Film Festivalı keçiriləcək

Sentyabrın 7-də Bakıda Azərbaycan Gənclərinin Film Festivalı keçiriləcək. Azərtac festivalın “facebook”da yaradılan səhifəsinə istinadla bildirir ki, “Park cinema in Park Bulvar”da keçirilməsi nəzərdə tutulan festival çərçivəsində Azərbaycanın hər yerindən 13-22 yaşlı gənclərin qısametrajlı filmləri nümayiş olunacaq. Festivalın sonunda isə mükafatlandırma mərasimi keçiriləcək.xeber100.com

YARAT Müasir İncəsənət Məkanının məlumatına əsasən…

YARAT Müasir İncəsənət Məkanı avqustun 20-21-də hatha-yoqa üzrə ixtisaslı təlimçi İra Berezinanın rəhbərliyi ilə yoqa kurslarını təşkil edəcək. YARAT Müasir İncəsənət Məkanından Azərtac-a bildirilib ki, layihənin məqsədi şüurlu surətdə həyata keçirdiyimiz proseslərlə qeyri-şüurlu proseslərimiz arasında, yəni zehin ilə vücud, çalışqanlıq ilə rahatlıq, fikrin cəmləşdirilməsi ilə dalğınlıq, ha (şüur, kişi, günəş) ilə tha (həyat qüvvəsi, qadın, ay) arasında balans yaratmaqdır. Bu iki qüvvənin bir-biri ilə birləşdiyi zaman insanın həyatında böyük hadisə baş verir, onun ali şüuru oyanır. Qeyd edək ki, kurslar həftənin hər şənbə günü saat: 18:30–20:00 keçiriləcək.xeber100.com

Olduğu kimi görünən, göründüyü kimi olan SƏNƏTKAR

Avqust ayı görkəmli sənətkarımız İlhamə Quliyevanın dünyaya göz açdığı aydır... İ.Quliyeva 17 avqust 1943-cü ildə dünyaya göz açıb. Musiqiçi ailəsində doğulan İlhamə üçün musiqisiz həyatı təsəsvvür etmək çətin olardı.  Sənətkar 1964-cü ildə Azərbaycan Dövlət Universitetini bitirib. 1965-1970-ci illərdə Azərbaycan Dövlət Teleradio Verilişləri Şirkəti Estrada Orkestrinin, 1970-1980-ci illərdə Azərbaycan Dövlət Filarmoniyasının solisti olub. 1980-ci ildən Azərbaycan Dövlət Qastrol-Konsert Birliyinin  solistidir. Daima repertuarına Azərbaycan və xarici ölkə bəstəkarlarının əsərlərini daxil edib. Səhnə performansı ilə hər zaman diqqəti çəkən İlhamə xanım olduğu kimi görünən, eyni zamanda səhnəyə yaraşan, səhnə üçün yaşayan sənətkarlardan biri olub. Fəaliyyəti müddətində dünya ölkələrində qastrol səfərlərində olan müğənni Azərbaycan musiqisinin təbliğində böyük rol oynyıb. Milli ruhlu sənətkar daima Azərbaycançılıq mövqeyindən çıxış edib ki, bu onun fəaliyyətində də özünü göstərib. Onun haqqında keçmiş zamanda danışmaq doğru olmazdı, çünki İlhamə bir sənətkar olaraq daima var olan, ölümdən sonrakı həyata inanan musiqiçilərimizdən olub. Saysız-hesabsız mükafatlara, sahib olan, fəaliyyəti dövründə bütün titulları qazanan sənətkarımıza Allahdan rəhmət diləyirik.xeber100.com  

XXI “Belaya veja” Beynəlxalq teatr festivalı keçiriləcək

BELTA agentliyinin məlumatına görə, sentyabrın 9-14-də Brest şəhərində XXI “Belaya veja” Beynəlxalq teatr festivalı keçiriləcək. Festivalda 17 ölkədən, o cümlədən Azərbaycandan 27 teatr kollektivi iştirak edəcək. Builki “Belaya veja” festivalı tamaşaçıları janr müxtəlifliyi ilə sevindirəcək. Afişada dram, müzikl, rok opera, fantasmaqoriya, uydurma pritça, qotik triller oyunu, məktəb kvesti, forma teatrı, monotamaşalar, küçə, xoreoqrafiya quruluşları təqdim edilib.xeber100.com

