Avstriyanın Federal Daxili İşlər Nazirliyinin məlumatı

Avstriyada sağçı ekstremist və rasist fəaliyyətlərlə əlaqədar cinayət hallarının sayı artıb. Avstriyanın Federal Daxili İşlər Nazirliyinin verdiyi məlumata əsasən, ötən il ölkədə 1313 hal üzrə sağçı ekstremizm və rasizmə görə cinayət işi açılıb. Bu, 2015-ci illə müqayisədə 13,5 faiz artım deməkdir.Avstriyanın Yaşıllar Partiyasının sorğusu əsasında verilən açıqlamada cinayət hallarının əsasən Vyana, yuxarı Avstriya və aşağı Avstriya federal əyalətlərində baş verdiyi göstərilib. Yaşıllar Partiyasının ədliyyə üzrə nümayəndəsi Albert Ştaynhauzer artan tendensiyanı şərh edərək bildirib ki, radikallaşmada əsasən iki istiqamət özünü göstərir. Birincisi nasional-sosializm, faşizm və digər zərərli ideologiyaları hələ də tərənnüm edən radikal qruplaşmalardan ibarətdirsə, ikinci qrup son dövrlərdə daha çox sosial media vasitəsilə miqrant, qaçqın və ümumiyyətlə əcnəbilərə qarşı radikal çağırışlar edən, qaçqın böhranından öz siyasi məqsədləri üçün sui-istifadə edən sağçı ekstremistlərdir.Avstriyanın Federal Daxili İşlər Nazirlinin müavini, ictimai asayiş üzrə baş direktor Konrad Koqler “Ö1” radiosuna verdiyi müsahibədə qeyd edib ki, daxili işlər orqanları sağçı eksremizm, dini ekstremizm, eləcə də sağçı və solçu radikal qruplara qarşı həssaslığını artırıb, eyni zamanda, Federal Ədliyyə Nazirliyində prokurorluq orqanlarına bu sahə üzrə xüsusi səlahiyyət də verilib.xeber100.com

İspaniya Milli Statistika idarəsinin açıqlamasına görə…

İspaniya Milli Statistika idarəsinin açıqlamasına görə, hazırda ölkədə 15413 nəfərin yaşı yüzü keçib. 20 il əvvəl isə yaşı 100-ü keçmiş ispanların sayı 3 min nəfərdən bir az artıq idi.Proqnozlara görə növbəti onilliyin sonuna doğru İspaniyada yaşı yüzdən artıq olan 100 min insan yaşayacaq. Hazırda İspaniya əhalisinin 23 faizini yaşı 65-dən çox olan pensiyaçılar təşkil edir. İspaniya hökumətinin pensiya xərcləri hər il artmaqdadır.xeber100.com

Kabar informasiya agentliyinin məlumatı

Aprelin 29-da yerli vaxtla saat 6:40-da Qırğızıstanın Oş əyalətinin Uzgen rayonunun Ayuu kəndində 7 ev torpaq altında qalıb.Kabar informasiya agentliyi xəbər verir ki, torpaq sürüşməsi nəticəsində azı 24 nəfər həlak olub. Təbii fəlakətin baş verdiyi ərazidə fövqəladə hallar naziri Kubatbek Boronovun başçılığı ilə operativ qərargah yaradılıb.Hazırda axtarış-xilasetmə əməliyyatlarına 182 xilasedici, 100 əsgər, Daxili İşlər Nazirliyinin 50 əməkdaşı və 15 tibb işçisi cəlb olunub. Həmçinin 40 ailənin potensial təhlükəli ərazilərdən təxliyə olunması üçün tədbirlər görülür. Qırğızıstan Prezidenti Almazbek Atambayevin fərmanı ilə aprelin 30-u ölkədə matəm günü elan edilib.xeber100.com

“World Press Photo” sərgisinin açılışı olub

Portuqaliyanın paytaxtı Lissabonda “World Press Photo” sərgisinin açılışı olub. Sərgidə 126 ölkədən olan fotoqrafın ümumilikdə beş min əsəri nümayiş etdirilir. Laureatlardan biri Aralıq dənizi sahillərindəki qaçqınları çəkən Daniel Etter olub.Əsas hədiyyəni isə “The Associated Press” agentliyinin fotoqrafı Burhan Özbilici alıb. O, Rusiyanın Türkiyədəki səfirinin öldürülmə anını əks etdirən fotosu ilə qalib olub.Fotomüsabiqə 1955-ci ildən keçirilir. Bu il 8 kateqoriya üzrə 45 fotoqraf mükafatlandırılıb.xeber100.com

