Ağ evin məlumatına əsasən…

Mayın 16-da ABŞ Prezidenti Donald Tramp Vaşinqtonda Türkiyənin lideri Rəcəb Tayyib Ərdoğanı qəbul edəcək. Bu barədə Ağ evin mətbuat katibi Şon Spayser məlumat verib.Anadolu informasiya agentliyi xəbər verir ki, Spayserin sözlərinə görə, liderlər görüş zamanı qarşılıqlı əlaqələrin daha da gücləndirilməsi, həmçinin terrorun bütün növlərinə qarşı mübarizədə əməkdaşlığın inkişafı yollarını müzakirə edəcəklər.Xatırladaq ki, Rəcəb Tayyib Ərdoğan aprelin 20-də jurnalistlərə verdiyi müsahibədə Çinə səfərinin ardından ABŞ-a gedərək mayın 16-17-də Trampla görüşəcəyini demişdi.xeber100.com

Avqust mavzoleyinin bərpası 10 milyon avroya başa gələcək

İtaliyanın paytaxtı Roma şəhərinin ən önəmli abidələrindən sayılan Avqust mavzoleyinin bərpası 10 milyon avroya başa gələcək. Abidə əsrlər boyu bombardmanlar, müxtəlif tikinti layihələri ilə öz görkəmini itirib, 1960-cı illərdə yararsız vəziyyətə düşüb. Layihəyə sərf olunacaq 10 milyon avronun 6 milyonunu İtaliyanın nüfuzlu mobil telefon rabitəsi şirkətlərindən olan “TİM” üzərinə götürüb, vəsaitin qalan hissəsi isə Mədəniyyət və Turizm Nazirliyi tərəfindən maliyyələşdiriləcək.xeber100.com

“JR Higashi Nihon” şirkətinin qərarına əsasən…

Tokionun paytaxt vağzalında gələn ay müsəlmanların ibadəti üçün xüsusi otaq açılacaq.2016-cı ildə Yaponiyanı ziyarət edənlər arasında İslam dininə sitayiş edən turistlərin 30 faiz təşkil etdiyini nəzərə alan “JR Higashi Nihon” şirkəti bu barədə qərar qəbul edib. Şirkət rəhbərliyi həmin regiondan olan turistlərin sayının gələcəkdə artacağını düşünür. Tokio vağzalında həmin otağın iyunun 5-dən açılacağı gözlənilir.Belə otaqlar Yaponiya paytaxtının Haneda və Narita beynəlxalq aeroportlarında artıq fəaliyyət göstərir. “JR Nishi Nihon” dəmiryolu şirkəti də Osaka vağzalı yaxınlığındakı binada müsəlmanların ibadəti üçün xüsusi otaqlar ayırıb.xeber100.com

RİA Novosti agentliyinin məlumatına əsasən…

Bazar ertəsi günü Parisin şərqində keçirilən etiraz aksiyasının iştirakçılarına qarşı polis gözyaşardıcı qaz və rezin güllə işlədib.RİA Novosti agentliyi xəbər verir ki, seçkilərin nəticələrinə qarşı yönəlmiş etiraz aksiyası Respublika Meydanında başlayıb. Hazırda nümayişçilər Bomarşe Bulvarınadək gedib çatıblar. Polis onların yolu üstündə mühafizə dəstəsi qoyub.Polis “Sputnik France”ın müxbirini müdafiə kaskasını çıxarıb və hadisələrdən canlı yayım apardığı telefonunu əlindən almağa çalışıb. Tədbirdə digər jurnalistlər də hüquq-mühafizə orqanlarının əməkdaşları tərəfindən hücumlara məruz qalıblar.Parisdə prezident seçkilərinin ilkin nəticələrinin elan olunmasından sonra nümayişlər başlanıb. “Frans Press” agentliyinin hüquq-mühafizə orqanlarına istinadla yaydığı məlumata görə, 140 nəfər saxlanılıb, 9 nəfər həbs edilib.Xatırladaq ki, bazar günü Fransada prezident seçkilərinin ikinci turu keçirilib. Son məlumata görə, “İrəli” hərəkatının lideri Emmanuel Makron seçicilərin 66,1 faizinin səsini qazanaraq ölkənin yeni prezidenti seçilib.xeber100.com

