Pambıqçılıq, tütün və ipəkçilik sahələrinə xüsusi diqqət göstəriləcək

Bu il pambıqçılıq, tütün və ipəkçilik sahələrinə daha çox diqqət ayrılacaq. Azərtac xəbər verir ki, bunu kənd təsərrüfatı naziri Heydər Əsədov jurnalistlərə açıqlamasında deyib. O bildirib ki, bu il Azərbaycanın pambıqçılıq, tütün və ipəkçilik sahələrinə xüsusi diqqət göstəriləcək. Hazırda Kənd Təsərrüfatı Nazirliyi daha çox fəaliyyətini pambıqçılığın inkişaf etdirilməsi istiqamətinə yönəldib. "Aqrar sektorda sahələr inkişaf etdikcə mineral gübrələrə maraq artır. Apardığımız monitorinqlər göstərir ki, mineral gübrələr kifayət qədər deyil. Məhsul çıxışı zamanı istifadə olunmuş mineralların qaytarılması mənfi saldoya malikdir", - deyə nazir vurğulayıb.xeber100.com

“Kənd təsərrüfatı kooperasiyası haqqında”…

Mayın 18-də Milli Məclisin aqrar siyasət komitəsinin iclasında “Kənd təsərrüfatı kooperasiyası haqqında” qanun layihəsi ikinci oxunuşda müzakirəyə çıxarılıb. Azərtac xəbər verir ki, komitənin sədri Eldar İbrahimov qanun layihəsi üzərində artıq 2010-cu ildən işlənildiyini deyib. Bildirib ki, qanun layihəsi hazırlanarkən dünya təcrübəsi, əsasən Almaniyanın bu sahədəki fəaliyyəti öyrənilib. Kooperasiya sistemi Azərbaycanda kənd təsərrüfatının inkişafına, istehsal olunan məhsulların rəqabət qabiliyyətliliyinin daha da artırılmasına və onların Avropa standartlarına uyğun gəlməsinə öz töhfəsini verəcək. Qeyd edilib ki, kənd təsərrüfatı kooperativləri dünyanın hər yerində, o cümlədən Avropanın inkişaf etmiş ölkələrində mövcuddur. Kooperasiya məhsul istehsal edən fermerdən tutmuş həmin məhsulun emalı, saxlanması, onun bazara çıxarılaraq satışının təşkilinədək bütün məsələləri özündə ehtiva edən bir sistemdir. Bu isə bir adamın, bir fermerin görəcəyi iş deyil. Tədarükçü, emalçı və istehsalçı - bunların hamısı bir sistemdir. Milli Məclis Aparatının əməkdaşı Vilayət Əlizadə qanun layihəsi haqqında danışıb. O bildirib ki, qanun layihəsinə ikinci oxunuşda altı yeni maddə və 50-dən çox yeni müddəa əlavə olunub, bəzi redaktə xarakterli dəyişikliklər edilib. İkinci oxunuşda qanun layihəsində artıq kənd təsərrüfatı kooperativlərinin üç növü - istehsal, istehlak və istehsal-istehlak (qarışıq) kooperativləri əksini tapıb və onların fəaliyyət prinsiplərinə aydınlıq gətirilib. Kənd təsərrüfatı istehsalı kooperativi kənd təsərrüfatı məhsulları istehsalçıları olan fiziki şəxslərin gəlir əldə etmək məqsədilə şəxsi əməyi ilə iştirakına əsaslanan birgə istehsalat və digər təsərrüfat fəaliyyəti yerinə yetirmək üçün birləşməsi ilə yaradılan kommersiya hüquqi şəxsdir. İstehsal kooperativlərində işlərin ən azı 70 faizi kooperativ üzvləri tərəfindən yerinə yetirilməlidir. İstehsal kooperativində muzdlu işçilərin sayı kooperativin əsas üzvlərinin sayının 30 faizindən (mövsümi işlərə cəlb edilənlər istisna olmaqla) çox ola bilməz. İstehsal kooperativinin işçisi, eyni zamanda, həmin kooperativin və eyni fəaliyyət növü ilə məşğul olan digər istehsal kooperativlərinin üzvü ola bilməz. Qanun layihəsinin ikinci oxunuşunda dövlətin kənd təsərrüfatı kooperasiyası sahəsində vəzifələri də artırılıb. Bu vəzifələrə dövlət ehtiyacları üçün hər il kooperativlərdən kənd təsərrüfatı və ərzaq məhsullarının dövlət tədarükünə dair sifarişlər müəyyən etmək, eyni zamanda, şəhər əhalisinin kənd təsərrüfatı məhsullarına olan ehtiyacının etibarlı ödənilməsi üçün şəhər və kənd bələdiyyələri və onların ittifaqları arasında kənd təsərrüfatı məhsullarının satışı üzrə əməkdaşlığın genişləndirilməsi daxildir. Bələdiyyələr qarşısında da yeni vəzifələr müəyyən edilib. Bələdiyyələr kənd təsərrüfatı bazarında rəqabəti genişləndirmək, kooperativlərin səmərəli fəaliyyətinə təkan vermək üçün kooperativlərin müraciəti əsasında kooperativ bazarların tikintisi məqsədilə torpaq ayırmalı, mövcud kənd təsərrüfatı bazarlarında kooperativlərə satış yerlərinin ayrılmasında iştirak etməlidir. Qanun layihəsinə ikinci oxunuşda kooperativ bazarların təşkili barədə maddə əlavə edilib. Kooperativlərin səmərəli fəaliyyətini təmin etmək üçün müvafiq icra hakimiyyəti orqanının müəyyən etdiyi qaydada kooperativ bazarlar təşkil ediləcək. Kooperativ bazarlar kənd təsərrüfatı məhsullarının satışı (ticarəti) ilə məşğul olacaq, istehlak kooperativlərinin nəzdində və onların idarəçiliyi altında fəaliyyət göstərəcək. Kooperativ bazarların yaradılması və onlara torpaq ayrılmasını müvafiq icra hakimiyyəti orqanları və bələdiyyələr həyata keçirəcəklər. Kooperativ bazarlarda Azərbaycanda fəaliyyət göstərən kooperativlərin istehsal etdiyi kənd təsərrüfatı və emal məhsullarından başqa digər məhsulların satışına, habelə kənd təsərrüfatı məhsullarının istehsalçısı olmayan digər fiziki və hüquqi şəxslərin satış etməsinə yol verilməyəcək.xeber100.com  

