“AzəriLayt” markalı neftin qiyməti bahalaşıb

Azərbaycan neftinin qiyməti 45 dollara yaxınlaşır. Azərtac xəbər verir ki, “AzəriLayt” markalı neftin bir barrelinin qiyməti 0,30 dollar bahalaşaraq 44,88 dollar təşkil edib.xeber100.com

“2016-cı ildə vergi sahəsində aparılacaq islahatların istiqamətləri”…

Vergilər Nazirliyində Azərbaycan Respublikası Prezidentinin "2016-cı ildə vergi sahəsində aparılacaq islahatların istiqamətləri"nin təsdiqi və vergi inzibatçılığının təkmilləşdirilməsi haqqında" 4 avqust 2016-cı il tarixli 2257 nömrəli Sərəncamında verilmiş tapşırıqların icrası ilə bağlı nazirliyik qarşısında duran vəzifələrə həsr edilən kollegiya iclası keçirilib. Vergilər Nazirliyinin analitik-informasiya şöbəsindən Azərtac-a bildiriblər ki, iclasda çıxış edən Azərbaycanın vergilər naziri, 1-ci dərəcəli dövlət vergi xidməti müşaviri Fazil Məmmədov deyib: “Prezident İlham Əliyevin rəhbərliyi altında son 10 il ərzində vergi orqanları tərəfindən sahibkarlığın inkişafının dəstəklənməsi, özəl sektorun fəaliyyətinin genişləndirilməsi və investisiya qoyuluşlarının stimullaşdırılması məqsədilə mühüm addımlar atılıb. Vergi orqanları ilə vergi ödəyiciləri arasında münasibətlərin qarşılıqlı etimada əsaslanan çevik və şəffaf mexanizmlər əsasında qurulması məqsədilə e-bəyannamə və e-VHF sisteminin tətbiqi, sahibkarlıq fəaliyyəti subyektlərinin "bir pəncərə" prinsipi üzrə qeydiyyatı, sahibkarların elektron qeydiyyatı, elektron xidmətlərin sayının artırılması, e-auditin tətbiqi istiqamətində bir sıra əhəmiyyətli tədbirlər həyata keçirilib. Ümumilikdə istər vergi qanunvericiliyinin, istərsə də vergi inzibatçılığının təkmilləşdirilməsi üzrə vacib işlər görülüb”.Vergilər naziri F.Məmmədov Tədbirlər Planından irəli gələn məsələlərin icrası, habelə vergi orqanlarının qarşısında qoyulmuş vəzifələrin icrasının təmin olunması ilə bağlı müvafiq tapşırıqlar verib.xeber100.com

İqtisadiyyat Nazirliyinə 700-dən çox müraciət daxil olub

İyul ayında İqtisadiyyat Nazirliyinin 195-2 Çağrı Mərkəzinə 700-dən çox, ümumilikdə isə indiyədək 55 mindən çox müraciət edilib. Nazirliyin mətbuat xidmətindən Azərtac-a bildiriblər ki, müraciətlər əsasən, sahibkarlığın inkişafı, güzəştli kreditlər, istehlakçıların hüquqlarının müdafiəsi, lisenziyalar, investisiya təşviqi sənədi, qeyri-neft məhsullarının ixracının dəstəklənməsi və nazirliyin səlahiyyətlərinə aid digər məsələlər barədə olub. Mərkəzə daxil olmuş müraciətlər operativ şəkildə cavablandırılıb, araşdırma tələb edən müraciətlərə isə nazirliyin aidiyyəti strukturları tərəfindən qanunvericilikdə müəyyən olunmuş müddətdə baxılıb və müvafiq tədbirlər görülüb. Qeyd edək ki, Çağrı Mərkəzinin xidmətlərindən istifadə etmək üçün bütün telefonlardan heç bir koddan istifadə etmədən 195 nömrəsinə zəng edərək "2" düyməsini yığmaqla İqtisadiyyat Nazirliyinin səlahiyyətlərinə dair məsələlərlə bağlı müraciət etmək və səsli menyunun köməyi ilə müvafiq məlumatlar almaq olar. Stasionar nömrələrdən 195-2 nömrəsinə edilən zənglər, Çağrı Mərkəzi tərəfindən göstərilən bütün xidmətlər ödənişsizdir.xeber100.com