Fransa Daxili İşlər Nazirliyinin məlumatına görə…

Emmanuel Makron gələn bazar günü, mayın 14-də Fransa prezidenti kimi and içəcək. Bu barədə ölkənin hazırkı Prezidenti Fransua Olland bildirib.BBC.com saytı xəbər verir ki, müvafiq bəyanat Avropada II Dünya müharibəsinin başa çatmasının 72-ci ildönümü münasibətilə Parisdə keçirilən tədbirdə səsləndirilib.Xatırladaq ki, Fransa Daxili İşlər Nazirliyinin prezident seçkilərinin mayın 7-də keçirilmiş ikinci turunun nəticələrinə dair yaydığı son məlumata görə, “İrəli” hərəkatının lideri Emmanuel Makron seçicilərin 66,1 faizinin səsini qazanaraq Beşinci respublikanın yeni prezidenti seçilib. Onun rəqibi “Milli cəbhə” partiyasının namizədi Marin Le Pen isə 33,9 faiz səs toplayıb.Bununla yanaşı, ölkənin Daxili İşlər Nazirliyi boş və etibarsız bülletenlərin sayının rekord saya çatdığını qeyd edib. Həmçinin heç bir namizədə səs verməyən fransızların sayı da çox olub – 25,38 faiz.xeber100.com

Qələbənin 72-ci ildönümü münasibətilə hərbi parad keçirilib

Moskvadakı Qızıl Meydanda 1941-1945-ci illər Böyük Vətən müharibəsində Qələbənin 72-ci ildönümü münasibətilə hərbi parad keçirilib. Rusiyanın müdafiə naziri Sergey Şoyqunun qəbul etdiyi hərbi paradda 10 mindən çox insan iştirak edib, 114 hərbi texnika, o cümlədən “T-34-85”, “Armata”, “T-72B3” tankları, “Tiqr-M”, “Tayfun-K” və “Tayfun-M” zirehli avtomobilləri, “Buk-M2” və “Top-M2Y” raket kompleksləri və s. nümayiş etdirilib.Rusiya Prezidenti Vladimir Putin paradda çıxış edərək bildirib ki, Qələbə milyonlarla insanın canı bahasına əldə edilib. Bu dəhşətli faciənin qarşısını aparıcı dövlətlərin irqi üstünlük kimi cinayətkar ideologiyası, birlik nümayiş etdirə bilməməsi üzündən almaq mümkün olmadı. Böyük Qələbə müxtəlif millətlərin və peşə sahiblərinin, marşalların və əsgərlərin sayəsində qazanıldı. V.Putin vurğulayıb ki, müasir dövrdə terrorizm, ekstremizm və neonasizm ilə səmərəli mübarizə aparmaq üçün qüvvələri birləşdirmək lazımdır və Rusiya bu sahədə əməkdaşlığa həmişə hazırdır.xeber100.com

Koreyanın Milli Seçki Komissiyasının məlumatı

Koreya Respublikasında növbədənkənar prezident seçkiləri başa çatıb. Koreyanın Milli Seçki Komissiyasının məlumatına əsasən, 13964 seçki məntəqəsində baş tutmuş səsvermə prosesində ümumi seçicilərin (42,48 milyon nəfər) 77,2 faizi səsvermədə iştirak edib. Seçicilərin 26,06 faizi mayın 4-5-də ilkin səsvermə günlərində səslərini veriblər.Qeyd edək ki, 13 namizədin mübarizə apardığı növbədənkənar prezident seçkisi sabiq prezidenti Pak Kın Hey impiçment yolu ilə hakimiyyətdən uzaqlaşdırılmasından sonra keçirilir. Koreya mətbuatı yazır ki, əvvəlki prezident seçkilərindən fərqli olaraq, bu dəfə qalibin rəsmən elan olunmasının ertəsi günü yeni seçilmiş dövlət başçısının andiçmə mərasimi keçiriləcək.xeber100.com

