Türkiyədə Milli Suverenlik Günü qeyd olunur

Türkiyədə 23 aprel - Milli Suverenlik və Uşaqlar Günü təntənəli şəkildə qeyd olunur.Azərtac xəbər verir ki, bu münasibətlə Türkiyə Böyük Millət Məclisinin sədri İsmayıl Qəhrəman, Baş nazir Binəli Yıldırım, təhsil naziri İsmət Yılmaz və digər rəsmi şəxslər Türkiyə Respublikasının banisi Mustafa Kamal Atatürkün məzarını ziyarət ediblər. Anıtqəbir önünə əklil qoyulub.Milli Suverenlik və Uşaqlar Günü münasibətilə ölkənin hər yerində bayram şənlikləri, beynəlxalq uşaq festivalları və s. mərasimlər təşkil olunub.Xatırladaq ki, 1920-ci il aprelin 23-də Türkiyə Böyük Milli Məclisi çağırılıb. 1921-ci ildə həmin gün milli bayram elan olunub, 1927-ci ildən isə bu tarix həm də Uşaqlar Günü kimi qeyd olunur.xeber100.com

İran nüvə proqramını bərpa etməyə hazırdır

ABŞ prezidenti Donald Tramp mayda sanksiya tətbiqinin dayandırılması qərarının müddətini uzatmayacağı təqdirdə İran nüvə proqramını bərpa edəcək.”TASS” xəbər verir ki, bu barədə İran XİN rəhbəri Məhəmməd Cavad Zərif bildirib.Onun sözlərinə görə, dünya ictimaiyyəti İranı nüvə sazişinə birtərəfli şəkildə riayət etməyə çağırmamalıdır.Qeyd edək ki, mayın 12-də D.Tramp sanksiyaların “dondurulması”nın uzadılmasına dair qərar verməlidir. Qərar qəbul edilmədikdə sanksiyalar avtomatik bərpa olunacaq.xeber100.com

Qırğızıstan parlamenti növbədənkənar iclas keçirib

Aprelin 20-də Qırğızıstan parlamenti-Joqorku Keneşin növbədənkənar iclası keçirilib.Azərtac xəbər verir ki, iclasda 30-cu hökumətin proqramı, strukturu və tərkibi təsdiq olunub.Joqorku Keneş Prezident Aparatının rəhbəri Nuxammedkalıy Abılqazievi ölkənin Baş naziri vəzifəsinə təsdiq edib.Kubatbek Boronov Baş nazirin birinci müavini, Jeniş Razzakov, Zamirbek Askarov, Altınay Omurbekova Baş nazirin müavinləri vəzifələrini tutublar.Bundan başqa, hökumət aparatının rəhbəri, xarici işlər, daxili işlər, ədliyyə, maliyyə, iqtisadiyyat, kənd təsərrüfatı, yeyinti sənayesi və meliorasiya, nəqliyyat və yollar, fövqəladə hallar, təhsil və elm, səhiyyə, mədəniyyət, informasiya və turizm, əmək və sosial inkişaf nazirləri də təsdiqlənib. Həmçinin milli təhlükəsizlik, müdafiə, sənaye, energetika və yeraltı sərvətlər, informasiya texnologiyaları və rabitə üzrə dövlət komitələrinin sədrləri təsdiq olunublar.Xatırladırıq ki, ölkə parlamenti aprelin 19-da hökumətə etimadsızlıq göstərmiş, dövlət başçısı Sooronbay Jeenbekov hökuməti tam tərkibdə istefaya göndərmişdi.xeber100.com

Növbədənkənar prezident seçkiləri iyunun 24-də keçiriləcək

Türkiyədə növbədənkənar prezident və parlament seçkiləri 2018-ci il iyunun 24-də keçiriləcək.Bu barədə Prezident Rəcəb Tayyib Ərdoğan məlumat verib.Xatırladaq ki, bu gün Ankarada Ədalət və İnkişaf Partiyasının sədri, Prezident Rəcəb Tayyib Ərdoğan ilə Millətçi Hərəkat Partiyasının sədri Dövlət Baxçalı arasında keçirilən görüşdə bu məsələ müzakirə olunub.xeber100.com

