“Azərsun Holdinq” MMC-nin dəstəyi ilə tədbir keçiriləcək

İyulun 30-da Azərbaycan Xalça Muzeyinin uşaq muzeyi şöbəsinin təşəbbüsü, IDEA İctimai Birliyi və “Azərsun Holdinq” MMC-nin dəstəyi ilə “Ailə günü” adlı tədbir keçiriləcək. Muzeyin “Açıq qapı” günü çərçivəsində təşkil ediləcək tədbirin məqsədi valideyn və uşaq arasında ümumi maraqları birləşdirmək, ünsiyyət körpüsünü möhkəmləndirmək və ən əsası mədəniyyət və incəsənətimizi tanıtmaqdır. Muzeydən Azərtac-a bildirilib ki, tədbirin proqramında müxtəlif yaş hədləri nəzərə alınıb. İştirakçılar Azərbaycan xalçaçılığı, dekorativ-tətbiqi sənətinin tarix və mədəniyyəti ilə yaxından tanış olacaqlar. Onlar muzeydə təşkil olunan ustad dərslərində iştirak etməklə öz yaradıcı bacarıqlarından istifadə edərək özlərinin incəsənət nümunələrini hazırlayacaqlar. İştirakçıları tədbirdə muzeyin əməkdaşlarının köməyi ilə kompüter proqramında virtual xalçanın yaradılması, saxsı qablar üzərində xalça rəsmlərinin və akril boyalarla dibçəklərin üzərində rəngarəng təsvirlərin çəkilməsi, dekorativ bəzək əşyaları, qolbaqların hazırlanması və digər bir-birindən əyləncəli oyunlar və masaüstü tapşırıqlar gözləyir. Tədbirə qoşulan iştirakçılar məşhur xalçaçı rəssam Eldar Mikayılzadənin “Xalçanın yaranışı” adlı xalçasının rəsm pazllarını yığmaq imkanı əldə edəcəklər. Muzeyin əməkdaşı Püstə Ağayeva “Klassik və müasir süjetli xalçalar” mövzusunda mühazirə deyəcək və muzeyə mini ekskursiya təşkil olunacaq. Bundan əlavə, dəvət olunmuş aktyorlar tərəfindən uşaqlar üçün böyük maraq doğuracaq nağıllardan ibarət tamaşalar da təqdim ediləcək. Məlumat üçün bildirək ki, tədbirdə hemofiliya və talassemiya pasiyentləri tam olaraq ödənişsiz iştirak edə bilər. Qeyd edək ki, muzeydə “Ailə günü” tədbirinin hər ayın son şənbəsi “Açıq qapı” günü çərçivəsində keçirilməsi nəzərdə tutulur.xeber100.com

Milli Parkda rəqs üzrə açıq dərslər keçirilir

Dənizkənarı Milli Parkda rəqs üzrə açıq dərslər keçirilir. Azərbaycan Rəqs Assosiasiyasından (ARA) Azərtac-a bildirilib ki, dərslər pulsuz təşkil edilib. Açıq dərslər yay mövsümü ərzində Azərbaycan Gənclər İttifaqı (AGİ), ARA, Jam SS rəqs studiyası və Bulvar administrasiyasının dəstəyi ilə həyata keçirilir. Dərslərə qatılmaq istəyən şəxs hər bazar günü saat 18:00-dan 21:00-dək Dövlət Kukla Teatrının arxasındakı açıq meydançaya gələ bilər. Dərslər Jam SS studiyasının peşəkar müəllimləri tərəfindən keçirilir.xeber100.com

