Rus turistlərinin ən çox səyahət etdiyi şəhərlərin reytinqi açıqlanıb

Rus turistlərinin cari ilin may ayının əvvəlində ən çox səyahət etdiyi şəhərlərin reytinqi açıqlanıb. travel.ru saytı xəbər verir ki, reytinq 30 aprel - 4 may tarixlərində otel və hostellərdə bronlaşdırmaya əsaslanıb. Sayt yazır ki, rus turistlər Bakıda 1 sutka ərzində orta hesabla 3 min rubl və ya 68 manat xərcləyiblər. Müqayisə üçün qeyd edək ki, qonşu ölkənin turistləri 1 sutka ərzində  Belarus və Polşada 2 min rubl və ya 45 manat, Sinqapur və Londonda isə 10 min rubl və ya 227 manat xərcə düşüblər. Ümumiyyətlə, rus turistlərinin qeyd edilən vaxt kəsiyində ən çox axın etdiyi şəhərlərin ilk onluğu bu cürdür: Minsk, Riqa, Praqa, Tallin, Bakı, Vilnüs, Tbilisi, Roma, Helsinki, və Belqrad.xeber100.com

Dünya birjalarında neftin qiyməti ucuzlaşmaqda davam edir

Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,67 dollar ucuzlaşaraq 44,92 dollar, Londonun İCE (“İnterContinental Exchange Futures”) birjasında “Brent” markalı neftin bir barrelinin qiyməti 0,99 dollar azalaraq 46,07 dollar olub. Azərtac xəbər verir ki, “AzəriLayt” markalı neftin bir barrelinin qiyməti isə ötən həftənin sonunda 47,94 dollar təşkil edib.xeber100.com  

“WSIS -2016” – İnformasiya Cəmiyyəti üzrə Ümumdünya Sammiti işə başlayıb

Cenevrədə “WSIS -2016” - İnformasiya Cəmiyyəti üzrə Ümumdünya Sammiti (World Summit on the Information Society) işə başlayıb. Tədbirin təşkilatçıları qismində BMT-nin bir sıra təsisatları, o cümlədən Beynəlxalq Telekommunikasiya İttifaqı (BTİ), Ticarət və İnkişaf üzrə Konfransı (UNCTAD), İnkişaf Proqramı (UNDP), Təhsil, Elm və Mədəniyyət Təşkilatı (UNESCO) çıxış edir. Rabitə və Yüksək Texnologiyalar Nazirliyindən Azərtac-a bildirilib ki, informasiya-kommunikasiya texnologiyaları sahəsində dünyanın ən böyük illik yığıncağı olan “WSIS -2016”da Azərbaycan nümayəndə heyəti də iştirak edir. Sammit çərçivəsində keçirilən yüksək səviyyəli görüşdə - Nazirlər Toplantısında Azərbaycan nümayəndə heyətinin çıxışı, həmçinin ikitərəfli görüşlərinin keçirilməsi nəzərdə tutulur.xeber100.com  

KATV1 müəyyən üstünlüklər verən kampaniyalara start verib

KATV1 əhalinin fiber-optik şəbəkələrlə təqdim olunan yüksək sürətli genişzolaqlı internetə keçməsi üçün müvafiq stimullaşdırma proqramını təqdim edib. Şirkətdən Azərtaca bildirilib ki, əhalinin “fiber”ə (fiber-optik şəbəkələr) keçirilməsi Azərbaycanda internet-infrastrukturu sahəsində həyata keçirilən dövlət siyasətinin tərkib hissəsidir. “Fiber”ə keçid nəticəsində istifadəçilər ADSL-dən daha keyfiyyətli internet əldə edəcəklər. Stimullaşdırma proqramı çərçivəsində KATV1 “optika”ya keçmək istəyən istifadəçilər üçün müəyyən üstünlüklər verən kampaniyalara start verib. Beləliklə, “optika”ya keçid zamanı müvafiq internet-paketinə görə iki aylıq ödəniş edən bütün istifadəçilər pulsuz wi-fi-modem əldə edəcək və ya hər bir yeni istifadəçi seçdiyi paket üzrə bir aylıq pulsuz internet əldə edəcək. Kampaniya avqustun 31-dək davam edəcək.xeber100.com  