Koreyada növbədənkənar prezident seçkiləri keçiriləcək

Koreya Respublikasında keçiriləcək növbədənkənar prezident seçkilərinin başlamasına bir sutkadan da az qalır. Artıq mayın 9-da ölkə vətəndaşları növbəti beş ildə ölkəyə kimin rəhbərlik edəcəyinə qərar verməlidir.TASS informasiya agentliyi xəbər verir ki, Koreya Respublikasının ali dövlət postu uğrunda 13 namizəd mübarizə aparır. Son ictimai rəy sorğularının nəticələri demokratık “Taburo” partiyasını təmsil edən Mun Çje İnin seçkiqabağı yarışın əsas favoriti olduğunu göstərir.“Realmeter” agentliyinin mayın 3-də dərc olunan məlumatına əsasən, seçicilərin 42,4 faizi Mun Çje İnə səs verməyə hazırdır. Onun yaxın rəqiblərinin hər biri - mərkəzçi “Xalq Partiyası”nın nümayəndəsi An Çxol Su və mühafizəkar “Azadlıq Partiyası”nın namizədi Xon Çjun Pxö respondentlərin yalnız 18,6 faizinin dəstəyinə malikdirlər.An Çxol Su əvvəlki populyarlığını itirdiyi halda (onun reytinqi ən yaxşı halda Mun Çje İndən cəmi 3 faiz geri qalıb), Xon Çjun Pxö, əksinə, əhali arasında dəstəyini 8,4 faiz artırmağa nail olub.Xatırladaq ki, Cənubi Koreyada növbədənkənar prezident seçkiləri korrupsiya qalmaqalında şübhəli bilinən sabiq prezident Pak Kın Xenin impiçmenti və vəzifəsindən kənarlaşdırılması ilə bağlıdır.Mayın 9-na təyin olunmuş növbədənkənar prezident seçkiləri Koreya yarımadasında KXDR-ABŞ qarşıdurması səbəbindən yaranan gərgin vəziyyət fonunda keçirilir. Mun Çje İn Şimali Koreya ilə münasibətlərin normallaşması tərəfdarı kimi tanınsa da, vəziyyətin müharibə həddinə çatması onun bu sahədə fəaliyyətini çətinləşdirir.xeber100.com  

“Gazprom” şirkətinin məlumatına əsasən…

Rusiya təbii qazının Türkiyə və Avropaya nəqlini nəzərdə tutan “Türk axını” qaz boru kəmərinin (Turkish Stream) tikintisinə başlanılıb.Azərtac xəbər verir ki, bu barədə Rusiyanın “Gazprom” şirkəti məlumat yayıb. Bildirilir ki, hazırda boru kəmərinin Qara dənizdən keçəcək hissəsinin inşası həyata keçirilir. İşlər “Türk axını”nın dəniz hissəsində iki boru kəmərinin tikintisini həyata keçirən İsveçrənin “Allseas” şirkətinə məxsus "Audacia" adlı gəmi ilə aparılır. Dənizin daha dərin hissəsində boru kəmərinin tikintisi isə "Pioneering Spirit" adlı gəmi vasitəsilə həyata keçiriləcək.“Türk axını” layihəsi Qara dəniz üzərindən Türkiyənin Avropa hissəsinədək və daha sonra Yunanıstan sərhədinədək qaz boru kəmərinin tikintisini nəzərdə tutur. Kəmərin dəniz hissəsinin uzunluğu 910 kilometrə yaxın, quru hissəsi isə Türkiyə ərazisi üzrə 180 kilometrdir. Boru kəmərinin birinci xətti türk bazarı, ikincisi Cənubi və Cənub-Şərqi Avropa ölkələri üçün nəzərdə tutulur. Hər bir xəttin illik ötürücülük gücü 15,75 milyard kubmetrdir. Layihənin ümumi dəyəri 11,4 milyard avro həcmində qiymətləndirilir.xeber100.com