Mərkəzi Bankın məlumatı…

Azərbaycan Respublikası Mərkəzi Bankının avqustun 8-nə USD/AZN rəsmi məzənnəsi 1,6005 səviyyəsində müəyyən edilib.Bu barədə Mərkəzi Bankdan Azərtac-a verilən məlumatda bildirilir.xeber100.com

“Azər Türk Bank” daha bir sosial layihənin iştirakçısı olub

“Azər Türk Bank” cəmiyyətin, ətraf mühitin qorunmasına və inkişaf etməsinə yönələn mühüm layihələr həyata keçirməyə davam edir. Bankdan “Apa-Economics”ə verilən xəbərə görə, bu günlərdə “Azər Türk Bank” daha bir sosial layihənin iştirakçısı olub. Bank “Yaşıl ASAN” təşəbbüsünə qoşulub. Təşəbbüs Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, “IDEA” ictimai birliyi və “Azərsun Holding” MMC tərəfindən həyata keçirilən “Hər kağızı bir yarpaqa dəyişək” layihəsinə dəstək məqsədi ilə ASAN könüllüləri tərəfindən irəli sürülüb.xeber100.com    

Əmlak Məsələləri Dövlət Komitəsinin məlumatına əsasən…

Əmlak Məsələləri Dövlət Komitəsi (ƏMDK) tərəfindən növbəti dəfə “Kütləvi çıxarış” kampaniyası 5 avqustda Xızının Yeni Yaşma kəndində keçirilib. Komitədən “Apa-Economics”ə verilən məlumata görə, budəfəki kampaniyanın özəlliyi vaxtilə kənddə 295 ailəyə ayrılıb, lakin faktiki və sənəd uyğunsuzluğu səbəbindən çıxarış verilməsi mümkün olmayan həyətyanı torpaq sahələrinin sənədləşdirilməsi olub. Belə ki, komitə tərəfindən belə torpaq sahələrinin sərhədləri dəqiqləşdirilib, müvafiq yerquruluşu, inventarlaşdırma və kadastr işləri aparılıb. Bununla da, faktiki və sənəd uyğunsuzluqları aradan qalxıb və əmlak hüquqlarının qeydiyyatı hüquqi cəhətdən mümkün vəziyyətə gəlib. Beləliklə, kampaniya çərçivəsində ilkin mərhələdə kəndin 100-ə yaxın sakininə onların mülkiyyətinə dair hazır çıxarışların verilməsi ilə kəndin bütün sakinlərinin torpaqlarının tamamilə sənədləşdirilməsinə başlanıb.xeber100.com

SOCAR-ın məlumatına əsasən…

Avqustun 5-də saat 10-dan 18-dək SOCAR-ın “Qaz İxrac” İdarəsinin Abşeron magistral qaz kəmərləri sahəsinin “Zirə-Şimal DRES” qaz kəmərinin 11-ci kilometrliyində, Hacıqabul magistral qaz kəmərləri sahəsinin “Şirvan” və Qazax magistral qaz kəmərləri sahəsinin “Bayramlı” qazpaylama stansiyalarında, eləcə də bəzi ölçü qovşaqlarında cari təmir işləri aparılacaq. Təmir müddətində Şirvan rayonunun Hacıqəhramanlı və Şəki rayonunun Bayramlı kəndlərinin təbii qaz təchizatında məhdudiyyətlər olacaq. SOCAR-ın mətbuat xidmətindən Azərtac-a bildirilib ki, aparılan işlərin Bakının Xəzər rayonunun Şüvəlan, Sahil və Mərdəkan qəsəbələrinin bir hissəsinin təbii qaz təchizatına təsir göstərməsi də mümkündür.xeber100.com

Sonuncu hərraclarda qızılın unsiyası 6,50 dollar azalıb

Amerika fond bazarında Dow Jones indeksi 0,23% – 18 355,00 bəndədək, S&P 500 0,31% – 2 163,79 bəndədək, NASDAQ 0,43% – 5 159,74 bəndədək artıb. “APA-Economics” xəbər verir ki, Avropa fond bazarlarında FTSE 100 indeksi 0,17% – 6 634,40 bəndədək, Fransa CAC-40-ı 0,16% – 4 321,08 bəndədək ucuzlaşıb, Almaniya DAX-ı 0,26% – 10 170,21 bəndədək bahalaşıb. COMEX-də sonuncu hərraclarda qızılın unsiyası 6,50 dollar azalaraq 1 358,20 dollara, gümüş isə 0,30 dollar azalaraq 20,18 dollara satılıb.xeber100.com