6 nömrəli stasionar dəniz özülü istismara verilib

Mayın 2-də SOCAR-ın "Bulla-dəniz" yatağındakı 6 nömrəli stasionar dəniz özülü istismara verilib. Azərtac xəbər verir ki, özülün istifadəyə verilməsi mərasimində SOCAR-ın prezidenti Rövnəq Abdullayev və şirkətin rəhbərliyinin nümayəndələri iştirak ediblər. R.Abdullayev əvvəlcə özüldə çalışan neftçilərlə görüşüb, onları bu əlamətdar hadisə münasibətilə təbrik edib və uğurlar arzulayıb. Özülə baxış keçirən SOCAR-ın prezidentinə məlumat verilib ki, şirkətin daxili imkanları ilə 2014-cü ildən inşasına başlanılan özülün layihəsi "Neftqazelmitədqiqatlayihə" İnstitutu tərəfindən verilib, istismara hazır vəziyyətdə olan birinci buraxılış kompleksi üzrə tikinti işləri "Neftqaztikinti" Tresti tərəfindən həyata keçirilib. Bir ədəd axtarış və 3 ədəd istismar quyusunun qazılması üçün nəzərdə tutulan özül dənizin 19-20 metr dərinliyində quraşdırılıb. Dəniz səviyyəsindən özülün döşəməsinədək olan məsafə isə 11 metrdir. Bildirilib ki, özüldə bir ədəd helikopter, 10 gəmi yanalma və 4 minik-düşmə meydançası quraşdırılıb. İşçi personalın rahat və təhlükəsiz çalışması üçün 88 nəfərlik vaqon tipli yaşayış evi və digər zəruri evciklər inşa edilib. Özül yükqaldırma qabiliyyəti 4-28 ton olan 3 stasionar qaldırıcı kran, 3 ədəd 42 nəfərlik xilasedici qayıq və 9 ədəd 10 nəfərlik xilasedici sal ilə təchiz edilib. Qeyd olunub ki, özüldə 5900-6300 metr dərinliyə qazılacaq quyularım hər birindən sutkada 150 ton kondensat və 500 min kubmetr qaz hasil edilməsi nəzərdə tutulur. Özüldə qazma işləri ilə istismarın eyni zamanda aparılması planlaşdırılır. İstismar işləri N.Nərimanov adına neft və qazçıxarma idarəsi (NQÇİ) tərəfindən həyata keçiriləcək. İnşaat işlərinin müasir texnika və texnologiyalardan istifadə edilərək beynəlxalq standartların tələblərinə uyğun təhlükəsiz və keyfiyyətlə həyata keçirildiyini deyən SOCAR-ın prezidenti R.Abdullayev görülən işlərdən razı qaldığını bildirib, özüldə qazılacaq ilk axtarış quyusunda qazma dəzgahını işə salıb. "Bulla-dəniz" yatağında hasilatın stabil saxlanılması və artırılması baxımından yeni özülün əhəmiyyətini vurğulayan R.Abdullayev obyektin vaxtında və keyfiyyətlə istismara buraxılmasını yüksək qiymətləndirib. Qeyd edib ki, ölkənin neft-qaz təsərrüfatının yaxşılaşdırılması, durmadan artan hasilat və nəql infrastrukturunun genişləndirilməsi sahəsində həyata keçirilən tədbirlər bundan sonra da davam etdiriləcək. Bildirilib ki, layihə dərinliyi 5900 metr olan 78 nömrəli şaquli quyu məhsuldar qatın VIII horizontunun neft-qazlılığını öyrənmək, sahənin tektonikasını və litoloji-stratiqrafik kəsilişini dəqiqləşdirmək məqsədilə SOCAR-AQŞ birgə müəssisəsi tərəfindən qazılacaq.xeber100.com

Vətəndaş müraciətlərinə baxılması üçün nəzarət sistemi yaradılıb

Vergilər nazirinin 18 mart 2016-cı il tarixli əmri ilə təsdiq edilmiş “Dövlət vergi orqanlarında kargüzarlığın aparılması Qaydaları”nda sənədlərin hazırlanması üçün ümumi tələblər qanunvericiliyin tələblərinə uyğunlaşdırılıb. Həmçinin sənədlərin icrası, vətəndaş müraciətlərinə baxılması proseslərini əvvəldən axıradək izləməyə imkan verən dəqiq və kifayət qədər təkmil nəzarət sistemi yaradılıb.Azərtac xəbər verir ki, bu barədə Vergilər Nazirliyi aparatının rəhbəri Əli Həsənov bildirib. Onun sözlərinə görə, dövlət vergi orqanlarının öz funksiyalarını yerinə yetirməsi prosesində kargüzarlığın aparılması xüsusi diqqət tələb edən məsələlərdəndir. Bu baxımdan, 2006-cı ilin fevralın 1-dən Avtomatlaşdırılmış Vergi İnformasiya Sisteminin (AVİS) tətbiq olunması nəticəsində dövlət vergi orqanlarında kargüzarlığın aparılmasında ciddi keyfiyyət dəyişiklikləri baş verib. Kargüzarlığın vahid sisteminin, sənədlərlə işin, onların hazırlanmasının, rəsmiləşdirilməsinin, uçotunun, icra mexanizminin və arxivə təhvil verilməsi qaydalarının təkmilləşdirilməsi sahəsində əhəmiyyətli işlər görülüb.xeber100.com

