Pulsuz hüquqi yardım

Artıq vətəndaşlar öz əmlaklarının qiymətləndirilməsini daha asan və obyektiv həyata keçirə biləcək. xezerxeber.com xəbər verir ki, Əmlak Məsələləri Dövlət Komitəsinə belə bir səlahiyyət verilib. Vətəndaşlar daşınmaz əmlak sahəsinə aid qarşılaşdıqları problemlərlə bağlı qurumdan pulsuz hüquqi yardım da ala biləcəklər. Əmlak Məsələləri Dövlət Komitəsinə vətəndaşlara pulsuz hüquqi yardım göstərilməsi ilə bağlı yeni səlahiyyət verilib. Artıq vətəndaşlar torpaq, eləcə də sahib olduqları daşınmaz əmlakla bağlı reyestr xidmətinin ərazi ofislərinə yaxınlaşmaqla tam məlumat ala bilərlər. Komitə eyni zamanda daşınmaz əmlakın qiymətləndirilməsi ilə bağlı da fəaliyyətini də genişləndirir. Qurum artıq Sumqayıt, Quba və Xaçmazda 150 mindən çox əmlakın qiymətləndirilməsini başa çatdırıb. Vətəndaşlar bu məlumatdan faydalanmaqla yanaşı ərazi ofislərində daşınmaz əmlakı girov qoyan, eləcə də satan zaman onun bazara uyğun qiymətləndirməsini həyata keçirə bilərlər. Xidmətin qiyməti isə əmlakın həcmindən asılı olaraq dövlətin müəyyən etdiyi tariflər əsasında həyata keçirilir. Qurumun sözçüsü eyni zamanda torpaqların elektron kadastr və uçot sisteminin yaradılması ilə bağlı komitənin üzərinə qoyulan vəzifələrin sürətlə yerinə yetirildiyinə də diqqət çəkib. Ölçmə işləri ilə yanaşı məlumatların yeni elektron bazaya daxil edilməsi gələcəkdə torpaqlardan elmi istifadəni asanlaşdıracaq və torpaqların keyfiyyət göstəricilərinin artırılmasına geniş imkan yaradacaq.  

Cəbhə xəttinə dəstək

Azərbaycan rabitə bazarının lider mobil operatoru Azercell şirkəti cəbhə xətti boyunca döyüşlər gedən ərazilərdə, Füzuli, Ağdam və Tərtərdə olan abunəçilərinə şəbəkə daxili 60 dəqiqə pulsuz danışıq hədiyyə edir. Abunəçilər hədiyyə dəqiqələrindən 1 ay ərzində istifadə edə bilərlər. 2 aprel 2016-cı il tarixindən Azercell-in texniki qrupu cəbhə bölgəsində kəsintisiz rabitəni təmin etmək üçün gərgin iş rejimində çalışır. Azercell-in hal-hazırda cəbhə xəttinə yaxın 70 stansiyası var. Onların 35 faizindən çoxu avtonom rejimdə çalışan generatorlarla təchiz edilib. Azercell-in işçi qrupu tam həcmli xidmət göstərmək məqsədilə cəbhə xətti boyunca və ətraf ərazilərdə 3G şəbəkəsinin əhatə dairəsinin genişləndirilməsi üzərində çalışır.  

