Qanvermə aksiyası təşkil edilib

"Məşədi Dadaş" məscidində talassemiya xəstəliyindən əziyyət çəkən uşaqlar üçün qanvermə aksiyası təşkil edilib. Aksiya məscidin icması, Mərkəzi Qan Bankı və Azərbaycan Talassemiya Federasiyasının birgə təşkilatçılığı ilə keçirilib. Talassemiya Federasiyasının mətbuat xidmətindən AZƏRTAC-a verilən məlumata görə, yüzdən çox gəncin qatıldığı aksiya uğurla başa çatıb və yardıma ehtiyacı olan uşaqlar üçün kifayət qədər qan toplanılıb. Aksiyada iştirak edənlər qan xəstəliklərindən əziyyət çəkən uşaqlar üçün könüllü qan verməyin xeyirxah və savab iş olduğunu bildiriblər.

“Yeni Nuh gəmisi” adı verilən mərkəz üçün 150 hektar torpaq sahəsi alınıb

ABŞ-da “Timeship” kriogen mərkəzinin inşası üzrə layihəyə start verilib. Mahiyyətcə, bu, hansısa müddətdən sonra ölüləri diriltməyə çalışacaq qəbiristanlıq variantıdır. Artıq “Yeni Nuh gəmisi” adı verilən mərkəz üçün 150 hektar torpaq sahəsi alınıb. Bu, 15×15 kilometr ölçülü kvadrata uyğundur. Azərtac “mednews.info” saytına istinadla xəbər verir ki, layihə gələcəkdə dirilmək istəyən insanların DNT-nin və orqanlarının qorunmasına istiqamətlənib. Mərkəzin yaradıcıları layihəyə təxminən 375 milyon dollar ayırıb. Bu işdə təhlükəsizliyə xüsusi diqqət yetirilir. Terror təhlükəsindən tutmuş qlobal istiləşmə ehtimalına qədər kriogen mərkəzin müdafiəsinə böyük vəsait ayrılıb. Mərkəz muxtar enerji şəbəkəsi və günəş batareyaları ilə təchiz olunacaq.xeber100.com

Sinqapurlu mütəxəssislər dünyanı təəccübləndirməyi qərara alıblar

Sinqapurlu mütəxəssislər dünyanı öz yeni ixtiraları ilə təəccübləndirməyi qərara alıblar. Belə ki, onlar insanı eyni vaxtda bir neçə ciddi xəstəlikdən müalicə edən həb hazırlamağa çox yaxındırlar. “nauka.com” saytı xəbər verir ki, mütəxəssislər artıq 3D printeri və polimerlər simbiozuna əsaslanan möcüzəli preparatın bir addımlığındadırlar. Onlar bildirirlər ki, həkim çox tezliklə iş yerini tərk etmədən dərman hazırlaya biləcək. Başqa sözlə, hazırda aktiv istehsalda olan həb bu və ya digər xəstəlik üçün zəruri olan komponentlərlə zənginləşdiriləcək. Preparat özü dəyişməyəcək, ona əlavələr ediləcək və həmin həb xəstələri müalicə edəcək. Lakin çoxdan gözlənilən yeni nəsil həbin nə dərəcədə təsirli olacağı hələ ki məlum deyil. Preparatın rəsmi buraxılışı haqqında heç bir məlumat yoxdur. Alimlər yalnız onu bildirirlər ki, hazırda danışıqlar və müxtəlif tədqiqatlar tam qaydası ilə aparılır və gündən-günə daha çox Sinqapur mütəxəssislərini cəlb edir.xeber100.com

