Yaponiya Nazirlər Kabinetinin məlumatı

Noyabrın 29-da Şimali Koreyanın son ballistik raket sınağı ilə əlaqədar Yaponiya Milli Təhlükəsizlik Şurasının iclası keçirilib.Yaponiya Nazirlər Kabinetindən Azərtac-ın xüsusi müxbirinə verilən məlumatda bildirilir ki, Şimali Koreyanın qərbindən yerli vaxtla gecə saat 3:18-də buraxılan raket Yaponiya üzərindən uçaraq bu ölkəyə məxsus iqtisadi zonaya düşüb. Hazırda raket buraxılışı ilə bağlı məlumatların toplanması və təhlili davam edir. Bildirilir ki, sınaqla əlaqədar hava və dəniz nəqliyyatında problemin yaranması barədə hələlik məlumat daxil olmayıb. Eyni zamanda, özünümüdafiə qüvvələri tərəfindən raketin vurulması ilə bağlı tədbir də görülməyib. Yaponiyaya məxsus iqtisadi zonaya düşən raket ölkənin təhlükəsizliyi üçün ciddi təhdiddir.Məlumatda qeyd edilir ki, səhər saat 6:10-da başlayan Milli Təhlükəsizlik Şurasının iclasında Şimali Koreya tərəfindən son ballistik raket sınağı ilə əlaqədar daxil olan məlumatlar müzakirə edilib. Baş nazir Şinzo Abenin göstərişinə uyğun olaraq, üç istiqamətdə - beynəlxalq ictimaiyyətlə əməkdaşlığın genişləndirilməsi, Şimali Koreyaya təzyiqlərin artırılması və BMT Təhlükəsizlik Şurası tərəfindən daha qəti tədbirlərin görülməsinə nail olmaq istiqamətlərində fəaliyyətin davam etdirilməsi qərara alınıb.xeber100.com

TASS informasiya agentliyinin məlumatı

Angela Merkelin mühafizəkar bloku hökuməti formalaşdırmaq üçün Almaniya sosial-demokrat partiyası ilə danışıqlara hazırdır.TASS informasiya agentliyi xəbər verir ki, bunu noyabrın 27-də Xristian-Demokratik İttifaqının (XDİ) başçısı Angela Merkel partiyanın idarə heyətinin Berlində keçirilən iclasından sonra jurnalistlərə müsahibəsində bildirib. “Biz məhz belə hökumətin qurulmasını istəyirik və ASDP ilə danışıqlara hazırıq”, - deyə o qeyd edib.Bununla yanaşı, Angela Merkelin sözlərinə görə, Almaniyanın avropalı tərəfdaşları hesab edirlər ki, AFR Aİ çərçivəsində vacib rol oynamağa qadirdir. “Yaxın Şərq münaqişəsini, Rusiya ilə vəziyyəti, ABŞ-da cərəyan edən hadisələri nəzərə alsaq, Almaniyanın qərar qəbuletmə bacarığının olması daha yaxşıdır”, - XDİ lideri belə deyib.Almaniya sosial-demokrat partiyasının (ASDP) rəhbərliyi Prezident Frank-Valter Ştaynmayerin vasitəçiliyi ilə mühafizəkarların başçısı Angela Merkellə danışıqlar aparmağa razılıq verib. Bunu bazar ertəsi günü ASDP lideri Martin Şults bəyan edib.Xatırladaq ki, Xristian-demokratik və Xristian-sosialist ittifaqı bloku (XDİ/XSİ), Azad demokratik partiya və “yaşıllar” arasında koalisiya hökumətinin qurulması üzrə bir aydan çox davam edən danışıqlar nəticəsiz başa çatıb. Bundan başqa, sosial-demokratlarla indiyədək razılıq əldə olunmaması ölkədə vəziyyəti siyasi böhran həddinə çatdırıb.xeber100.com

