Gənc Tamaşaçılar Teatrı 88-ci mövsümə yekun vurmağa hazırlaşır

Xəbər verdiyimiz kimi Azərbaycan Dövlət Gənc Tamaşaçılar Teatrının yaradıcı heyəti artıq bir neçə gündür ki, respublikamızın bölgələrində qastrol səfərindədir. Teatrın mətbuat xidmətindən Azərtac-a bildirilib ki, V.Siqarevin “Şeytan ailəsi” əsəri əsasında hazırlanmış “Ağ ölüm” tamaşası ötən gün Yardımlı və Lənkəranda uğurla nümayiş etdirilib. Rayon ictimaiyyəti tərəfindən maraqla qarşılanan tamaşa hazırda Lerik rayonunda nümayiş olunur. Həmçinin, sözü gedən tamaşanın bu gün Astarada da nümayişi nəzərdə tutulur. Bununla da teatr özünün 88-ci mövsümünə yekun vuracaq. Bölgələrdə yaşayan əhalinin asudə vaxtının səmərəli keçirilməsi, gənclərin və məktəblilərin mənəvi estetik tərbiyəsinin formalaşdırılması məqsədilə nümayiş etdiriləcək tamaşada əsas rolları Əməkdar Artist Nübar Novruzova, aktyorlar Rəzzaq Məmmədov, Vüsal Mehrəliyev, Zülfiyyə Alhüseynova, Səbinə Məmmədova, Manaf Dadaşov və Anar Seyfullayev ifa edəcəklər.xeber100.com

“Azərbaycanı tanıyaq” adlı tədbir keçirilib

Azərbaycanın Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzinin (AMM) himayəçilik etdiyi, Daşkənddə fəaliyyət göstərən 30 nömrəli internat məktəbinin vilayətdəki Çervak istirahət zonasındakı yay düşərgəsində “Azərbaycanı tanıyaq” adlı tədbir keçirilib. Xeyriyyə tədbirində Mədəniyyət Mərkəzinin əməkdaşları, məktəbin müəllimləri və şagirdləri iştirak ediblər. Mədəniyyət Mərkəzinin direktoru Samir Abbasov Azərbaycan-Özbəkistan dostluğu, AMM-in uşaq evləri ilə bağlı layihələri, Azərbaycanda uşaqlara yaradılan şərait və digər məsələlərdən danışıb. Mədəniyyət Mərkəzinin əməkdaşı Kifayət Pirməmmədova tədbirdə Azərbaycanın mədəniyyəti, incəsənəti haqqında məlumat verib. Tədbirin bədii hissəsində uşaqlar arasında viktorina keçirilib, Azərbaycanın və Özbəkistanın dövlət simvolları, mədəniyyəti, ədəbiyyatına dair sualları cavablandıran uşaq və yeniyetmələrə hədiyyələr verilib. Mədəniyyət Mərkəzinin nəzdindəki “Azərbaycan qızları” uşaq rəqs ansamblının üzvləri bir-birindən gözəl rəqslərimizi, internat məktəbinin şagirdləri isə dünya xalqlarının rəqslərini ifa edib, şeirlər söyləyiblər. Tədbirin sonunda təxminən 150 uşağa AMM-in sovqatları, kiçik ölçüdə bayraqlar, ölkəmizin mədəniyyətinə dair suvenirlər hədiyyə edilib. Sonra uşaqlar plova, meyvə və şirniyyatlara qonaq ediliblər.xeber100.com

