Milli Dram Teatrı 144-cü teatr mövsümünü açdı

Azərbaycan Dövlət Akademik Milli Dram Teatrı 144-cü teatr mövsümünü İlyas Əfəndiyevin “Hökmdar və qızı” pyesi əsasında hazırlanmış “Qarabağnamə” tamaşası ilə açıb. Azərtac xəbər verir ki, teatrın baş rejissoru və direktoru Xalq Artisti Azərpaşa Nemət yeni mövsümün başlanması münasibətilə teatrın kollektivini və tamaşaçıları təbrik edib. A.Nemət deyib ki, görkəmli dramaturqumuz İlyas Əfəndiyevin əsəri əsasında hazırlanan “Qarabağnamə” tamaşası Azərbaycan tarixinin böyük bir mərhələsini təsvir edir. Aktyorlarımız tamaşada məharətlə çıxış edirlər. Qeyd olunub ki, bu il teatrsevərləri yeni tamaşalarla, qastrol səfərləri ilə, festivallarla dolu maraqlı bir mövsüm gözləyir. Sonra səhnə əsərində çıxış edən aktyorlar səhnəyə dəvət olunub. Tamaşaçılar aktyorları alqışlarla qarşılayıb. Tamaşanın quruluşçu rejissoru Xalq Artisti Mərahim Fərzəlibəyov, quruluşçu rəssamı Əməkdar Rəssam İsmayıl Məmmədov, musiqi tərtibatçısı isə Həmid Kazımzadədir. Səhnə əsərində əsas rolları Xalq artistləri Rafiq Əzimov, Firəngiz Mütəllimova, Hacı İsmayılov, Ramiz Məlik, Əməkdar artistlər Kazım Abdullayev, Elxan Quliyev, Əjdər Həmidov, Əli Nurzadə, Aslan Şirin, aktyorlar Şəhla Əliqızı, Rövşən Kərimduxt, Anar Heybətov, Sərdar Rüstəmov və başqaları ifa ediblər. Tamaşa XVIII əsrdə Qarabağ xanlığının mərkəzi olan Şuşada baş vermiş tarixi hadisələrdən və Qarabağ hökmdarı İbrahim xanın ictimai-siyasi, ailə-məişət həyatından bəhs edir.xeber100.com

Füzuli Dövlət Dram Teatrı 28-ci mövsümünü açıb

Füzuli Dövlət Dram Teatrı 28-ci mövsümünü Şıxəli Qurbanovun “Olmadı elə, oldu belə” əsəri ilə açıb. Azərtac xəbər verir ki, tamaşa “N” saylı hərbi hissənin əsgər və zabitlərinə təqdim olunub. Tamaşanın quruluşçu rejissoru Əli Hüseynov, quruluşçu rəssamı Ellinaz Balaşova, musiqi tərtibatçısı Sənan Sevindikzadədir. Tamaşada əsas rollarda Sehran Xanlarov, Qaçaq Qarayev, Məryəm Məmmədova, İntizar Quliyeva, Vaqif Rəhimov, Fatimə Səfərəliyeva, Elşən Gözəlov, Aygün Cəfərova, Vüqar Babayev və başqaları çıxış edib. “Olmadı elə, oldu belə” tamaşası əsgər və zabitlər tərəfindən maraqla qarşılanıb.xeber100.com

Tarix Muzeyində “Musiqili rənglər” adlı sərgi açılıb

Azərbaycan Milli Musiqisi Günü ərəfəsində “İçərişəhər” Tarix Muzeyində “Musiqili rənglər” sərgisi açılıb. Sərginin təşkilatçıları “İçərişəhər” Tarixi Muzeyi və “Da`Art” Təsviri İncəsənət Mərkəzidir. Azərtac xəbər verir ki, ekspozisiyada təqdim olunan 131 rəsmin hamısı musiqiyə həsr edilib. Açılış mərasimində muzeyin ictimaiyyətlə əlaqələr və kütləvi-mədəni tədbirlər şöbəsinin rəhbəri İradə Qasımova, Xalq Rəssamı Arif Hüseynov və “Da`Art” Təsviri İncəsənət Mərkəzinin direktoru Dilara Atakişiyeva çıxış ediblər. Sərginin açılışından sonra Bülbül adına orta ixtisas musiqi məktəbi şagirdlərinin konserti olub. Xatırladaq ki, 1995-ci ildə, dahi bəstəkar Üzeyir Hacıbəylinin anadan olmasının 110 illik yubileyi ərəfəsində ümummilli lider Heydər Əliyevin imzaladığı fərmana əsasən, sentyabrın 18-i hər il ölkəmizdə Milli Musiqi Günü kimi qeyd olunur.xeber100.com

