“Disney xəzinəsi” adlı sərgi keçiriləcək

İyulun 18-də Azərbaycan Rəssamlar İttifaqının V.Səmədova adına sərgi salonunda rəssam Elmira Rəcəbovanın “Disney xəzinəsi” adlı fərdi sərgisi keçiriləcək. Azərtac xəbər verir ki, müəllif sərgini disney qəhrəmanlarına həsr edib. Elmira Rəcəbova tərəfindən seçilmiş bütün disney personajları səmimi yaxşı və misilsiz olmaqla, çox parlaq, rəngarəng və sadəcə olaraq öz xeyirxahlığı və cəsarəti ilə özlərinə diqqətini cəlb edir. Baş və ən heyranedici personaj, əlbəttə ki, Mikki Maus özüdür. Elmira Rəcəbova məşhur obrazların bütövlükdə qalereyasını yaradır. Gözəl Belosnejka, möcüzələr ölkəsində dəcəl Alisa, qaraçı Esmiralda və gözəl Ariyelin onun yaradıcılığında ən romantik obrazları yeri tutur. Onun yaradıcılığında kişi obrazları zəkalı Ələddin və cəsarətli Tarzan, eləcə də oxşar nağılların digər nümayəndələri də əks olunur. Müəllif sevimli ayı balası Vinni Pux və maral balası Bembini özünün dostları ilə və çoxsaylı başqa qəhrəmanları çəkir.xeber100.com

“Buzlar diyarı” tamaşasının premyera tarixi müəyyənləşib

Azərbaycan, Rusiya və Gürcüstan sənətçilərinin müştərək layihəsi çərçivəsində hazırlanan “Buzlar diyarı” tamaşasının premyeranın tarixi müəyyənləşib. Akademik Opera və Balet Teatrından Apa-ya verilən məlumata görə, Hans Kristian Andersenin nağılları əsasında hazırlanan tamaşa oktyabrın 22-də Akademik Opera və Balet Teatrının binasında Azərbaycan tamaşaçılarına təqdim olunacaq. Azərbaycan və rus dillərində  nümayiş olunacaq tamaşanın biletləri artıq şəhərin bütün kassalarında və "ASAN xidmət" mərkəzlərində satışdadır. Biletləri yayda alanlar Elza, Anna, Kristoff, Şahzadə, Maral Sven, Qar adamı Olaff kimi qəhrəmanlarla selfi çəkdirmək imkanı qazanacaq.xeber100.com

Milli İncəsənət Muzeyində fərdi sərgi açılacaq

İyulun 15-də Mədəniyyət və Turizm Nazirliyinin təşkilatçılığı ilə Azərbaycan Milli İncəsənət Muzeyində Xalq Rəssamı Vidadi Nərimanbəyovun anadan olmasının 90 illiyinə həsr olunmuş fərdi sərgi açılacaq. Muzeyin mətbuat xidmətindən Azərtac-a bildirilib ki, sərgidə rəssamın Azərbaycan Milli İncəsənət Muzeyi, Azərbaycan Dövlət Rəsm Qalereyası və ailə kolleksiyasında saxlanılan əsərləri təqdim olunacaq. Vidadi Nərimanbəyovun illər öncə yaratdığı bir neçə əsəri də bu sərgidə nümayiş ediləcək. Qeyd edək ki, Vidadi Nərimanbəyov 1926-cı ildə Fransanın Kann şəhərində anadan olub. Rəssamlıq təhsilini Ə.Əzimzadə adına Bakı Rəssamlıq Texnikumu, V.Muxina adına Sankt-Peterburq (keçmiş Leninqrad) Ali Rəssamlıq Sənaye Məktəbi və Tbilisi Rəssamlıq Akademiyasında alıb. "Nədir günahımız?", "Düşmənin sevinci...", "Yolda" və digər əsərləri onu özünəməxsus dəsti-xətti ilə seçilən, istedadlı rəssam kimi məşhurlaşdırıb. V.Nərimanbəyov təkcə Azərbaycanda deyil, eyni zamanda, keçmiş SSRİ respublikalarında, Bolqarıstan, Rumıniya, Əlcəzair, Finlandiya, Çexiya, Macarıstan kimi dünyanın 20-dək xarici ölkəsində fərdi yaradıcılıq sərgilərini təşkil edərək, ölkəmizin incəsənətini təbliğ edib. Rəssamın əsərləri Azərbaycan Dövlət İncəsənət Muzeyində, Moskva Dövlət Tretyakov Qalereyasında, MDB və Avropa ölkələrinin muzeylərində saxlanılır. Xatırladaq ki, Vidadi Nərimanbəyov 2001-ci ildə vəfat edib.xeber100.com

