KXDR-ə qarşı sanksiyalar sərtləşdirilib

Avropa İttifaqı KXDR-ə qarşı ticarət məhdudiyyətlərinin gücləndirilməsi və şimali koreyalı işçilərin geri göndərilməsi də daxil olmaqla sanksiyaları sərtləşdirib. TASS informasiya agentliyi xəbər verir ki, bu, Aİ Şurasının xarici işlər nazirləri səviyyəsində yayılan bəyanatında bildirilir.Yeni tədbirlər KXDR-ə bütün növ neft məhsullarının kommersiya ixracatına tam qadağa qoyulmasını, həmçinin Aİ ölkələri tərəfindən humanitar ehtiyaclar üçün Pxenyana göndərilə biləcək yanacağın maksimal həcminin ildə 2 milyon bareldən 500 min barelə qədər azaldılmasını nəzərdə tutur. Avropa İttifaqı KXDR-dən bütün növ qida və kənd təsərrüfatı məhsullarının, həmçinin daş və taxta idxalını tam qadağan edib. Eyni zamanda, bu ölkəyə bütün növ sənaye avadanlıqlarının, yük maşınlarının, həmçinin dəmir, polad və onların ərintilərinin və digər metalların ixracı qadağan olunub.Aİ Şurası, həmçinin 24 ay ərzində Avropa İttifaqı ölkələrində müqavilə üzrə işləyən bütün KXDR vətəndaşlarının repatriasiyası barədə qərar qəbul edib.Xatırladaq ki, Koreya yarımadasında vəziyyət KXDR-in raket-nüvə proqramının son zamanlar aktivləşməsi səbəbindən ciddi surətdə gərginləşib. BMT Təhlükəsizlik Şurası Şimali Koreyanın 2017-ci il noyabrın 29-da keçirdiyi qitələrarası raket sınağına cavab olaraq dekabrın 22-də bu ölkəyə qarşı beynəlxalq sanksiyaları kəskin şəkildə sərtləşdirən qətnamə qəbul edib. Sənəd Pxenyana xam neftin və neft emalı məhsullarının çatdırılmasına yeni məhdudiyyətlər qoyur, həmçinin 24 ay ərzində bütün koreyalı işçilərin vətənlərinə göndərilməsini tələb edir. Bu tədbirlərin Pxenyanı nüvə silahının sonrakı inkişafı və onun çatdırılması imkanlarından məhrum edəcəyi gözlənilir.xeber100.com

BMT atəşkəs rejiminin tətbiqinə dair qətnaməni qəbul edib

BMT Təhlükəsizlik Şurası Suriyada 30 günlük atəşkəs rejiminin tətbiqi və ölkə ərazisində humanitar əməliyyatların aparılmasına dair qətnaməni yekdilliklə qəbul edib."RİA Novosti"nin verdiyi xəbərə görə, sənəd humanitar yardımları çatdırmaq, yaralı və ağır xəstələrin tibbi təxliyəsini həyata keçirmək üçün münaqişənin bütün tərəflərindən toqquşmaları azı 30 gün müddətinə dərhal dayandırmağı və humanitar fasiləni təmin etməyi tələb edir.Sənədə əsasən, atəşkəs rejimi İŞİD, “Cəbhə ən Nüsrə” və “Əl Qaidə” kimi terror təşkilatlarına və onlarla əlaqəli qruplaşmalara şamil edilmir.xeber100.com