Beynəlxalq sığorta müqaviləsi bağlanılıb

Aprel ayında Yaşıl Kart sistemi çərçivəsində fəaliyyət göstərmək hüququ olan sığortaçılar tərəfindən 387 beynəlxalq sığorta müqaviləsi bağlanılıb. İcbari Sığorta Bürosundan (İSB) Azərtaca verilən məlumata görə, bu müqavilələrdən 324-ü Türkiyə və İran İslam Respublikasına, 62-si Yaşıl Kart Sisteminə daxil olan bütün ölkələrə, 1 müqavilə isə Moldova və Ukraynaya səfər edən avtonəqliyyat vasitələri ilə bağlı olub. Aprel ayında beynəlxalq sığorta müqavilələri üzrə sığorta haqları 81 483 manat təşkil edib. Yaşıl Kart üzrə bağlanılan müqavilələrin 161-i minik, 113-ü yük, 106-ı qoşqu, 4-ü avtobus, 3-ü isə motosiklet kateqoriyası üzrə olan nəqliyyat vasitələri ilə bağlı olub. Bağlanılan müqavilələr üzrə ən aşağı sığorta haqqı 15 manat, ən yüksək sığorta haqqı 1200 manat təşkil edib. Müqayisə üçün qeyd edək ki, 2016-cı ilin yanvar-mart ayları ərzində 324 beynəlxalq sığorta müqaviləsi bağlanılıb və bu müqavilələr üzrə sığorta haqlarının məbləği 55 437 manat təşkil edib.xeber100.com  

İqtisadiyyat Nazirliyində 7 mindən çox müraciətə baxılıb

Bu ilin yanvar-mart aylarında İqtisadiyyat Nazirliyinin 195-2 Çağrı Mərkəzinə 7 mindən çox müraciət daxil olub. İndiyədək 195-2 Çağrı Mərkəzinə daxil olan müraciətlərin sayı isə təqribən 52 mindir. Nazirliyin mətbuat xidmətindən bildirilib ki, müraciətlər əsasən sahibkarlığın inkişafı, güzəştli kreditlər, istehlakçıların hüquqlarının müdafiəsi, lisenziyalar, investisiya təşviqi sənədi, qeyri-neft məhsullarının ixracının dəstəklənməsi və nazirliyin səlahiyyətlərinə aid digər məsələlər barədə olub. Mərkəzə daxil olmuş müraciətlər operativ şəkildə cavablandırılıb, araşdırma tələb edən müraciətlər isə nazirliyin aidiyyəti strukturları tərəfindən qanunvericilikdə müəyyən olunmuş müddətdə baxılıb və müvafiq tədbirlər görülüb. Xatırladaq ki, Çağrı Mərkəzinin xidmətlərindən istifadə etmək üçün bütün telefonlardan 195 nömrəsinə zəng edib “2” düyməsini yığmaq lazımdır. Stasionar nömrələrdən “195-2” nömrəsinə edilən zənglər, Çağrı Mərkəzi tərəfindən göstərilən bütün xidmətlər ödənişsizdir. Çağrı Mərkəzi canlı rejimdə, qanunvericiliklə nəzərdə tutulmuş rəsmi iş günlərində fasiləsiz olaraq saat 9.00-dan 18.00-dək fəaliyyət göstərir.xeber100.com

