Bakıya birbaşa aviareys açılacaq

Rusiyanın “Pobeda” aviaşirkətinə Rostov-Dondan Bakıya birbaşa aviareys açmağa icazə verilib. Bu barədə Rusiya Federal Hava Nəqliyyatı Agentliyi məlumat yayıb. Qeyd edək ki, Rostov-Don-Bakı istiqamətində aviareyslərin həftədə 4 dəfə həyata keçirilməsi mümkündür.xeber100.com

Sahibkarlar üçün maarifləndirmə tədbirləri təşkil ediləcək

İqtisadiyyat Nazirliyi Azərbaycanda fəaliyyət göstərən sənaye parkları və məhəllələrinin idarəedici təşkilatı və orada fəaliyyət göstərən sahibkarlar üçün təlimlər və digər maarifləndirmə tədbirləri təşkil edəcək. İqtisadiyyat Nazirliyinin mətbuat xidmətindən Azərtac-a bildiriblər ki, sentyabr ayında başlayacaq təlimlər nazirliyin müvafiq şöbələrinin və Bakı Biznes Tədris Mərkəzinin əməkdaşları tərəfindən keçiriləcək. Təlimlərdə sənaye parklarının və məhəllələrinin idarəedici təşkilatları və sahibkarlar özəl bölmənin inkişafına göstərilən dövlət dəstəyi tədbirləri, investisiya təşviqi mexanizminin tətbiqi qaydaları, lisenziyalaşdırma sahəsində həyata keçirilmiş islahatlar, sahibkarlara elektron xidmətlərin göstərilməsi, insan resurslarının idarə olunması və digər mövzularda məlumatlandırılacaq. Qeyri-neft sənayesinin davamlı inkişafında, regionlarda sahibkarlıq fəaliyyətinin genişləndirilməsində, xüsusilə kiçik və orta sahibkarlığın inkişafında, məşğulluqda sənayenin xüsusi çəkisinin artırılmasında sənaye parkları və məhəllələri xüsusi rol oynayır. Artıq Sumqayıt Kimya Sənaye Parkı, Balaxanı Sənaye Parkı və Qaradağ Sənaye Parkı fəaliyyət göstərir, Neftçala Sənaye Məhəlləsində istehsal sahələrində avadanlıqların yerləşdirilməsi və digər hazırlıq işləri aparılır. Mingəçevir Sənaye Parkının və Masallı Sənaye Məhəlləsinin təşkili istiqamətində tədbirlər davam etdirilir. Sənaye parklarının və məhəllələrinin rezidentlərinin sayı da gündən-günə artır.xeber100.com

Şərabçılar Assosiasiyası yaradılır

Azərbaycanda  Azərbaycanda İxracın və İnvestisiyaların Təşviqi Fondundan (AZPROMO) azərtac-a bildiriblər ki, qurumun şərab istehsalı və satışı ilə məşğul olan yerli şirkətlərin nümayəndələri ilə görüşündə ölkəmizdə Şərabçılar Assosiasiyasının yaradılması qərara alınıb. Görüşdə, həmçinin Azərbaycan istehsalı olan şərabın ixracının təşviqi üçün görülən işlər, eləcə də şərab istehsalı və satışı ilə məşğul olan şirkətlərin bu sahədə təklifləri müzakirə olunub.xeber100.com

Nizamnamə kapitalının artırılması məsələsi müzakirə olunub

“Muğanbank” ASC-nin səhmdarların ümumi yığıncağında bankın nizamnamə kapitalının artırılması məsələsi müzakirə olunub. Bankdan Azərtac-a bildiriblər ki, yetkin qərarla nizamnamə kapitalının 10 milyon manat artırılmasına qərar verilib.xeber100.com

