndə heyəti də iştirak edir. Sammit çərçivəsində keçirilən yüksək səviyyəli görüşdə - Nazirlər Toplantısında Azərbaycan nümayəndə heyətinin çıxışı, həmçinin ikitərəfli görüşlərinin keçirilməsi nəzərdə tutulur.xeber100.com  

KATV1 müəyyən üstünlüklər verən kampaniyalara start verib

KATV1 əhalinin fiber-optik şəbəkələrlə təqdim olunan yüksək sürətli genişzolaqlı internetə keçməsi üçün müvafiq stimullaşdırma proqramını təqdim edib. Şirkətdən Azərtaca bildirilib ki, əhalinin “fiber”ə (fiber-optik şəbəkələr) keçirilməsi Azərbaycanda internet-infrastrukturu sahəsində həyata keçirilən dövlət siyasətinin tərkib hissəsidir. “Fiber”ə keçid nəticəsində istifadəçilər ADSL-dən daha keyfiyyətli internet əldə edəcəklər. Stimullaşdırma proqramı çərçivəsində KATV1 “optika”ya keçmək istəyən istifadəçilər üçün müəyyən üstünlüklər verən kampaniyalara start verib. Beləliklə, “optika”ya keçid zamanı müvafiq internet-paketinə görə iki aylıq ödəniş edən bütün istifadəçilər pulsuz wi-fi-modem əldə edəcək və ya hər bir yeni istifadəçi seçdiyi paket üzrə bir aylıq pulsuz internet əldə edəcək. Kampaniya avqustun 31-dək davam edəcək.xeber100.com  

6 nömrəli stasionar dəniz özülü istismara verilib

Mayın 2-də SOCAR-ın "Bulla-dəniz" yatağındakı 6 nömrəli stasionar dəniz özülü istismara verilib. Azərtac xəbər verir ki, özülün istifadəyə verilməsi mərasimində SOCAR-ın prezidenti Rövnəq Abdullayev və şirkətin rəhbərliyinin nümayəndələri iştirak ediblər. R.Abdullayev əvvəlcə özüldə çalışan neftçilərlə görüşüb, onları bu əlamətdar hadisə münasibətilə təbrik edib və uğurlar arzulayıb. Özülə baxış keçirən SOCAR-ın prezidentinə məlumat verilib ki, şirkətin daxili imkanları ilə 2014-cü ildən inşasına başlanılan özülün layihəsi "Neftqazelmitədqiqatlayihə" İnstitutu tərəfindən verilib, istismara hazır vəziyyətdə olan birinci buraxılış kompleksi üzrə tikinti işləri "Neftqaztikinti" Tresti tərəfindən həyata keçirilib. Bir ədəd axtarış və 3 ədəd istismar quyusunun qazılması üçün nəzərdə tutulan özül dənizin 19-20 metr dərinliyində quraşdırılıb. Dəniz səviyyəsindən özülün döşəməsinədək olan məsafə isə 11 metrdir. Bildirilib ki, özüldə bir ədəd helikopter, 10 gəmi yanalma və 4 minik-düşmə meydançası quraşdırılıb. İşçi personalın rahat və təhlükəsiz çalışması üçün 88 nəfərlik vaqon tipli yaşayış evi və digər zəruri evciklər inşa edilib. Özül yükqaldırma qabiliyyəti 4-28 ton olan 3 stasionar qaldırıcı kran, 3 ədəd 42 nəfərlik xilasedici qayıq və 9 ədəd 10 nəfərlik xilasedici sal ilə təchiz edilib. Qeyd olunub ki, özüldə 5900-6300 metr dərinliyə qazılacaq quyularım hər birindən sutkada 150 ton kondensat və 500 min kubmetr qaz hasil edilməsi nəzərdə tutulur. Özüldə qazma işləri ilə istismarın eyni zamanda aparılması planlaşdırılır. İstismar işləri N.Nərimanov adına neft və qazçıxarma idarəsi (NQÇİ) tərəfindən həyata keçiriləcək. İnşaat işlərinin müasir texnika və texnologiyalardan istifadə edilərək beynəlxalq standartların tələblərinə uyğun təhlükəsiz və keyfiyyətlə həyata keçirildiyini deyən SOCAR-ın prezidenti R.Abdullayev görülən işlərdən razı qaldığını bildirib, özüldə qazılacaq ilk axtarış quyusunda qazma dəzgahını işə salıb. "Bulla-dəniz" yatağında hasilatın stabil saxlanılması və artırılması baxımından yeni özülün əhəmiyyətini vurğulayan R.Abdullayev obyektin vaxtında və keyfiyyətlə istismara buraxılmasını yüksək qiymətləndirib. Qeyd edib ki, ölkənin neft-qaz təsərrüfatının yaxşılaşdırılması, durmadan artan hasilat və nəql infrastrukturunun genişləndirilməsi sahəsində həyata keçirilən tədbirlər bundan sonra da davam etdiriləcək. Bildirilib ki, layihə dərinliyi 5900 metr olan 78 nömrəli şaquli quyu məhsuldar qatın VIII horizontunun neft-qazlılığını öyrənmək, sahənin tektonikasını və litoloji-stratiqrafik kəsilişini dəqiqləşdirmək məqsədilə SOCAR-AQŞ birgə müəssisəsi tərəfindən qazılacaq.xeber100.com