Kyodo agentliyinin məlumatına əsasən…

Kyodo agentliyinin yaydığı məlumata görə, ABŞ Okinava adasındakı Kadena aviabazasında Şimali Koreya tərəfindən hücuma qarşı təlimlər keçirib.Təlimlər aprelin 12-dən 14-dək təşkil edilsə də, bu barədə məlumat yalnız aprelin 15-də açıqlanıb. Təlimlər Koreya yarımadasında vəziyyətin gərginləşməsi fonunda Şimali Koreyanın hücumunun qarşısının alınması məqsədilə keçirilib. Aprelin 4-də Şimali Koreyanın növbəti raket sınağından sonra ABŞ-ın Şimali Koreyaya hücumu mövzusu Yaponiyada ən aktual məsələyə çevrilib.Suriyaya baş tutan raket zərbələrindən sonra ABŞ Prezidenti Donald Trampın Şimali Koreyaya qarşı bütün variantların baxıldığı barədə bəyanatı, eyni zamanda, bu ölkəyə məxsus dəniz zərbə qrupunun Koreya yarımadasına göndərilməsi Yaponiya və Cənubi Koreyada ciddi narahatlıq doğurub.ABŞ-ın müttəfiqi olan hər iki ölkə Vaşinqtonun Şimali Koreyaya qarşı istənilən addımını dəstəkləmək məcburiyyətindədir. Bununla yanaşı, bu ölkələrdə yaxşı başa düşürlər ki, Şimali Koreyanın cavab atəşlərinin hədəfi məhz həmin ərazilərdəki ABŞ bazaları olacaq. Bunu nəzərə alan Yaponiya artıq ABŞ-dan hücum olacağı təqdirdə mütləq əvvəlcədən xəbərdarlıq olunmasını tələb edib.xeber100.com

Ali Seçki Komissiyasının məlumatına görə…

Türkiyənin hakim Ədalət və İnkişaf Partiyasının (AKP) təklifi ilə aprelin 16-da ölkə Konstitusiyasına dəyişikliyi nəzərdə tutan ümumxalq səsverməsi keçiriləcək.Ali Seçki Komissiyasının məlumatına görə, referendumla bağlı ölkədə bütün hazırlıq işləri başa çatıb.Bu səsvermədə 55 milyon 319 min 222 nəfər vətəndaş iştirak edəcək. Onlar 167 min 140 qutuda səs verəcəklər.Ölkənin şərq bölgələrində yerləşən 32 vilayətində səsvermə yerli vaxtla saat 7.00-dan 16.00-dək, digər ərazilərdə isə saat 8.00-dan 17.00-dək keçiriləcək. Aprelin 15-də saat 18.00-da təbliğat kampaniyası rəsmi şəkildə başa çatır.Ölkədə asayişin qorunması üçün ciddi tədbirlər görülür. Bu məqsədlə aprelin 16-da saat 6.00-dan 24-00-dək ölkənin bütün ərazilərində spirtli içki satılması qadağan olunub.Qeyd edək ki, bu səsvermə Türkiyənin tarixində Konstitusiyasına dəyişikliyi ilə bağlı 7-ci referendumdur.xeber100.com

Prezidentliyə namizədlərin rəsmi qeydiyyatı başlayıb

Cənubi Koreyanın Mərkəzi Seçki Komissiyası aprelin 15-də ölkə prezidentliyinə namizədlərin rəsmi qeydiyyatına başlayıb.Azərtac Cənubi Koreya KİV-lərinə istinadla xəbər verir ki, seçkiqabağı kampaniyaya iki gündən sonra start veriləcək. Ölkədə keçirilən növbədənkənar prezident seçkiləri martın 10-da korrupsiya qalmaqalında şübhəli bilinən sabiq prezident Pak Kın Xenin impiçmenti və vəzifəsindən kənarlaşdırılması ilə bağlıdır.MSK artıq prezidentliyə iki əsas namizədi - Demokratik Partiyanın namizədi Mun Çje İni və mərkəzçi Xalq Partiyasının namizədi An Çxol Sunu, həmçinin daha 10 nəfəri qeydiyyatdan keçirib.İctimai rəy sorğuların nəticəsinə əsasən, Mun Çje İn prezident postuna iddialı namizədlərin arasında lider mövqedə qərarlaşıb.Mayın 9-na təyin olunmuş növbədənkənar prezident seçkiləri Koreya yarımadasında KXDR-ABŞ qarşıdurması səbəbindən yaranan gərgin vəziyyət fonunda keçiriləcək. Mun Çje İn Şimali Koreya ilə münasibətlərin normallaşması tərəfdarı kimi tanınsa da, vəziyyətin müharibə həddinə çatması onun bu sahədə fəaliyyətini çətinləşdirir.Xatırladaq ki, 2012-ci il seçkilərində Mun Çje İn rəqibi Pak Kın Xeyə uduzmuşdu.xeber100.com

