Kardiologiya Cəmiyyətinin sessiyası keçirilib

İyunun 10-da Bakıda Azərbaycan Kardiologiya Cəmiyyətinin (AKC) Avropa Ürək Çatışmazlığı Assosiasiyası (AÜÇA) ilə birgə sessiyası keçirilib.Azərtac xəbər verir ki, tədbirdə çıxış edən AÜÇA-nın Azərbaycan üzrə baş koordinatoru Tofiq Cahangirov sessiyanın əhəmiyyətindən danışaraq tədbirin əməkdaşlığın inkişafı yolunda irəliyə doğru atılan mühüm addım olduğunu və kardiologiyanın inkişafına öz töhfəsini verəcəyini bildirib.Sonra onun “Atım fraksiyası saxlanılmış ürək çatışmazlığı: yeniliklər varmı?” mövzusunda məruzəsi dinlənilib.Sessiyada AÜÇA -nın keçmiş prezidenti Gerasimos Filippatosun “Ürək çatışmazlığında gözdən qaçan məqamlar”, AÜÇA-nın idarə heyətinin üzvü Yuriy Lopatinin “Ürək çatışmazlığının profilaktikası:Avropa tövsiyələri nədən danışır?” mövzularında məruzə ediblər.xeber100.com

İctimai Nəzarət və Məsləhət Şurası yaradılıb

Tibb Universitetinin Böyük Elmi Şurasının qərarı ilə universitetin rektoru yanında İctimai Nəzarət və Məsləhət Şurasının yaradılması qərara alınıb və onun 9 nəfərdən ibarət tərkibi formalaşıb.Universitetdən Azərtac-a bildiriblər ki, bu gün təhsil müəssisəsinin rektoru, professor Gəray Gəraybəyli yeni yaradılmış qurumun üzvləri ilə görüşüb. Görüş zamanı rektor yeni yaradılmış Şuranın məqsədləri haqqında məlumat verərək onu da söyləyib ki, istənilən ali məktəbdə gedən proseslərin düzgün, şəffaf və ədalətli həllində ictimaiyyətin böyük rolu var. Buna görə də rektor universitetdə gedən proseslərin şəffaflığını təmin etmək məqsədilə bir neçə aydır ki, tələbələrlə mütəmadi olaraq görüşlər keçirir.Çıxış edən İctimai Şura üzvləri bildiriblər ki, qurumun əsas işi ATU-da gedən proseslərin, görülən işlərin fayda və səmərəsini ortaya çıxarmaqdır.Qeyd edək ki, Şuranın tərkibinə tələbə və valideynlər də daxil edilib. Şuranın sədri Milli Məclisin deputatı, həkim qastroenteroloq İlham Məmmədov, sədr müavini ATU-nun əczaçılığın texnologiyası və idarəçiliyi kafedrasının baş müəllimi Aidə Bəndəliyeva, şuranın katibi isə Əhməd Abbasbəyli seçilib.xeber100.com

Tibb Universitetində pulsuz həkim müayinəsi təşkil olunub

Tibb Universitetinin (ATU) Tədris Cərrahiyyə Klinikasında 1 İyun - Uşaqların Beynəlxalq Müdafiəsi Günü və Ramazan ayı münasibətilə psixonevroloji xəstəliklərdən əziyyət çəkən uşaqlar üçün pulsuz həkim müayinəsi təşkil olunub.Universitetdən Azərtac-a bildiriblər ki, ATU-nun Tədris Cərrahiyyə Klinikasının baş həkimi, professor Rauf Ağayev klinikada bu tip aksiyaların artıq ənənə halını aldığını deyib.İlk aksiyada klinikaya müraciət edən bütün uşaqlar üçün ümumi neonatoloq və pediatr müayinəsi, həmçinin bəzi önəmli analizlər pulsuz keçirilib. İkinci aksiya isə Şəhər Nevroloji Dispanserində müalicə alan uşaqlar üçün təşkil olunub.R.Ağayevin sözlərinə görə, dispanserdə qeydiyyatda olan uşaqlar arasında serebral ifliclə yatan, nevroloji və somatik xəstəliklərdən müalicə alanlar var. Bu uşaqlar pulsuz olaraq oftalmoloq, travmatoloq, otolorinqoloq baxışından keçib, exo və kardioqramma müayinəsi olunub. Ümumilikdə ikigünlük aksiya zamanı psixonevroloji problemləri olan 40-dək uşaq müayinədən keçib.xeber100.com