17 may – Dünya Telekommunikasiya və İnformasiya Cəmiyyəti Günüdür

Xəbər verildiyi kimi mayın 17-də Rabitə və Yüksək Texnologiyalar Nazirliyi (RYTN) “ADA” Universiteti ilə birgə bununla bağlı tədbir keçirib. Rabitə və yüksək texnologiyalar nazirinin müavini Elmir Vəlizadə çıxışında bu günün əhəmiyyəti, İKT-nin cəmiyyətdə rolu, iqtisadi və sosial inkişafa təsiri barədə məlumat verib. Diqqətə çatdırılıb ki, hazırda əhalinin 75 faizi genişzolaqlı internetdən istifadə edir. Bu günün qeyd olunmasında məqsəd informasiya-kommunikasiya texnologiyalarından (İKT) istifadənin cəmiyyətlərə və ölkələrə verdiyi imkanlar barədə məlumatlılıq səviyyəsinin yüksəldilməsinə kömək etməkdən ibarətdir.xeber100.com

“WorldFood Azerbaijan 2016” sərgisi keçiriləcək

Mayın 19-dan 21-dək Bakı Ekspo Mərkəzində regionun qida sənayesi üzrə mühüm və əhəmiyyətli tədbirlərindən biri - Azərbaycan Beynəlxalq "Qida sənayesi" "WorldFood Azerbaijan 2016" sərgisi keçiriləcək. Sərgi Kənd Təsərrüfatı Nazirliyinin dəstəyi, "Iteca Caspian" və "ITE Group" şirkətlərinin təşkilatçılığı ilə keçirilir. "Iteca Caspian" şirkətindən Azərtac-a bildiriblər ki, hər il keçirilən "WorldFood Azerbaijan" sərgisində yerli və beynəlxalq ərzaq məhsulları bazarının aparıcı istehsalçı, distribüter və təchizatçıları iştirak edəcəklər. Bu il sərgidə Almaniya, Birləşmiş Ərəb Əmirlikləri, Belarus, Çexiya, Qazaxıstan, Hindistan, İspaniya, İtaliya, Litva, Rusiya, Türkiyə, Ukrayna və digər ölkələri təmsil edən 200-dən artıq şirkətin iştirakı gözlənilir. Sərginin bölmələrində konservləşdirilmiş məhsullarla yanaşı, süd məhsulları, baqqaliyyə məmulatları, şirniyyat, soyutma sistemləri, içkilər və bir sıra digər məhsullar təqdim olunacaq. Həmçinin builki sərgidə ölkə bazarında ilk dəfə təmsil olunan meyvə və tərəvəz çeşidini geniş təmsil edəcək Azərbaycan şirkətləri iştirak edəcək. "WorldFood Azerbaijan 2016" sərgisi qida sənayesi sahəsində mövcud olan təmayüllər və bu sahənin əsas inkişaf problemlərinin müzakirəsi ilə yanaşı, yeni məhsul və texnologiyaların təqdimatı üçün unikal platformaya çevriləcək. Sərgi çərçivəsində ilk dəfə olaraq qida məhsulları təchizatçılarının ticarət şəbəkələri və distribüterlərlə ikitərəfli görüşləri keçiriləcək. Bu cür ikitərəfli "B2B" görüşlər, istehsal şirkətlərinin rəhbərləri və pərakəndə satış nümayəndələri arasında şəxsi işgüzar əlaqələrin qurulmasına və ikitərəfli müqavilələrin imzalanmasına mühüm imkanlar yaradacaq. Eyni zamanda, həmin gün keçirilməsi planlaşdırılan Xəzər Beynəlxalq "Qablaşdırma, Tara, Etiket və Poliqrafiya" Ipack Caspian 2016" sərgisində müxtəlif sənaye sahələri üçün qablar, qablaşdırma materialları, tara və hazır qablaşdırmaların istehsal və tərtibatı üçün avadanlıqlar təqdim olunacaq.xeber100.com  