Fransada keçirilən seçkilərdə Emmanuel Makron qələbə qazanıb

Mərkəzçi “İrəli” hərəkatının liderinin minlərlə tərəfdarı öz namizədlərinin qələbəsini qeyd etmək üçün Parisdəki Luvr piramidasının yaxınlığında toplanıb. Fransa paytaxtı demək olar ki, yekdilliklə üstünlüyü Emmanuel Makrona verib: o, burada seçicilərin 90 faizinin səsini qazanıb.TASS informasiya agentliyi xəbər verir ki, sabiq iqtisadiyyat naziri və investisiya bankiri Emmanuel Makron mayın 7-də Fransada keçirilən seçkilərdə inamlı qələbə qazanıb. Daxili İşlər Nazirliyinin yekun məlumatına əsasən, onu 20 milyon 753 min fransalı – seçicilərin 66,1 faizi dəstəkləyib.Emmanuel Makronun rəqibi “Milli cəbhə” partiyasının namizədi Marin Le Pen 10 milyon 643 seçici (33,9 faiz) səsini toplamağa müvəffəq olub. Ona verilən səslər Makronla müqayisədə iki dəfə az olsa da, “Milli cəbhə” partiyası üçün rekord göstəricidir.Beləliklə, 39 yaşlı Emmanuel Makron ölkə tarixində ən gənc prezident olub. 1977-ci ildə həkim ailəsində anadan olan Makron əvvəldən seçkilərin nominal favoriti sayılırdı.O, siyasətdə demək olar, yeni fiqurdur. 2004-2008-ci illərdə İqtisadiyyat Nazirliyində müfəttiş vəzifəsində çalışan Makron, eyni zamanda, “Rothschild & Cie Banque” bankında investisiya bankiri işləyib. Siyasi arenaya təxminən beş il əvvəl, 2012-ci ildə Fransua Olland tərəfindən Yelisey sarayının baş katibinin köməkçisi vəzifəsinə təyin olunduqdan sonra çıxıb. İki ildən sonra hakim Sosialist Partiyasının daxilində növbəti böhran zamanı iqtisadiyyat nazirliyinə başçılıq edib. Onun hökumətdə əsas nailiyyəti 2015-ci il avqustun 6-da “Makron qanunu” adlandırılan “iqtisadi artım, aktivlik və şansların bərabərliyi üçün qanunun” qəbul edilməsi olub.2016-cı ildə proqressiv “İrəli” siyasi hərəkatını yaradıb. Özünü müstəqil siyasətçi adlandırmasına baxmayaraq, Yelisey sarayının dəstəyindən də imtina etmir. Makronun rəqibləri onu Ollandın “siyasi reinkarnasiyası” adlandırırlar.Emmanuel Makron Fransa siyasətinə yeni nəfəs gətirəcəyini vəd edir. Onun strategiyası fransız cəmiyyətindəki antaqonizmlərin inkarı üzərində qurulub. Şərhçilərdən biri Makronun proqramını belə ümumiləşdirir: “Nə sol, nə də sağ – hər ikisi eyni zamanda”.Seçkilərdə qələbəsindən sonra Makron bəyan edib ki, onun Fransa prezidenti seçilməsi ilə tarixdə yeni səhifə açılır. “Mən bütün Fransanın maraqlarını müdafiə edəcəyəm”, - deyə Makron vurğulayıb. O, həmçinin Avropa İttifaqını möhkəmləndirəcəyini və Fransanın Aİ ilə əlaqələrini gücləndirəcəyini vəd edib.xeber100.com