Milli Musiqi Gününə həsr olunmuş tədbir keçirilib

Üzeyir Hacıbəyli adına Bakı Musiqi Akademiyasının qarşısında 18 sentyabr - Milli Musiqi Gününə həsr olunmuş təntənəli tədbir keçirilib. Azərtac xəbər verir ki, tədbirdə mədəniyyət və turizm naziri Əbülfəs Qarayev çıxış edərək Üzeyir bəyin adı ilə bağlı olan əlamətdar gün münasibətilə musiqi ictimaiyyətini təbrik edib, onlara yaradıcılıqlarında yeni uğurlar arzulayıb. Qeyd edilib ki, ulu öndər Heydər Əliyev tərəfindən təsis olunan bu bayram Azərbaycan musiqi ictimaiyyətinə böyük töhfədir. Ə.Qarayev vurğulayıb ki, Üzeyir Hacıbəylinin adı Azərbaycan xalqının yaddaşına əbədi həkk olunub və o, heç zaman unudulmayacaq. Bildirib ki, eyni zamanda, sentyabrın 18-i Azərbaycan musiqisinin digər nümayəndəsi, böyük bəstəkarımız Müslüm Maqomayevin də ad günüdür. Əbülfəs Qarayev hazırda II Şəki Beynəlxalq Teatr Festivalının keçirildiyini diqqətə çatdıraraq bu festivalda dünyanın müxtəlif sənət ocaqlarının tanınmış kollektivlərinin iştirak etdiyini bildirib. Festival günlərində Üzeyir bəyin də əsərlərinin nümayiş olunacağını söyləyib. Nazir diqqətə çatdırıb ki, Üzeyir Hacıbəylinin adı ilə bağlı olan və artıq ənənəvi olaraq beynəlxalq səviyyədə keçirilən növbəti musiqi festivalı bütün musiqisevərlərə gözəl bir hədiyyə olacaq. Belə ki, sentyabrın 18-dən start götürəcək Üzeyir Hacıbəyli VIII Beynəlxalq Musiqi Festivalının proqramı olduqca zəngindir. Festival çərçivəsində F.Əmirov adına Azərbaycan Dövlət Mahnı və Rəqs Ansamblının 80 illiyinə həsr olunan yubiley tədbiri keçiriləcək. Milli Musiqi Günündə Müdafiə Nazirliyinin nümunəvi hərbi orkestri və Azərbaycan Dövlət Xor Kapellasının ifasında klassik musiqi nümunələri təqdim olunub.xeber100.com

“İnsan haqları, humanizm və maarifçilik” mövzusunda tədbir keçiriləcək

Sentyabrın 20-də İstiqlal Muzeyinin ekspozisiyasında “İnsan haqları, humanizm və maarifçilik” mövzusunda tədbir keçiriləcək. Muzeydən Azərtac-a bildirilib ki, tədbirdə insanın cəmiyyətdə hüquq və vəzifələri barədə çıxışlar dinləniləcək. Bakı şəhərində yerləşən məktəblərin şagirdləri, Azərbaycan Dövlət Rəssamlıq Akademiyasının tələbələri, Milli Qvardiyanın əsgərləri, Hərbi Dəniz Qüvvələrinin şəxsi heyəti və ictimaiyyət nümayəndələrinin iştirak edəcəkləri tədbirdə “İnsan haqları nədir?” adlı film nümayiş olunacaq.xeber100.com

YARAT Müasir İncəsənət Mərkəzində konsert proqramı təşkil olunub

YARAT Müasir İncəsənət Mərkəzində növbəti dəfə möhtəşəm konsert proqramı təşkil olunub. Azərtac xəbər verir ki, “Dərviş” rok qrupunun ifasında təqdim olunan musiqi proqramı maraqla qarşılanıb. Konsert çərçivəsində Nərmin Behbudovanın ifasında dünya rok musiqi nümunələrindən ibarət kompozisiyalar səsləndirilib. Qeyd edək ki, “Dərviş” qrupu “Baku rock panorama”, “Qızıl payız”, “Main Music Fest”, “French Music day” və “Baku Jazz Fest” kimi bir çox festivallarda uğurla çıxış edərək bir sıra mükafatlara layiq görülüb.xeber100.com

İnsan haqları mövzusunda tədbir keçiriləcək

Sentyabrın 20-də Azərbaycan İstiqlal Muzeyində insan haqları, humanizm və maarifçilik mövzusunda tədbir keçiriləcək. Muzeydən Azərtac-a bildirilib ki, tədbirdə Azərbaycan İstiqlal Muzeyinin elmi-kütləvi işlər şöbəsinin müdiri Sədi Mirseyibli, “Polisə dəstək” İctimai Birliyinin sədri Şəmsəddin Əliyev mövzu ilə bağlı çıxış edəcəklər və “İnsan haqları nədir?” adlı sənədli film nümayiş olunacaq. İnsan haqları, demək olar ki, dünyanın bütün ölkələri tərəfindən qəbul edilir. Konstitusiyalarda insan haqları inkarolunmaz bir hüquq kimi təsbit olunur. Beynəlxalq aləmdə insan haqları BMT-nin deklarasiyası ilə qanuniləşdirilib. Tədbirdə Bakı şəhərində yerləşən orta məktəb şagirdləri, Azərbaycan Dövlət Rəssamlıq Akademiyasının tələbələri, Milli Qvardiyanın əsgərləri, Hərbi Dəniz Qüvvələrinin şəxsi heyəti iştirak edəcək.xeber100.com

