Muğam Mərkəzində klassik musiqi konserti olub

Beynəlxalq Muğam Mərkəzində klassik musiqi konserti olub. Ümumrusiya və beynəlxalq müsabiqələr laureatları Mariya Paxar (soprano), İlya Xardikov (tenor) rus və xarici ölkə bəstəkarlarının musiqisinə yazılmış operalardan ariyaları və romansları ifa ediblər. Onları fortepianoda Sergey Semyonov müşayiət edib. Rusiya İnformasiya-Mədəniyyət Mərkəzinin mətbuat xidmətindən AZƏRTAC-a verilən məlumata görə, konsert Azərbaycanda həyata keçirilən “Rus dili millətin mədəni kodu və millətlərarası ünsiyyət vasitəsi kimi” təhsil, maarifçilik layihəsi çərçivəsində təşkil edilib. Bu layihə dünyanın ən zəngin dillərindən biri olan rus dilinin qorunub saxlanmasına və onun statusunun artırılmasına yönəlib. Layihənin təşkilatçıları Kinofestivallar və beynəlxalq proqramlar mərkəzi, Moskvadakı L.N.Tolstoy Dövlət Muzeyi, “KinoFokus” şirkəti, Bakıdakı Rus Evi, Azərbaycan Dillər Universiteti və Beynəlxalq Muğam Mərkəzidir. Layihə Rusiya Prezidentinin Mədəni Təşəbbüslər Fondunun dəstəyi ilə həyata keçirilir. Azərbaycan Respublikası mədəniyyət nazirinin müavini Murad Hüseynov Rusiyanın Azərbaycandakı səfirliyinin, biznes strukturların, təhsil müəssisələrinin nümayəndələri, incəsənət xadimləri, mədəni ziyalılar, rusiyalı həmvətənlər konsertə gələnlər arasında olub.xeber100.com

“Əsrarəngiz Azərbaycan” adlı sənədli film çəkilib

Türkiyənin tanınmış aparıcısı, Azərbaycan həqiqətlərini dünyaya çatdıran Esra Gezginci “Əsrarəngiz Azərbaycan” adlı sənədli film ərsəyə gətirib. Türkiyənin Azərbaycandakı səfirliyindən verilən məlumata görə, sənədli filmin əsas mövzusu Azərbaycanın mədəni irsi, folkloru, xüsusilə Qarabağın tarixi, həmçinin Azərbaycan-Türkiyə dostluq-qardaşlıq münasibətləridir. Esra Gezgincinin sözlərinə görə, “Əsrarəngiz Azərbaycan” filmində Bakıdan Türk dünyasının paytaxtı Şuşaya qədər uzanan səyahəti əks etdirən ümumilikdə 10 veriliş çəkilib. Qeyd edək ki, sənədli film daha öncə Türkiyənin NTV kanalında izləyicilərə təqdim edilib. Verilişdə işğaldan azad olunan rayonlarımız haqda da danışan E.Gezginci Şuşanın önəmi barədə NTV izləyicilərinə ətraflı məlumat verib.xeber100.com

1 Aprel Ümumdünya Gülüş Günüdür

Hər il aprelin 1-nin ənənəvi olaraq Ümumdünya Gülüş Günü kimi qeyd olunması heç də səbəbsiz deyil. Bunu şərtləndirən başlıca səbəb insanların həyatlarını gülüşsüz təsəvvür etməmələridir. “Gülüş bir günəşdir, o qışı insanın üzündən götürür” deyimi də yəqin ki, insanların bu mənəvi-psixoloji dəyərə verdikləri ən düzgün qiymətdir. Gülüş Günü 500 il əvvəl Fransada yaranıb. O vaxt fransızlar yeni ili məhz həmin gün qarşılayırdılar. Amma Fransa kralı qərar verdi ki, yeni il yanvarın 1-də qeyd olunsun. Xalq kralın qərarından narazı qaldı. Buna etiraz etmək üçün müxtəlif tədbirlər keçirirdilər. Camaat kralın adamlarını lağa qoyurdu. Onları qonaqlığa dəvət edir, özləri həmin yerə gəlmir, yalan xəbərlər yayırdılar. Amma kral qərarını dəyişmədi. Aradan illər keçdi. Xalq yavaş-yavaş yeni ili yanvarın 1-də qeyd etməyə öyrəşdi. Bununla belə, 1 apreli də unutmadılar. Həmingünkü zarafatları yada salıb 1 apreli Gülüş Günü kimi qeyd etməyi qərara aldılar. Tezliklə bu ənənə bütün dünyaya yayıldı. Həmin gün insanlar bir-birini aldadır, özü də bundan heç kim incimir. Düzdür, hamı çalışır ki, 1 apreldə aldanmasın. Amma buna çox az adam nail olur.xeber100.com