“ASAN könüllülər” üçün növbəti təlim keçirilib

"Azər Türk Bank" və "ASAN xidmət"in birgə təşkilatçılığı ilə "ASAN könüllülər" təşkilatının üzvləri üçün növbəti təlim keçirilib. Bankdan Azərtac-a bildiriblər ki, əhalinin maliyyə savadlılığının artırılmasına dəstək məqsədilə reallaşdırılan layihə çərçivəsində təşkil olunan təlimlərdə "Azər Türk Bank"ın əməkdaşları könüllülərin iqtisadiyyat, maliyyə, bank sektoru ilə bağlı biliklərinin artırılmasına kömək göstəriblər. Təlimlərin il ərzində müntəzəm şəkildə təşkil olunması nəzərdə tutulub.xeber100.com

“Türk Hava Yolları”ndan turizmin inkişafına dəstək…

“Türk Hava Yolları” Azərbaycanda turizmin inkişafına dəstək vermək istəyir. Bu barədə “Türk Hava Yolları”nın Bakıdakı nümayəndəliyinin rəhbəri Seyfullah İlyas AZƏRTAC-a eksklüziv müsahibəsində deyib. Onun sözlərinə görə Azərbaycan son zamanlar turizmin inkişafına xüsusi diqqət ayırıb. “Biz də bundan istifadə edərək həm Azərbaycan turizminin inkişafına dəstək vermək, həm də turistləri öz aviaşirkətimiz vasitəsilə cəlb etmək istəyirik. Mənim şəxsi fikrimcə Azərbaycan turizm cəhətdən ziyarət edilməli bir ölkədir. Çünki tək Bakı ilə deyil, həm də təbii gözəlliklərlə dolu digər bölgələrinin təbiəti ilə də turistlərin diqqətini çəkə biləcək bir səviyyədədir. Bundan əlavə Azərbaycanın qış turizmi cəhətdən də inkişaf edən bölgələri var. Son dövrlərdə xidmət sahəsində qiymətlərin aşağı düşməsi nəticəsində demək olar ki, burada turist axınının olması üçün gözəl şərait yaranıb. Biz də Azərbaycana dəstək üçün uçuşlar həyata keçirdiyimiz digər istiqamətlərdə buranın turizm tanıtımı üçün işlər görmək istəyirik”, - deyə S.İlyas vurğulayıb. Seyfullah İlyas qeyd edib ki, bununla bağlı Azərbaycanın Mədəniyyət və Turizm Nazirliyi ilə görüşlər keçirilir.xeber100.com

“Kredit riskinə dair illik konfrans” keçiriləcək

Mayın 24-də Bakıda "Moody's" beynəlxalq reytinq agentliyi "Kredit riskinə dair illik konfrans"ını keçirəcək. Azərtac Azərbaycan Banklar Assosiasiyasına istinadla xəbər verir ki, konfransda "Fond resurslarının şaxələndirilməsi – "Moody's"in reytinqləri", "Azərbaycan: neft qiymətlərinin enməsindəki yeni çağırışlar", "Azərbaycan bank sisteminin perspektivləri", "Azərbaycan bank sistemində və MDB ölkələrində xarici valyuta riskinin təsirləri" mövzularında çıxışlar olacaq. Konfrans çərçivəsində keçirilən diskussiya panelində Azərbaycanın bank və korporativ sektor üçün neft qiymətlərinin volatiliyinin əhəmiyyəti müzakirə olunacaq. Konfransda "Moody's Investors Service"in vitse-prezidenti Burak Cerrahoğlu, Rusiya və MDB ölkələri üzrə "Moody's Investors Service"in baş meneceri Alexey Sazhin və agentliyin digər əməkdaşları iştirak edəcəklər.xeber100.com

