Dünya Səhiyyə Təşkilatının məlumatı

Avropa ölkələrinin bir çox sakini mövsümi qripə qarşı peyvənd olunmur. Dünya Səhiyyə Təşkilatına (DST) üzv olan Avropa regionu ölkələrinin yarısında yaşı 65-dən yuxarı olan sakinlərin üçdəbirindən azı vaksinləşdirilib. Bununla yanaşı, mövsümi qrip nəticəsində əmələ gələn respirator xəstəliklərdən ildə təxminən 44 min insan dünyasını dəyişir. Ölüm hallarının təqribən 75 faizi yaşlı nəslin payına düşür.Azərtac DST-yə istinadla xəbər verir ki, son 7 il ərzində yüksək risk qrupuna daxil olan insanların – yaşlıların, uşaqların və xroniki xəstəlikləri olan sakinlərin qripə qarşı vaksinləşdirilməsi xeyli azalıb.Ekspertlər ehtiyat edirlər ki, Avropada mövsümi qripə qarşı vaksinləşdirməyə tələbatın azlığı pandemiya halında ciddi mənfi nəticələrə gətirib çıxara bilər.DST-nin Avropa Regional Bürosunun direktoru bildirib ki, vaksinləşdirmə qrip virusunun əmələ gətirdiyi ağır xəstəliyə qarşı daha effektiv üsuldur. Lakin apardığımız tədqiqatlar göstərir ki, Avropa regionu ölkələrinin bəzilərində vaksinləşdirməyə tələbat azalır. Ekspertlər narahatdırlar ki, ölkələrin bəzilərində həm qripə qarşı peyvənd olunmaq istəyənlərin sayı, həm də vaksin ehtiyatı azalıb. Çünki alınan vaksinlərin həcmi tələbdən asılıdır.Bununla belə, 2017/2018-ci qrip mövsümü özünün pik nöqtəsinə Qərbi Avropada çatıb, bəzi ölkələrdə ağır halların çox sürətli artımı müşahidə olunur. Ölkələrin bəziləri yaşlı insanlar arasında anomal yüksək ölüm hallarının olması barədə xəbər verirlər.xeber100.com

Səhiyyə naziri vətəndaşları qəbul edib

Mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə əlaqədar müraciətlərinin həllinə kömək göstərirlər.Fevralın 9-da səhiyyə naziri Oqtay Şirəliyev ölkə rəhbərinin tapşırığına uyğun olaraq Bərdə rayon Diaqnostika Mərkəzində vətəndaşların növbəti qəbulunu keçirib.Səhiyyə Nazirliyinin mətbuat xidmətindən Azərtac-a bildirilib ki, nazir Bərdə, Ağdam, Ağcabədi və Tərtər rayonlarından olan 13 nəfəri qəbul edərək onların şikayət, təklif və fikirlərini dinləyib.Müraciətlərdə qaldırılan məsələlər nazirliyin müvafiq qurumlarının əməkdaşlarının iştirakı ilə araşdırılıb və onların bəziləri yerindəcə həll edilib.Nazirliyin səlahiyyətlərinə aid olmayan məsələlər aidiyyəti üzrə çatdırılması üçün qeydiyyata alınaraq nəzarətə götürülüb.xeber100.com