Varşavada Azərbaycana həsr edilən sərgi açılıb

Azərbaycanın Polşadakı səfirliyinin təşkilatçılığı ilə Varşava şəhərində ölkəmizə həsr edilən sərgi açılıb. Səfirlikdən Azərtac-a bildiriblər ki, sərgi Mazovetsk Voyevodluğunun və Varşava şəhər meriyasının qarşısında yerləşən Plac Bankowy meydanında təşkil edilib. Varşavanın ən böyük meydanlarından biri olan Plac Bankowy şəhər mərkəzində yerləşir və eyni zamanda, vacib nəqliyyat kəsişməsi rolunu oynayır. Varşavanın tanınmış tarixi turistik məkanlarından biri olan Plac Bankowy meydanını gündəlik olaraq minlərlə insan ziyarət edir. Azərbaycanın Polşada təbliğinə həsr edilən sərgidə ölkəmizin tarixi abidələrinə və müasir memarlığına dair fotoşəkillər və təbiət mənzərələri nümayiş etdirilir. Sərgidə, həmçinin Azərbaycanın əsas turizm istiqamətlərini özündə əks etdirən fotolar da Varşava sakinlərinin diqqətinə təqdim edilib. Açıq havada təşkil olunmuş sərgi iyulun sonunadək davam edəcək.xeber100.com

Rusiyada yaşayan millətlərin milli mətbəxlərini nümayiş etdirən festivalı keçirilib

Moskvada Milli Mətbəx Festivalı keçirilib. Festivalda ölkəmizi Azərbaycan Slavyan Gənclər Assosiasiyasının (ASGA) Rusiya nümayəndəliyi təmsil edib. Şəhər meriyası tərəfindən təşkil olunan festivalda Rusiyada yaşayan millətlərin milli mətbəxləri nümayiş olunub. Diasporla İş üzrə Dövlət Komitəsindən Azərtac-a bildiriblər ki, festivalda ASGA–nın Rusiya nümayəndəliyinin rəhbəri Toğrul Allahverdili və icraçı direktor Xəzər Qarayev Azərbaycan stendinə yaxınlaşan iştirakçılara və qonaqlara milli mətbəximiz haqqında məlumat veriblər. Tədbirdə iştirak edən Moskva meriyasının rəsmiləri, Dövlət Dumasının deputatları və digər rəsmi şəxslər Azərbaycan mətbəxinin nümunələri ilə tanış olublar. Tədbirin sonunda Azərbaycanı festivalda təmsil edən ASGA-nın Rusiya nümayəndəliyinin sədri Toğrul Allahverdiliyə şəhərin ictimai-siyasi həyatında fəal iştirak, Azərbaycanın milli mətbəxini yüksək səviyyədə təqdim etdiyinə görə şəhər rəhbərliyi adından fəxri diplom və mükafat təqdim edilib.xeber100.com

Beynəlxalq Musiqi Festivalı başlayıb

İyulun 9-da Xəzər dənizinin sahilindəki “Sea Breeze” istirahət mərkəzində “Jara” Beynəlxalq Musiqi Festivalı başlayıb. İki gün davam edəcək festivalda çoxlu sayda məşhur müğənnilər iştirak edir.  Xatırladaq ki, “Jara”nın təşkilatçıları  musiqiçi Emin Ağalarov, Rusiyanın əməkdar artisti Qriqori Leps, “Russkoye radio”nun və “Qızıl qrammofon” mükafatının təsisçisi Sergey Kojevnikovdur. Festival Bakıda hər il keçiriləcək.

“Retro Bakı” layihəsinə start verilib

Bakı Şəhər Mədəniyyət və Turizm Baş İdarəsinin təşkilatçılığı ilə yay aylarında əhalinin asudə vaxtının səmərəli keçməsi məqsədilə yeni “Retro Bakı” layihəsinə start verilib. Baş İdarədən Azərtac-a bildirilib ki, layihə çərçivəsində hər həftə sonu axşam saatlarında Fəvvarələr Meydanında müxtəlif konsert proqramları təşkil olunacaq. İki saat ərzində paytaxtımızın sakinləri və şəhərimizin qonaqları milli və dünya inciləri ilə zəngin rəqs və musiqi nömrələrinə tamaşa edə biləcəklər.xeber100.com  