Rabitə və Yüksək Texnologiyalar Nazirliyinin məlumatına əsasən…

Rabitə və Yüksək Texnologiyalar Nazirliyinin telekommunikasiya sahəsində apardığı islahatların nəticəsi olaraq, Bakı Telefon Rabitəsi İstehsalat Birliyi (BTRİB) cari il sentyabrın 1-dən etibarən internet və İPTV xidmətləri üzrə “öncədən ödəmə” sisteminin tətbiqinə başlayır. Nazirlikdən Azərtac-a bildirilib ki, bundan sonra, BTRİB-in təqdim etdiyi internet və İPTV xidmətlərdən istifadə edən abunəçilərin debitor borcu yaranmayacaq. Belə ki, əvvəllər istifadəçilər göstərilən xidmətlərə görə sonradan ödəniş etdiyi üçün debitor borcu yaranırdı. Bəzi hallarda xidmətlərdən istifadə edən abunəçilər xidmət haqqını ödəməkdən yayınırdılar. Nəticədə abunəçiyə göstərilən xidmət dayandırılırdı. İndi isə, “öncədən ödəmə” sisteminin tətbiqi ilə abunəçi müvafiq qaydada öncədən ödədiyi məbləğə uyğun xidmət alacaq və göstərilən xidmətdə fasilə yaranmayacaq. Bu da müxtəlif səbəblərdən ünvanı tərk edən və ya xidmət haqqını ödəyə bilməyən istifadəçilərin borclanması kimi problemləri aradan qaldıracaq. Qeyd edək ki, Bakı Telefon Rabitəsi İstehsalat Birliyinin təqdim etdiyi telefon və internet xidmətləri üzrə aylıq abunə haqları üzrə onlayn və ödəmə terminalları vasitəsilə ödəniş etmək mümkündür.xeber100.com

“DəmirBank” aksiya keçirir

“DəmirBank” KFC restoranlar şəbəkəsi ilə birlikdə aksiya həyata keçirir. Bankdan Azərtac-a bildiriblər ki, “DəmirBank”ın istənilən plastik kartları ilə KFC restoranlarında ödəniş etdikdə "kiçik fri kartof" hədiyyə qazanmaq mümkündür. Aksiya 6 KFC restoranında keçərlidir – 28 May, 28 Mall, İnşaatçılar, Park Bulvar, Həzi Aslanov, Fəvvarələr meydanı. “DəmirBank”ın plastik kartları ilə Azərbaycanda, eləcə də dünyanın 200-dək ölkəsində ticarət və xidmət müəssisələrində məhsul və xidmətlərin qiymətinin heç bir komissiya tutulmadan nağdsız ödənişini həyata keçirmək mümkündür. Müştəri istədiyi zaman ATM və bank filialları vasitəsilə kartdan vəsaiti nağd şəklində çıxara, eyni zamanda müxtəlif onlayn ödənişlərini həyata keçirə bilər.xeber100.com

Dünya birjalarında neftin qiyməti…

Dünya birjalarında neftin qiyməti yenidən bahalaşıb. Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,69 dollar bahalaşaraq 48,10 dollar, Londonun İCE (“İnterContinental Exchange Futures”) birjasında “Brent” markalı neftin bir barrelinin qiyməti 0,80 dollar artaraq 49,96 dollar olub. Azərtac xəbər verir ki, “AzəriLayt” markalı neftin bir barrelinin qiyməti isə 0,75 dollar bahalaşaraq 51,04 dollar təşkil edib.xeber100.com

Mərkəzi Bank manatın bu günə olan rəsmi məzənnəsini açıqlayıb

Azərbaycan Mərkəzi Bankı (AMB) manatın bu günə olan rəsmi məzənnəsini açıqlayıb. AMB-dən "Apa-Economics"ə verilən məlumata görə, ABŞ-ın milli valyutası olan dolların məzənnəsi avqust ayının 22-si ilə müqayisədə dəyişməyərək 1,6204 manat səviyyəsində qalıb. Avro manata nisbətən bahalaşıb. Avrozonanın vahid valyutası 0,48% möhkəmlənərək 1,8369 manat olub. Əsas ticarət tərəfdaşlarımızdan biri olan Rusiyanın milli valyutası rublu ötən günlə müqayisədə 0,79% azalaraq 0,0250 manat səviyyəsinə enib. Türkiyə lirəsinin məzənnəsi 0,11% möhkəmlənərək 0,5518 manat olub. Rəsmi məzənnəyə əsasən, 1 ingilis funt sterlinqi 2,1312 manatdır. Beləliklə, funt sterlinq 0,83%-lik bahalaşma nümayiş etdirib. Gürcüstan larisinin məzənnəsi 0,78% azalaraq 0,7123 manat təşkil edib.xeber100.com