Səhiyyə Nazirliyinin məlumatına görə…

Ölkə əhalisinin üç ay davam edən tibbi profilaktik müayinəsi başa çatıb.Səhiyyə Nazirliyinin mətbuat xidmətindən Azərtac-a xəbər verirlər ki, müayinə tədbirləri fevralın 15-dən mayın 15-dək aparılıb. Həmin müddətdə 5,5 milyon nəfər müayinə edilib və onlardan 2,6 milyonu kişi və 2,9 milyonu qadındır.Tibbi profilaktik müayinə tədbirləri zamanı Bakı şəhərində 1,3 milyon nəfərin sağlamlıq göstəriciləri yoxlanılıb.Ölkə üzrə müayinədən keçirilənlərdən təxminən 2 milyonu təkrar tibbi yoxlanışlara cəlb olunub, 68,4 mini dispanser nəzarətinə alınıb, 27 min nəfər hospitalizasiya olunub.Müayinələr nəticəsində aşkar olunan xəstəliklərin 17,2 faizi ürək, 16,8 faizini tənəffüs sistemi, 11,7 faizini həzm sistemi xəstəlikləri təşkil edib.xeber100.com

Səhiyyə komitəsinin iclası keçirilib

İyunun 1-də Milli Məclisin səhiyyə komitəsinin iclası keçirilib.Azərtac xəbər verir ki, komitənin sədri Əhliman Əmiraslanov gündəlikdəki məsələlər barədə məlumat verib.Gündəliyə İnzibati Xətalar Məcəlləsi və "Azərbaycan Respublikasında vərəmlə mübarizə haqqında" qanunlarda dəyişikliklər edilməsi barədə qanun layihələri daxil idi.İnzibati Xətalar Məcəlləsinə təklif edilən dəyişikliyə əsasən dərman vasitələrinin pulsuz paylanması, satışı, ödənişli və ya ödənişsiz tibbi xidmətlərin göstərilməsi ilə müşayiət olunan reklam aksiyalarının keçirilməsinə görə fiziki şəxslər üç yüz manatdan beş yüz manatadək məbləğdə, vəzifəli şəxslər səkkiz yüz manatdan min manatadək məbləğdə, hüquqi şəxslər min manatdan iki min manatadək məbləğdə cərimə ediləcəklər.Xatırladaq ki, hazırda fiziki şəxslər cərimə olunanlar sırasında yoxdur.Dəyişikliklər İnzibati Xətalar Məcəlləsini "Dərman vasitələri haqqında" Qanunda dəyişikliklər edilməsi barədə" Azərbaycan Respublikasının 2016-cı il 29 noyabr tarixli 422-VQD nömrəli Qanununa uyğunlaşdırmaq məqsədilə təklif edilir.Həmin dəyişikliklərə əsasən, həkim resepti olmadan buraxılan dərman vasitələrinin qəbulu və tibbi texnikadan istifadə əlavə təsirlə müşayiət olunduqda, reklamda bu barədə məlumat verilməli, həkimlə, yaxud mütəxəssislə məsləhətləşmənin zəruriliyi qeyd edilməlidir. Eyni zamanda, dərman vasitələrinin pulsuz paylanması, satışı, ödənişli və ya ödənişsiz tibbi xidmətlərin göstərilməsi ilə müşayiət olunan reklam aksiyalarının keçirilməsi qadağan edilir.xeber100.com  