İcbari sığorta sisteminin tətbiqi ilə bağlı müzakirə aparılıb

Avropa İttifaqı “Azərbaycanda icbari tibbi sığorta sisteminin tətbiqinə dəstək" tvinninq layihəsini icra edir. Bu geniş proqramın reallaşdırılması çərçivəsində layihənin təmsilçiləri Azərbaycan Tibb Universitetinin (ATU) qonağı olublar.Universitetdən Azərtac-a bildiriblər ki, görüşdə ATU-nun rektoru, professor Gəray Gəraybəyli qonaqlara rəhbərlik etdiyi universitetdəki tədris-təhsil sistemi və burada fəaliyyət göstərən klinikaların fəaliyyəti haqqında məlumat verib. G.Gəraybəyli Azərbaycanda icbari tibbi sığortanın tətbiqinin mühüm məsələ olduğunu, bu məqsədlə dövlət tərəfindən əhəmiyyətli addımların atıldığını vurğuladı.Rektor bildirdi ki, ATU-nun klinikalarında bəzi qurumlardan göndərilən sığortalı xəstələrə xidmət göstərilir. Lakin bu imkandan bütün əhalinin istifadəsi insanların sağlamlığının müdafiəsində ciddi rol oynayır. G.Gəraybəyli Avropa İttifaqının dəstəklədiyi bu layihənin ölkəmizdə icbari tibbi sığortanın tətbiqində və islahatların aparılmasında böyük rol oynayacağından əminliyini vurğulayıb.Avropa İttifaqının “Azərbaycanda icbari tibbi sığorta sisteminin tətbiqinə dəstək” tvinninq layihəsinin rezident tvinninq müşaviri Qediminas Çerniauskas isə layihənin məqsədləri haqqında ətraflı məlumat verib. O, iki il ərzində Avropa ölkələrinin müvafiq istiqamət üzrə böyük təcrübəyə malik mütəxəssis və ekspertləri Avropanın qabaqcıl təcrübəsinə əsaslanaraq İcbari Tibbi Sığorta üzrə Dövlət Agentliyinə dəstək verəcəyini bildirib.xeber100.com  

Dünya Səhiyyə Təşkilatı xəbərdarlıq edir

Dünyanın həm yoxsul, həm də zəngin 22 ölkəsindən olan yarım milyon insanda antibiotiklərə davamlılığın artması müşahidə olunur. Dünya Səhiyyə Təşkilatının (DST) ekspertləri müvafiq məlumatın mikrob əleyhinə preparatlara davamlılıq üzrə Qlobal epidemioloji nəzarət sistemi tərəfindən əldə edildiyini söyləyiblər.Azərtac BMT-nin Xəbərlər Mərkəzinə istinadla bildirir ki, bakteriyalar arasında antibiotiklərə əks-təsir göstərən bağırsaq çöpü, salmonella, həmçinin qızılı stafilokok və digər təhlükəli xəstəliklərdir. DST-nin nümayəndəsi Mark Sprenger deyib: “Məruzə təsdiqləyir ki, antibiotiklərə davamlılıq problemi çox ciddidir. Ən çox yayılan və ən təhlükəli yoluxmaların dərmanlara qarşı davamlı olması müşahidə edilir. Patogenlərin milli sərhəd tanımaması isə xüsusi narahatlıq doğurur. Məhz buna görə DST bütün ölkələri etibarlı olan əks-təsirin izlənmə sisteminə qoşulmağa çağırır ki, buradan da məlumatlar qlobal sistemə ötürüləcək”.Hazırda Qlobal epidemioloji nəzarət sistemindən 52 ölkə istifadə edir. Sistem vərəm istisna olmaqla, ən təhlükəli xəstəlik törədicilərinin əks-təsirini izləyir. Məsələ orasındadır ki, vərəm çöplərinin davamlılığı üzərində müşahidə artıq neçə illərdir aparılır.xeber100.com

Tibb Universitetinin məlumatına görə…

Azərbaycan Tibb Universitetinin (ATU) Tədris Terapevtik Klinikasında şüa diaqnostikası və terapiyası kafedrasının rezidentlərinin seminarı keçirilib.Universitetdən Azərtac-a bildiriblər ki, tədbirdə çıxış edən klinikanın direktor müavini Adil Nuriyev bu cür seminarların elmi əhəmiyyətindən danışıb. Bildirilib ki, silsilə xarakteri daşıyan seminarlar may ayında keçiriləcək rezidentlərin VI elmi-təcrübi konfransına (6-cı ATUREK) hazırlıq xarakteri daşıyır.Sonra kafedranın həkim-rezidenti Xavər Qurbanlının vezikoureteral refluks xəstəliyinin radiodiaqnostikası, kafedranın həkim-rezidenti Gülməkan Qədimlinin isə “Renal dopler” (“Böyrək dopleri”) müayinəsi haqqında çıxışları dinlənilib.Seminar mövzular ətrafında müzakirələrlə davam etdirilib.xeber100.com