“Multikulturalizmin Azərbaycan modeli”…

Azərbaycan Xalça Muzeyində milli azlıqların həyat və yaşayış tərzini əks etdirən “Bir ailədə” adlı fotosərgi açılıb. Apa-nın xəbərinə görə, sərgi “Azərbaycan-doğma diyar” devizi altında Milli Azlıqların V Respublika Festivalı çərçivəsində təşkil olunub. Fotosərginin açılışında çıxış edən mədəniyyət və turizm nazirinin müavini Sevda Məmmədəliyeva bildirib ki, sərgidə Azərbaycanda yaşayan müxtəlif xalqların ənənələri, həyat tərzini əks etdirən əsərlər nümayiş olunur. O qeyd edib ki, Azərbaycanda həmişə müxtəlif ölkələrə, dillərə böyük diqqət yetirilib. Nazir müavini onu da qeyd edib ki, Bakı artıq mədəniyyətlərarası dialoqun məkanı kimi qəbul edilir. Fotosərgiyə baxış keçirildikdən sonra “Multikulturalizmin Azərbaycan modeli” mövzusunda dəyirmi masa keçirilib.xeber100.com

Fransanın milli bayramında milli rəqslərimiz təqdim olunub

Azərbaycanın Dostları Assosiasiyası və Azərbaycanın Fransadakı səfirliyi bu ölkənin Sen-Jan milli bayramı münasibətilə konsert proqramı təşkil edib. Diasporla İş üzrə Dövlət Komitəsindən Azərtac-a bildiriblər ki, konsertdə Xalq Artisti Yusif Qasımovun rəhbərlik etdiyi “Bakı ulduzları” rəqs ansamblının ifasında Azərbaycanın milli rəqsləri təqdim olunub. Konsert proqramını Sen Simeon kommunasının meri Patrik Rabaglia, Fransa senatının üzvü Natali Qule də izləyiblər. Senator N.Qule Azərbaycanın Dostları Assosiasiyasına və Azərbaycanın Fransadakı səfirliyinə tədbirə görə təşəkkürünü bildirib və rəqs ansamblının rəhbəri Yusif Qasımova Fransa Senatının xatirə medalını təqdim edib. Azərbaycanın Dostları Assosiasiyasının baş katibi Mirvari Fətəliyeva təmsil etdiyi təşkilatın fəaliyyəti haqqında məlumat verib, Azərbaycanın zəngin mədəniyyətinin təbliği və Fransa-Azərbaycan münasibətlərinin möhkəmlənməsində qurumun verdiyi töhfələrdən danışıb.xeber100.com

“Davamlı Turizm Beynəlxalq ili”…

Azərbaycan BMT İnkişaf Proqramının (UNDP) birgə turizm vasitəsilə davamlı inkişafa nail olmaq istiqamətində, xüsusilə də 2017-ci ilin BMT tərəfindən elan edilmiş “Davamlı Turizm Beynəlxalq ili” çərçivəsində birgə layihələrin keçirilməsində maraqlıdır. Bu fikirləri ABŞ-da səfərdə olan mədəniyyət və turizm naziri Əbülfəs Qarayev UNDP-nin rəhbəri Helen Klarkla görüşdə səsləndirib. Nazirlikdən Azərtac-a bildirilib ki, görüşdə UNDP ilə Azərbaycan arasında əməkdaşlıq, xüsusilə mədəniyyət və turizm sahəsində davamlı inkişafın dəstəklənməsi perspektivləri müzakirə edilib. Nazir turizm menecmenti, turizm informasiya mərkəzlərinin açılması məqsədilə Bakıdakı UNDP ofisi ilə sıx əməkdaşlıq edildiyini söyləyib. H.Klark apreldə Bakıda BMT Sivilizasiyalar Alyansının 7-ci Qlobal Forumunun yüksək səviyyədə təşkili münasibətilə naziri təbrik edərək Forumda müzakirə olunmuş məsələlərin BMT-nin qəbul etdiyi Davamlı İnkişaf Gündəliyinə uyğun olduğunu vurğulayıb. Ə.Qarayev BMT rəsmisinin diqqətinə çatdırıb ki, Ermənistanın Azərbaycan torpaqlarını işğal altında saxlaması və bu münaqişə ölkəmizin, eləcə də regionunun inkişafı və təhlükəsizliyi üçün ciddi maneədir. Sonda nazir H.Klarkı Azərbaycan Prezidenti İlham Əliyevin himayəsi ilə 2017-ci ildə Bakıda keçiriləcək 4-cü Ümumdünya Mədəniyyətlərarası Dialoq Forumuna dəvət edib.xeber100.com