ABŞ-ın Enerji İnformasiya Administrasiyasının məlumatı

ABŞ-ın sutkalıq xam neft istehsalı azalıb.Azərtac xəbər verir ki, bu barədə ABŞ-ın Enerji İnformasiya Administrasiyasının (EIA) məlumatında deyilir.Bildirilir ki, ötən hesabat həftəsində ABŞ-ın xam neft hasilatı əvvəlki həftəyə nisbətdə gündəlik orta hesabla 1000 barrel azalaraq 10,27 milyon barrel olub. Bu, ölkə tarixində neft hasilatının ən yüksək səviyyəsidir. ABŞ-ın gündəlik neft hasilatı ard-arda 5 həftə artdıqdan sonra ilk dəfə azalmağa başlayıb. Bu göstərici ilə ABŞ gündəlik neft hasilatında Səudiyyə Ərəbistanını geridə qoyur.Hazırda ABŞ dünyanın ən böyük ikinci xam neft istehsalçısı mövqeyindədir. ABŞ-ın xam neft hasilatı sonuncu dəfə 1970-ci ilin noyabrında maksimum – gündəlik orta hesabla 10,04 milyon barrel olub.Neft İxrac edən Ölkələr Təşkilatının (OPEC) fevral ayında yayımladığı hesabata görə, Səudiyyə Ərəbistanında xam neft istehsalı yanvarda gündəlik orta hesabla 9,97 milyon barrel təşkil edib.EIA-nın proqnozuna görə, ABŞ-ın xam neft istehsalı bu il sutkalıq 10,6 milyon barrelə çatacaq. Gələn il isə ABŞ-ın gündəlik neft hasilatını 11,2 milyon barrelə çatdıraraq istehsal göstəricisinə görə Rusiyanı da geridə qoyması proqnozlaşdırılır.xeber100.com

Vizasız rejim qüvvəyə mindikdən sonra…

İsrail vətəndaşları üçün vizasız rejim qüvvəyə mindikdən sonra bu ölkədən Özbəkistana iyun ayına qədər olan bütün biletlər iki gün ərzində satılıb.Interfax informasiya agentliyi xəbər verir ki, bu barədə məlumat Özbəkistan Prezidenti Şavkat Mirziyoyevin sədrliyi ilə keçirilən iclasda səsləndirilib.2018-ci il fevralın 10-dan başlayaraq İsrail, İndoneziya, Koreya, Malayziya, Sinqapur, Türkiyə və Yaponiya vətəndaşları Özbəkistana 30 gün müddətinə vizasız səfər edə biləcək. Bundan başqa, 39 ölkə vətəndaşları üçün də viza verilməsi qaydası sadələşdirilib. Bu il iyulun 1-dən ölkədə elektron vizaların tətbiqinə başlanacaq. Bununla bağlı vətəndaşlarına vizasız rejimin şamil edildiyi ölkələrdən reyslərin sayı artırılacaq. Daşkənddən əlavə, Buxara, Səmərqənd, Urqanç, Nəvai və Qarşi şəhərlərindən də xarici ölkələrə birbaşa reyslər həyata keçiriləcək.İclasda qeyd olunub ki, ötən il Özbəkistana 2,7 milyon nəfərə yaxın turist gəlib. İsrail vətəndaşları arasında bu ölkədən getmiş 100 mindən çox insan var.xeber100.com

“Arabian Business” nəşrinin məlumatı

Dubayda iki ay ərzində 3D çap texnologiyası ilə ilk villalar inşa ediləcək. Bu barədə “Arabian Business” nəşri məlumat yayıb.Azərtac xəbər verir ki, Dubay bələdiyyəsindən verilən məlumata görə, bu tipli villaların inşası üçün bütün lazımi avadanlıqlar artıq əmirliyə gətirilib.Qeyd olunub ki, əmirlikdə 2030-cu il üçün yeni binaların 25 faizi bu cür müasir texnologiyalar vasitəsilə tikiləcək. Bu da, öz növbəsində, inşaata sərf olunan vəsaiti azaldacaq və tikinti müddətini qısaldacaq.xeber100.com

Rixter cədvəli üzrə 5 bal gücündə zəlzələ olub

Yunanıstanın Zakintos adası yaxınlığında İon dənizində Rixter cədvəli üzrə 5 bal gücündə zəlzələ olub.ABŞ-ın Geologiya İnstitutunun məlumatına əsasən, zəlzələ gecə saatlarında baş verib. Xəsarət barədə məlumat yoxdur.xeber100.com

“RİA Novosti” agentliyinin məlumatı

ABŞ Rusiya ilə münasibətlərdə sərt mövqedən çıxış etməyi davam etdirəcək. “RİA Novosti”nin verdiyi xəbərə görə, bu barədə ABŞ prezidentinin mətbuat katibi Sara Sanders bildirib.“Prezident Donald Tramp bir çox məsələlər üzrə Rusiya ilə münasibətlərdə çox sərt olub və biz bu mövqeni davam etdirəcəyik”, - deyə Sanders Ağ Evdəki brifinqdə bildirib.S.Sanders bu sözləri jurnalistlərin D.Trampın Rusiya ilə bağlı mövqeyinin yetərincə sərt olmamasına dair fikirlərinə cavab olaraq bildirib.xeber100.com