Dərman vasitələrinə reseptlərin yazılması qaydası təsdiqlənib

Resept blanklarında hər hansı düzəliş edilməsi qadağan edilib.Azərbaycanda dərman vasitələrinə reseptlərin yazılması qaydası təsdiqlənib.Apa-nın məlumatına görə, bu, Səhiyyə Nazirliyinin Kollegiyasının təsdiq etdiyi və yanvarın 23-dən qüvvəyə minən “Aptek təşkilatlarına dair tələblər və aptek təşkilatlarından dərman vasitələrinin buraxılması qaydaları”nda əksini tapıb.Qaydalara əsasən reseptlər təşkilati-hüquqi və mülkiyyət formasından asılı olmayaraq bütün tibb müəssisələrində çalışan, həmçinin özəl tibbi praktika ilə məşğul olan resept yazmaq hüququna malik tibb işçiləri (həkim və tibb məntəqələrinin feldşerləri) tərəfindən tibbi göstərişlər əsasında yazılır. Dərman vasitələrinə reseptlər “Resept blankı forması” və “Ödənişsiz resept blankı forması”nda, optik ləvazimatlara isə “Optik ləvazimatlara resept blankı forması”nda yazılır. Resept dərman vasitələrinin beynəlxalq patentləşdirilməmiş adı, buraxılış forması, dozası və istifadə qaydaları qeyd olunmaqla yazılır. Təyin edilmiş dərman vasitəsinin beynəlxalq patentləşdirilməmiş adının olmadığı hallarda (3 və daha artıq tərkibli, bioloji oxşar dərman vasitələri qrupuna aid olduqda) resept blankında onun ticarət adı yazılır. Resept blanklarında hər hansı düzəlişə yol verilmir.Dərman vasitələrinin tərkib hissələri resept blankında latın və ya ingilis dillərində, dərman forması, hazırlanması və müvafiq buraxılış qaydaları latın dilində, reseptin siqnatura hissəsi (dərmanın istifadə edilmə qaydası) isə Azərbaycan dilində yazılmalıdır. Ambulator şəraitdə müalicə alan xəstələrə resept blankında yazılmış dərman vasitəsi haqqında məlumatlar ambulator xəstənin tibbi kartında və elektron sağlamlıq kartında qeyd edilir. Stasionar şəraitdə müalicə alan xəstələrə dərman vasitələri tibb müəssisəsinə ayrılan dərman vasitələrinin siyahısına uyğun olaraq resept yazmadan təyin edilir.Tibb müəssisəsinə ayrılan dərman vasitələrinin siyahısında olmayan dərman vasitəsinin xəstəyə təyin olunmasına tibbi göstəriş olduqda müalicə həkiminə dərman təyinatını tibb müəssisəsinin rəhbəri və ya onun bu məqsədlə təyin etdiyi məsul şəxslə, təcili-təxirəsalınmaz hallar zamanı isə cavabdeh növbətçi həkim ilə razılaşdırmaqla reseptin yazılmasına icazə verilir.Dərman vasitələrinin ödənişsiz alınması üçün nəzərdə tutulan reseptlər yalnız dövlət müalicə-profilaktika müəssisələrinin həkimləri tərəfindən, Səhiyyə Nazirliyi tərəfindən təsdiq olunmuş siyahıya uyğun yazılır. Ödənişsiz şərtlərlə dərman almaq hüququna malik olan şəxslərə dərman preparatı yazmaq üçün istifadə olunan ödənişsiz resept blanklarının qeydiyyatı aparılır.xeber100.com

Səhiyyə Nazirliyində brifinq keçirilib

Yanvarın 25-də Səhiyyə Nazirliyinin Kliniki Tibbi Mərkəzində mövsümi xəstəliklər mövzusunda brifinq keçirilib.Azərtac xəbər verir ki, Bakı şəhərinin baş terapevti Rəhilə Əliyeva çıxışında payız-qış dövründə kəskin respiratorlu infeksiyaların və qripin yaranması hallarının sürətlə artmasını bildirib. Bu xəstəliklərin yaranmasına səbəb virus və bakteriyalardır. Onun sözlərinə görə, risk qrupuna əsasən tənəffüs yolları və xroniki xəstəlikləri olan insanlar daxildir.“Kəskin respiratorlu xəstəliklər tənəffüs yollarının “soyuqdəymə” simptomları ilə müşayiət olunan istənilən infeksiyalı xəstəlikləri özündə birləşdirir. Buraya faringit, laringit, traxeit və s. daxildir. Zökəm, öskürək və digər soyuqdəymə hallarının əmələgəlmə səbəbləri aşkarlanmadıqda, o zaman həkim tərəfindən “Kəskin respiratorlu xəstəlik” diaqnozu qoyulur. Bu xəstəliklər qrupu həm viruslu infeksiyaları, həm də burun-udlaq infeksiyalarının xroniki ağırlaşmasını özündə birləşdirir. Əgər sizin hərarətiniz olduqca yüksəkdirsə, deməli bu, qripdir. Soyuqdəymə nadir hallarda yüksək hərarətlə müşayiət olunur. Mövsümi xəstəliklərə yoluxmamaqdan ötrü soyuq havada uzun müddət qalmamaq və tərkibində çoxlu vitamin olan yeməklə qidanlanmaq vacibdir. Həmçinin aktiv həyat tərzi keçirmək, insanların daha sıx olduğu yerlərdən uzaq durmaq məsləhətdir”, - deyə R.Əliyeva vurğulayıb.xeber100.com  