“3D” printerə malik robot prototipi hazırlanıb

Massaçusets Texnologiya İnstitutunun mühəndisləri bina çap etməyə imkan verən daxili "3D" printerə malik robot prototipi hazırlayıblar."hitech.vesti.ru" saytı xəbər verir ki, gələcəkdə tamamilə avtonom işləyəcək robot Ay, Mars və ya Antarktikada bir neçə il ərzində binalar inşa edə biləcək.Sınaqlar çərçivəsində diametri 15 metr, hündürlüyü 3,65 metr olan günbəzin divarları "çap edilib". Sistem 14 saat ərzində bu işin öhdəsindən gəlib. Bundan sonra işçilər yalnız hazır formaya beton tökməlidirlər. Sistem, həmçinin konkret tikinti sahəsinin tələblərinə və sifarişçinin arzularına uyğunlaşdırıla bilər.xeber100.com

TASS informasiya agentliyinin məlumatına görə…

ABŞ-ın dəniz piyadalarının 30 nəfərlik ilk dəstəsi Əfqanıstanın cənubunda yerləşən Gilmənd əyalətinə gəlib.TASS informasiya agentliyi xəbər verir ki, AFR telekanalının məlumatına əsasən, ölkənin ən gərgin regionlarından olan Gilmənd əyalətinə ümumilikdə 300 dəniz piyadası göndəriləcək. Hərbçilərin əsas hədəfi aprelin 28-də ənənəvi “bahar hücumlarına” başlayan “Taliban” hərəkatı ilə mübarizə olacaq.Bölmənin göndərilməsi amerikalı hərbçilərin rotasiyası çərçivəsində həyata keçirilir. Hazırda Əfqanıstanda yerli təhlükəsizlik qüvvələrinə təlim keçən, hərbi müşavir funksiyasını yerinə yetirən, həmçinin yaraqlılarla mübarizədə güc strukturlarına yardım edən təxminən 8,4 min ABŞ hərbçisi yerləşir.2014-cü ildə Amerikanın hərbi kontingenti Əfqanıstanı tərk etdikdən sonra ölkənin cənub rayonlarının bir çoxu “Taliban” hərəkatının nəzarətinə keçib. Son zamanlar bəzi kənd rayonlarında üstünlüyə yiyələnən yaraqlılar böyük şəhərlər istiqamətində hücumlarını davam etdirir. Həmçinin regionda İŞİD qruplaşmasının da təsir dairəsi artmaqdadır.Gilmənd əyaləti Əfqanıstanın ən qaynar nöqtələrindən biridir. Son vaxtlar “Taliban” bu istiqamətdə 4 ABŞ hərbçisini öldürüb.xeber100.com

Birləşmiş Krallığın Aİ-nin tərkibindən çıxması məsələsi müzakirə edilib

Avropa İttifaqına üzv ölkələrin liderləri Brüsseldə keçirilən sammitdə Böyük Britaniya ilə onun Aİ-nin tərkibindən çıxması (“Brexit”) barədə danışıqlar üçün hazırlanan direktivləri yekdilliklə dəstəkləyib.AZƏRTAC Interfax informasiya agentliyinə istinadla xəbər verir ki, bu barədə məlumat Avropa Şurasının sədri Donald Tuskun “Twitter” səhifəsində yerləşdirilib.Xarici KİV-lər bu qərarın Londonla danışıqlar astanasında Avropa İttifaqının birliyini nümayiş etdirdiyini vurğulayır.Qeyd edək ki, Avropa İttifaqının 27 ölkəsinin (Böyük Britaniya istisna olmaqla) dövlət və hökumət başçıları Birləşmiş Krallığın Aİ-nin tərkibindən çıxması məsələsi üzrə gələcək danışıqların rəhbər prinsiplərini müzakirə və qəbul etmək üçün aprelin 29-da Brüsseldə toplanıb.xeber100.com