Beynəlxalq İslam Akademiyası yaradılıb

Prezident Şavkat Mirziyoyevin Fərmanı ilə Özbəkistan İslam Akademiyası və Daşkənd İslam İnstitutunun bazasında Özbəkistan Beynəlxalq İslam Akademiyası yaradılıb.Yeni qurumun Qaraqalpaq Respublikası, Səmərqənd, Namanqan və Surxandərya vilayətlərində filialları fəaliyyət göstərəcək. Akademiyada Hədis üzrə Elmi Məktəb, İxtisasartırma Mərkəzi fəaliyyət göstərəcək.Akademiya dünyanın müxtəlif ölkələrindən, eləcə də MDB ölkələrindən tələbələr qəbul edəcək. Uğur qazanan tələbələrə İmam Buxari adına dövlət mükafatı da veriləcək.xeber100.com

Avstriya hökuməti BMT-yə vasitəçilik təklif edir

Avstriya hökuməti Suriya münaqişəsi ilə bağlı danışıqlar prosesində vasitəçilik missiyasını davam etdirməkdə maraqlıdır.Azərtac xəbər verir ki, bununla bağlı Avstriyanın kansleri Sebastian Kurts BMT-nin Suriya üzrə xüsusi elçisi Staffan de Misturaya müraciət edib. Federal Kansler Aparatından verilən məlumatda qeyd edilir ki, Avstriya bundan sonra da hərbi həll yolu olmayan Suriya münaqişəsində BMT-nin sülh danışıqlarını tam gücü ilə dəstəkləməyə hazırdır.Avstriya kansleri müraciətində mümkün etimad quruculuğu tədbirləri və münaqişənin sülh yolu ilə həlli istiqamətində ilk addımların atılmasından bəhs edib, artıq sağlam düşüncə ilə hərəkət etmək və diplomatik kanallarla sülh prosesini irəli aparmaq üçün vaxtın yetişdiyi qeyd edilib: “Yeni bir gərginliyin, xüsusilə də ABŞ və Rusiya kimi supergüclər arasında gərginliyin qarşısını almaq üçün bütün müvafiq addımların atılması zəruridir”.Buna görə də Avstriya tərəfi ölkənin dialoq məkanı və körpü qurucusu kimi ənənəvi rolunu nəzərə alaraq, Suriya danışıqlarında fəal vasitəçiliyini BMT-nin xüsusi elçisinə təklif edib. İranın nüvə proqramı və Suriyada sülhün bərqərar olması ilə bağlı danışıqların Vyanada keçirilməsi Avstriyanın bu sahədə geniş təcrübəsindən xəbər verir.Eyni zamanda, Avstriyanın xarici işlər naziri Karin Knayssl verdiyi açıqlamada bildirib ki, Avstriya danışıqlar məkanı kimi öz missiyasını icra etməyə hazırdır və ilk növbədə əsas hədəf de Misturanı öz fəaliyyətində yaxından dəstəkləməkdən ibarətdir.xeber100.com

Pekində beynəlxalq festival başlayıb

Çinin paytaxtı Pekində beynəlxalq film festivalı başlayıb.Azərtac xəbər verir ki, bu il 8-ci dəfə keçirilən beynəlxalq film festivalı dünya kino sənayesinin tanınmış simalarını Pekinə toplayıb. Festivala 230-dan çox yerli və xarici film istehsalçısı, o cümlədən rejissor, aktyor, ssenarı müəllifi, habelə kino aləminin digər nümayəndələri qatılıb.Festivalın əsas hadisəsi isə 15 filmin “Tiantan” mükafatı uğrunda mübarizə apardığı müsabiqədir. Bu filmlər dünya üzrə müsabiqəyə təqdim edilən 659 film arasından seçilib. Çin, ABŞ, İsveç, Rumıniya və Polşadan olan tanınmış kino mütəxəssislərindən, rejissor və aktyorlardan ibarət münsiflər heyəti qalib filmləri seçəcək. Mükafat uğrunda mübarizə aparan həmin filmlərlə yanaşı, daha 300-dən çox film festivalın davam edəcəyi bir həftə ərzində Pekinin ən iri kinoteatrlarında nümayiş olunacaq. Bundan başqa, festivalın proqramına forumlar, seminarlar, karnaval, ustad dərsləri də daxildir.Qeyd edək ki, son illər Çinin kino sənayesi sürətlə inkişaf edir. Ölkədə hazırda 9914 kinoteatrda 53 min 824 kinoekran fəaliyyət göstərir ki, bu da sayca dünyada ən çoxdur. Hazırda dünyanın ən böyük ikinci kino bazarı olan Çində kassa yığımı 2003-cü ildən bəri hər il orta hesabla 35 faiz çoxalıb. Ötən il Çində kassa yığımı 8 milyard dollara yaxın olub. Mütəxəssislər hesab edir ki, 2020-ci ildə Çində film nümayişinin kassa yığımının ümumi məbləği 15 milyard dollara çatacaq.xeber100.com