“Bərpa olunmuş eksponatlar” adlı sərgi açılacaq

Sentyabrın 15-də Azərbaycan Xalça Muzeyində “Bərpa olunmuş eksponatlar” adlı sərgi açılacaq. Muzeydən Azərtac-a bildirilib ki, Azərbaycan Xalça Muzeyi və Muzey Sərvətləri və Xatirə Əşyalarının Elmi Bərpa Mərkəzi əməkdaşlarının birgə səyi nəticəsində muzeyin bərpa və konservasiyaya ehtiyacı olan 690 ədəd eksponatı üzərində zəruri işlər görülüb. “Bərpa olunmuş eksponatlar” sərgisinin keçirilməsində əsas məqsəd müvafiq sənət incilərini nümayiş etdirmək, milli sərvətimiz olan bu eksponatların daim nəzarətdə olduğunu və qorunduğunu göstərməkdir. Sərgidə 49 eksponat yer alacaq. Bunlar xalça məmulatları, xovsuz və xovlu xalçalar, geyimlər, tikmələr, bədii metal sənətinə aid nümunələr, çini, şüşə və ağac əşyalardan ibarətdir. Bu eksponatlar öz materialına və tarixinə görə fərqlənən, muzeyin kolleksiyasına məxsus füsunkar sənət inciləridir. “Bərpa olunmuş eksponatlar” sərgisi eksponatların təqdimi ilə kifayətlənmir. Sərgi çərçivəsində eksponatların konservasiya prosesini canlı izləmək üçün muzeyin bərpaçıları tərəfindən ustad dərsləri keçiriləcək. Tamaşaçılar videoçarx və slayd-şou vasitəsilə eksponatların bərpa sirləri və bərpaçıların bacarıqları barədə geniş məlumat almaq imkanı əldə edəcəklər.xeber100.com

Əməkdaşlıq əlaqələri müzakirə edilib

Sentyabrın 14-də Mədəniyyət və Turizm naziri Əbülfəs Qarayev Beynəlxalq Türk Mədəniyyəti Təşkilatının (TÜRKSOY) baş katibi Düsen Kaseinov ilə görüşüb. Nazirlikdən Azərtac-a bildirilib ki, görüşdə Şəkidə keçiriləcək “Üç məkan” II Şəki Beynəlxalq Teatr Festivalının türkdilli ölkələr üçün əhəmiyyətindən söhbət açılıb, habelə ölkəmizlə təşkilat arasında əməkdaşlıq əlaqələri müzakirə edilib. TÜRKSOY-un baş katibi Düsen Kaseinov səmimi qəbula görə nazirə təşəkkürünü bildirib. O, 2016-cı ildə Şəki şəhərinin “Türk dünyasının mədəniyyət paytaxtı” elan olunması çərçivəsində həyata keçirilən layihələrin əhəmiyyətini xüsusi vurğulayıb və bu istiqamətdə görülən işləri yüksək qiymətləndirib.xeber100.com

Bakı Uşaq Teatrı açıq havada təşkil etdiyi tamaşalarına yekun vurub

Bakı Uşaq Teatrı yay mövsümündə açıq havada təşkil etdiyi meydan tamaşalarına yekun vurub. Azərtac xəbər verir ki, teatrın yaradıcı kollektivi paytaxtın mərkəzi meydanlarından birində tamaşaçılarla son görüşünü gerçəkləşdirib. Tədbir çərçivəsində balacalar üçün şən mahnılardan ibarət konsert və rəqslərdən ibarət əyləncəli proqramlar təşkil olunub. Meydan tamaşalarında uşaqların marifləndirilməsi ilə yanaşı , onların yay tətili günlərində vaxtlarının asudə və səmərəli keçirilməsi məqsədilə bir çox nağıl tamaşalar səhnələşdirilərək maraqlı müsabiqələr təşkil edilib. Bundan başqa, mövsüm ərzində teatr uşaqların gələcəkdə pis vərdişlərdən uzaq olması üçün maarifləndirmə xarakterli layihələr də təşkil edib. Qeyd edək ki, Bakı Şəhər Mədəniyyət və Turizm Baş İdarəsinin təşkilatçılığı ilə reallaşan meydan tamaşaları Bakı Uşaq Teatrı tərəfindən növbəti aylarda paytaxtın bir sıra rayonlarında nümayiş olunacaq.xeber100.com