“Broadway Night Show” konserti keçiriləcək

Sentyabrın 24-də Heydər Əliyev Sarayında “Baku Sinfonietta” orkestrinin iştirakı ilə “Broadway Night Show” konserti keçiriləcək. Sarayın mətbuat xidmətindən Azərtac-a bildirilib ki, konsertdə tamaşaçılara sevilən “Walt Disney” musiqiləri təqdim olunacaq. Hər yaş dövründən tamaşaçılara maraqlı və baxımlı olan, rəngarəng süjet xətti ilə seçilən “Aslan Kral” (The Lion King), “Cəngəlliklər kitabı” (The Jungle Book), “Gözəl və bədheybət” (Beauty and the Beast), “Ələddin” (Aladdin), “Su Pərisi”(The Little Mermaid), “Mulan” (Mulan), “Pinokkio” (Pinocchio), “Anastasiya” (Anastasia) və s. ən məşhur “Walt Disney” cizgi filmlərindən kompozisiyalar səsləndiriləcək.xeber100.com

Azərbaycan klassik musiqisinə həsr olunan gecə keçirilib

Azərbaycanın Los-Ancelesdəki baş konsulluğunda ABŞ-ın nüfuzlu tibb ocaqlarından olan Cedars-Sinai Tibb Mərkəzinin “Bir Ürək Xilas Et” Fondunun üzvləri üçün Azərbaycan klassik musiqisinə həsr olunan gecə keçirilib. Tədbirdə çıxış edən Azərbaycanın Los-Ancelesdəki baş konsulu Nəsimi Ağayev milli musiqi sənətimizin tarixindən bəhs edərək Azərbaycanın klassik musiqi janrı haqqında məlumat verib. Dünya musiqi tarixində ölkəmizin bir sıra yeniliklərə imza atdığını vurğulayan diplomat bu səpkidə müsəlman dünyasında ilk opera, operetta və baletin məhz Azərbaycanda yarandığını qeyd edib. Azərbaycanın Üzeyir Hacıbəyli, Qara Qarayev, Fikrət Əmirov kimi dahi bəstəkarlarının olduğunu bildirən baş konsul klassik musiqi sənətimizin inkişafında bu incəsənət xadimlərinin əvəzolunmaz rolundan bəhs edərək onların dünyanın mədəniyyət yaddaşına həkk olunmuş əsərlərindən söz açıb. Azərbaycan musiqisinin ABŞ-da geniş təbliğ olunmasına baş konsulluğun daim xüsusi diqqətlə yanaşdığını bildirən diplomat bu səpkidə 2013-cü ildə “Arşın mal alan” operettasının Los-Ancelesdə, 2014-cü ildə isə “Yeddi gözəl” baletinin San-Dieqo şəhərində uğurla keçirilmiş ABŞ premyeralarını və bu premyeraların minlərlə amerikalı tərəfindən izlənilməsini böyük mədəniyyət hadisələri kimi qeyd edib.xeber100.com

Vokalçıların IV beynəlxalq müsabiqəsi keçiriləcək

Xəbər verdiyimiz kimi, oktyabrın 22-23-də Moskvada Müslüm Maqomayevin Mədəni-Musiqi İrsi Fondunun təşkilatçılığı ilə Vokalçıların Müslüm Maqomayev adına IV beynəlxalq müsabiqəsi keçiriləcək. Azərtac Fondun saytına istinadla xəbər verir ki, müsabiqənin final konserti oktyabrın 23-də “Crocus City Hall” səhnəsində reallaşacaq. Konsertdə 12 ölkədən, o cümlədən Azərbaycan, Argentina, Gürcüstan, Misir, İsrail, İtaliya, Qazaxıstan, Çin, Rusiya, Monqolustan, Ukrayna və Xorvatiyadan vokalçılar çıxış edərək müsabiqənin laureatı adı uğrunda mübarizə aparacaqlar. Gənc vokalçılar artistlər həm klassik ariyaları, Neopolitan mahnılarını, həm də estrada janrından, eləcə də Müslüm Maqomayevin repertuarından mahnıları ifa edəcəklər. SSRİ Xalq Artisti Tamara Sinyavskayanın rəhbərliyi altında beynəlxalq münsiflər heyəti vokalçıların ifasını qiymətləndirəcək. Müsabiqə-konsert Moskvanın “Russkaya filarmoniya” simfonik orkestrinin müşayiəti ilə keçiriləcək. Orkestrə Dmitri Yurovski dirijorluq edəcək.xeber100.com