“Boeing” kompaniyası yeni təyyarəsini sınaqdan keçirib

Amerikanın “Boeing” kompaniyası yeni “737 MAX 9” təyyarəsini uğurla sınaqdan keçirib. Bu barədə məlumat korporasiyanın saytında yerləşdirilib.Interfax informasiya agentliyi xəbər verir ki, yeni laynerdə əvvəlki “MAX 8 “modelinə nisbətən 16 sərnişin yeri artıqdır. Bununla yanaşı, onun daha qənaətcil olduğu bildirilir. Uçuş məsafəsi 6,5 min kilometr təşkil edən və sürəti saatda 842 kilometrə çatan təyyarə ümumilikdə 178 sərnişin daşıya biləcək.Yeni təyyarənin 2018-ci ildə istifadəyə veriləcəyi gözlənilir. Buna baxmayaraq, indiyədək bütün dünya üzrə 90-a yaxın kompaniya ümumilikdə 3,7 min təyyarə üçün ilkin sifarişlər verib.xeber100.com

Xarici işlər nazirlərinin görüşü keçirilib

Moskvada Rusiya, Suriya və İran xarici işlər nazirlərinin görüşü keçirilib.Görüşün yekunlarına dair keçirilmiş mətbuat konfransında Rusiyanın xarici işlər naziri Sergey Lavrov bildirib ki, Rusiya Suriyada BMT Təhlükəsizlik Şurasının 2254 saylı qətnaməsinin tələblərinin yerinə yetirilməsində israrlıdır. Rusiya Suriya hökumətinə sülhün, iqtisadiyyatın, mülki infrastrukturun bərpa edilməsində, humanitar problemlərin həll olunmasında hərtərəfli yardımı davam etdirəcək.Rusiyalı nazir əlavə edib ki, üçtərəfli görüşdə Suriya ərazisindəki terrorçu qruplaşmaların məhv edilməsi məsələsinə xüsusi diqqət ayrılıb. S.Lavrovun sözlərinə görə, Rusiya və ABŞ Suriyada kimyəvi tərkisilahın təminatçılarıdır. O xatırladıb ki, Suriyanın kimyəvi silahların qadağan edilməsinə dair Konvensiyaya qoşulması təşəbbüsünü məhz ABŞ və Rusiya dəstəkləyib.Suriyanın xarici işlər naziri Valid Müəllem qeyd edib ki, Moskva, Tehran və Dəməşq Suriyada terrorizmlə mübarizəni davam etdirəcək. O, İran xarici işlər naziri ilə də bu məsələləri müzakirə etdiyini bildirib.xeber100.com

Vergi qanunvericiliyində dəyişikliklər olacaq

Avstraliya parlamentində kiçik və orta biznes üçün vergi yükünün azaldılması üzrə müvafiq müddəalar müzakirə edilib, müasir reallıqlar nəzərə alınmaqla vergi dərəcələrinin optimallaşdırılması barədə üçillik proqram qəbul olunub.Azərtac “vergiler.az” saytına istinadla bildirir ki, nəzərdə tutulan dəyişikliklərdən biri də hər hansı şirkətin kiçik biznesə aid edilməsi üçün onun illik maksimal dövriyyəsinin həddinin 2 milyon Avstraliya dollarından (1 AUD =1,29388 manat) 10 milyon dollara qaldırılmasıdır.Korporativ verginin dərəcəsi isə 28,5 faizdən 27,5 faizə endirilib. 2025-ci ilə qədər isə bu dərəcənin 25 faizədək aşağı salınacağı planlaşdırılır.xeber100.com

