“Venta-1” peyki Yer kürəsinin aşağı orbitində

Latviyada “Venta-1” adlı ilk süni peyk uğurla orbitə çıxarılıb. Bu barədə Ventspils ali məktəbinin nümayəndəsi Aqnese Yekabsone məlumat verib.“Venta-1” peyki Yer kürəsinin aşağı orbitində (LEO), təxminən 505 kilometr yüksəklikdə uçacaq. Peyk sutka ərzində Yerin ətrafında 16 dəfə dövrə vuracaq, lakin ondan gələn siqnalları həmişə qəbul etmək mümkün olmayacaq. Bu siqnallar gündə 2-3 dəfə, hər dəfə təxminən 10 dəqiqə ərzində yaxşı qəbul ediləcək.Ventspils ali məktəbinin komandası peykin buraxılmasını öz radiostansiyasında birbaşa efirdə izləyib. “Venta-1” peykindən gələn siqnallar da həmin radiostansiyada qəbul ediləcək, layihənin baş əlaqələndiricisi Ayqar Krauze isə bu tarixi hadisədə şəxsən iştirak etmək üçün Hindistana yola düşüb.xeber100.com

Əməkdaşlığın gələcək perspektivləri müzakirə olunub

Türkiyənin xarici işlər naziri Mövlud Çavuşoğlu Yaponiyanın paytaxtı Tokioya üçgünlük səfər edib.Səfərin üçüncü günü Sasakava Sülh Fonduna gələn nazir burada Yaxın Şərqdəki proseslər və Türkiyənin bölgədəki rolu barədə çıxış edib, çoxsaylı sualları cavablandırıb. Sasakava Sülh Fondunun fəxri prezidenti Yahey Sasakava ilə görüşdə iki ölkənin beyin mərkəzləri arasında əməkdaşlıq əlaqələri müzakirə olunub.Yaponiya mətbuatı ilə təmaslar çərçivəsində “Nikkey” qəzetinin və NHK telekanalının müxbirləri ilə görüşən M.Çavuşoğlu bölgədə baş verən proseslər, Yaponiya-Türkiyə əlaqələri və digər aktual mövzularda onların suallarını cavablandırıb.Həmin gün Yaponiyanın iqtisadiyyat, ticarət və sənaye naziri Hiroşiqe Seko ilə görüşən Türkiyənin xarici işlər naziri iki ölkə arasında iqtisadi və ticarət sahələrində əməkdaşlıq məsələlərini müzakirə edib.Yaponiyanın Baş naziri Şinzo Abe ilə görüşdə isə Türkiyə-Yaponiya əlaqələri, regional və beynəlxalq məsələlər ətrafında fikir mübadiləsi aparılıb. İki ölkə arasında əməkdaşlığın gələcək perspektivləri müzakirə olunub.Qeyd edək ki, nazir M.Çavuşoğlunun səfəri Türkiyədən Yaponiyaya xarici işlər naziri səviyyəsində 14 il sonra ilk dəfə reallaşıb.xeber100.com

Yonhap agentliyinin məlumatına görə…

Koreya Respublikasının Torpaq, İnfrastruktur və Nəqliyyat Nazirliyi ölkədə istehsal olunan və idxal edilən 403 min 128 avtomobilin geri çağırılması barədə göstəriş verib.Yonhap agentliyi nazirliyə istinadla xəbər verir ki, müxtəlif nöqsanlara görə geri çağırılan avtomobillər 7 şirkətin 38 modelinə aiddir. Buraya “Hyundai”nin “Santa Fe” və “MaxCruze” modelləri, “Maserati Ghibli”, “Ford Focus”, “Lincoln MKS” və digərləri daxildir.Avtomobillərdəki qüsurlu hissələr istehsalçı şirkətlərin hesabına dəyişdiriləcək.xeber100.com

Dünya İqtisadi Forumunun illik Asiya sammiti keçiriləcək

İyunun 27-29-da Çinin Dalyan şəhərində Dünya İqtisadi Forumunun illik Asiya sammiti keçiriləcək.“Yay Davosu” adlandırılan sammitdə 90-dan çox ölkədən 2000-ə yaxın nümayəndə, o cümlədən hökumət rəsmiləri, regional təşkilatların və iri şirkətlərin rəhbərləri, vətəndaş cəmiyyətinin təmsilçiləri iştirak edəcəklər. Sammitdə innovasiya, elm və texnologiyanın inkişafının iqtisadi proseslərə təsiri məsələləri müzakirə olunacaq.Qeyd edək ki, “Yay Davosu” 2007-ci ildən bəri təşkil edilir.xeber100.com

Avropa İttifaqının sammiti işə başlayıb

Təhlükəsizlik və müdafiə, miqrasiya böhranı, Brexit Avropa İttifaqının (Aİ) iyunun 22-23-də Brüsseldə keçiriləcək növbəti sammitinin başlıca mövzularıdır. Aİ liderləri ilk növbədə Avropanın sığınacaq vermək sistemində islahatlar prosesinə başlamaq və birgə müdafiə fondunun yaradılması barədə razılığa gəlmək niyyətindədirlər. Şimali Avropa qaz kəmərinin gücünün iki dəfə artırılması layihəsi daha bir müzakirə mövzusu ola bilər.Avropa Komissiyasının nümayəndəsi sammitin gündəliyi barədə jurnalistlərə məlumat verərək bildirib ki, məhz təhlükəsizlik və müdafiə sahəsini son dərəcə əhəmiyyətli sayır. Brüsselin fikrincə, mövcud xarici və daxili təhlükələr fonunda avropalılar sadəlövhlükdən əl çəkməli və elə düşünməməlidirlər ki, hər kəs öz təhlükəsizliyini təkbaşına təmin edə bilər. Avropa Komissiyasının yüksək vəzifəli məmuru deyib: “Biz həm müdafiə sahəsində, həm də daxili təhlükəsizliyin səviyyəsinin artırılması ilə bağlı məsələlərdə səylərimizi lap çox artırmalıyıq”.xeber100.com