Bu gün Müslüm Maqomayevin doğum günüdür

Hər il avqustun 17-də  Xalq Artisti Müslüm Maqomayevin xatirəsi dərin ehtiramla anılır. Azərbaycanın opera və estrada müğənnisi Müslüm Maqomayev 1942-ci ildə Bakıda anadan olub. 14 yaşında doğma şəhəri Bakıda dənizçilər klubunda çıxış edən Müslüm Maqomayev ilk uğurunu 1962-ci ildə qazanıb. Maestro Niyazinin tövsiyəsi ilə tələbə və gənclərin Helsinkidə keçirilən VIII Ümumdünya festivalına yollanan Müslüm oradan medalla qayıdıb. Bu münasibətlə populyar “Oqonyok” jurnalı onun portretini və “Bakılı gənc dünyanı fəth edir” sərlövhəli məqaləni dərc edib. Müslüm Maqomayev XX əsrin 60-cı illərində Azərbaycan Dövlət Akademik Opera və Balet Teatrının solisti olub, Milanın dünya şöhrətli “La Skala” teatrında təcrübə keçib. Ötən əsrin 60-70-ci illərində Müslüm Maqomayevin məşhurluğunun həddi-hüdudu yox idi. Konsert salonlarındakı yerlər azlıq etdiyindən o, stadionlarda minlərlə dinləyici qarşısında çıxış edir, daim qastrol səfərlərində olurdu. Mahnıları yazılan vallar çox böyük tirajla buraxılırdı. Məhz buna görə də onu sovet estradasının son yarım əsrdəki ən parlaq ulduzu, kralı, rəmzi adlandırırlar. Keçmiş SSRİ-də klassik opera ariyalarını estradaya məhz Müslüm Maqomayev gətirib. Təsadüfi deyil ki, o, 31 yaşında SSRİ Xalq Artisti fəxri adına layiq görülüb.xeber100.com  

Hind mədəniyyəti beynəlxalq sərgisi açılacaq

Sentyabrın 2-də Bakıda Hind mədəniyyəti beynəlxalq sərgisi açılacaq. Azərtac xəbər verir ki, Hindistanın Bakıdakı səfirliyinin dəstəyi ilə baş tutacaq sərgi sentyabrın 18-dək davam edəcək. Hər il ənənəvi olaraq təşkil olunan sərgi bu dəfə “Amay” ticarət mərkəzində keçiriləcək. Qonaqlar sərginin pavilyonunda yer alan Hindistan mədəniyyət nümunələri ilə yaxından tanış olma imkanı əldə edəcəklər. Burada, həmçinin, hind rəqsləri, hind yeməkləri də təqdim ediləcək. Hindistandan gətirilən qızıl və gümüş əşyalar, tavalar və qazanlar, mebel, xalça, ədviyyat, çay və başqa məhsullar da sərgilənəcək. Sərgidə müxtəlif növdə ipək, qumaş və pambıq parçalardan hazırlanmış geyimlər, kəlağayılar, yaylıqlar və dəsmallar nümayiş olunacaq. Bir sözlə, ziyarətçilər hind musiqisi və incəsənəti ilə yaxından tanış ola biləcəklər.xeber100.com

“Mədəni irsimiz fotolarda” adlı sərgi-müsabiqə keçiriləcək

Avqustun 26-da Mədəniyyət və Turizm Nazirliyinin dəstəyi və “Abşeron” Gənclərin İnkişafı İctimai Birliyinin təşkilatçılığı ilə “Mədəni irsimiz fotolarda” adlı sərgi-müsabiqə təşkil olunacaq. Azərtac “Arts Council Azerbaijan”ın “facebook” səhifəsinə istinadla məlumat verir ki, layihə ölkəmizin milli-mədəni irsin təbliği, tarixi mədəniyyət obyektlərinin, incəsənət ocaqlarının, teatr və muzeylərinin, eləcə də mədəniyyət və incəsənət xadimlərimizin yerli və xarici vətəndaşlar tərəfindən yaxından tanınması məqsədilə həyata keçiriləcək. Belə ki, layihə çərçivəsində gənc fotoqrafların işlərində vətənimizin mədəni irs nümunələrini əks edən şəkillərdən ibarət sərgi-müsabiqə “Art Villa” qalereyasında baş tutacaq. Sözügedən layihə, həmçinin mədəni irsin öyrənilməsində müasir texnologiyaların, aparıcı beynəlxalq təcrübənin tətbiqi, tarix və mədəniyyət abidələrinin genişmiqyaslı tədqiqinə, o cümlədən ölkədə turizmin inkişafına öz töhfəsini verəcək. Qeyd edək ki, sərgiyə memarlıq, monumental mədəniyyət və Azərbaycanın milli ənənələrinə həsr olunmuş fotolar təqdim olunmalıdır. Fotolar [email protected] elektron ünvanına göndərilməlidir. Hər iştirakçı 5–dək foto göndərə bilər. 3 min piksel və JPEG formatında nəzərdə tutulan fotolar son 3 il ərzində çəkməlidir.xeber100.com