Dünya Səhiyyə Təşkilatı Assambleyasının 42-ci sessiyasında…

1988-ci ildə keçirilən Dünya Səhiyyə Təşkilatı (DST) Assambleyasının 42-ci sessiyasında mayın 31-i Dünya Tütünsüz Günü təsis olunub. Həmin gün hər yerdə qeyd olunur, diqqəti tütündən istifadə edilməsinin sağlamlıq üçün yaratdığı təhlükələrə yönəldir və tütün istehlakının miqyasının azaldılması üzrə səmərəli siyasət aparmağa çağırır.Bu gün ölkəmizdə də bir sıra tədbirlər həyata keçirilir. Belə seminarlardan biri də Səhiyyə Nazirliyinin İctimai Səhiyyə və İslahatlar Mərkəzində (İSİM) seminar təşkil olunub.Azərtac xəbər verir ki, əlamətdar günün builki mövzusu “Tütün - inkişaf üçün təhlükə!”nin aradan qaldırılmasında KİV-lərin roluna həsr edilib. Tütünlə mübarizə sahəsində İSİM-in yaydığı məlumatların kütləvi informasiya vasitələrilə ictimaiyyətə çatdırıldığı nəzərə alaraq, KİV-lərlə aparılan mübarizənin daha yaxşı səmərə verməsi üçün müxtəlif ölkələrdə tətbiq edilən metod və alqoritmlər seminarın əsas müzakirə predmeti olub.Seminarda interaktiv kommunikasiyanın yaradılması üçün jurnalistlərin iştirakı ilə tütün tüstüsünün tərkibindəki zərərli maddələr araşdırılıb.xeber100.com

Türkdilli dövlətlərin II Beynəlxalq Nevrologiya Konqresi keçirilib

Qazaxıstanın Almatı şəhərində türkdilli dövlətlərin II Beynəlxalq Nevrologiya Konqresi keçirilib.Azərtac xəbər verir ki, konqresdə Azərbaycan, Rusiya, Belarus, Qırğızıstan və Tatarıstandan olan 300-ə yaxın nümayəndə iştirak edib.Ölkəmizi konqresdə təmsil edən Həkimləri Təkmilləşdirmə İnstitutunun sinir xəstəlikləri kafedrasının müdiri Rəna Şirəliyeva dağınıq sklerozun diaqnostikası və sinir xəstəlikləri kafedrasının assistenti Rahim Əliyev isə onurğa beyninin anomaliyaları mövzusunda məruzə ediblər.Xatırladırıq ki, Nevroloqların I Beynəlxalq Konqresi 2013 –cü ildə Bakıda keçirilib.xeber100.com

Dünya Səhiyyə Təşkilatının qərarı ilə…

Dünya Səhiyyə Təşkilatının qərarı ilə hər il may ayında Dünya Astma və Allergiya Xəstələri Günü qeyd edilir. Günün təsis olunmasında əsas məqsəd cəmiyyətin diqqətini bu problemlərə cəlb etmək və əhalini maarifləndirməkdir. Epidemioloji araşdırmalara əsasən hazırda dünya əhalisinin 40 faizdən çoxunda allergiya əlamətləri müşahidə edilir. Buna artıq pandemiya demək olar. Belə ki, dünya əhalisinin hər üç nəfərindən biri allergik rinitdən, hər onundan biri isə bronxial astmadan əziyyət çəkir.Bu xəstəliklərin bir sıra yayılma risk faktorları mövcuddur. Bunlara misal olaraq siqaret, əsasən uşaqlar və hamilələrdə siqaret tüstüsü, hamiləlik zamanı istifadə olunan allergik mənşəli qidalar, kimyəvi maddələrlə təmas, hormonal kontraseptivlər və antibiotiklər, sintetik əlavəli ərzaqlar, stress və s.Bronxial astma səhiyyə üçün qlobal problemə çevrilə bilər. Belə ki, hazırda dünya əhalisinin təxmini 300 milyonu bu xəstəliyin qurbanıdır. Xəstəlik passiv həyat tərzinin səbəblərindən biridir. Yer kürəsinin müxtəlif bölgələrində aparılan sorğuya əsasən bronxial astmadan əziyyət çəkənlərin 51-59 faizində xəstəliyi hətta astma əleyhinə preparatlarla da nəzarətdə saxlamağı mümkün olmadığı görülüb.Xəstəliyi nəzarətdə saxlamaları üçün əsasən mümkün qədər allergiya törədən qidalardan, heyvanlardan, toz və kitab, xalı kimi tozlanan əşyalarda, siqaret tüstüsü kimi bir sıra xəstəliyi qıcıqlandıracaq səbəblərdən uzaq durmaları məsləhət görülür.Uşaqlarda astmanın ilkin profilaktikası - əsasən yenidoğulmuşların ana südü, yaşca daha böyüklərin isə düzgün qidalanması, yaşadıqları mühitin düzgün seçilməsidir.Bu xəstəliyin kontrolda saxlanılması problemin təkrarlanma müddətinin 3-10 il arası uzadılması deməkdir.xeber100.com  