“Mən dəyərəm min cavana” ikihissəli musiqili komediyası nümayiş olunacaq

Aprelin 2-də Azərbaycan Dövlət Akademik Musiqili Teatrında Faiq Sücəddinov və Tamara Vəliyevanın “Mən dəyərəm min cavana” ikihissəli musiqili komediyası nümayiş olunacaq. Teatrdan bildirilib ki, gözlənilməz və maraqlı situasiyalarla zəngin səhnə əsərinin ilk nümayişindən illər keçsə də, yenə də öz aktuallığını itirməyib və çox böyük maraqla baxılır. Tamaşanın budəfəki nümayişində rolları Xalq artisti, “Şöhrət” ordenli İlham Namiq Kamal və sənət ocağının digər əməkdaşları iştirak edəcək. Qeyd edək ki, tamaşa illər öncə görkəmli teatr və kino aktyoru, “Şöhrət” ordenlı Xalq artisti Hacıbaba Bağırovun sağlığında onun 75 illik yubileyi münasibətilə hazırlanıb. Lakin tamaşanın premyerasından 1 il öncə – 2006-cı ildə böyük sənətkarın 74 yaşında qəfil dünyasını dəyişməsi bütün planları dəyişir və 2007-ci ildə “Mən dəyərəm min cavana” onu sevənlərə bir təskinlik kimi təqdim olunur.xeber100.com

“Sən qayıdacaqsan” tamaşası Dövlət Sərhəd Xidmətinin Akademiyasının zabit heyətinə təqdim olundu