“İpək yolu” VII Beynəlxalq musiqi festivalı davam edir

Şəki “İpək yolu” VII Beynəlxalq musiqi festivalı artıq üçüncü gündür musiqisevərləri, şəhərin qonaqlarını maraqlı və rəngarəng konsert proqramları ilə sevindirir. Festivalın əvvəlki günlərində tamaşaçılar TURKSOY-un xalq çalğı alətləri orkestrinin, Türkiyənin “Şimdi” ansamblının, Anadolu Türk Xalq Mahnı və Rəqs kollektivinin çıxışlarını izləyiblər. Azərtac xəbər verir ki, iyunun 29-da günorta saatlarında Şəki xanları sarayının həyətində Yaponiyanın “Va-Liqa” musiqi ansamblının konserti olub. Konsertdə Şəki Şəhər İcra Hakimiyyətinin, Azərbaycan Bəstəkarlar İttifaqının, TÜRKSOY-un, Yaponiyanın Azərbaycandakı səfirliyinin rəsmiləri, musiqisevərlər iştirak ediblər. Konsertə başlamazdan əvvəl Yaponiyanın ölkəmizdəki səfiri Tsuquo Takahaşi çıxış edərək, Şəki şəhərində keçirilən musiqi festivalında iştirak etməkdən qürur duyduğunu bildirib. Vurğulanıb ki, Azərbaycanın qədim tarixi-memarlıq abidəsi olan Şəki xanlarının sarayında yapon musiqiçilərinin konsertinin gerçəkləşməsi çox əlamətdardır. Diqqətə çatdırılıb ki, tamaşaçılar qarşısında çıxış edəcək “Va-Liqa” ansamblı Yaponiyanın ənənəvi musiqi və mədəniyyət janrının xaricdə təbliği ilə məşğuldur. Ansamblın 2014-cü və 2015-ci illərdə Bakı və İsmayıllı şəhərlərindəki konsertləri Azərbaycan tamaşaçıları tərəfindən yüksək qiymətləndirilib. Yaponiya səfiri iki ölkə arasında mədəni əlaqələrin musiqi və incəsənət vasitəsi ilə daha da möhkəmlənəcəyinə əminliyini bildirib. Sonra “Va-Liqa” musiqi ansamblının üzvləri tamaşaçılar qarşısında geniş konsert proqramı ilə çıxış edib. Ansamblın üzvləri Hanavaçie, Omodaka Akiko, Yamada Miçiko və Kasai Hiroyukinin ənənəvi yapon musiqi alətləri olan tsuqaru şamisen, şinobue, vadaiko və zərb alətlərində təqdim etdikləri ifalar, həmçinin Azərbaycan muğamının ifa tərzinə bənzər Yaponiyanın minyo musiqisi tamaşaçılar tərəfindən böyük maraqla qarşılanıb. Konsertin sonunda ansamblın üzvlərinə festivalla bağlı xatirə hədiyyələri təqdim olunub. Festivalın proqramına uyğun olaraq, iyunun 29-da axşam Yay teatrında Gəncə Dövlət Filarmoniyasının konserti olacaq.xeber100.com