IX musiqi festivalı keçiriləcək

Oktyabrın 4-5-də Rusiyanın Samara şəhərində Mstislav Rostropoviçə həsr olunur IX musiqi festivalı keçiriləcək. Festival Mariya Teatrının bədii rəhbəri və direktoru Valeri Gergiyevin və Samara vilayəti hökumətinin təşəbbüsü ilə təşkil edilir. Azərtac Mariya Teatrının saytına istinadla xəbər verir ki, ənənəvi olaraq Samara Akademik Opera və Balet Teatrının səhnəsində adıçəkilən teatrın simfonik orkestri V. Gergiyevin dirijorluğu ilə çıxış edəcək. Dünya şöhrətli violonçelçi, həmyerlimiz Mstislav Rostropoviçin müstəsna istedadı və tükənməz enerjisi, şəxsiyyəti onu klassik musiqi tarixinin görkəmli nümayəndələrindən birinə çevirib. O, dünyanın 30-dan çox ölkəsinin 130-dan çox mükafatına layiq görülüb. M.Rostropoviç özünü iki böyük musiqiçinin – Sergey Prokofyev və Dmitri Şostakoviçin şagirdi və dostu hesab edib, dünya ölkələrində onların əsərlərini violonçeldə səsləndirib, habelə bu əsərlərə dirijorluq edib.xeber100.com

“Retro Bakı” layihəsi çərçivəsində növbəti konsert proqramı təşkil olunacaq

İyulun 23-də Bakı Şəhər Mədəniyyət və Turizm Baş İdarəsinin təşkilatçılığı ilə reallaşan “Retro Bakı” layihəsi çərçivəsində növbəti konsert proqramı təşkil olunacaq. Baş İdarədən Azərtac-a bildirilib ki, iyulun 24-də dama edəcək konsert Fəvvarələr Meydanında baş tutacaq. Bu həftənin konsert proqramında tanınmış caz ifaçısı, Əməkdar İncəsənət Xadimi Cavan Zeynallı, həmçinin, müğənnilər Nəzakət Məmmədova, Tural Mehri, Nigar Süleymanova, Mehman Tağıyev, “Odlar Yurdu” qrupu maraqlı repertuarla paytaxt sakinləri və qonaqların görüşünə gələcək. Konsertdə bəstəkar və xalq mahnılarımız ilə yanaşı, dünya bəstəkarlarının əsərləri də səsləndiriləcək.xeber100.com

“Art Villa” qalereyasında art-seminar keçirilib

Art-Ekspertlər Məktəbi və Azərbaycan-Ukrayna Gənclər Birliyi “Art Council” qeyri-hökumət təşkilatının birgə təşkilatçılığı ilə “Art Villa” qalereyasında art-seminar keçirilib. Azərtac xəbər verir ki, iki gün davam edəcək seminar qısa müddətdə Qərbi Avropa rəssamlığında dəst-xətti və üslubu seçməyə imkan verəcək. Layihənin rəhbəri Dadaş Məmmədov bildirib ki, sayca ikinci olan “Dünya rəssamlığını necə başa düşmək” adlı art-seminar incəsənət sahəsində alternativ təhsil layihəsidir. Qeyd olunub ki, ukraynalı mütəxəssislərin iştirakı ilə reallaşan seminarın proqramına antik, renessans, barokko, rokoko, romantizm, realizm, impressionizm, postimpressionizm, məşhur şəxsiyyətlər, rəssamlar, onların bioqrafiyası və digər məsələlər daxildir. Seminarın məqsədi qarşılıqlı mədəni əlaqələrin inkişafına töhfə verməklə yanaşı, bu sahədə çalışan incəsənət xadimlərini bir araya gətirməkdən ibarətdir.xeber100.com