Martın 31-də Bakı Bələdiyyə Teatrının hazırladığı “Sən qayıdacaqsan” tamaşası Dövlət Sərhəd Xidmətinin Akademiyasının zabit heyətinə təqdim olundu. 31 mart 1918-ci ildə azərbaycanlılara qarşı törədilmiş soyqırımın timsalında bütün dünyada törədilmiş müharibələrə həsr olunan “Sən qayıdacaqsan” tamaşasının nümayişindən öncə Bakı Bələdiyyə Teatrının truppa müdiri, aktyor İsmayıl Atakişiyev çıxış edib. O, öncə Akademiyanın zabit heyəti teatrın adından salamladıqdan sonra bildirib ki, Azərbaycanın tarixində elə tarixi anlar var ki, həmin gün xalq tərəfindən müqəddəs hesab olunur. İstər teatrda, istər kinoda, təsviri sənətdə və s. sahələrdə həmin anlar öz əksini tapıb.  Bakı Bələdiyyə Teatrının repertuarında həmin tarixi anları yaşadan tamaşalar çoxluq təşkil edir. Belə tamaşalardan biri də bu gün sizlərə təqdim edəcəyimiz “Sən qayıdacaqsan” tamaşasıdır. Tamaşada müharibənin fəsadlarını yaşayan insanların hər birinin itirdiklərinin yolunu gözləməsi, müharibənin ağrı-acısı və sonda ümid dolu gözləntilər sabaha olan inamdan xəbər verir”. İ.Atakişiyev çıxışının sonunda bütün zabit heyətini soyqırımda həlak olanlar, eləcə də şəhidlərimiz üçün 1 dəqiqəlik sükuta dəvət etdi.   Daha sonra tamaşa təqdim olundu. Tamaşada qəhrəmanların yol ayrıclarını birləşdirib bir düz yol əmələ gətirməsi və bununla da onların həsrətinə son qoyulması və s. məqamlar müharibənin törətdikləri fəsadlara baxmayaraq insanoğlunun birlik olaraq yenidən həyatına davam etməsi, əsərin əsas ideyasını təşkil edir. Əsərin müəllifi və quruluşçu rejissoru, Əməkdar artist Bəhruz Vaqifoğlu, ideya müəllifi, Hüsniyyə Mürvətova, quruluşçu rəssam, Əməkdar mədəniyyət işçisi İlham Əsgərov, musiqi hissə müdiri, Əməkdar mədəniyyət işçisi Nazim Əbidov, işıqçı rəssam Tərlan Ələsgərli, kostyum sexinin müdiri Leyla Əkbərova, dizayn işləri üzrə tərtibatçı Səbuhi Səmədovdur. Tamaşada iştirak edirlər: Hüsniyyə Mürvətova(Əməkdar artist), Rafiq İbrahimov(Əməkdar artist), Mehman Abdullayev, Zülfiyyə Qurbanova, Toğrul Rza, Zülfiyyə Məmmədova, Elçin Muradov, Ülviyyə Rza, Fateh Muradov, Əzizə Həşimova. “Sən qayıdacaqsan” tamaşası Dövlət Sərhəd Xidmətinin Akademiyasının zabit heyəti tərəfindən böyük maraqla qarşılandı. Qeyd edək ki, Bakı Bələdiyyə Teatrının fəaliyyətinin mühüm istiqamətlərindən biri də gənc nəslə vətənpərvərlik hissi aşılamaqdan ibarətdir. Bu baxımdan da teatrın repertuarında olan tamaşalar əsasən gənc nəsildə yüksək vətənpərvərlik şüurunun formalaşmasına xidmət edir.xeber100.com  

XXV Beynəlxalq Rus Teatrları Festivalı keçiriləcək

Aprelin 7-dən 16-dək Sankt-Peterburqda “Rusiyada görüşlər” adlı XXV Beynəlxalq Rus Teatrları Festivalı keçiriləcək. Festivalın saytı xəbər verir ki, mədəni forum görkəmli rus dramaturqu Aleksandr Ostrovskinin anadan olmasının 200 illiyinə həsr olunub. Müstəqil Dövlətlər Birliyinə üzv ölkələrin teatr kollektivləri “Baltika evi” teatr-festivalının binasına toplaşacaqlar. Ölkəmizi bu festivalda Səməd Vurğun adına Azərbaycan Dövlət Akademik Rus Dram Teatrı təmsil edəcək. Aprelin 8-də teatrımız “Maskarad” tamaşasını nümayiş etdirəcək (rejissor – Azərbaycanın Xalq artisti Aleksandr Şarovskidir). Festival iştirakçıları tamaşaları müzakirə edəcək, diskussiyalar aparacaq, səhnə nitqi və aktyorluq sənəti üzrə ustad dərslərində, teatrın quruluş hissəsinin mütəxəssisləri üçün məşğələlərdə iştirak edəcəklər. Festivalın yubileyi ilə əlaqədar MDB-yə üzv ölkələrin rus teatrlarının son 25 il ərzində yaratdıqları ən maraqlı tamaşalardan bəhs edən “25 il birlikdə” adlı fotosərgi açılacaqxeber100.com