“Böyük iyirmilik” ölkələrinin sammiti Osakada keçiriləcək

2019-cu ildə “Böyük iyirmilik” (G20) ölkələrinin sammiti Yaponiyanın Osaka şəhərində keçiriləcək. Bu barədə müvafiq qərar Yaponiya hökuməti tərəfindən verilib.TASS informasiya agentliyi xəbər verir ki, şəhər digər dövlətlərdən olan yüksək vəzifəli qonaqları yerləşdirmək üçün müvafiq infrastruktur və otellərin sayının təhlilindən sonra tədbirə ev sahibliyi etmək üçün seçilib. Sammitin keçiriləcəyi dəqiq vaxt bu il iyunun axırı və ya iyulun əvvəlində məlum olacaq.Eyni zamanda, ölkənin cənub-qərbində yerləşən Fukuoka şəhəri G20 ölkələrinin maliyyə nazirləri və Mərkəzi Banklarının rəhbərlərinin görüşü üçün meydança qismində nəzərdən keçirilir.Yaponiya G20 dövlətlərinin başçılarının sammitinə indiyədək heç vaxt ev sahibliyi etməyib.xeber100.com

Fövqəladə vəziyyət rejimi tətbiq edilib

Fevralın 16-da baş vermiş güclü zəlzələ ilə əlaqədar Meksikanın Oaxaka ştatının 33 bələdiyyəsində fövqəladə vəziyyət rejimi tətbiq edilib. RİA Novosti agentliyinə istinadla xəbər verir ki, təbii fəlakətin nəticələrinin aradan qaldırılması üçün bölgəyə 5 minədək hərbçi və hərbi texnika göndərilib.Qeyd edək ki, ötən cümə günü Meksikanın Oaxaka ştatında 7,2 bal gücündə zəlzələ qeydə alınıb. Yeraltı təkanlar paytaxt Mexikoda hiss olunub. Zəlzələ nəticəsində yüzlərlə tikiliyə ziyan dəyib.xeber100.com

İranın Çabahar limanı Hindistanın idarəçiliyinə veriləcək

Şimal-Cənub Beynəlxalq Nəqliyyat Dəhlizinin mühüm dayaq məntəqəsi olan İranın Çabahar limanı Hindistanın idarəçiliyinə veriləcək.Azərtac-ın verdiyi məlumata görə, İran prezidenti Həsən Ruhaninin Hindistana rəsmi səfəri çərçivəsində iki dövlət arasında əməkdaşlıq haqqında 15 sənəd imzalanıb.İmzalanan sənədlərdən biri İranın Çabahar limanının idarəçiliyinin Hindistana verilməsi ilə bağlıdır. Hindistanın baş naziri Narendra Modi ilə İran prezidenti H. Ruhaninin görüşündə Çabahar limanının idarəçiliyinin müvəqqəti olaraq Hindistana verilməsi haqqında razılıq əldə olunub.Xatırladaq ki, bu liman Şimal-Cənub Beynəlxalq Nəqliyyat Dəhlizinin formalaşmasında əhəmiyyətli rola malikdir. Hindistan Çabahar limanı vasitəsilə Əfqanıstan, Orta Asiya və Şərqi Avropa ölkələri ilə ixrac-idxal əməliyyatlarını həyata keçirmək niyyətindədir.Yüklər Hindistanın Mumbai limanından gəmilərlə İranın Çabahar limanına gətiriləcək, buradan isə Qəzvin-Rəşt-Astara (İran)-Astara (Azərbaycan) dəmir yolu ilə Rusiya və Avropa ölkələrinə çatdırılacaq. Əks istiqamətdə daşınma da Hindistan üçün olduqca sərfəlidir.Hindistanın Şimal-Cənub Beynəlxalq Nəqliyyat Dəhlizinə maraq göstərməsi İran ilə yanaşı, Azərbaycanın da iqtisadi maraqlarına uyğundur.xeber100.com