“Macarıstan günləri” çərçivəsində…

Bakıda keçirilən “Macarıstan günləri” çərçivəsində martın 16-da Nizami Kino Mərkəzində “İnsanın faciəsi” tammetrajlı animasiya filmi (Azərbaycan dilində subtitrlərlə) nümayiş olunub.Azərtac xəbər verir ki, filmin nümayişindən əvvəl Macarıstanın ölkəmizdəki səfiri İmre Laslotski Bakıda “Macarıstan günləri”nin təşkilinə görə Azərbaycanın Birinci vitse-prezidenti xanım Mehriban Əliyevaya minnətdarlığını bildirib. Qeyd edib ki, “İnsanın faciəsi” filmi macar yazıçısı İmre Madaçın eyniadlı mənzum-poetik dramı əsasında çəkilib. Səfir 150 il bundan əvvəl yazılmasına baxmayaraq “İnsanın faciəsi” əsərinin bu gün aktuallıq kəsb etdiyini, müasir dövrlə səsləşdiyini vurğulayıb.Filmin rejissoru Marsel Yankovic çıxışında İmre Madaçın möhtəşəm “İnsanın faciəsi” dramının indiyə qədər 40-dan çox dilə, o cümlədən bütün Avropa dillərinə tərcümə olunduğunu, sonuncu dəfə isə Azərbaycan dilinə tərcümə edildiyini söyləyib.xeber100.com

Xətai Sənət Mərkəzində sərgi keçirilib

Martın 16-da Xətai Sənət Mərkəzində Novruz bayramına həsr edilmiş rəsm müsabiqəsinin yekun sərgisi keçirilib.Azərtac xəbər verir ki, müsabiqədə 100-dək uşaq və yeniyetmənin Novruza həsr edilmiş rəsmləri nümayiş olunub. Bildirilib ki, müsabiqənin təşkilinin məqsədi gənc rəssamlar arasında müvafiq yaradıcılıq texnikasını yaşatmaq və gələcək inkişafına stimul yaratmaqdır. Müsabiqəyə təqdim edilən rəsmlər sırasından bədii dəyərə malik əsərlər seçilərək sərgilənib.xeber100.com

Mahnı Teatrında anım günü keçirilib

Martın 15-də Mahnı Teatrında Türkiyənin istiqlal şairi Mehmet Akif Ersoyun anım günü keçirilib.Azərtac xəbər verir ki, Bakı Yunus Əmrə İnstitutunun təşəbbüsü ilə keçirilən anım tədbirdə Türkiyənin ölkəmizdəki səfiri Erkan Özoral Mehmet Akif Ersoyu böyük istiqlal şairi və ictimai xadim kimi xarakterizə edib.Bildirib ki, Osmanlı dövlətinin tənəzzülü dövründə Vətənin işğalına dözməyən şairi xalqı milli azadlıq uğrunda mübarizəyə ruhlandıran şeirlər yazıb. Şair bu gün dillər əzbəri olan istiqlal marşını da o illərdə yazıb.Tədbirdə Milli Məclisin deputatları Q.Paşayeva, H.Məmmədov, Bakı Yunus Əmrə İnstitutunun direktoru İ.Yıldırım və digər çıxış edənlər Mehmet Akif Ersoyun Vətəni və xalqı qarşısında böyük işlər gördüyünü vurğulayıblar. Türkiyə Cümhuriyyətinin qurulmasında, şüurlarda vətənpərvərlik ideyalarının oyanmasında bu böyük şəxsiyyətin danılmaz əməyi olduğunu diqqətə çatdırıblar. Onun yaradıcılığını əhatə edən 8 cildlik əsərlər toplusunun başdan-başa doğulduğu Vətənə sevgi və fədakarlıqdan yoğurulduğunu bildiriblər.Tədbirdə Mehmet Akif Ersoyun seirləri, sözlərinə bəstələnmiş musiqi əsərləri ifa olunub.Sonda sözləri böyük şairə məxsus olan və yaranmasından 96 il keçən Türk İstiqlal marşı səsləndirilib.xeber100.com

“Erasmus” layihəsi çərçivəsində ustad dərsləri təşkil olunacaq

Martın 19-dan 26-dək Üzeyir Hacıbəyli adına Bakı Musiqi Akademiyasında “Erasmus” layihəsi çərçivəsində ustad dərsləri təşkil olunacaq.Azərtac xəbər verir ki, Bakı Musiqi Akademiyası və Luici Kerubini adına Florensiya Konservatoriyasının birgə keçirəcəyi ustad dərslərində akademiyanın müəllim və tələbə heyəti iştirak edəcək.Xalq artistləri Xuraman və Fidan Qasımova bacılarının da qatılacağı ustad dərsləri çərçivəsində konsert proqramı nəzərdə tutulur.Qeyd edək ki, layihə ölkələrarası mədəni əlaqələrin möhkəmləndirilməsini təmin etmək və milli mədəniyyətlərin mübadiləsini həyata keçirmək məqsədi daşıyır.xeber100.com

Opera və Balet Teatrı təqdim edir

Aprelin 8-də Opera və Balet Teatrında C.Puççininin  “İl Tabarro” (“Plaş”) operasının tamaşası keçiriləcəkdir.Bu operanın ilk tamaşası 14 dekabr 1918-ci ildə Nyu-Yorkda məşhur Metropoliten-Operada baş tutmuş və tamaşa o zaman  çox böyük uğur qazanmışdı. Xatırladaq ki, Opera və Balet Teatrında "İl Tabarro" ilk dəfə 2014-cü ildə Almaniyalı sənətkarlar - rejissor Lüdviq Bauman və dirijor Korneliya fon Kerssenbrok tərəfindən səhnəyə qoyuylmuşdur.xeber100.com .