Musiqili Teatr aprel repertuarını təqdim edir

Azərbaycan Dövlət Akademik Musiqili Teatrı aprel ayı üçün zəngin və maraqlı repertuar tərtib edib. Sənət ocağının aprel repertuarını təqdim edirik: 1 aprel –“Bremen musiqiçiləri və Pen” , “Ər və arvad” 2 aprel –“Düyməcik”, “Mən dəyərəm min cavana” 7 aprel –“Nəğməmə inan” 8 aprel –“Qırmızı papaq”, “Kimdir müqəssir” 9 aprel –“Dəcəl çəpişlər”, “Utancaq qız”, “Baladadaşın toy hamamı” 14 aprel – “Molla Nəsrəddinin beş arvadı” 15 aprel –“Qırmızı papaq”, “O olmasın, bu olsun” 16 aprel – “Qızıl cücə”, “Amerikalı kürəkən” 21 aprel – “999-cu gecə” 22 aprel – “Sehrli nəğmə”, “Psix” 23 aprel – “Qoğalın macərası”, “Bəxtiyar” 28 aprel – “Paris Notr-Dama ithaf” 29 aprel – “Məchul pilləkən”, “Utancaq qız” , “Anamın kitabı” 30 aprel – “Buratino”, “Lara Martins Jazz club”xeber100.com

Martın 27-si Beynəlxalq Teatr Günü kimi qeyd olunur

Hər il martın 27-si Beynəlxalq Teatr Günü kimi qeyd olunur. Bu əlamətdar gün Beynəlxalq Teatr İnstitutunun 1961-ci ildə Vyanada keçirilmiş IX konqresində qəbul edilmiş qərara əsasən təsis olunub. Ənənəyə əsasən, hər il Beynəlxalq Teatr Günü münasibətilə görkəmli teatr xadimləri ictimaiyyətə müraciət ünvanlayırlar. Yaranmasının 150-ci ildönümü qeyd edilən Azərbaycan teatrında da Beynəlxalq Teatr Günü münasibətilə silsilə tədbirlər keçirilir. Azərbaycan teatr sənəti çox qədim və zəngin bir tarixə malikdir. XIX əsrin ikinci yarısından başlayaraq ölkəmizdə cərəyan edən ictimai-siyasi hadisələr maarifçilik hərəkatının inkişafına güclü təkan vermişdi. Həmin dövr Azərbaycan teatrı üçün də əlamətdar olmuşdu. Belə ki, böyük mütəfəkkir Mirzə Fətəli Axundzadə tərəfindən ədəbiyyatımıza dram janrının gətirilməsi xalq teatrının peşəkar teatr sənətinə çevrilməsində həlledici rol oynamışdı. Görkəmli maarifçi Həsən bəy Zərdabi və yazıçı Nəcəf bəy Vəzirovun təşəbbüsü ilə 1873-cü ildə Bakıda M.F.Axundzadənin “Lənkəran xanının vəziri” və “Hacı Qara” komediyalarının tamaşaya qoyulması ilə Azərbaycanda, eləcə də bütün müsəlman Şərqində dünyəvi, peşəkar teatrın təməli qoyulmuşdur. Uzun və şərəfli bir yol keçmiş Azərbaycan teatrı son illər ərzində daha da möhkəmlənərək yeni inkişaf mərhələsinə qədəm qoyub. Bu gün ölkəmizdə 30-a yaxın dövlət teatrı fəaliyyət göstərir. Bu teatrlarda 1000-ə yaxın aktyor çalışır. Ölkə rəhbərliyi bütün sahələrdə olduğu kimi, teatr sənətinin də inkişafına xüsusi diqqət yetirir. Teatr binalarının əsaslı təmiri, incəsənət ustalarının sosial-rifah halının yaxşılaşdırılması istiqamətində atılan addımlar bunun bariz nümunəsidir. Prezident İlham Əliyevin 2009-cu il 18 may tarixli Sərəncamı ilə təsdiq edilmiş “Azərbaycan teatrı 2009-2019-cu illərdə” Dövlət Proqramı uğurla həyata keçirilir. On illik bir dövrü əhatə edən proqram çərçivəsində Abdulla Şaiq adına Azərbaycan Dövlət Kukla, S.Vurğun adına Azərbaycan Dövlət Rus Dram, Azərbaycan Dövlət Gənc Tamaşaçılar, Azərbaycan Dövlət Akademik Milli Dram, Azərbaycan Dövlət Akademik Musiqili, Mingəçevir, Şuşa, İrəvan, Ağdam və Füzuli Dövlət Dram teatrlarının binalarında yüksək səviyyədə təmir-bərpa və yenidənqurma işləri aparılıb. Ötən illər ərzində teatrlarımız dünyanın 20-dən artıq ölkəsində, o cümlədən ABŞ, Almaniya, Türkiyə, Rusiya, Belarus, Gürcüstan, Fransa, Mərakeş, Finlandiya, İran, Misir, Hollandiya, Estoniya, Bolqarıstan, Ukrayna, Türkmənistan, Tacikistan, Başqırdıstan, İsveçrə, Moldova və Serbiyada keçirilən beynəlxalq tədbirlərdə Azərbaycanı layiqincə təmsil ediblər.xeber100.com