Türk axını” qaz boru kəmərinin tikintisinə bu ilin yayında başlanılacaq

Rusiya təbii qazının Türkiyə və Avropaya nəqlini nəzərdə tutan “Türk axını” qaz boru kəmərinin (Turkish Stream) tikintisinə bu ilin yayında başlanılacaq.Azərtac xəbər verir ki, bu barədə Rusiyanın enerji nəhəngi “Gazprom” şirkəti məlumat yayıb. Açıqlamada bildirilir ki, boru kəmərinin dəniz hissəsinin inşası yayda başlayacaq və ümumilikdə “Türk axını”nın tikintisinin 2019-cu ilin sonunda tamamlanması nəzərdə tutulur.“Gazprom” boru kəmərinin dəniz hissəsində inşa ediləcək iki boru kəmərinin tikintisi üzrə İsveçrənin “Allseas” şirkəti ilə müqavilə imzalayıb.Xatırladaq ki, “Türk axını” layihəsi Rusiya təbii qazının Türkiyəyə və bu ölkədən də Avropaya çatdırılmasını nəzərdə tutur. Kəmərlə nəql olunacaq 31,5 milyard kubmetr qazın Avropanın, qalan hissəsinin isə Türkiyənin daxili tələbatının ödənilməsi üçün istifadə edilməsi planlaşdırılır. Layihə üzrə iki boru kəməri tikiləcək.xeber100.com

“RİA Novosti”nin məlumatına görə…

Makedoniyada etirazçılar polis səddini yararaq parlament binasına daxil olublar.“RİA Novosti” xəbər verir ki, “Vahid Makedoniya uğrunda” hərəkatın üzvləri Makedoniya parlamentinə basqın edərək müxalifət lideri Zoran Zayevə və onun rəhbərlik etdiyi Sosial-Demokratik İttifaqını təmsil edən bir neçə deputata xəsarətlər yetiriblər.Etirazlar parlamentin spikeri vəzifəsinə alban Tələt Cəfərin spiker seçilməsindən sonra baş verib.Makedoniya Prezidenti George İvanov müraciətlə çıxış edərək, iri partiyaların liderlərini problemi dinc yolla müzakirə etməyə, siyasi böhrandan birgə çıxmağa çağırıb.Qeyd edək ki, “Vahid Makedoniya uğrunda” hərəkatla Sosial-Demokratik İttifaqından olan deputatlar arasında yaranan gərginlik səbəbindən parlamentin iclası təxirə salınmışdı. Buna rəğmən parlamentdə çoxluq təşkil edən Sosial-Demokratik İttifaqının rəhbərliyi ilə digər partiyalardan olan deputatlar Demokratik Birlik İttifaqından olan Tələt Cəfəri parlamentin sədri seçmişdi. Bundan sonra “Vahid Makedoniya uğrunda” hərəkat tərəfdarları parlamentə basqın edərək, jurnalistləri və deputatları əsir götrümüşdülər. Lakin polisin həyata keçirdiyi əməliyyat nəticəsində onlar xilas ediliblər. İlkin məlumatlara görə, qarşıdurmalarda 1-i ağır olmaqla, 9 nəfərin yaralandığı bildirilir.xeber100.com

“Uber Technologies Inc” uçan taksilər istifadəyə verməyə hazırlaşır

ABŞ-ın “Uber Technologies Inc” taksi sifarişi üzrə servis xidməti 2020-ci ilə qədər pilotlu uçan taksiləri istifadəyə verməyə hazırlaşır. Bunu kompaniyanın baş icraçı direktoru Ceff Holden bildirib.Azərtac xəbər verir ki, uçan taksi ilk vaxtlar Dallas rayonunda və Dubayın “Expo 2020” sərgisində sərnişinlərə xidmət göstərəcək. Gediş qiyməti “UberX” tarifinə uyğun – 1 mil məsafə üçün 1,32 dollar olacaq.Kompaniya artıq bir neçə aviasiya istehsalçısı, o cümlədən vertikal uçuş texnologiyası əsasında avtomobillər hazırlayan “Aurora Flight Services” və “Pipistrel Aircraft” şirkətləri ilə əməkdaşlıq edir. Bundan başqa, eniş meydançaları düzəltmək üçün hər iki şəhərdə mülk sahibləri ilə razılıq əldə olunub.“”Uber” yeni sistem barədə hələ keçən ilin oktyabrında məlumat vermişdi. Helikopter kimi vertikal şəkildə havaya qalxan və enən uçan avtomobillər elektrik mühərriki sayəsində minimal səslə hərəkət edəcək və atmosferə zərərli qazlar atmayacaq.xeber100.com