“Samsung” qrafen kürəciklər yaradıb

“Samsung” şirkəti tərəfindən qrafendən istifadə nəticəsində hazırlanmış akkumulyator smartfonu 12 dəqiqə ərzində enerji ilə doldurur.Bu haqda “Financial Times” nəşri yazıb. Şirkət nümayəndələri bildirirlər ki, akkumulyatorun dolmasını beş dəfə sürətləndirən qrafen kürəcikləri uğurla sintez edilib. Bunun üçün adi litium-ion batareyaları üçün orta hesabla təxminən bir saat vaxt lazımdır.Nəşr yazır ki, qrafen litium-ion batareyaları üçün alternativ qismində 2004-cü ildən nəzərdən keçirilir. Qrafendən hazırlanmış kürəciklər, həmçinin elektrik avtomobillərində tətbiq edilə bilər.Qrafen qrafitdən əldə olunan karbon elementidir. O, elektrik enerjisini silisiumdan daha sürətli keçirir. Hesab edilir ki, qrafen gələcəkdə mikro və nanoelektronika sahələrində istifadə edilən əsas material olacaq.xeber100.com

“China Daily” qəzeti yazır…

Çin Xalq Respublikası Mərkəzi Hərbi Şurasının (MHŞ) üzvü general Can Yan evində intihar edib.“China Daily” qəzeti xəbər verir ki, intihar noyabrın 23-də baş verib, amma ictimaiyyətə bu gün açıqlama verilib. Bildirilir ki, bir müddət əvvəl hüquq mühafizə orqanları onun haqqında təhqiqata başlamışdı. Güman olunurdu ki, Can Yanın Mərkəzi Hərbi Şuranın keçmiş sədr müavini işləmiş və sonradan korrupsiya əməllərinə görə ömürlük həbs cəzasına məhkum edilən general Quo Bosion və MHŞ-nin keçmiş sədr müavin işləmiş, sonradan haqqında korrupsiya əməlinə görə açılan cinayət işinin gedişində vəfat edən general Su Çayxou ilə əlaqəsi olub.Qeyd edək ki, Mərkəzi Hərbi Şura Çində silahlı qüvvələrin ən yuxarı idarəetmə qurumdur. Onun sədri Çin Xalq Respublikasının sədri, Kommunist Partiyasının baş katibi Si Cinpindir.xeber100.com

İran Prezidenti Administrasiyasının məlumatı

Bu gün yenidən İran Prezidenti seçilən Həsən Ruhaninin fəaliyyətinin ilk 100 günü tamam olur.Bu barədə Azərtac-a açıqlamasında İran Prezidenti Administrasiyasının mətbuat xidmətinin rəis müavini Pərviz İsmaili deyib.P.İsmaili qeyd edib ki, bu münasibətlə Prezident H.Ruhani axşam saatlarında İranın dövlət televiziyası ilə çıxış edərək fəaliyyəti barədə xalqa hesabat verəcək və qarşıda duran vəzifələr haqqında danışacaq. Prezident regional məsələlər, iqtisadi və ictimai mövzular ilə əlaqədar proqramlarını şərh edəcək.xeber100.com

NHK telekanalının məlumatına görə…

Roma Papası Myanmaya səfərə gəlib.NHK telekanalı xəbər verir ki, ölkədə rohinca müsəlmanlarına görə humanitar böhranın davam etdiyi bir vaxtda baş tutan bu səfər şərhçilər tərəfindən böyük maraqla izlənir.Noyabrın 27-də Yanqon şəhərinə gələn Roma Papasını katoliklər dəstəsi qarşılayıb.Xatırladaq ki, avqustda baş verən silahlı qarşıdurma nəticəsində 600 mindən çox rohinca qonşu Banqladeşə qaçıb. BMT və ABŞ bunu etnik təmizləmə adlandırsa da, Myanma hökuməti bu ittihamı qəbul etmir.Roma Papasının Myanmaya səfəri burada çox az sayda olan katoliklər üçün böyük əhəmiyyət kəsb edir. Əsasən buddizmin hökmran olduğu bu ölkədə digər dinlərin nümayəndələri diskriminasiyadan şikayət edirlər.Roma Papasının Banqladeşə də səfər edərək burada qaçqın rohinca müsəlmanları ilə görüşəcəyi bildirilir.xeber100.com