Azərbaycan xalqı Novruzu üçüncü ildir Qələbə sevinci ilə qeyd edir

Bu gün Novruz bayramıdır. Vətən müharibəsindəki qələbədən sonra Azərbaycan xalqı Novruzu üçüncü ildir Qələbə sevinci ilə qeyd edir. Qeyd edək ki, bu il Azərbaycana yaz fəsli martın 21-i Bakı vaxtı ilə saat 01:24:24-də qədəm qoyacaq. Bu zaman gecə ilə gündüz bərabərləşəcək, Günəş ekliptika üzrə hərəkət edərək ekvatoru kəsəcək və Cənub yarımkürəsindən Şimal yarımkürəsinə keçəcək. Həmin andan Şimal yarımkürəsində yaz fəsli, Cənub yarımkürəsində isə payız fəsli başlayacaq. Yaz fəslinin uzunluğu 92 gün 17 saat 33 dəqiqə 23 saniyə olacaq. Novruz bayramının təşəkkül tapmasında, inkişaf etməsində xalqımızın mühüm töhfəsi var. Sovet dövründə Novruz bayramının keçirilməsinə sərt qadağalar qoyulsa da, xalqımız onu həmişə qeyd etməyə can atıb. Milli adət-ənənələrimizə, o cümlədən Novruz bayramına yüksək qiymət verən Ulu Öndər deyib: “Novruz xalqımızın əsrlərdən bəri qoruyub saxladığı və bütün dövrlərdə həmişə əziz tutduğu bayramlardan biridir. Onun tarixi də Azərbaycan xalqının tarixi kimi keşməkeşli, enişli-yoxuşlu olmuşdur. Bu ulu bayramın müstəqil respublikamızda dövlət səviyyəsində qeyd edilməsi öz milli köklərimizə, adət-ənənələrimizə, tarixi keçmişimizə dərin ehtiram bəslədiyimizi və sarsılmaz tellərlə bağlı olduğumuzu nümayiş etdirir”. Novruz bir çox türk xalqları ilə bərabər, Azərbaycan xalqının milli-mənəvi varlığını dolğunluğu ilə əks etdirən, ümumxalq səviyyəsində qeyd olunan, etnik təfəkkürün ayrılmaz funksional səviyyəsinə çevrilən bayramdır. Novruz xalqın ortaq duyğu və düşüncələrini dilə gətirən, türk mədəniyyətinin qorunub yaşadılmasında əhəmiyyətli yeri olan qədim el bayramımızdır. Bayramınız mübarək olsun!

Azərbaycan Milli Xalça Muzeyi iki gün fəaliyyət göstərməyəcək

Novruz bayramı ilə əlaqədar Azərbaycan Milli Xalça Muzeyi iki gün fəaliyyət göstərməyəcək. Muzeydən bildirilib ki, martın 20-21-i istisna olmaqla bayramın digər günlərində muzey ekspozisiyası həmişəki qrafiklə - həftə içi saat 10:00-dan 18:00-a, şənbə və bazar isə 11:00-dan 19:00-dək işini davam etdirəcək. Bayram günlərini maraqlı və səmərəli keçirmək istəyənlər yollarını muzeydən sala bilərlər.xeber100.com