“Yomiuri” qəzetinin məlumatına görə…

Yaponiyanın Baş naziri Şinzo Abe aprelin sonlarında Rusiyaya səfərdən sonra Avropanın beş ölkəsini ziyarət edəcək. Bu barədə aprelin 13-də “Yomiuri” qəzeti məlumat yayıb.Qəzetin verdiyi məlumata görə, Baş nazirin aprelin sonu mayın əvvəlinə planları Yaponiyada gələn ayın əvvəllərində qeyd edilən və bir neçə dövlət bayramını özündə birləşdirən “Qızıl həftə”yə uyğun olaraq tərtib olunub.Şinzo Abenin Rusiyaya səfəri aprelin 27-28-nə planlaşdırılır. Səfər zamanı onun Rusiya Prezidenti Vladimir Putinlə görüşəcəyi və Kuril adalarında birgə iqtisadi fəaliyyət, həmçinin həmin adaların 1945-ci ilin avqustunadək burada yaşamış yaponlar tərəfindən ziyarətinin sadələşdirilməsi məsələlərini müzakirə edəcəyi gözlənilir.xeber100.com

Şimali Koreyanın nüvə proqramına qarşı çoxmərhələli strategiya hazırlanıb

ABŞ hakimiyyəti Şimali Koreyanın nüvə proqramına qarşı çoxmərhələli strategiya hazırlayıb.Azərtac xəbər verir ki, Reuters agentliyinin məlumatına əsasən, tədbirlərin siyahısı xeyli genişdir və həm güc, həm də diplomatik metodları nəzərdə tutur. Bununla belə, ABŞ Prezidenti Donald Tramp ilk növbədə diplomatik və iqtisadi təsir tədbirlərini nəzərdən keçirir. Sanksiyalar qismən Vaşinqton, qismən isə BMT vasitəsilə tətbiq oluna bilər. Məhdudlaşdırıcı tədbirlər birbaşa Pxenyanın fəaliyyətinə mütənasib olaraq “sürüşkən şkala” üzrə həyata keçiriləcək.Sanksiyalara KXDR-ə neft ixracına embarqo, həmçinin bu ölkədən dəniz məhsulları və kömür alınmasına qadağanın daxil edilməsi mümkündür. Habelə Şimali Koreya təyyarələrinin digər dövlətlərin hava sərhədlərini keçməsinə, gəmilərinin isə xarici limanlara girməsinə icazə verilməyə bilər. KXDR kompaniyaları ilə əməkdaşlıq edəcək Çin banklarına da cəza nəzərdə tutulur.Bir qədər əvvəl “The New York Times” qəzeti aprelin 15-də - ölkənin ilk lideri Kim İr Senin anadan olmasının ildönümündə Pxenyanın yeni nüvə sınağı keçirə biləcəyi barədə məlumat yayıb.xeber100.com

“TESCO” firması maliyyə hesabatları ilə əlaqədar olaraq cərimələnib

Britaniyanın ən böyük supermarket şəbəkələrindən sayılan “TESCO” firması maliyyə hesabatları ilə əlaqədar olaraq cərimələnib. Cərimədən sonra firmanın illik gəliri aşağı enib.Firma maliyyə hesabatlarında verilən nöqsanları qəbul etdikdən sonra 235 milyon funt sterlinq cərimə ödəməli olacaq.“TESCO”dan verilən açıqlamada illik gəlir hədəflərini daha da artırdıqları bildirilib. Gələcəkdə bu cür nöqsanlara yol verilməməsi üçün daha ciddi tədbirlərin görüləcəyi diqqətə çatdırılıb.xeber100.com

5,8 bal gücündə zəlzələ olub

Aprelin 12-də Filippinin Mindanao adasında 5,8 bal gücündə zəlzələ olub. Bu barədə ABŞ Geoloji Xidməti məlumat yayıb.Yeraltı təkanların episentri Osias yaşayış məntəqəsindən 7,9 kilometr şimalda, ocağı isə 8,3 kilometr dərinlikdə yerləşib.Dağıntılar və zərərçəkənlər barədə hələlik məlumat verilməyib.xeber100.com