Əczaçılıq şirkətinin məsul şəxslərinin iştirakı ilə toplantı keçirilib

Səhiyyə Nazirliyinin Analitik Ekspertiza Mərkəzində ölkəmizdə fəaliyyət göstərən 40-a yaxın topdansatış əczaçılıq şirkətinin məsul şəxslərinin iştirakı ilə toplantı keçirilib. Nazirliyin mətbuat xidmətindən Azərtac-a bildirilib ki, toplantıda topdansatış əczaçılıq şirkətləri tərəfindən ölkəyə idxal olunan dərman vasitələrinin saxlanma şəraiti haqqında danışılıb. Qeyd olunub ki, normativ sənədlərə görə laborator analizlər üçün 5-15 gün vaxt tələb olunur. Bu müddətdə dərman vasitələrinin lazımi avadanlığı və şəraiti olmayan anbarlara yığılaraq saxlanılması faktları aşkarlanıb. Mərkəzin rəhbərliyi belə anbarlarda dərman vasitələrinin saxlanılmasının qətiyyən yolverilməz olduğunu, belə halların dərman vasitələrinin keyfiyyətinə, təhlükəsizliyinə və effektivliyinə birbaşa təsir göstərdiyini vurğulayıb. Həmçinin bu kimi hallar aşkarlandığı təqdirdə topdansatış əczaçılıq şirkətlərinə qarşı qanunvericiliyə uyğun müvafiq tədbirlərin görüləcəyi diqqətə çatdırılıb. Sonda şirkət nümayəndələrinin sualları cavablandırılıb.xeber100.com

“Los Angeles Times” qəzetinin məlumatına görə…

İİV/QİÇS-in inkişafını ənənəvi antiretrovirus preparatlar komplekti olmadan – insan orqanizmindən əldə edilmiş əks-cisimlərin köməyi ilə məhv etmək mümkündür. Bunu ABŞ-ın Rokfeller Universitetindən Mişel Nussentsvayqın rəhbərliyi ilə bir qrup alimin “Nature” jurnalında dərc etdirdiyi məktub təsdiqləyir. Azərtac TASS-a istinadla xəbər verir ki, məktuba əsasən söhbət 3BNC117 kodu ilə tanınan “neytrallaşdıran əks-cisimdən” gedir. Bu, anadangəlmə İİV-i olan pasiyentlərin birinin orqanizmindən götürülüb. Bu adamlar hətta virusa yoluxanda da infeksiya inkişaf etmir və təbii yolla məhv olur. Nussentsvayqın rəhbərlik etdiyi tədqiqatçılar adi pasiyentlərdə İİV-i məhv etmək üçün bu inyeksiyadan istifadə edib. Virus daşıyanların iki qrupu ciddi nəzarət şəraitində adi dərmanların qəbulunu dayandırıblar. Bunun əvəzinə onlara iynə vurulub. Eksperimentin 13 iştirakçısının hamısında sonuncu peyvənddən sonra ən azı 5 həftə virus yükü son dərəcə aşağı səviyyədə olub. Altı nəfərdə müdafiə ən azı 9 həftə davam edib. Hətta 19 həftəlik rekord da qeydə alınıb. Xoşagəlməz əlavə təsirlər müşahidə edilməyib. “Los Angeles Times” qəzetinin məlumatına görə, Nussentsvayq İİV/QİÇS-in dərmanından söhbət açmağın hələ tez olduğunu bildirib. Alimin sözlərinə görə, “bu, çox yüksək plankadır”. Lakin o, artıq sağlam insanların yoluxmadan qorunması üçün peyvənd barədə düşünür. Primatlar üzərində bu eksperimentlər aparılıb və ümidverici nəticələr əldə edilib.xeber100.com

İnsan üzərində genetik təcrübələrə icazə verilib

ABŞ Səhiyyə Departamenti yanında rekombinant DNT üzrə Məşvərət Məclisi Pensilvaniya Universiteti əməkdaşlarının insanlar üzərində genetik modifikasiya təcrübələri aparmaq xahişini bəyənib. Azərtac “therussiantimes.com” saytına istinadla xəbər verir ki, təcrübələr üç məkanda keçiriləcək. Pensilvaniya Universiteti ilə yanaşı, Kaliforniya və Hyuston universitetləri də bu işə cəlb olunacaq. Alimlər CRISPR/Cas9 texnologiyasından istifadə edəcək. Onlar qarşılarına insanın immun hüceyrələrini yaxşılaşdırmaq məqsədi qoyurlar. Bu, melanoma, sarkoma, miyeloma və digər təhlükəli xərçəng xəstəlikləri ilə daha səmərəli mübarizə aparmaq imkanı yaradacaq. Eksperimentlər üçün artıq 18 könüllü seçilib. Tədqiqatlar 2 il davam edəcək. CRISPR həmçinin PD-1 geninin fəaliyyətini pozacaq. Bu gen limfositlərin fəallığını zəiflədir. Modifikasiya edilən limfositlər sonradan pasiyentin orqanizminə qaytarılır və şişə fəal həmlələr edir. İki illik tədqiqatlara cəlb ediləcək 18 könüllü xərçəng xəstəliyinin müxtəlif növlərindən (melanoma, sarkoma, miyeloma) əziyyət çəkir. Şişlər mövcud müalicə metodlarına davamlı olmalıdır.xeber100.com