I Beynəlxalq Opera Festivalı keçiriləcək

Sentyabrın 22-dən 25-dək Rusiya Mədəniyyət Nazirliyinin, Krasnodar Diyarının və Soçi Şəhər Administrasiyasının dəstəyilə Qalina Vişnevskaya adına I Beynəlxalq Opera Festivalı keçiriləcək. Festivalın təsisçisi Qalina Vişnevskaya adına Opera İfaçılığı Mərkəzidir. Dünya şöhrətli musiqiçi Mstislav Rostropoviçin ömür-gün yoldaşı, SSRİ Xalq Artisti Qalina Vişnevskaya yaşasaydı, oktyabrın 25-də onun 90 yaşı olardı. Yubiley münasibətilə Moskvada, Sankt-Peterburqda və Rusiyanın digər mədəniyyət mərkəzlərində görkəmli ifaçıya həsr edilən tədbirlər keçiriləcək. Soçidəki opera festivalı müvafiq musiqi tədbirləri sırasında ən parlaq səhifə olacaq. Festivalın bədii rəhbəri Olqa Rostropoviçin sözlərinə görə, Soçidə böyük opera bayramının təşkili üçün hər cür şərait, o cümlədən qəşəng meydançalar, gözəl iqlim və başlıcası isə musiqini sevən tamaşaçı auditoriyası var. Qalina Vişnevskaya adına I Beynəlxalq Opera Festivalının əsas iştirakçıları görkəmli ifaçının adını daşıyan Opera İfaçılığı Mərkəzinin solistləri və orkestridir. Festivalın açılış mərasimi Krasnaya Polyanada “Roza Xutor” konsert zalında olacaq. Həmin gün Opera İfaçılığı Mərkəzinin orkestrinə Daniel Montane (İspaniya) dirijorluq edəcək. Növbəti günlər festival tədbirləri Qış Teatrında davam etdiriləcək. Festival çərçivəsində, həmçinin Krasnodar diyarının sanatoriya-sağlamlıq düşərgələrinin uşaqları üçün xeyriyyə konserti nəzərdə tutulub. Qış Teatrında Qalina Vişnevskayanın həyat və yaradıcılığına həsr edilən fotosərgi də təqdim ediləcək. Soçidə yeni opera festivalının açılışı Qalina Vişnevskayanın anadan olmasının 90 illik yubileyinin bayram edilməsi ilə yanaşı, indiyədək yüksək opera sənətinin təqdim edilmədiyi Rusiyanın qeyri-rəsmi yay paytaxtının mədəni həyatına yeni rəng qatacaq.xeber100.com

2016-2017-ci tədris ili üçün pedaqoji kadrların işə qəbulu üzrə müsabiqə elan edilir

Mədəniyyət və Turizm Nazirliyinin sistemindəki uşaq musiqi, incəsənət və rəssamlıq məktəblərində, mərkəzlərində təhsilin keyfiyyətinin yüksəldilməsini, bilikli və bacarıqlı ixtisaslı kadrların bərabərhüquqlu, şəffaf və sağlam rəqabət şəraitində seçilib yerləşdirilməsini, kadrlara olan tələb-təklif prinsiplərinin gözlənilməsini təmin etmək məqsədilə 2015-2016-cı tədris ilindən etibarən sözügedən məktəblərə pedaqoji kadrların işə qəbulu vakant yerlər əsasında müsabiqə yolu ilə aparılır. Nazirlikdən Azərtac-a bildirilib ki, bununla əlaqədar olaraq müvafiq komissiya 2016-2017-ci tədris ili üçün pedaqoji kadrların işə qəbulu üzrə növbəti - III müsabiqəni elan edir.xeber100.com

Niyazi – 104

Avqustun 20-də maestro Niyazinin anadan olmasının 104-cü ili tamam olur. Azərtac xəbər verir ki, bu münasibətlə Azərbaycan Dövlət Musiqi Mədəniyyəti Muzeyinin filialı olan Niyazinin mənzil-muzeyinin kollektivi Fəxri xiyabanda maestronun məzarını ziyarət edəcək və sənətkarın mənzil-muzeyində “Açıq qapı” günü keçiriləcək. "Açıq qapı” günü çərçivəsində qonaqlara maestro haqqında olan sənədli filmlər, onun konsertlərindən, “Rast” muğam-baleti və “Çitra” baletindən videogörüntülər təqdim olunacaq. Musiqisevərlər gün ərzində maestronun mənzil-muzeyini ziyarət etmək imkanı əldə edəcəklər.xeber100.com