“Akkuyu” AES-i layihəsinin işə salınması ilə bağlı…

Türkiyənin Mersin əyalətində dekabrın 10-da “Akkuyu” AES-i layihəsinin işə salınması ilə bağlı təntənəli mərasim keçiriləcək.“RİA Novosti”nin verdiyi xəbərə görə, tədbirdə “Rosatom”un rəhbəri Aleksey Lixaçov və Türkiyənin energetika naziri Berat Albayrak iştirak edəcək.Məlumata görə, söhbət enerji bloklarının inşasına dair hazırlıq işlərinin başlanmasından gedir.Qeyd edək ki, prezident Vladimir Putin Rusiyanın “Akkuyu” AES-in tikintisinə 22 mlrd. dollar yatırılacağını bəyan etmişdir.Ankara stansiyanı 2023-cü ildə işə salmaq niyyətindədir.xeber100.com

4,9 bal gücündə zəlzələ baş verib

ABŞ-ın geoloji xidmətinin məlumatına əsasən Nepalın şərq hissəsində 4,9 bal gücündə zəlzələ baş verib.Xarici KİV-lər xəbər verir ki, zəlzələnin episentri Banepa şəhər bələdiyyəsindən 67 kilometr şimal-şərqdə, yer səthindən 10 kilometr dərinlikdə yerləşib.Hələlik həlak olanlar, xəsarət alanlar və ya dağıntılar barədə heç bir məlumat verilmir.Nepal aktiv seysmik zonada yerləşir. Xatırladaq ki, 2015-ci il aprelin 25-də bu ölkədə 7,9 bal gücündə dağıdıcı zəlzələ baş vermişdi. Təxminən iki həftə sonra isə ölkə 7,3 bal gücündə yeni yeraltı təkanlara məruz qalmışdı. O vaxt bu iki zəlzələ nəticəsində 9 minə yaxın insan həlak olmuş, 22 mindən çox insan yaralanmışdı.xeber100.com

“Brexit” danışıqlarının ilk mərhələsi yekunlaşıb

“Brexit” üzrə danışıqlarda üç əsas mövzu - vətəndaşların hüquqlarının qarşılıqlı qorunması, İrlandiya sərhədləri və Britaniyanın Avropa İttifaqının tərkibindən çıxmağa görə ödəyəcəyi vəsait məsələlərində irəliləyiş əldə olunub.Euronews telekanalı  xəbər verir ki, bu barədə məlumat Böyük Britaniya-Aİ danışıqlarının ilk mərhələsinin nəticəsi üzrə məruzədə yer alıb.Britaniyanın Baş naziri Tereza Mey Avropa Komissiyasının sədri Jan-Klod Yunker və Avropa Şurasının başçısı Donald Tuskla danışıqlar aparmaq üçün Brüsselə gəlib. Mey və Yunkerin 15 səhifəlik “irəliləyiş barədə məruzəyə” qol çəkdiyi bildirilir. “Böyük Britaniyanın Aİ-nin tərkibindən çıxması barədə sazişin əsas məqsədi Aİ və Böyük Britaniya vətəndaşlarının qarşılıqlı müdafiəsi, Aİ çərçivəsində və insanların seçimi nəticəsində əldə olunan hüquqlarının qorunmasıdır”, - məruzənin mətnində belə deyilir.İrlandiya məsələsində tərəflər Şimali İrlandiya və İrlandiya Respublikası arasında sərhədləri maksimal dərəcədə sərbəst saxlamaq barədə razılaşıblar. Maliyyə öhdəliyinə gəldikdə isə Britaniyanın ödəyəcəyi vəsaitin məbləği hələ bildirilmir, lakin tərəflər onun hesablanması metodu üzrə razılığa gəliblər. “Financial Times” jurnalı bu məbləğin 40-60 milyard avro olacağını yazır.Xatırladaq ki, Böyük Britaniya Avropa İttifaqını 2019-cu il martın 29-da tərk edəcək.xeber100.com