Belçikada qatarların hərəkəti müvəqqəti dayandırılıb

Belçika polisi Brüsselin mərkəzi dəmir yol vağzalında özünü partlatmaq istəyən kamikadzeni zərərsizləşdirib.RİA Novosti agentliyi xəbər verir ki, hazırda vağzalda vəziyyət nəzarət altındadır. Hadisə ilə əlaqədar qatarların hərəkəti müvəqqəti dayandırılıb.Öldürülən şəxsin üzərində partladıcı kəmər olub. Hadisə yerinə çoxlu sayda polis və hərbçi cəlb edilib. Əraziyə giriş-çıxış məhdudlaşdırılıb.Polis vəziyyətin nəzarət alında olduğunu bildirib.xeber100.com

Britaniya Xarici İşlər Nazirliyinin açıqlamasında…

Britaniya Xarici İşlər Nazirliyindən verilən açıqlamaya əsasən, ölkənin Avropa İttifaqından (Aİ) çıxmaq üzrə dövlət katibi David Davis “Brexit” danışıqlarına başlamaq üçün Brüsselə səfər edib.Bildirilib ki, artıq Aİ ilə yeni və xüsusi münasibətlər qurmağa başlamaq lazımdır. Aİ ilə Britaniya arasında ortaq dəyərlər və maraqlar mövcuddur. Bizi birləşdirən amillər daha çoxdur. Qarşıda “Brexit” üçün bizi çətin danışıqların gözləməsinə baxmayaraq, hər iki tərəfin ortaq dəyərlərimiz və vətəndaşlarımızın rifahı naminə ən uyğun razılaşmalar əldə edəcəyinə əminik. Bunları nəzərə alaraq, danışıqlarımıza pozitiv və konstruktiv başlamağa üstünlük veririk.xeber100.com

Fransa Daxili İşlər Nazirliyinin məlumatı

Fransada keçirilən son parlament seçkilərində qadınların sayı rekord həddə - 223-ə çatıb. İndiyədək Fransada qanunverici orqana seçilən qadınların sayı 155-dən çox olmayıb.Yeni formalaşacaq parlamentdə qadın deputatların 47 faizi “İrəli, Respublika” hərəkatını, 46 faizi Demokratik Hərəkat partiyasını, 38 faizi Sosialistləri, 25 faizi Milli Cəbhəni, 23 faizi Respublikaçıları, 20 faizi Kommunistləri, 17 faizi Müstəqillər və Demokratlar Birliyini təmsil edəcək.Fransa Daxili İşlər Nazirliyinin iyunun 19-da yaydığı məlumata əsasən, “İrəli, Respublika” hərəkatı 42,82, Respublikaçılar 22,33, Milli Cəbhə 8,95, Demokratik Hərəkat 6,11, Sosialistlər 5,62, “Fəth edilməyən Fransa” 4,70 faiz, Müstəqillər və Demokratlar Birliyi 3,09, sağçı partiyalar 1,72, solçu partiyalar 1,41, Kommunist partiyası 1,24 faiz, Regionçular partiyası 0,78, radikal sollar 0,37, Ekolojistlər 0,11, radikal sağçılar 0,11, digər kiçik partiyalar isə 0,53 faiz səs toplayıb.xeber100.com

RİA Novosti agentliyinin məlumatına görə…

Almaniya polisi Ştutqart şəhər aeroportunda Bolqarıstan marşrutu üzrə uçan təyyarədə terror aktı hazırlamaqda şübhəli bilinən iki nəfəri saxlayıb.RİA Novosti agentliyi bildirir ki, bu barədə “Stuttgarter Zeitung” nəşri məlumat yayıb.Bildirilir ki, saxlanılanların həqiqətən terror aktı törətmək və ya zarafat etmək niyyətində olduqları hələlik məlum deyil. Şübhəlilərin yaşı və milli mənsubiyyətləri barədə də heç bir məlumat verilmir.xeber100.com

ABŞ Dövlət Departamenti dövlət çevrilişi haqqında sənəd yayıb

ABŞ Dövlət Departamenti 1953-cü ildə İranda baş vermiş dövlət çevrilişi haqqında sənəd yayıb.İran mətbuatının məlumatına görə, bu sənəd baş vermiş çevrilişin arxasında ABŞ-ın dayandığını göstərir. Sənədə görə, həmin dövrdə İranın Baş naziri Məhəmməd Mosəddeqi devirib yerinə “sözəbaxan” birini gətirmişdilər. Çevrilişə səbəb isə ondan ibarət idi ki, M.Mosəddeq İranın neft sənayesini milliləşdirmək istəyirdi.M.Mosəddeq Beynəlxalq Haaqa Məhkəməsinə müraciət edərək Qərb şirkətləri ilə imzalanmış neft müqavilələrinin ləğv edilməsi haqqında iddia qaldırmışdı. Beynəlxalq məhkəmə İranın haqlı olduğunu bildirmiş və Baş nazirin iddiasını təmin etmişdi. Məhz bundan sonra ABŞ İranda dövlət çevrilişi hazırlayıb həyata keçirmişdi.xeber100.com