Musiqili Teatr 106-cı teatr mövsümünü başa vurmaq üzrədir

Azərbaycan Dövlət Musiqili Teatrı 106-cı teatr mövsümünü başa vurmaq üzrədir. Teatrın mətbuat xidmətindən bildirilib ki, bununla əlaqədən iyulun 4-də mükafatlandırma mərasimi keçiriləcək. Teatrın direktoru, Əməkdar İncəsənət Xadimi Əliqismət Lalayevin təklifi əsasında formalaşan mükafatın təsisçiləri Musiqili Teatr və teatrın həmkarlar ittifaqıdır. “Mövsümün ən yaxşı aktrisası”, “Mövsümün ən yaxşı aktyoru”, “Mövsümün ən yaxşı balet artisti” və digər nominasiyaları üzrə qaliblərlə yanaşı, “Mövsümün ən yaxşı tamaşası” da mükafatlandırılacaq. Qaliblərə xüsusi prizlər və mükafatlar veriləcək. Qeyd edək ki, yekunlaşmaqda olan mövsüm sənət ocağı üçün çox əlamətdar və zəngin olub. Mövsüm boyu teatrda bir çox beynəlxalq və respublika əhəmiyyətli tədbirlər keçirilib, “Qafqazlı qardaşqızı” “Baladadaşın toy hamamı”, “Qızıl cücə” və “999-cu gecə” tamaşalarının premyerası olub. Habelə, teatr ölkəmizdə keçirilən Amerika günləri çərçivəsində məşhur “Company-E” şirkəti ilə ortaq layihə kimi “Brodvey” şou-proqramının Azərbaycan versiyasını təqdim edib. Teatr multikulturalizm ili çərçivəsində müxtəlif regionlarda – Masallı, Xaçmaz və Şamaxı rayonlarında tamaşalarla çıxış edib. Xalq Artisti Afaq Bəşirqızının 60, Bəşir Səfəroğlunun 90 illik yubileyləri yüksək səviyyədə təşkil olunub. Eyni zamanda, teatr “Sosial proqramlar” çərçivəsində Əmək və Əhalinin Sosial Müdafiəsi Nazirliyinin Dövlət Sosial Təminat Xidmətinin Sağlamlıq İmkanları Məhdud Gənclərin Peşə Reabilitasiya Mərkəzində, “Azərbaycan Uşaqları” İctimai Birliyinin Uşaq Sığınacağı-Reinteqrasiya Mərkəzində konsert proqramları ilə çıxış edib. Kollektivin bəzi üzvləri yerli və beynəlxalq müsabiqələrdə yüksək səviyyədə iştirak edib və uğurlu çıxışlarına görə il boyu müxtəlif təşkilatlar tərəfindən təltif olunublar.xeber100.com

IV Bakı Beynəlxalq Teatr Konfransı keçiriləcək

Noyabrın 7-8-də Azərbaycan Respublikası Mədəniyyət və Turizm Nazirliyinin təşkilatçılığı ilə IV Bakı Beynəlxalq Teatr Konfransı keçiriləcək. Konfrans “Azərbaycan teatrı 2009-2019-cu illərdə” Dövlət Proqramının icrası çərçivəsində təşkil ediləcək. Azərtac xəbər verir ki, bu barədə məlumat Beynəlxalq Teatr Tədqiqatları Federasiyasının (IFTR) saytında yer alıb. Beynəlxalq teatr konfransının əsas məqsədi dünyanın hər yerindən aparıcı nəzəriyyəçilər, alimlər, rejissorlar və prodüserlərə müasir teatrın imkanlarını və qarşılaşdığı problemləri müzakirə etmək üçün platforma yaratmaqdır. Builki konfransın əsas mövzusu “Multikulturalizm və teatr” olacaq. Konfransın işçi dilləri ingilis, rus və Azərbaycan dilləridir. Noyabrın 6-da və 9-da isə beynəlxalq ekspertlər tərəfindən ustad dərsləri və treninqlər keçiriləcək.xeber100.com