“Muğam televiziya müsabiqəsi”nə start verilib

Altıncı “Muğam televiziya müsabiqəsi”nə start verilib. Bu barədə Azərtac-a “Azərbaycan Televiziya və Radio Verilişləri” Qapalı Səhmdar Cəmiyyətinin mətbuat xidmətindən məlumat verilib.Bildirilib ki, seçim turuna fevralın 17-də yekun vurulub.20 iddiaçı – Almaxanım Əhmədli, Nərgiz Nuriyeva, Gülər Babayeva (Bakı), Arzu Mahmudova (Ağcabədi), Atlas Mehdiyeva (İmişli), Rəvanə Əmiraslanlı (Gəncə), Səma Sultanova (Xocavənd), Nüşabə Kərimova (Zəngilan), Türkan Orucova, Çinarə Alıyeva (Sumqayıt), Məcid Asri (İran İslam Respublikası), Pərviz Qasımov, Valid Abdullayev, Vüsal Cəfərov (Ağdam), Məftun Məmmədov (Zərdab), Fərhad Ramazanov (Lənkəran), Mirəli Sarızadə, Taleh Hüseynli (Beyləqan), Nurlan Namazov (Goranboy) və Qənbər Axundov (Laçın) müsabiqəyə vəsiqə qazanıb.xeber100.com      

Bu gün “İlaxır çərşənbə”dir

Novruz bayramı müxtəlif ayin və mərasimlərin, xüsusilə 4 çərşənbə axşamının sehrindən keçib gəlib. 4 ünsürün – su, od, yel və torpağın adı ilə bağlanan bu çərşənbələr özünəməxsus mifoloji və etnoqrafik mahiyyəti ilə seçilib.Azərtac xəbər verir ki, hər il olduğu kimi, bu il də Bakı Şəhər İcra Hakimiyyəti xalqımızın milli bayramı - “İlaxır çərşənbə”ni təntənəli şəkildə qeyd edir. Belə ki, martın 14-də səhər metronun “İçərişəhər” stansiyası və Bakı Şəhər İcra Hakimiyyəti binasının yanındakı ərazidən Novruz personajları – Dədə Qorqud, Bahar qızı, Kosa, Keçəl musiqi qruplarının, həmçinin dəvələr, süvarilər və faytonların müşayiəti ilə böyük karvan Suraxanı “Atəşgahı”na yollanıb.Bayram karvanı Bakı Şəhər İcra Hakimiyyətindən hərəkətə başlayaraq İstiqlaliyyət küçəsi ilə “Beşmərtəbə” dairəsi, Heydər Əliyev Sarayının yanından keçməklə metronun Sahil stansiyası, Hökumət evi, Ali Məhkəmənin qarşısından hərəkət etməklə Heydər Əliyev prospektinə çıxıb və metronun “Koroğlu” stansiyasından Hava Limanı avtomagistralı ilə Suraxanı “Atəşgahı”na yola düşüb. “Atəşgah”dan od götürən bayram karvanı Hava Limanı avtomagistralı, Heydər Əliyev prospekti, 28 May küçəsini keçərək Heydər Əliyev Sarayının arxasından keçməklə Fəvvarələr meydanından Gənclər meydanına gələcək, bayram tonqalını alovlandıracaq. Dədə Qorqudun Novruz xeyir-duası ilə saat 19.00-da incəsənət ustalarının iştirakı ilə bayram konserti və atəşfəşanlıq təşkil ediləcək.xeber100.com

Milli Teatr Günü münasibətilə…

Azərbaycan Dövlət Musiqili Teatrında Ü.Hacıbəylinin “Arşın mal alan” operası əsasında hazırlanan eyniadlı səhnə əsəri nümayiş olunub.Teatrın mətbuat xidmətindən Milli Teatr Günü münasibətilə təqdim olunan tamaşanın nümayişindən əvvəl Azərbaycan teatr sənətinin 144 illik şərəfli yoluna qısa nəzər salınıb. Bu tarixi prosesdə Musiqili Teatrın oynadığı roldan, görülən işlərdən söz açılıb. Daha sonra tamaşa təqdim edilib.xeber100.com

“Bahar süitası” adlı klassik musiqi axşamı təşkil olunub

Beynəlxalq Muğam Mərkəzində “Bahar süitası” adlı klassik musiqi axşamı təşkil olunub.Azərtac xəbər verir ki, respublikanın gənc ifaçılarının qatıldığı konsert proqramında Azərbaycan bəstəkarlarının əsərləri səsləndirilib.Həmçinin, konsertdə Azərbaycan Dövlət Simli Kvarteti də müxtəlif kompozisiyalar təqdim edib.Gecədə təqdim olunan bir-birindən gözəl parlaq ifalar konserti daha da maraqlı edib.xeber100.com

Klassik musiqi axşamı təşkil olunacaq

Martın 14-də Azərbaycan Dövlət Filarmoniyasının kamera və orqan musiqisi zalında klassik musiqi axşamı təşkil olunacaq.Filarmoniyadan Azərtac-a bildirilib ki, konsertdə bədii rəhbər və baş dirijor, Əməkdar Artist Faiq Sadıqovun rəhbərliyi ilə Azərbaycan Televiziyası və Radiosunun Səid Rüstəmov adına Xalq Çalğı Alətləri Orkestri çıxış edəcək. Solist tanınmış tarzən Səbuhi Cəfərovdur.Konsertdə Q.Qarayev, H.Xanməmmədov, S.Ələsgərov, V.Adıgözəlov, O.Kazımi və digər bəstəkarların əsərləri səsləndiriləcək.xeber100.com