Tibb Universitetində rezidentlərin seminarı keçirilib

Azərbaycan Tibb Universitetinin (ATU) Tədris Cərrahiyyə Klinikasında şüa diaqnostikası və terapiyası kafedrasının rezidentləri üçün seminar keçirilib.Universitetdən Azərtac-a bildiriblər ki, tədbirdə çıxış edən ATU-nun şüa diaqnostikası və terapiyası kafedrasının müdiri, dosent Məlahət Sultanova seminarın mahiyyəti barədə məlumat verib: “Şüa diaqnostikası və terapiyası kafedrasında 40 rezident fəaliyyət göstərir. Onlardan 20-si ATU-nun Tədris Terapevtik, digərləri isə Tədris Cərrahiyyə Klinikasında çalışırlar. Sevindirici haldır ki, bu seminara hər iki klinikanın bazasında olan rezidentlərimizin məruzələri dinləniləcək. Tədbir bir neçə gün davam edəcək. Hər gün müxtəlif mövzularda çıxışlar olacaq”.Sonra ilk olaraq II kurs rezidenti Gültən Rəfibəyli “Fetal heterotaksi sindromları” mövzusunda cıxışı dinlənilib.xeber100.com

Dünya Səhiyyə Təşkilatının 142-ci sessiyası işə başlayıb

Cenevrədə Dünya Səhiyyə Təşkilatı (DST) İcraiyyə Komitəsinin 142-ci sessiyası işə başlayıb.Azərtac DST-nin saytına istinadla xəbər verir ki, sessiyada təşkilatda islahatlar məsələsi, ictimai səhiyyə sisteminin hazırlıq və çevikliyinin təmin edilməsi, poliomielitin ləğvindən sonra keçid dövrünün planlaşdırılması, dərman vasitələri və vaksinlərin qlobal çatışmazlığı problemləri, onların əlçatanlığı və digər məsələlər müzakirə olunacaq.İcraiyyə Komitəsi səhiyyə sahəsində texniki cəhətdən ixtisaslaşmış 34 üzvdən ibarətdir. Onlar üç il müddətinə seçilir.Komitənin əsas funksiyaları Səhiyyə Assambleyasının qərarlarının və siyasətinin həyata keçirilməsi, ona məsləhətlər verilməsi və fəaliyyətinə yardım edilməsidir.xeber100.com

Milli Oftalmologiya Mərkəzinin məlumatı

Milli Oftalmologiya Mərkəzinin Səyyar Klinikası Azərbaycan Milli Elmlər Akademiyasının Mərkəzi Elmi Kitabxanasında humanitar aksiya keçirib.Mərkəzdən Azərtac-a bildiriblər ki, daha öncə Səyyar Klinika Azərbaycan Milli Elmlər Akademiyasının 380 əməkdaşlarını müayinə edib. Tədbirdə çıxış edən Milli Oftalmologiya Mərkəzinin elmi-təşkilat bölməsinin rəhbəriYazgül Abdiyeva mərkəzin həyata keçirdiyi aksiyalar haqqında məlumat verib. Qeyd edək ki, aksiya çərçivəsində kitabxananın 120 əməkdaşı müayinə olunub.Qeyd edək ki, fəaliyyət müddəti ərzində Səyyar Klinika respublikanın 92 rayon və şəhərində 130-dan çox aksiya keçirib.xeber100.com