Ukrayna parlamentinə ultimatum

Ukrayna Prezidenti Petro Poroşenko ölkənin Ali Radasına ultimatum göndərib.O qeyd edib ki, Ukrayna parlamenti Ali Antikorrupsiya Məhkəməsinin yaradılması ilə bağlı konkret iş görməsə, prezidentlik hüququndan istifadə edərək qanun layihəsini qəbul edəcək.“Dekabrın 8-də artıq bir ay olacaq ki, Ali Antikorrupsiya Məhkəməsinin yaradılması ilə bağlı Ukrayna Ali Radasına müraciət etmişəm. Mənim müraciətim yenə qüvvəsində qalır. Əgər növbəti həftənin əvvəlində qanun layihəsinin qəbulu ilə bağlı hər hansı istək görməsəm, 7-10 gün ərzində öz təşəbbüsümlə layihəni qəbul edəcəyəm”, - deyə Poroşenko qeyd edib.Prezident, həmçinin Ali Radadan Venesiya Komissiyasının rəyi əsasında “Antikorrupsiya məhkəmələri haqqında” qanuna yenidən baxılmasını istəyib.xeber100.com

BMT Təhlükəsizlik Şurasında müzakirə

BMT Təhlükəsizlik Şurası ABŞ tərəfindən Qüdsün birtərəfli qaydada İsrailin paytaxtı kimi tanınması ilə bağlı bu şəhərin statusu məsələsini dekabrın 8-də müzakirəyə çıxaracaq.Euronews telekanalı xəbər verir ki, BMT TŞ-nin iclasının keçirilməsi üçün Təhlükəsizlik Şurasının üzvü olan səkkiz dövlət – Boliviya, Böyük Britaniya, Misir, İtaliya, Seneqal, Uruqvay, Fransa və İsveç müraciət ediblər.Xatırladaq ki, dekabrın 6-da ABŞ Prezidenti Donald Tramp Qüdsü İsrailin paytaxtı kimi tanıdığını elan edib və həmçinin Amerika səfirliyinin Təl-Əvivdən bu şəhərə köçürülməsi barədə sənəd imzalayıb. Birləşmiş Ştatlar konqresi ABŞ səfirliyinin Qüdsə köçürülməsi planını hələ 1995-ci ildə qəbul etmişdi. Lakin şəhərin mübahisəli statusu və problemin müsəlman aləmi üçün həssaslığı səbəbindən Amerikanın bütün prezidentləri bu qərarı o vaxtdan indiyədək təxirə salırdılar.Trampın dünən verdiyi bəyanat regionda gərginliyi artırıb. KİV-lərdə yayılan son məlumatlara görə, artıq İordan çayının qərb sahilində və Qəzzə sektorunda fələstinlilərlə İsrail əsgərləri arasında toqquşmalar baş qaldırıb.xeber100.com

Beynəlxalq Olimpiya Komitəsinin açıqlamasında

Beynəlxalq Olimpiya Komitəsi Rusiyanı 2018-ci ildə Koreya Respublikasının Pxönçan şəhərində keçiriləcək Qış Olimpiya Oyunlarında iştirakdan kənarlaşdırıb.Xarici KİV-lər xəbər verir ki, rusiyalı idmançılar yalnız Olimpiya bayrağı altında turnirə qatılacaqlar.Beynəlxalq Olimpiya Komitəsinin açıqlamasına görə, bu qərar Lozannada keçirilən toplantıda verilib.xeber100.com