“Yeni İpək Yolu”: İmkanlar və qlobal təsirlər” mövzusunda brifinq keçirilib

Aprelin 29-da Azərbaycan, Gürcüstan, Qazaxıstan və Türkiyənin ABŞ-dakı səfirliklərinin təşkilatçılığı ilə ABŞ Konqresinin binalarından birində “Şərqi Asiya və Qərbi Avropanı birləşdirən “Yeni İpək Yolu”: İmkanlar və qlobal təsirlər” mövzusunda brifinq keçirilib. Vaşinqton şəhərində yerləşən ABŞ-Azərbaycan Ticarət Palatasının moderatorluğu ilə keçirilmiş brifinqdə Azərbaycan, Gürcüstan, Qazaxıstan və Türkiyənin dövlət qurumlarından olan nümayəndələr çıxış ediblər. Brifinq zamanı Trans-Xəzər Şərq-Qərb Ticarət və Tranzit Dəhlizinin strateji əhəmiyyəti və rəqabətliliyi vurğulanmaqla yanaşı, Azərbaycan və digər ölkələr tərəfindən həyata keçirilən infrastruktur layihələri, qeyd edilən dəhliz boyu ticarət və tranzit imkanları barədə tədbir iştirakçılarına məlumat verilib. Xatırladaq ki, aprelin 28-də Vaşinqtondakı məşhur təhsil ocaqlarından olan Cons Hopkins Universitetində Trans-Xəzər Şərq-Qərb Ticarət və Tranzit Dəhlizinin əhəmiyyətinə həsr olunmuş geniş tərkibli forum keçirilib. Bu forum çərçivəsində aparılmış müzakirələr və ölkəmizin Gürcüstan, Türkiyə və Qazaxıstanla birgə regional əməkdaşlığı böyük maraqla qarşılanıb. Bu xüsusda, səfir Elin Süleymanovun ABŞ-ın “The Washington Times” qəzetində “Müasir İpək Yolunun izi ilə” məqaləsi dərc edilib. Forumun davamı olaraq ABŞ Konqresində təşkil edilmiş brifinq də böyük diqqətə səbəb olub və orada Konqres üzvlərinin köməkçiləri, ABŞ federal dövlət strukturlarının, akademik dairələrin təmsilçiləri, habelə bir sıra mütəxəssislər də daxil olmaqla, ümumilikdə 50-yə yaxın nümayəndə iştirak edibxeber100.com

“Koroğlu” metro stansiyasının yaxınlığında Nəqliyyatın Mübadilə Mərkəzi fəaliyyətə başlayıb

Bakıda “Koroğlu” metro stansiyasının yaxınlığında Nəqliyyatın Mübadilə Mərkəzi fəaliyyətə başlayıb. AZƏRTAC xəbər verir ki, mərkəzin açılışında Bakı Nəqliyyat Agentliyinin mətbuat xidmətinin rəhbəri Nuridə Allahyarova gələcəkdə belə mərkəzlərin “Koroğlu” metro stansiyasının digər çıxışında, “Qara Qarayev” metro stansiyasının, “28 May” metro stansiyasının çıxışında, Bakı Beynəlxalq Avtovağzal Kompleksində də yaradılması nəzərdə tutulur. Onun sözlərinə görə, Bakı Nəqliyyat Agentliyi yarandığı gündən Bakının nəqliyyat sistemində, təhlükəsiz sərnişindaşıma sahəsində, ümumilikdə nəqliyyat şəbəkəsində təkmilləşdirmə və optimallaşdırma işləri həyata keçirilir. Bu həm sərnişinlər arasında qanunvericilikdən irəli gələn maddələrin maarifləndirmə yolu ilə çatdırılması, həm də məsələlərin öhdəlik kimi qarşıya şərt qoyulmasından ibarətdir. Nəqliyyatın Mübadilə Mərkəzi isə sərnişinlərin və nəqliyyat vasitələrinin rahat, təhlükəsiz hərəkəti üçün yaradılıb. N.Allahyarova bildirib ki, bəzi ərazilərdə nəqliyyatın sıx hərəkəti müşahidə olunur və bu təhlükəsizlik baxımından ciddi problemlər yaradırdı. “Koroğlu” metro stansiyası ətrafında nəqliyyatın və sərnişinlərin xaotik hərəkətini aradan qaldırmaq və eyni dayanacaqda taksilərin, avtomobillərin, avtobusların dayanmasının qarşısını almaq məqsədilə Nəqliyyatın Mübadilə Mərkəzi yaradılıb. Artıq “Koroğlu” metro stansiyasının önündə sıxlıq aradan qalxıb və avtobuslar mərkəzə toplanıb. Avtobuslar və sərnişinlər üçün dünəndən məlumatlandırıcı lövhələr yerləşdirilib və sərnişinlər getmək istədikləri məkanı, marşrut xətlərini həmin lövhələrdə görə bilərlər”, - deyə N.Allahyarova vurğulayıb.xeber100.com