“Art Tower” qalereyasında “Bahar” adlı rəsm sərgisi açılıb

İçərişəhərdə yerləşən “Art Tower” qalereyasında “Arts School” rəssamlıq məktəbinin şagirdlərinin “Bahar” adlı rəsm sərgisi açılıb.Azərtac xəbər verir ki, sərgi “İçərişəhər” Dövlət Tarix-Memarlıq Qoruğu İdarəsi, Mədəniyyət və Turizm Nazirliyi və “Arts Council Azerbaijan” (Azərbaycan İncəsənət Konsulluğu) qeyri-hökumət təşkilatının dəstəyi ilə gerçəkləşib. Sərgidə məktəbin şagirdlərinin bahar fəslinə həsr edilmiş müxtəlif janrlı əsərləri nümayiş olunub.2010-cu ildən fəaliyyət göstərən “Arts School” məktəbi “Arts Council Azerbaijan” təşkilatının layihəsidir və gənc rəssamların sənətə olan marağını inkişaf etdirmək məqsədi daşıyır. Layihənin rəhbəri Sona Quliyevadır.Sərgi aprelin 10-dək davam edəcək.xeber100.com

Mədəniyyət nazirlikləri bir sıra layihələr hazırlayıb

"Azərbaycan bizə yaxın qonşu, ən başlıcası dost və qardaş ölkədir. Bütün sahələrdə olduğu kimi, mədəniyyət sahəsində də əlaqələrimiz inkişaf edir".Bu sözləri jurnalistlərə müsahibəsində Gürcüstanın mədəniyyət və abidələrin mühafizəsi naziri Mixail Georqadze deyib.Nazir bildirib ki, Azərbaycanın və Gürcüstanın mədəniyyət nazirlikləri bir sıra layihələr hazırlayıb. Son illər musiqi kollektivlərimiz qarşılıqlı səfərlər həyata keçirir, maraqlı konsert proqramları ilə çıxış edirlər.M.Georqadze deyib: “Hazırda Tbilisi Konservatoriyasının tələbələri Azərbaycanda səfərdədirlər. Onlar Bakıda azərbaycanlı tələbələrlə birgə maraqlı proqramlarla çıxış edəcəklər. Azərbaycan Milli Konservatoriyasının tələbələri də yaxın vaxtlarda Gürcüstana səfər edəcəklər. Düşünürəm ki, azərbaycanlı tələbələrin Gürcüstan paytaxtında təqdim edəcəkləri musiqi nömrələri gürcü ictimaiyyətinin xoşuna gələcək. Biz də onlara lazımi dəstəyi göstərəcək, konsert vermələri üçün şərait yaradacağıq”.xeber100.com

Opera və Balet Teatrı təqdim edir

Aprelin 15-də Opera və Balet Teatrında bəstəkar Əfrasiyab Bədəlbəylinin “Qız qalası” baleti təqdim olunacaq.Teatrdan verilən məlumata görə, səhnə əsəri görkəmli bəstəkarın 110 illiyi çərçivəsində nümayiş olunacaq.Səhnə əsərində rolları Xalq Artisti Gülağası Mirzəyev və Əməkdar artistlər Tamilla Məmmədzadə və Makar Ferştandt ifa edəcək.Tamaşanın dirijoru Cavanşir Cəfərovdur.Qeyd edək ki, “Qız qalası”nın ilk nümayişi 1940-cı il aprelin 16-da baş tutub.xeber100.com

IX Beynəlxalq Festivalın proqramı açıqlanıb

Aprelin 23-dən 27-dək Bakıda keçiriləcək IX Beynəlxalq Mstislav Rostropoviç Festivalının proqramı açıqlanıb. Turizm Nazirliyinin təşkilatçılığı ilə reallaşacaq festivalın bütün konsertləri Filarmoniyada təşkil olunacaq.Azərtac festivalın saytına istinadla xəbər verir ki, aprelin 23-də keçiriləcək açılış mərasimində Üzeyir Hacıbəyli adına Azərbaycan Dövlət Simfonik Orkestri çıxış edəcək. Aprelin 26-da D.Şostakoviç adına Sankt-Peterburq Filarmoniyasının Rusiya Akademik Simfonik Orkestrinin Əməkdar Kollektivi çıxış edəcək.xeber100.com

Beynəlxalq Fərc Film Festivalı keçiriləcək

Aprelin 21-dən 28-dək Tehranda Beynəlxalq Fərc Film Festivalı keçiriləcək.Festivalın təşkilat komitəsindən bildiriblər ki, tədbirə 58 ölkədən 140 film təqdim olunacaq.Festivalda Rusiya, Fransa, Almaniya, Yaponiya, İsveç, Misir, Bolqarıstan, Polşa və başqa ölkələrlə yanaşı, Azərbaycan filmləri də nümayiş olunacaq.xeber100.com  