Şuşa Teatrı 142–ci mövsümü “Solğun çiçəklər”lə bağlayacaq

İyulun 12–də Şuşa Dövlət Musiqili Dram Teatrı “Azərsun Holdinq” Mədəniyyət Mərkəzində 142–ci teatr mövsümünə, görkəmli Azərbaycan dramaturqu Cəfər Cabbarlının “Solğun çiçəklər” tamaşası ilə yekun vuracaq. Teatrın mətbuat xidmətindən Azərtac-a bildirilib ki, tamaşanın quruluşçu rejissoru Lalə Şirinova, quruluşçu rəssamı Valeh Məmmədov, musiqi tərtibatçısı Azad Məmmədovdur. Tamaşada əsas rolları Əməkdar Artist Rasəf Mehdiyev, aktyorlar Dürdanə Dünyamalıyeva, Xanirə İsgəndərova, Vüsalə Məmmədzadə və Zahid Mehdiyev canlandıracaqlar.xeber100.com

Musiqili Teatr mövsümü “Baladadaşın toy hamamı” tamaşası ilə bağlayacaq

Azərbaycan Dövlət Musiqili Teatrı iyulun 16-da “Baladadaşın toy hamamı” tamaşası ilə mövsümə yekun vuracaq. Teatrın mətbuat katibi Samir Sədaqətoğlunun Apa-ya verdiyi məlumata görə, tamaşanın quruluşçu rejissoru xalq artisti Cənnət Səlimova, bəstəkarı Firudin Allahverdi, səhnələşdirəni əməkdar artist Nofəl Vəliyev, quruluşçu-dirijoru Fəxrəddin Atayev, quruluşçu-rəssamı xalq rəssamı Tahir Tahirov, baletmeysterləri Yelena və Zakir Ağayevlər, musiqi rəhbəri əməkdar incəsənət xadimi Nazim Hacıəlibəyovdur.  Tamaşada səslənən mahnıların sözləri Vüqar Əbdülova məxsusdur. Rolları xalq artistləri Fatma Mahmudova, Ramiz Məmmədov, əməkdar artistlər Novruz Qartal, Almaz Ələsgərova, Çingiz Əhmədov, aktyorlar Məhərrəm Qurbanov, Əmrah Dadaşov, Gülcahan Salamova, Rəsmiyyə Nurməmmədova, Əliməmməd Novruzov, Gülçöhrə Abdullayeva, Fərid Rzayev, Aydan Həsənova, Gültac və Hüseyn Əlililər, Elçin İmanov, Şaban Cəfərov, Gülnarə Abdullayeva, Elnarə Nağdəliyeva, Nigar Qarayeva, Nahid İsgəndərzadə və Rahib Məmmədzadə ifa edirlər.xeber100.com

Milli Teatr mövsümə “Qarabağnamə” tamaşası ilə yekun vuracaq

Azərbaycan Dövlət Akademik Milli Dram Teatrında mövsümə “Qarabağnamə” tamaşası ilə yekun vurulacaq. Teatrın mətbuat xidmətindən Apa-ya verilən məlumata görə, xalq yazıçısı İlyas Əfəndiyevin əsəri əsasında hazırlanan tamaşanın quruluşçu rejissoru xalq artisti Mərahim Fərzəlibəyov, quruluşçu rəssamı İsmayıl Məmmədovdur. Rolları xalq artistləri Rafiq Əzimov, Firəngiz Mütəllimova, Hacı İsmayılov, Ramiz Məlik, əməkdar artistlər Kazım Abdullayev, Elxan Quliyev, Əjdər Həmidov, Əli Nurzadə, Aslan Şirin, aktyorlar Şəhla Əliqızı, Rövşən Kərimduxt, Anar Heybətov, Sərdar Rüstəmov, Əminə Babayeva, Rəşad Bəxtiyarov, Elnar Qarayev, Elnur Qədirov, Rada Nəsibova, Günel İmanova ifa edirlər. Tamaşanın musiqi tərtibatçısı Həmid Kazımzadə, geyim rəssamı Aygün Mahmudova, işıq üzrə rəssamı Rafael Həsənovdur. Tamaşa XVIII əsrdə Qarabağ xanlığının mərkəzi olan Şuşada baş vermiş tarixi hadisələrdən və Qarabağ hökmdarı İbrahim xanın ictimai-siyasi, ailə-məişət həyatından bəhs edir. O dövrdə xanlıqlara bölünmüş Azərbaycana yiyələnmək istəyən Rusiya və İranla siyasi əlaqələri və dostluq münasibətlərini bərqərar etməyə çalışan İbrahim xan erməni fitnəkarlığının qurbanı olur.xeber100.com