6,0 bal gücündə zəlzələ olub

İndoneziya sahillərində 6,0 bal gücündə zəlzələ olub.Azərtac xəbər verir ki, bu barədə Avropa və Aralıq dənizi Seysmoloji Mərkəzin (EMSC) məlumatında bildirilir.Yeraltı təkanların episentri Ternate adasından 88 km şimal-qərbdə, ocağı 60 km dərinlikdə yerləşib.xeber100.com

İraqda kütləvi aksiya keçirilib

İraqda ABŞ, Fransa və Böyük Britaniyanın Suriyanı bombardman etməsinə etiraz olaraq aksiya keçirilib.Azərtac xəbər verir ki, yerli mətbuatın verdiyi məlumata görə, Bağdadın Təhrir meydanına toplaşan minlərlə iraqlı ABŞ-ı müstəqil dövlətlərin daxili işlərinə qarışmaqda ittiham ediblər.Aksiya iştirakçıları vurğulayıb ki, Amerika İraqın kütləvi qırğın silahına malik olmasını bəhanə gətirərək ölkəni bombardman etdi. Lakin sonradan məlum oldu ki, Səddam Hüseynin rəhbərlik etdiyi İraqda nüvə silahı olmayıb.Aksiya iştirakçıları beynəlxalq təşkilatlara müraciət edərək ABŞ-ın beynəlxalq hüquq normalarına hörmətsiz yanaşmasını qınamalarını tələb edib.Qeyd olunub ki, Suriyanın kimyəvi silahdan istifadə etməsinə dair heç bir sübutun olmadığı təqdirdə bu ölkənin bombalanması açıq-aşkar şəkildə beynəlxalq hüququ tapdalamaq deməkdir.xeber100.com

“Vyana Şəhər Xətləri” Şirkəti sınaq yoxlanışına başlayıb

Vyanada ictimai sərnişindaşıma xidmətini həyata keçirən “Vyana Şəhər Xətləri” Şirkəti sürücüsüz hərəkət edəcək mikroavtobusların sınaq yoxlanışına başlayıb.Azərtac xəbər verir ki, Fransanın “Navya” şirkətinin istehsalı olan tam avtomatlaşdırılmış iki mikroavtobus gələn ilin əvvəlindən etibarən şəhərin yeni salınmış Zeeştadt Aspern rayonunda hərəkət edəcəklər. Nəqliyyata buraxılmazdan əvvəl isə bu il ərzində mikroavtobuslar sınaqdan keçiriləcək, sərnişinlərlə hərəkət edəcəkləri marşrut üzrə test yoxlanışları aparılacaq və onların hərəkət cədvəli üzrə yol və ətraf ərazini “öyrənməsi” təmin ediləcəkdir. Çoxlu sayda sensorlarla təchiz olunmuş mikroavtobusların müvafiq proqram təminatı təkmilləşdirilməli, yeni texnologiyanın seriya istehsalına hazirlanması üçün bir sıra texniki işlər görülməli, eləcə də nəqliyyat qanunvericiliyində dəyişikliklər aparılmalıdır.Saatda maksimum 20 km sürətlə hərəkət edəcək mikroavtobuslar 11 sərnişin üçün nəzərdə tutulub və nəqliyyatın sıxlığı az olan saatlarda marşruta buraxılacaq. Avstriya qanunvericiliyi sürücüsüz nəqliyyat vasitələrini qadağan etdiyinə görə, hərəkət vaxtı avtobusda nəzarəti həyata keçirən və lazım gələrsə onun hərəkətini nizamlayan sürücü-operator olacaqdır.xeber100.com