Azərbaycana narkotik keçirilməsinin qarşısı alınıb

Biləsuvar Gömrük İdarəsinin “Qoşa Təpə” gömrük postunda İrandan Azərbaycana piyada gələn, Azərbaycan vətəndaşı olan 2 nəfər gömrük nəzarətindən keçən zaman onlardan birinə məxsus siqaret qutusunun içərisindən gömrük nəzarətindən gizlədilmiş 1 ədəd bükümdə, xalis çəkisi 1,16 qram olan narkotik vasitə tiryək aşkar edilərək götürülüb. Dövlət Gömrük Komitəsinin Mətbuat Xidmətindən “Apa-Economics”ə verilən məlumata görə, faktla bağlı Biləsuvar Gömrük İdarəsinin Gömrük hüquqpozmalarına qarşı mübarizə şöbəsində aparılan araşdırma zamanı həmin  şəxsin yaşadığı Sumqayıt şəhərindən 3 tanışı ilə birlikdə Biləsuvar Gömrük İdarəsinin “Qoşa Təpə” gömrük postuna qədər gəldikləri, yolda narkotik vasitə sayılan marixuanadan istifadə etdikləri müəyyən edilib. Həmin şəxslər  gömrükçülərə Sumqayıtdan əldə etdikləri marixuananın müəyyən hissəsini isə Biləsuvar Gömrük İdarəsinin “Qoşa Təpə” gömrük postuna gəldikləri və postun  qarşısında yerləşən avtomobil dayanacağındakı avtomobildə saxladıqlarını  bildiriblər. Avtomobilə baxış keçirilmədən əvvəl sürücü gömrükçülərə sadəcə ayaqaltı rezinin altında 1 ədəd kağız  bükümdə narkotik maddə-marixuana olduğunu deyib.  Bundan sonra həmin  avtomobilə  Biləsuvar Gömrük İdarəsinin “Buç” ləqəbli xidməti itinin tətbiqi ilə baxış keçirilib. Yoxlama zamanı avtomobilin salonunun müxtəlif yerlərindən daha 6 ədəd kağız bükümdə  narkotik vasitə olan marixuana tapılıb. Ümumilikdə avtomobildən 7 bükümdə ümumi  xalis çəkisi 3,21 olan narkotik vasitə  qurudulmuş marixuana  aşkar edilərək götürülüb.xeber100.com

Xarici ölkə vətəndaşlarının sayı artır…

Cari ilin yanvar-aprel aylarında Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun fərdi uçot sistemində fərdi şəxsi hesabı açılan xarici ölkə vətəndaşlarının sayı 2 129 nəfər artaraq 29 994 nəfərə çatıb. Nazirliyin ictimaiyyətlə əlaqələr şöbəsindən “Apa-Economics”ə verilən məlumata görə, həmin şəxslərdən 89,1%-i kişilər, digərləri isə qadınlardır.Ötən ilin müvafiq dövrü ilə müqayisədə isə sistemdə qeydiyyata alınan əcnəbilərin sayı 990 nəfər çoxalıb. Hazırda fərdi uçot sistemində qeydiyyatda olan əcnəbilər sırasında Türkiyə, Gürcüstan, Rusiya, Hindistan, İran, Çin, Banqladeş, Böyük Britaniya və Şimali İrlandiya, Pakistan, Ukrayna, Filippin və s. ölkələrin vətəndaşları daha çoxdurlar.Ümumilikdə sistemin əhatə etdiyi xarici ölkə vətəndaşları 120-ə yaxın ölkəni təmsil edirlər.xeber100.com

3 marşrut xətti istifadəyə veriləcək

Yeni istifadəyə verilən “Avtovağzal” metro stansiyasının açılışı ilə bağlı mayın 12-dən Bakı Nəqliyyat Agentliyi metro stansiyası ətrafındakı sərnişin sıxlığını nəzərə alaraq sərnişinlərin rahat hərəkətini təmin etmək məqsədilə “BakuBus” MMC-nin yeni 13 nömrəli marşrut xəttinin istifadəyə verilməsi və 2, 14 nömrəli marşrut xətlərinin hərəkət trayektoriyasının uzadılması ilə bağlı qərar verib.Bu barədə Bakı Nəqliyyat Agentliyinin ictimai əlaqələr şöbəsinin müdiri Nuridə Allahyarova Azərtac-a deyib. İlkin mərhələdə 13 nömrəli marşrut xətti üzrə mayın 12 və 13-də sınaq rejimində 8 ədəd avtobus xidmət göstərəcək. Mayın 15-dən isə marşrut xətləri tam rejimdə fəaliyyət göstərəcək. 2 və 14 nömrəli marşrut xəttinın Cəfər Cabbarlı adına Kinostudiya, Moskva prospekti, Biləcəri dairəsi və Bakı Beynəlxalq Avtovağzal Kompleksi istiqamətində hərəkət trayektoriyası uzadılıb. Bakı Nəqliyyat Agentliyi gələcəkdə də sərnişinlərin rahat və təhlükəsiz hərəkətini təmin etmək məqsədilə optimallaşdırma işlərini davam etdirəcək.xeber100.com