Ucuz neft erasına hazırlıq

Səudiyyə Ərəbistanı krallığın aktivlərini birləşdirərək dünyada ən iri investisiya fondu yaradır. ANS PRESS-in məlumatına görə, fondun investisiya həcminin 2 trilyon dollar təşkil edəcəyi bildirilir. Bu barədə “Bloomberg”ə Səudiyyə Ərəbistanının kralı Salman bin Əbdüləziz əs-Səudun oğlu Şahzadə Məhəmməd bin Salman bildirib. “Sovereign Fund Institute”nin hesablamalarına görə, hazırda “Public Investment Fund”un aktivlərinin qiyməti 5.3 milyard dollar təşkil edir. Şahzadə Məhəmməd PIF (“Public Investment Fund”) fondunun dünyanın ən böyük suveren investisiya fondu olacağına şübhəsiz inandığını bildirib. Şahzadənin sözlərinə görə, hazırda PIF Səudiyyə Ərəbistanı Mərkəzi Bankında və eyni zamanda dünyada etilenqlikol istehsalı üzrə ikinci hesab edilən “Saudi Arabia Basic Industries Corporation” şirkətində pay sahibidir. Şahzadə Salman onu da vurğulayıb ki, fondun aktivləri o zaman artmağa başlayacaq ki, Saudi Aramco neft şirkətinin səhmləri İctimai Təşəbbüs Təşkilatına keçirilsin və aktivlər fonda təhvil verilsin. 2018-ci ildən gec olamamaq şərti ilə şirkətin 5%-i satışa çıxarılacaq. Saudi Aramco dünyanın ən böyük neft ehtiyyatlarına malik olan şirkətidir. Onun neft ehtiyatlarının həcmi təxminən 260 milyard barrel olduğu bildirilir. "Bloomberg"in hesablamalarına görə, əgər neftin qiyməti barreli 10 dollara olsa belə şirkətin bazar dəyəri 2.5 trilyon dollar təşkil edəcək. “Saudi Aramco”nun İctimai təşəbbüs Təşkilatına keçirilməsi və səhimlərinin PIF fonduna köçürülməsindən sonra Səudiyyə Ərəbistanı artıq neftdən deyil investisiyalardan gəlir əldə etməyə başlayacaq. Bin Salman bildirib ki, belə olan təqdirdə krallığın neftdən aslılığı 20 il ərzində tamamilə aradan qaldırılacaq. "Bloomberg"dən bidlirilir ki, fondun toplayacağı vəsait o qədər böyük olacaq ki, hətta “Apple”, “Google” və “Berkshire Hathaway” satın almağa belə yetəcək. Hazırkı nəhəng suveren fond SAMA 632 milyard dollar aktivə malikdir.

Qaçaqmalçılıq yolu ilə ölkə ərazisinə gətirilənlər

Xaçmaz Gömrük İdarəsinin əməkdaşları külli miqdarda siqaretin qaçaqmalçılıq yolu ilə ölkə ərazisinə gətirilməsi və realizə edilməsi cəhdlərinin qarşısını alıblar. Dövlət Gömrük Komitəsindən “APA-Economics”ə verilən məlumata görə, həyata keçirilən tədbir nəticəsində Xaçmaz Gömrük İdarəsi “Samur” gömrük postunun qarşısında duran “VAZ 21099” markalı nəqliyyat vasitəsi saxlanılıb. Həmin nəqliyyat vasitəsinə baxış zamanı avtomobilin salonundan Belarusun aksiz markası ilə markalanan cəmi 39 min ədəd “NZ Gold Compact”, “NZ Black Compact” və “NZ Sun” adlı siqaretlər aşkar olunaraq götürülüb. Digər əməliyyat məlumatı əsasında isə Xaçmaz şəhərindəki “Şahzadə” şadlıq sarayının qarşısında duran və Azərbaycan vətəndaşının idarə etdiyi “VAZ 2102” markalı nəqliyyat vasitəsi saxlanılıb. Həmin nəqliyyat vasitəsinə baxış zamanı isə avtomaşının yük yerindəki 3 ədəd çantadan Belarus Respublikasının aksiz markası ilə markalanan 60 min ədəd “NZ Gold Compact” markalı siqaret aşkar edilib.

MDB-də ən yaxşı ölkə

Rusiyanın "Travel.ru" turizm saytı 2016-cı ildə MDB ölkələrində istirahət üçün perspektivli sayılan turizm istiqamətlərini müəyyənləşdirib. Reytinq son bir ildə müstəqil şəkildə dincəlməyə gedən rusiyalı turistlərin bron etdikləri otellərin və mənzillərin sayına əsasən tərtib olunub. Sayta xəbər verir ki, Azərbaycan bu il xaricdə dincələn ruslar üçün MDB-də ən yaxşı ölkə seçilib və reytinq cədvəlinə liderlik edib. Azərbaycandan başqa, Qazaxıstan, Qırğızıstan və Belarus da siyahıda yer alıb. MDB ölkələri rusiyalı turistlər üçün nisbətən ucuz qiymətlər, inkişaf etmiş infrastruktur, vizasız giriş və əsasən yerli sakinlərin rus dilində danışa bilmələri ilə cəlbedici olublar. 2015-ci ildə Azərbaycana gələn turistin 685 mini Rusiyanın payına düşüb. Onlar, əsasən, paytaxt Bakı, Qusar, Gəncə, Şamaxı, Qəbələ, Naftalan, Göygöl, Xudat, Xaçmaz, Astara, Siyəzən və Lənkəranın görməli yerləri ilə tanış olublar.  