ABŞ Ali Məhkəməsi immiqrasiya fərmanını təsdiqləyib

Ağ ev qələbəsini bayram edir: dekabrın 4-də ABŞ Ali Məhkəməsi Donald Trampın immiqrasiya fərmanının tam qüvvəyə minə biləcəyi barədə qərar çıxarıb.Euronews telekanalı xəbər verir ki, fərmanın üçüncü versiyasını (o, cəmi üç ay fəaliyyət göstərən əvvəlki qadağanı əvəzləməyə yönəlib) qismən məhdudlaşdıran qərarın ləğv edilməsi barədə Trampın iddiası təmin olunub.Fərman 6 ölkənin - İran, Yəmən, Liviya, Suriya, Somali və Çadın Amerika ərazisində ailə bağlılığı olmayan vətəndaşlarının ABŞ-a daxil olmasını qadağan edir. Tramp, həmçinin sentyabr ayında ayrıca olaraq Şimali Koreya vətəndaşlarının və Venesuela məmurlarının ölkəyə girişinə qadağa qoyub.Məhkəmənin qərarı müvəqqəti xarakter daşıyır. O, həm ABŞ-da, həm də digər ölkələrdə etiraz dalğaları doğuran fərmana qarşı iddialara baxılanadək qüvvədə qalacaq. Etirazçılar hökuməti diskriminasiya və islamofobiyada ittiham edirlər. Ağ ev isə öz növbəsində siyahı tərtib olunan zaman yalnız bir parametrin - bu və ya digər ölkələrin milli təhlükəsizliyə təhdidinin nəzərə alındığını bildirib.xeber100.com

Associated Press agentliyinin məlumatı

ABŞ və Cənubi Koreya hərbi hava qüvvələrinin dekabrın 4-də başlayan ən irimiqyaslı birgə təlimlərində yüzlərlə təyyarə iştirak edir.Associated Press agentliyinin yaydığı məlumata əsasən, birgə manevrlər KXDR-in ötən həftəki qitələrarası ballistik raket sınağına cavab olaraq keçirilir.Vigilant Ace adlandırılan məşqlər beş gün davam edəcək. Təlimlərə 200-dən çox təyyarə, o cümlədən ABŞ-ın altı F-22 qırıcı təyyarəsi, rəsmən təsdiqlənməmiş informasiyaya görə, səsdən sürətli B-1B strateji bombardmançı təyyarələri, habelə 12 min amerikalı hərbi qulluqçu cəlb olunub.Pxenyan bu manevrləri KXDR-ə qarşı açıq təxribat adlandırıb və istənilən an nüvə müharibəsinə gətirib çıxara biləcəyini bəyan edib.xeber100.com

6,1 maqnitudalı zəlzələ baş verib

Bu gün Ekvador sahillərində zəlzələ olub."RİA Novosti" agentliyinin verdiyi məlumata görə, yerli vaxtla saat 11.19 radələrində Baiya de Karakes şəhərindən 33 km şimal-şərqdə 6,1 maqnitudalı zəlzələ baş verib.Zəlzələnin ocağı 40 km dərinlikdə yerləşib. Dağıntı və tələfat barədə məlumat daxil olmayıb.xeber100.com

WAM agentliyinin məlumatı

Birləşmiş Ərəb Əmirliklərinin hakimiyyəti Yəməndəki qiyamçı husilərin Əbu-Dabi əmirliyində tikilən "Baraka" Atom Elektrik Stansiyasına (AES) qanadlı raket buraxmasını təkzib edib.Bu barədə BƏƏ-nin rəsmi WAM agentliyi məlumat yayıb.Qeyd edək ki, bu gün Yəməndəki qiyamçı husilər BƏƏ-də tikilən və 2018-ci ildə birinci blokunun istifadəyə verilməsi gözlənən "Baraka" AES-ə qanadlı raket atdıqlarını və hədəfi vurduqlarını bəyan edib. Husilərin silahlı qruplaşmasının nümayəndəsi Əziz Rəşid "Baraka" AES-ə raket buraxılmasının Əb-Dabiyə siyasi və hərbi mesaj olduğunu bildirib.BƏƏ Fövqəladə və Böhranlı Situasiyalar üzrə Milli İdarəsi ölkənin Hava Hücumundan Müdafiə Sisteminə malik olduğunu və "Baraka" AES-in belə təhlükələrdən tam qorunduğunu açıqlayıb. Eyni zamanda husilərin bəyanatına əhəmiyyət verilməməsi zəruri sayılıb.xeber100.com