“Abşeron” Rəsm Qalereyasında sərgi açılacaq

İyulun 22-də "Abşeron" Rəsm Qalereyasında “Milli Dəyər” layihəsi çərçivəsində gənc rəssamların sərgisi açılacaq. Tədbirin təşkilatçılarından olan “Gənclərin Dostluq Şəbəkəsi” İctimai Birliyindən Azərtac-a verilən məlumata görə layihədə iştirak edəcək gənclər hazırladıqları rəsmlər vasitəsilə cəmiyyətə kiçik ismarıc vermiş olacaqlar. Layihə Azərbaycan Respublikasının Prezidenti yanında Gənclər Fondunun maliyyə yardımı, “Gənclərin Dostluq Şəbəkəsi” İctimai Birliyinin təşkilatçılığı, Azərbaycan Teatr Xadimləri İttifaqı və Seyid Cəfər Pişəvəri adına Respublika Humanitar Fənlər Gimnaziyasının dəstəyi ilə keçirilir. Əsas məqsəd milli mənəvi dəyərlərimizin qorunub saxlanılması və inkişaf etdirilməsi baxımından gəncləri təşviq etmək, gənclər siyasətinə dəstək olmaq, yaradıcı gənclərin mədəniyyət və incəsənətə olan maraqlarını artırmaq və onların asudə vaxtlarının səmərəli təşkil edilməsi üçün zəruri şərait yaratmaqdan ibarətdir. Qeyd edək ki, layihə çərçivəsində qısametrajlı filmin çəkilməsi, gənclərlə görüşlərin təşkili və onların iştirakı ilə sərgi açılması nəzərdə tutulur.xeber100.com

Amerika filmlərinin nümayişinə başlanılıb

Nizami Kino Mərkəzində iyulun 21–dən ABŞ-ın “İşıqlar sönür” və “Startrek: sonsuzluq” filmlərinin nümayişinə başlanılıb. Mərkəzin mətbuat xidmətindən bildirilib ki, Erik Hayssererin ssenarisi əsasında rejissor Devid F. Sandberqin çəkdiyi “İşıqlar sönür” filmi dəhşət və qorxu janrındadır. Doğma yuvasını tərk edən Rebbeka bütün uşaqlıq qorxularının geridə qaldığını zənn edir. Balaca olarkən o, işıq söndükdə nəyin real olub-olmadığından əmin ola bilmirdi. İndi onun şüurunu imtahana çəkən anlaşılmayan dəhşətli hadisələr kiçik qardaşı Martinlə baş verir. Anaları Sofi ilə sirli bağlantısı olan, bəlli olmayan hədə yenə ortaya çıxıb. Amma bu dəfə Rebbeka sirri açmaq üzrədir – işıq sönən kimi həyatları təhlükə altında olacağına artıq əmindir. Filmdə rolları Tereza Palmer, Qabriel Beytman, Aleksandr DiPersia, Billi Berk, Mariya Bello, Rolando Boys, Ava Kantrell, Ariel Dupin, Emili Elin Lind, Lotta Losten və başqa aktyorlar canlandırıb. Rejissor Castin Linin Saymon Peqqin ssenarisi əsasında çəkdiyi “Startrek: sonsuzluq” filmi triller, macəra, döyüş və fantastika janrındadır. Hadisələr beşillik missiya başladıqdan iki il sonra cərəyan edir. Kapitan Ceyms T. Kirk başda olmaqla hərəkət edən “Enterprayz” ulduz gəmisinin ekipajı tanınmayan gəlmələrin qüvvətli və təhlükəli hücumuna məruz qalır. Gəmilərini məhv etdikdən sonra gəlmələr ekipaj üzvlərini tanınmayan planetdə daha qorxulu düşmənlə üz üzə qoyurlar. Rollarda Kris Payn, Zakari Kuinto, Saymon Peqq, Karl Urban, Zoi Saldana, Con Ço, Anton Elçin, İdris Elba, Sofiya Butella və Co Taslim çəkiliblər.xeber100.com