Böyük Vətən müharibəsi-71

"Azərbaycan Hava Yolları" QSC (AZAL) 9 May - Böyük Vətən müharibəsində qələbənin 71-ci ildönümünə həsr olunmuş yeni aksiyaya başlayır. AZAL-ın mətbuat xidmətindən “APA-Economics”ə  verilən məlumata görə, aksiya çərçivəsində Sovet İttifaqı qəhrəmanları və SSRİ Şöhrət Ordeninin 3 dərəcəsi ilə təltif olunan şəxslər, I, II və III qrup Böyük Vətən müharibəsi əlilləri və iştirakçıları, Böyük Vətən müharibəsində yaralanan, kontuziya alan və həlak olan hərbi qulluqçuların dul arvadları AZAL-ın marşrut şəbəkəsinin istənilən istiqamətinə pulsuz aviabilet əldə edə biləcəklər. Aksiya çərçivəsində pulsuz aviabilet həmçinin onları müşayiət edən bir sərnişin üçün də nəzərdə tutulub. Aksiya çərçivəsində aviabiletlərin rəsmiləşdirilməsinə 11 aprel tarixindən başlanılacaq. Gediş tarixi mayın 3-dən 12-dəkdir. Geri dönüş tarixi isə sərnişinlərin istəyindən asılıdır. "İkinci Dünya müharibəsində qələbənin qazanılmasında Azərbaycan xalqının böyük xidməti vardır. Biz bu qələbəni bizə hədiyyə edənlərə böyük hörmətlə yanaşırıq. Azərbaycanın milli aviadaşıyıcısı üçün veteranlara uçuşlar yerinə yetirdiyimiz istənilən şəhərdə olmaq imkanı yaratmaq böyük şərəfdir", - deyə AZAL QSC-nin vitse-prezidenti Eldar Hacıyev bildirib. Veteranlar aviabiletləri AZAL-ın kassalarında, həmçinin aviaşirkətinin xarici dövlətlərdəki nümayəndəliklərində rəsmiləşdirə bilərlər. Bu aksiya çərçivəsində aviabilet əldə etmək üçün Böyük Vətən müharibəsi veteranları kateqoriyasına mənsub olduğunu təsdiqləyən sənəd təqdim olunmalıdır.      