Opera və Balet Teatrı mövsümü başa vurmağa hazırlaşır

İyunun 29-da Azərbaycan Dövlət Akademik Opera və Balet Teatrı görkəmli Azərbaycan bəstəkarı Q.Qarayevin “Don Kixot” və “Leyli və Məcnun” baletlərinin tamaşası ilə 107-ci mövsümünü başa vuracaq. Teatrın mətbuat xidmətindən Azərtac-a bildirilib ki, mövsüm başa çatsa da, yaradıcı kollektiv iyul ayı ərzində yeni mövsümə hazırlıqla əlaqədar yaradıcılıq məşqlərini davam etdirəcək. Bundan əlavə, teatrın simfonik orkestri isə çox məsul bir qastrol səfərinə hazırlaşacaq. Belə ki, teatrın orkestr heyəti artıq 9-cu dəfə Almaniyada keçiriləcək Qut-İmmlinq Beynəlxalq Opera Sənəti Festivalında iştirak etmək üçün dəvət alıb. Orkestr festivala 60 nəfərlik heyətlə qatılacaq. Mədəniyyət və Turizm Nazirliyinin dəstəyi ilə baş tutacaq qastrol səfəri avqustun 1-dən 9-dək davam edəcək. Orkestr avqustun 7-də festivalın əsas tədbiri olan – “Qrand” final konsertində çıxış edəcək. 32 ölkənin qatıldığı festivalda, həmçinin dünya bəstəkarlarının operalarından ariya və duetlər səsləndiriləcək. Konsertdə görkəmli bəstəkarlar Üzeyir Hacıbəyli, Qara Qarayev, Fikrət Əmirov, Niyazi və Polad Bülbüloğlunun musiqi əsərlərindən ibarət kompozisiyaların də ifa olunacağı nəzərdə tutulur. “Qrand” final konsertində orkestri Qut-İmmlinq festivalının musiqi rəhbəri və dirijoru Korneliya fon Kerssenbrok, Xalq Artisti, professor Cavanşir Cəfərov, dirijorların beynəlxalq müsabiqələrinin laureatı Əyyub Quliyev və gənc dirijor Murtuza Məmmədov idarə edəcəklər.xeber100.com

“Yurd həsrəti” adlı sərgi açılıb

İyunun 28-də Azərbaycan Rəssamlar İttifaqının Vəcihə Səmədova adına sərgi salonunda tanınmış rəssam Səyyar Əliyevin “Yurd həsrəti” adlı fərdi sərgisi açılıb. Azərtac xəbər verir ki, sərgi Mədəniyyət və Turizm Nazirliyi və Azərbaycan Rəssamlar İttifaqının birgə təşkilatçılığı ilə reallaşıb. Tədbirdə Azərbaycan Rəssamlar İttifaqının katibi, Xalq Rəssamı Ağəli İbrahimov çıxış edərək sərgidə sənətkarın 80-dək sənət əsərinin nümayiş olunduğunu diqqətə çatdırıb. Qeyd olunub ki, ekspozisiyada fırça ustasının abstrakt əsərləri, realist işlər və peyzaj janrları üstünlük təşkil edir. Həmçinin, fəlsəfi yanaşma, vətənpərvərlik, xeyirxahlıq, insansevərlik kimi mövzuların nümayiş olunduğu əsərlər arasında rəssamın “Müqəddəs torpaq”, “Ruhların səsi”, “Xarı bülbülün faciəsi” “Xarı bülbülün səsi”, “Şuşa faciəsi” və başqa mövzuların əks olunduğu əsərləri yer alıb. Mədəniyyət və Turizm Nazirliyinin sektor müdiri Qalib Qasımov çıxış edərək sərginin əhəmiyyətindən söz açıb. Bildirilib ki, rəssamın yaradıcılığından vətənini sənəti qədər sevən bir sənətkar olduğu hiss olunur. Vurğulanıb ki, həm janr müxtəlifliyi, həm də işlənmə texnikası ilə maraq doğuran sənət əsərləri zəngin dünyagörüşün və gərgin əməyin bəhrəsidir. Çıxışlarda bildirilib ki, emosional hisslərin rənglərlə ifadəsi və fəlsəfi yanaşma sənət əsərlərinin əsas mövzularındandır. Rəssamın özünəməxsus sənət dünyasından bəhs edən natiqlər onun rəssamlığa olan sonsuz sevgisindən danışıblar. Daha sonra qonaqlar sərgi ilə tanış olub. Sərgi bir həftə davam edəcək.