Dünya Səhiyyə Təşkilatı yeni fəaliyyət planı hazırlayıb

Dünya Səhiyyə Təşkilatı (DST) Panamerikan Səhiyyə Təşkilatı ilə birgə Zika virusunun alovlanmasının qarşısını almaq üçün cavab tədbirləri üzrə plana yenidən baxıb və onun maliyyələşdirilməsinə təxminən 122 milyon ABŞ dolları istəyib. Azərtac BMT-nin xəbərlər mərkəzinə istinadla xəbər verir ki, yeni fəaliyyət planı bu xəstəliyin doğurduğu ağırlaşmalarının müalicəsi və qarşısının alınması üzrə tədbirlərin gücləndirilməsini nəzərdə tutur. İndiyədək 60 ölkədə Zika virusunun yayılması barədə məlumatlar gedib. Virus Latın Amerikası və Karib hövzəsi ölkələrində daha sürətlə yayılır. DST bu ilin fevralında virusun dünya miqyasında təhlükəli olduğunu bildirib. Dərhal DST tərəfindən virusun yayılmaması üçün cavab tədbirləri üzrə plan qəbul olunub. Mayın əvvəlində isə BMT-nin baş katibi Pan Gi Mun virusla mübarizəni gücləndirmək məqsədilə çoxtərəfdaşlı fondun yaradılmasını elan edib.xeber100.com

Təcili yardıma 100-dən artıq müraciət olub

“İyunun 17-dən 19-dək Bakıda keçirilən Formula-1 yarışları zamanı ərazidə olan təcili tibbi yardıma təxminən 100-dən artıq müraciət olub. Müraciət edənlər arasında könüllülər və marşallar üstünlük təşkil edib”. Bunu “Report”a açıqlamasında Bakı şəhər Təcili və Təxirəsalınmaz Tibbi Yardım Stansiyasının baş həkimi Rauf Nağıyev bildirib. Onun sözlərinə görə, müraciətlərin əksəriyyəti yerli vətəndaşlar tərəfindən olub. Baş həkim qeyd edib ki, müraciətlərin çoxu baş, çiyin və göz ağrıları ilə bağlı olub: “Günvurma ilə bağlı heç bir müraciət daxil olmayıb. Yarış iştirakçılarından isə təcili tibbi yardıma müraciət edən olmayıb”. Qeyd edək ki, Səhiyyə Nazirliyi iyunun 17-dən 19-dək Bakıda keçirilən Formula-1 yarışları zamanı idmançılara yardım göstərilməsi üçün 12 tibbi yardım briqada ayırmışdı. Həmin briqadalar yolboyu xüsusi döngələrdə, təhlükəli zonalarda fəaliyyət göstəriblər. Eyni zamanda, ayrı-ayrı ixtisaslaşmış tibb müəssisələrindən 11 həkim yarış ərazisinə ezam olunmuşdu. Dəniz vağzalının yaxınlığında isə beynəlxalq tələblərə uyğun klinika açılmışdı ki, orada 30-a yaxın tibb işçisi çalışıb. Bu tibbi heyət ən yüksək hazırlıqlı cərrahlar, travmatoloqlar və rentgenoloqlardan ibarət olub. Tamaşaçılara və qonaqlara 6 səyyar tibbi briqada xidmət edib. Bundan əlavə, 9 məntəqədə həkim və feldşerlər növbə çəkib. Azərbaycan Tibb Universitetinin 75 könüllüsü də tamaşaçılar arasında olub.xeber100.com