Las-Veqasda keçirilən “Kainat gözəli” müsabiqəsində

Cənubi Afrika Respublikasından olan Demi-Li Nel-Piters Las-Veqasda keçirilən “Kainat gözəli” müsabiqəsində qalib gəlib.Interfax informasiya agentliyi xəbər verir ki, yeni kainat gözəli İİV və QİÇS-lə mübarizə işinə yardım etmək üçün öz titulundan yararlanmaq niyyətindədir.Qeyd edək ki, “Kainat gözəli” müsabiqəsinə bütün dünyadan 92 iştirakçı qatılıb. Qalibə bir illik maliyyə təminatı, Nyu-Yorkda mənzil və digər mükafatlar verilir. Nil-Piters bu titulu əldə edən ikinci cənubi afrikalıdır.xeber100.com

Geo TV telekanalının məlumatı

İslamabadda dini fəallar Pakistanın ədliyyə naziri Zahid Həmidin istefasından sonra etiraz aksiyalarını dayandırmağa razılaşıblar.Geo TV telekanalı xəbər verir ki, nazir paytaxtda dini fəalların aramsız etirazları fonunda könüllü şəkildə istefa verib. Etirazçılar və ölkə hökuməti arasında razılaşmaya əsasən, hökumət Pakistanda kütləvi etirazların əsas səbəbi olan seçkilər barədə qanuna düzəlişlərin analizini 30 gün ərzində dərc etməlidir. Həmçinin hadisədə günahı olanlar ölkə qanunvericiliyinə əsasən cəza almalıdır.Sazişdə, eyni zamanda, 2017-ci il noyabrın 6-dan sonra həbs edilən bütün dini fəalların azad olunacağına və onlara qarşı cinayət işlərinin dayandırılacağına dair bənd də var.Xatırladaq ki, hüquq mühafizə orqanlarının İslamabadda dini fəalların oturaq aksiyasını dağıtması nəticəsində baş verən toqquşmalarda hər iki tərəfdən 250 nəfərə qədər insan yaralanıb, 4 nəfər həlak olub. Paytaxta əlavə polis və ordu qüvvələri yeridilib.xeber100.com

ABŞ Geoloji Xidmətinin məlumatına əsasən…

ABŞ Geoloji Xidmətinin yaydığı məlumata əsasən, noyabrın 27-də Papua-Yeni Qvineya sahillərində 6 bal gücündə zəlzələ olub.Kyodo agentliyi xəbər verir ki, yeraltı təkanlar yerli vaxtla saat 17:11-də Sakit okeanın cənub-qərbində yerləşən Yeni Şərqi Britaniya əyalətinin Kokoro şəhərindən 109 kilometr cənub-şərqdə və 57,8 kilometr dərinlikdə qeydə alınıb.Havay adalarında yerləşən Sakit okean Sunami Mərkəzi sunami təhlükəsi barədə xəbərdarlıq yaymayıb.xeber100.com

“Brexit” ilə bağlı son irəliləyişlər barədə məlumat veriləcək

Bu gün Britaniyanın Baş naziri Tereza May Brüsseldə Avropa Şurasının Sammitində iştirak edəcək.Azərtac xəbər verir ki, Baş nazirin Şuranın Prezidenti Donald Tusk ilə də görüşü planlaşdırılıb.T.May çıxışında Avropanın təhlükəsizlik məsələlərini ön plana çıxaracaq. Britaniyanın Avropa İttifaqı üçün əhəmiyyətindən, təhlükəsizlik məsələlərində vahid yanaşmanın vacibliyindən danışacaq.xeber100.com