Dəmir yolları ilə bağlı statistika açıqlanıb

Ermənistanın Azərbaycana təcavüzü nəticəsində işğal altında qalan dəmir yolları ilə bağlı statistika açıqlanıb. “Azərbaycan Dəmir Yolları” Qapalı Səhmdar Cəmiyyətinin mətbuat katibliyinin rəisi Nadir Əzməmmədovun APA-ya verdiyi məlumata görə, erməni təcavüzü nəticəsində Azərbaycan dəmir yollarının 240,4 km sahəsi işğal altına düşüb. Bura Horadiz-Ordubad sahəsi üzrə 144 km (o cümlədən Mehri rayonu üzrə 43, 4 km), Mincivan-Qafan sahəsi üzrə 39,1 km, Təzəkənd-Xankəndi sahəsi üzrə 51,0 km, Qazax-Barxudarlı sahəsi üzrə 6,3 km sahə daxildir.  İşğal nəticəsində dəmir yolunun təsərrüfatlarına təxminən 45 mln. 60 min dollar məbləğində ziyan dəyib. 1992-ci ilin aprel ayından Mincivan dövriyyə deposu tamam dağıdılıb. Depoda olan 10 ədəd müxtəlif markalı teplovoz blokadada qalıb, təqribən 14 mln. dollar həcmində ziyan dəyib. Vaqon təsərrüfatına dəyən ziyanın təqribi miqdarı 4 mln. 860 min dollar məbləğindədir. Horadiz-Mincivan-Qafan-İmişli stansiyalarında olan vaqonların texniki-müayinə məntəqələri (TMM), cari təmir  sexləri, qaldırıcı mexanizmlər, vaqonların təmiri üçün xüsusi dalan yolları, xeyli miqdarda yük vaqonları və sairə texniki avadanlıqlar dağıdılıb. Yol təsərrüfatı üzrə dəyən ziyanın miqdarı 10 mln. 250 min dollar təşkil edir. Bura istehsal gücü 200 min kub olan çınqıl zavodu, yol distansiyalarının emalatxanaları, drezinlər, qaldırıcı qurğular, ağır maşın-mexanizmləri, inzibati binalar, yoldəyişdirici qurğular, müxtəlif tipli relslər, böyük və orta körpülər, tunellər, qalereyalar, keçidlər və s. avadanlıqlar daxildir. Daşıma Proseslərini İdarəetmə Birliyi üzrə işğal olunmuş stansiyalara Horadiz-Mincivan sahəsində dəymiş ziyanın təqribi miqdarı 12 mln. 350 min dollar məbləğindədir. Rabitə  və İşarəvermə, Enerji təchizatı təsərrüfatlarının Horadiz-Mincivan sahəsində dəymiş ziyanın təqribi  miqdarı 3 mln. 600 min dollar  təşkil edir. Bura 80 km. ikixətli xüsusi markalı kabellər, avtomatik bloklama sistemləri, rabitə və teleqraf qurğuları, yerli ATS, dispetçer mərkəzləşdirmə qurğusu, Mincivan-Bartaz , Mincivan-Xurama sahələrində olan birxətli  avtomatik bloklama  sistemləri, Mincivan-Zəngilan sahəsində rele yarımavtomat bloklama sistemi daxildir. Qeyd edək ki, “Azərbaycan Dəmir Yolları” Qapalı Səhmdar Cəmiyyətinin xətt boyu yerləşən təşkilatlarında keçirilən anım tədbirlərində 31 mart soyqırımı qurbanlarının xatirəsi yad olunur, faciəni yaradan səbəblər, soyqırımı nəticəsində vurulan maddi və mənəvi ziyan bir daha xatırlanır.    

Vəzifə saxtakarlığı

Baş prokuror yanında Korrupsiyaya qarşı Mübarizə Baş İdarəsində Bakı Apellyasiya Məhkəməsinin “Muğanbank” ASC-nin Kredit Departamenti müdirinin qanunsuz əməlləri barədə araşdırma aparılıb. Baş Prokurorluğun mətbuat xidmətindən APA-ya verilən məlumata görə, araşdırma zamanı məlum olub ki, “Muğanbank” ASC-nin Kredit Departamentinin müdiri Samir İsmayılov vəzifə səlahiyyətlərindən sui-istifadə edərək özü və ya üçüncü şəxs üçün qanunsuz olaraq maddi və sair nemətlər əldə etmək məqsədilə vətəndaşın razılığı olmadan saxta etibarnamə əsasında ona məxsus mənzili qanunsuz olaraq qeyd olunan bankın xeyrinə ipoteka ilə yüklü edib. İsmayılovun vəzifə saxtakarlığı etməsində şübhələr üçün əsaslar olduğundan fakta görə Cinayət Məcəlləsinin 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb. Hazırda iş üzrə zəruri istintaq-əməliyyat tədbirləri davam etdirilir.  