Diaqnostika Mərkəzində yeni kampaniyaya start verilir

Respublika Diaqnostika Mərkəzində (RDM) iyunun 28-dən etibarən yeni kampaniyaya start verilir. Mərkəzdən Azərtac-a bildirilib ki, kampaniyada iştirak edənlər qastroenteroloji-hepatoloji konsultasiyalara 50 faiz, endoskopik diaqnostika və müalicələrə isə 20 faiz endirimdən yararlanacaqlar. Konsultasiya və müayinələr ABŞ-ın Klivlend Universitetində kurs keçən, Türkiyə Qastreonteroloji Dərnəyinin fəxri üzvü olan RDM-in qastroenteroloq-hepatoloqu Cəmil Kamilli tərəfindən aparılacaq. Kampaniya iyulun 28-dək davam edəcək.xeber100.com

17 İyun – Tibb İşçilərinin Peşə Bayramı Günüdür

Azərbaycan Respublikası Prezidentinin 2001-ci il 4 iyun tarixli Sərəncamına əsasən hər il iyunun 17-si Tibb İşçilərinin Peşə Bayramı Günü kimi qeyd olunur. Respublikamızda gedən sürətli iqtisadi inkişaf bütün sosial sahələrin, o cümlədən səhiyyənin inkişafına da əsaslı təkan verib. Son illər səhiyyənin idarə olunması, tibb müəssisələrinin maddi-texniki bazasının gücləndirilməsi, yeni tibbi texnologiyaların tətbiqi, köklü kadr islahatları və başqa geniş miqyaslı tədbirlər həyata keçirilib. Bu da öz növbəsində səhiyyəmizin dünya standartları üzrə inkişafına, onun dünyanın qabaqcıl ölkələrinin səhiyyə sisteminə ardıcıllıqla inteqrasiya etməsinə zəmin yaradıb. Prezident İlham Əliyevin diqqət və qayğısının nəticəsidir ki, 600-dən artıq yeni tikilmiş və ya əsaslı təmirdən çıxmış tibb müəssisəsi müasir avadanlıqlarla təmin olunub. Azərbaycan səhiyyəsində uğurla aparılan islahatlar, maddi-texniki bazanın təkmilləşdirilməsi, təchizat və kadr hazırlığı ilə bağlı görülmüş işlər əhalinin dövlət tibb müəssisələrinə olan inamını getdikcə artırır. Prezident İlham Əliyevin səhiyyəyə göstərdiyi xüsusi diqqət bu sahədə xeyli irəliləyişlərə səbəb olub. Ölkəmizdə tibb müəssisələrinin təmir və bərpası, vətəndaşların pulsuz dərman vasitələri və preparatlarla təmin olunması, onların müalicəsi, regionlarda diaqnostika mərkəzlərinin tikilərək istifadəyə verilməsi, xüsusilə uşaqların bütün tibbi xidmətlərə ən yüksək səviyyədə əhatə olunması səhiyyə sahəsində aparılan islahatların başlıca istiqamətlərini təşkil edir.Bir sıra dövlət proqramlarının reallaşdırılmasında Heydər Əliyev Fondunun prezidenti Mehriban xanım Əliyevanın böyük xidmətləri var. Fond diabetli, talassemiyalı xəstələrə qayğısında və onların müalicəsinin təşkilində, qanvermə aksiyalarının keçirilməsində, ana və uşaqların sağlamlığının qorunmasının yaxşılaşdırılmasında bir çox böyük layihələrə imza atıb. Bu gün səhiyyə sahəsində qəbul edilmiş dövlət proqramları uğurla icra olunur. Səhiyyəmizin dünya standartları üzrə inkişafının əsas istiqamətlərindən biri tibbi təhsil və kadr islahatıdır. Tibb işçilərimizin bilik və peşə bacarıqlarının artırılmasına Səhiyyə Nazirliyi tərəfindən xüsusi diqqət yetirilir. Bütün dünyada qəbul edilən tibb işçilərinin sertifikasiyanın tətbiqi üzrə iş uğurla başa çatıb. Eyni zamanda, ölkəmizdə həkimlərin müxtəlif ixtisaslar üzrə hazırlığı dünyanın əksər ölkələrinin tibb təhsil sistemində qəbul olunmuş rezidentura vasitəsilə həyata keçirilir.xeber100.com