Azərbaycan Banklar Assosiasiyasının məlumatına əsasən…

Azərbaycan Banklar Assosiasiyasının (ABA) "Ödəniş sistemləri və alternativ xidmət kanalları üzrə" Ekspert Qrupu "PayPal" sisteminin pərakəndə satışla məşğul olan şəxslər üçün yeni imkanlar açacaq funksiyasının Azərbaycanda işə salınmasına yönəlik danışıqlara başlayıb. Azərtac ABA-ya istinadla xəbər verir ki, Ekspert Qrupu "Receive Enabled" adlanan funksiyanın Azərbaycanda aktivləşdirilməsi üçün görülməli olan işlərlə bağlı "PayPal" şirkətinin regional rəhbərliyi ilə müzakirə aparıb. "PayPal"ın xarici ölkələrdə fəaliyyət metodları müzakirə edilib və Azərbaycanda bu xidmətin aktivləşdirilməsi üçün görülməli işlər barədə ilkin məlumat əldə edilib. Qeyd edək ki, beynəlxalq alış-veriş saytlarında (ebay, Alibaba, Amazon və s.) ödənişlərin həyata keçirilməsi zamanı təhlükəsizliyinə görə üstünlük verilən sistemlərdən biri "PayPal"dır. Amma bu sistem Azərbaycanda "bir istiqamətli" işləyir. Yəni, sözügedən alış-veriş şəbəkələrində biz yalnız məhsulun aldığımız zaman ödəniş etmək üçün "PayPal"dan istifadə edə bilirik. Başqa sözlə, yerli satıcılar bu alış-veriş saytlarında "PayPal" üzərindən ödəniş qəbul edə bilmirlər. Məsələn, Azərbaycandakı satıcı hər hansı malı internet vasitəsilə satır və xaricdəki müştəri malın dəyərini təhlükəsizlik məqsədilə "PayPal" üzərindən ödəyir. Bu zaman ödəniş satıcının "PayPal" hesabına düşsə də, onu yerli bankdakı hesaba keçirmək və istifadə etmək mümkün olmur.xeber100.com

“Bakcell” smartfonlar üçün təklif etdiyi internet paketlər çeşidini daha sərfəli edib

“Bakcell” şirkəti müxtəlif müştəri qruplarının ehtiyaclarına uyğun olaraq, geniş çeşidli internet paketlərini - gündəlik 25 meqabayt (MB) cəmi 0.10 AZN-dən başlayan, həmçinin müxtəlif trafik həcmli və limitsiz paketlərini təklif edir. Şirkətdən Azərtac-a bildirilib ki, abunəçiləri daha rahat təcrübə ilə təmin etmək məqsədilə “Bakcell” smartfonlar üçün təklif etdiyi internet paketlər çeşidini daha sərfəli edib. Belə ki, şirkət paketlərin qiymətini artırmadan, müştərilərə eyni qiymətə ikiqat həcmə qədər internet təqdim edir. Bundan əlavə, limitsiz paketlərin yenilənməsi zamanı nəinki təqdim olunan MB kvotası, hətta müştəri təcrübəsi səviyyəsi belə mühüm dərəcədə artırılıb. Adətən, limitsiz internet paketlərinin təyin edilmiş meqabayt kvotası başa çatanda internet sürəti da aşağı düşür. İndi isə limitsiz internet paketlərinin təyin edilmiş MB kvotası başa çatdıqda “Bakcell”in avtomatik “Yüksək sürət” xidməti sayəsində abunəçilər hər 100 MB üçün sadəcə 0.89 AZN ödəməklə aylıq limitsiz paketin növbəti yenilənməsinə qədər internetdən yüksək sürətlə istifadə etmək imkanına malikdirlər.xeber100.com