9000-dən çox yeni iş yeri açılıb

İqtisadiyyat Nazirliyinin Sahibkarlığa Kömək Milli Fondu iqtisadiyyatın müxtəlif sahələrində fəaliyyət göstərən sahibkarlıq subyektlərinin investisiya layihələrinin maliyyələşdirilməsini davam etdirir. Martın 29-da bu istiqamətdə növbəti tədbir – Xəzər rayonunun Zirə qəsəbəsində sahibkarlığın güzəştli kreditləşdirilməsi məsələlərinə dair işgüzar forum keçirilib. Nazirliyin mətbuat xidmətindən verilən məlumata görə, tədbirdə sahibkarlara güzəştli kreditlərin alınması mexanizmi barədə ətraflı məlumat verilib, Xəzər rayonunda həyata keçirilməsi məqsədəuyğun hesab olunan nümunəvi layihələr təqdim olunu b , sahibkar-müvəkkil kredit təşkilatı münasibətlərinin möhkəmləndirilməsi istiqamətində müzakirələr aparılıb, sahibkarların investisiya layihələri güzəştli qaydada maliyyələşdirilib. 70-ə yaxın sahibkarın iştirak etdiyi forum çərçivəsində Xəzər rayonunun iqtisadi potensialının reallaşdırılması məqsədilə prioritet hesab olunan istixana, zeytunçuluq və üzümçülük təsərrüfatlarının, ət kəsimi, üzlük daşların və plastik qabların istehsalı müəssisələrinin yaradılması üzrə nümunəvi investisiya layihələrinin təqdimatı keçirilib, kiçik həcmli investisiya layihələrinin ümumi dəyərinin 100%-dək hissəsinin dövlətin güzəştli kreditləri hesabına maliyyələşdiriləcəyi bildirilib, sahibkarlara nümunəvi layihələr və metodiki materiallar paylanıb. Sahibkarlığa Kömək Milli Fondunun icraçı direktoru Şirzad Abdullayev bildirib ki, indiyədək Bakı şəhərinin və onun qəsəbələrinin sosial-iqtisadi inkişafına dair dövlət proqramları çərçivəsində paytaxt qəsəbələrində sahibkarlıq subyektlərinin 1200-ə yaxın investisiya layihəsinin maliyyələşdirilməsinə 307 milyon manat güzəştli kredit verilib, digər sahələrlə yanaşı, müasir texnologiyaların tətbiqinə əsaslanan çörək zavodlarının, istixana, quşçuluq təsərrüfatlarının, logistik mərkəzlərin, ət emalı, metal konstruksiya, neft-kimya sənayesi avadanlıqları, mebel və digər sənaye müəssisələrinin yaradılması üzrə investisiya layihələri maliyyələşdirilib, 9000-dən çox yeni iş yerinin açılması imkanı yaradılıb. İşgüzar forumda Bakı qəsəbələrində fəaliyyət göstərən 18 sahibkara 3,2 milyon manat güzəştli kredit verilib. Verilmiş kreditlər əsasən heyvandarlıq, quşçuluq, tərəvəzçilik, tikinti materiallarının istehsalı sahələrinin inkişafına yönəldiləcək. Bu kreditlərin reallaşdırılması hesabına 100-dən çox yeni iş yerinin açılması mümkün olacaq. Forum çərçivəsində Xəzər rayonunun Zirə qəsəbəsində güzəştli kredit ayrılmış zeytunçuluq təsərrüfatına və ildə 4 min ton tərəvəz məhsulları istehsal edə biləcək müasir istixana kompleksinə baxış keçirilib. Ümumilikdə Bakı şəhərinin qəsəbələrində 109,8 ha ərazidə illik istehsal gücü 36,2 min ton tərəvəz məhsulları, 8 milyon ədəd dekorativ bitkilər, 10,6 milyon ədəd tərəvəz ştilləri olan 25 müasir istixana kompleksinin yaradılmasına 77,8 milyon manat dövlətin güzəştli kreditləri verilib.  

Yol tikintisinə 140 milyon dollar ayrılıb

Dünya Bankı Bakı-Şamaxı avtomobil yolunun genişləndirilməsi məqsədi ilə Azərbaycana 140 milyon dollar həcmində maliyyə vəsaiti ayırıb.  Bu barədə Dünya Bankının mətbuat xidməti xəbər verib. Məlum olduğu kimi, Azərbaycan hökuməti Bakı-Şamaxı avtomobil yolunun dörd zolağadək genişləndirilməsi üçün bankdan əlavə maliyyə vəsaiti almaq üçün müraciət etmişdi. Mətbuat xidmətinin məlumatındа həmçinin bildirilir ki, Dünya Bankı eyni zamanda Belarusa büdcə vəsaitlərinin idarəetməsi sisteminin təkmilləşdirilməsi üçün 10 milyon ABŞ dolları ayırıb.