Tibb Universitetinin məlumatına əsasən…

Tibb Universitetinin (ATU) Tədris Terapevtik Klinikasında müasir standartlara cavab verən LOR (Qulaq-burun-boğaz) kabineti fəaliyyətə başlayıb.ATU-nun mətbuat xidmətindən Azərtac-a bildiriblər ki, kabinetin fəaliyyənin səmərəliyini artırmaq üçün burada artıq audiometriya və timpanometriya olmaqla daha iki müayinə metodları yerinə yetiriləcək. Bunun üçün kabinet “Otometrics” audiometri və timpanometri ilə təchiz olunub.Audiometriya metodu vasitəsilə eşitmə qabiliyyəti yoxlanılır. Bu cihazın kamera ilə təchiz olunması müayinənin daha dəqiq aparılmasına şərait yaradır. Bu metod vasitəsilə beş yaşdan yuxarı uşaqlar və böyüklərdə eşitmə yoxlanılılır.Timpanometriya orta qulağın funksiyasının obyektiv müayinə metodudur. Orta qulağın sümük sistemi, yevstax borusu, təbil pərdəsi və bu sistemlərin bir-biri ilə əlaqəsini göstərən çox sadə müayinə metoddur və yaşından asılı olmayaraq bütün xəstələrə tətbiq edilir.xeber100.com

Bu gün Ümumdünya Sağlam Həzm Günüdür

Hər il mayın 29-da Ümumdünya Sağlam Həzm Günü qeyd edilir.AZƏRTAC xəbər verir ki, Ümumdünya Sağlam Həzm Günü Ümumdünya Qastroenteroloqlar Təşkilatının (World Gastroenterology Organisation, WGO) təşəbbüsü ilə təsis olunub.Beynəlxalq qeyri-hökumət, peşəkar tibbi federasiyası olan Ümumdünya Qastroenteroloqlar Təşkilatı qastroenteroloqların yüzdən çox milli cəmiyyətini və dörd regional assosiasiyasını birləşdirir. Bütövlükdə, bu Təşkilatın 50 mindən çox fərdi üzvü var.WGO faktiki olaraq 1935-ci ildə qastroenteroloqların Brüsseldə keçirilmiş birinci Beynəlxalq konqresində yaradılsa da, onun rəsmi təsis tarixi 1958-ci il mayın 29-u hesab olunur. Həmin gün Vaşinqtonda, Qastroenteroloqların Birinci Ümumdünya Konqresində bu təşkilatın nizamnaməsi qəbul edilib. WGO-nun nizamnaməsinin qəbul edildiyi günün sağlam həzm günü elan edilməsi qərara alınıb.Hər il Ümumdünya Sağlam Həzm Gününün mövzusu seçilir və bununla əlaqədar keçirilən bütün tədbirlər qastroenterologiyanın müəyyən probleminə, onun müalicəsi və profilaktikası üsullarına həsr edilir.xeber100.com