Avropa Azərbaycan Cəmiyyətinin təşəbbüsü ilə…

“Gənc səslər, qədim nəğmə” filmi aprelin 12-də Parisdə “Avropa ətrafında Avropa” (“L’Europe autour de l’Europe”) festivalında nümayiş etdiriləcək. Avropa Azərbaycan Cəmiyyətinin (TEAS) təşəbbüsü ilə çəkilmiş filmin müəllifi Amerika Muğam Cəmiyyətinin prezidenti Cefri Verbokdur.Azərtac xəbər verir ki, bu barədə məlumat TEAS-ın və festivalın saytında yer alıb.Qarabağdan olan uşaqların muğamı çox məharətlə ifa etdiyini bilən Cefri Verbok 2000-ci ildə azərbaycanlı məcburi köçkün və qaçqınların məskunlaşdığı düşərgələrdə onları üzə çıxarmaq üçün axtarışa başlayıb. Filmdə C.Verbokun vaxtilə dinlədiyi üç azyaşlı ifaçının yeni köçkün qəsəbələrində axtarışları, onların indiki həyatı və musiqi bacarıqlarının necə inkişaf etdirməsi haqqında söz açılır.xeber100.com

“Bitməyən savaş” adlı tədbir-sərgi keçiriləcək

Aprelin 6-da İstiqlal Muzeyinin ekspozisiyasında keçən il aprel ayında baş verən döyüşlərə həsr olunan “Bitməyən savaş” adlı tədbir-sərgi keçiriləcək.Muzeydən Azərtac-a bildirilib ki, muzeydə təşkil olunan sərgidə 2016-cı il aprel döyüşlərində həlak olan Əbdülməcid Axundov, Fəxrəddin Qurbanlı, Samid İmanov, Müşfiq Orucov, Orxan Müstəcəbov, Vüqar Yusifov, Murad Mirzəyev, Raquf Orucov və Pəncəli Teymurovun əşyaları nümayiş olunacaq.Tədbirdə şəhidlərin qohumları və dostları, Milli Qvardiyanın, Daxili Qoşunların əsgərləri, Sərhəd Qoşunların şəxsi heyəti və digər qonaqlar iştirak edəcəklər.Qeyd edək ki, 2016-cı il aprel ayının 1-dən 2-nə keçən gecədən başlayaraq Azərbaycan və Ermənistan silahlı qüvvələri arasında “Dördgünlük müharibə” kimi tarixə düşmüş hərbi münaqişə baş vermişdi. Bu döyüş zamanı Azərbaycan Silahlı Qüvvələrinin birləşmələri Goranboy rayonuna və Naftalan şəhərinə təhlükə yarada biləcək Talış kəndi ətrafındakı yüksəklikləri, eləcə də Seysulan məntəqəsini azad edib, Füzuli rayonu istiqamətində yerləşən “Lələ təpə” adlandırılan yüksəkliyə nəzarəti ələ keçirib, Ağdərə-Madagiz istiqamətində yolların nəzarətdə saxlanılmasını təmin ediblər.xeber100.com

Mədəniyyət və Turizm Nazirliyinin təşkilatçılığı ilə…

Aprelin 7-dən 13-dək Bakı İncəsənət Mərkəzinin “Yeni Gallery” sərgi salonunda Mədəniyyət və Turizm Nazirliyinin təşkilatçılığı ilə “Azərbaycan bədii plakatı: 1994-2005-ci illər” adlı sərgi açılacaq.Nazirlikdən Azərtac-a bildirilib ki, tədbirin açılış mərasimi aprelin 7-də baş tutacaq. Sərgidə Azərbaycanın müstəqillik dövrünün 12 ili ərzində yaradılmış bədii plakat nümunələrinin ən tanınmış əsərləri ictimaiyyətə təqdim ediləcək.xeber100.com

VI “Baku Fashion Night 2017” moda günləri keçiriləcək

Aprelin 14-də  "Baku Fashion Night"ın təşkilatçılığı ilə moda həvəskarları üçün VI "Baku Fashion Night 2017" təntənəli moda günləri keçiriləcək.Azərtac xəbər verir ki, bu layihə 2014-cü ilin aprel ayından ildə iki dəfə keçirilir. Layihənin məqsədi Azərbaycan dizaynerlərinə dəstək olmaq, həmçinin peşəkarlara və həvəskarlara fikir mübadiləsi aparmaq, dəb meyillərini müzakirə edərək onlara fikirlərini bildirmək imkanı verməkdir.xeber100.com

IX “Bahar süjetləri” müsabiqəsinin sərgisi açılıb

Rusiya İnformasiya və Mədəniyyət Mərkəzində həvəskar fotoqrafların IX “Bahar süjetləri” müsabiqəsinin sərgisi açılıb. Sərgidə təqdim olunan fotoşəkillərdə müəlliflərin Azərbaycan təbiətinin gözəlliyinə sevgisi əksini tapıb.Azərtac RİMM-in saytına istinadla xəbər verir ki, bu il ilk dəfə olaraq münsiflər heyətində gənc fotoqraf-rəssamlar Q.Hüseynov və F.Sultanov yer alıb. Onlar bir çox peşəkar fotosərgilərin iştirakçısı və laureatlarıdır.Alsu Yusupova, Aslan Əzimzadə və Nelli Hüseynova müsabiqənin laureatları olublar. “Orijinal ideya” nominasiyasında Viktoriya Vasilyeva və Tatyana Brovinanın işləri xüsusi mükafata layiq görülüb.“Rossotrudniçestvo” Agentliyinin Azərbaycandakı nümayəndəliyinin rəhbəri Valentin Denisov müsabiqənin laureatlarına diplom və mükafatları təqdim edib.xeber100.com