Mərkəzi Bank manatın bu günə olan rəsmi məzənnəsini açıqlayıb

Azərbaycan Mərkəzi Bankı (AMB) manatın bu günə olan rəsmi məzənnəsini açıqlayıb. AMB-dən Publika.az-a verilən məlumata görə, ABŞ-ın milli valyutası olan dolların məzənnəsi avqust ayının 3-ü ilə müqayisədə 0,2% möhkəmlənərək 1,5947 manat təşkil edib. Avro isə manata nisbətən ucuzlaşıb. Avrozonanın vahid valyutası 0,4% zəifləyərək 1,7775 manat olub. Əsas ticarət tərəfdaşlarımızdan biri olan Rusiyanın milli valyutası rubl 0,84% bahalaşaraq 0,0240 manat səviyyəsinə yüksəlib.xeber100.com

“Societe Generale” neftin qiyməti ilə bağlı yeni proqnozunu açıqlayıb

Fransız mütəxəssislər neftin yenidən 30 dollara düşəcəyini proqnozlaşdırır. Fransa bankı “Societe Generale” neftin qiyməti ilə bağlı yeni proqnozunu açıqlayıb. Bankın mütəxəssisləri hesab edir ki, bu ilin fevralında 26 dollaradək ucuzlaşan neftin qiyməti yenidən 30 dollar səviyyəsinə düşə bilər.Bank əməkdaşlarının fikrincə, ucuz neft dövrü hələ bitməyib.Təklifin həddindən artıq çox olması, həmçinin anbar çoxluğu ilə əlaqədar neftin qiyməti yenidən ucuzlaşmağa başlayıb. Neftin qiymətinin mütəxəssislərin proqnozlaşdırdığı həddə düşməsinin ölkəmiz üçün yaradacağı fəsadı bəri başdan hesablamaq elə də çətin deyil. Neftin ucuzlaşması indiyədək bəlli itkilərlə müşayiət olunub. Neftdən gələn gəlirlərin həddən çox azalması Azərbaycanda iqtisadiyyatın bütün sahələrinə ciddi təsir edib. 30 dollara eniş isə artıq daha böyük itkilərlə üzləşmək riski deməkdir.Iqtisadçı-ekspert Nemət Əliyev də neftin qiymətinin bu həddə düşməsini istisna etmir. Fikrini də belə əsaslandırır ki, bunu şərtləndirən əsas amillər bu gün də öz qüvvəsindədir. Xüsusilə Ukraynaya olan münasibətə görə Rusiyaya tətbiq edilən sanksiyalar bu gün də qüvvədə qalır: “2012-ci ildə neftin dünya bazarında qiyməti orta hesabla 112 dollar idi. Bu həddən aşağı düşəndə, hətta 60 dollara düşəndə belə, heç kim ondan aşağı həddin olacağını proqnozlaşdırmırdı. Lakin artıq bu hədd kimisə təəccübləndirmir. Neftin qiymətinin aşağı düşməsini şərtləndirən səbəblər ortadadırsa, qiymət daha da enməkdə davam edəcək”. Ekspert deyir ki, qiymətin aşağı düşməsi artıq ölkəmiz üçün fəlakət deməkdir. Ölkə iqtisadiyyatı, dövlət büdcəsi, əhalinin gəlirləri və s. neftdən çox asılı vəziyyətə salınıb. Onun 30 dollar və daha aşağı düşməsi əhali və iqtisadiyyat üçün böyük faciədir: “Hələ indiki şəraitdə iqtisadiyyatın əksər sahələrində, dövlət büdcəsində böhran yaşanır. Istehlak bazarı təxminən, yarıya düşüb. Ümumdaxili məhsulun həcmində ötən il 23 milyard dollar azalma baş verib. Əhali böyük gəlirlərdən məhrum olub. Qiymətin 30 dolllar və ya ondan aşağı düşməsinin fəsadları da böyük olacaq. Dövlət büdcəsinin, əhalinin, əksər sektorlar və bütün kateqoriyalar üzrə gəlirlər azalacaq. Bu azalma isə heç bir yaxşı perspektiv vəd etmir”.