Namizədlərin final teledebatının mövzusu açıqlanıb

ABŞ prezidenti postuna namizədlər Donald Tramp və Hillari Klinton arasında keçiriləcək final teledebatının moderatoru “Fox News” telekanalının aparıcısı Kris Uolles toxunmağa hazırlaşdığı mövzuları elan edib. Xarici KİV-lər xəbər verir ki, telekanalın efirində yayımlanan informasiyaya əsasən, teledebatda hüquqi borc və normalar, miqrasiya, iqtisadiyyat, ali məhkəmə, xarici ölkələrdə qaynar nöqtələr, prezident olmağa layiqlik barədə mövzular müzakirə olunacaq. Teledebatlar oktyabrın 19-da axşam saatlarında Las-Veqas şəhərində keçiriləcək. Bir qədər əvvəl Amerika KİV-ləri əvvəlki debatlarda moderatorların Donald Trampın sözünü kəsməsini və hətta onunla mübahisəyə girməsini vurğulayıb. Trampın özü isə bu vəziyyəti bir nəfərin üç nəfərə qarşı mübarizəsi adlandırıb. ABŞ-da prezident seçkiləri noyabrın 8-də keçiriləcək. Teledebatlar seriyası tarazlığın namizədlərdən birinin xeyrinə dəyişməsi üçün əsas alət hesab edilir.xeber100.com

“Samsung Galaxy S8”in funksiyaları barədə məlumatlar yayılmağa başlayıb

“Samsung” şirkətinin qabaqcıl smartfonlarının təqdimatı ənənəvi olaraq ayların əvvəlində keçirilir, lakin artıq internetdə “Galaxy S8” qurğusunun hansı funksiyalarla təchiz ediləcəyi barədə məlumatlar yayılmağa başlayıb. “4PDA” resursu xəbər verir ki, bəzi məlumatlara görə, aparatda “Home” düyməsi ləğv ediləcək, barmaq izləri skaneri isə bilavasitə displeyə quraşdırılacaq. Bundan əlavə, ekran bütün üst qatı örtəcək və “Edge” istehsal xəttindən olan modellərdə olduğu kimi, təkcə yan tərəflərə deyil, həm də yuxarı və aşağıya əyiləcək. Həmçinin “Galaxy S8” Cənubi Koreya istehsalçısının ilk ikikameralı smartfonu olacaq. Hazırda isə yeni qurğunun təqdimatının nə vaxt baş tutacağı məlum olub. “Ricciolo” saytı “Twitter” səhifəsində fevralın 26-da Barselonada “MWC 2017” sərgisi çərçivəsində keçiriləcək “Samsung Galaxy Unpacked” tədbirinin elanını yerləşdirib. Elanda “8” rəqəminin yer aldığı açıq göz şəklini görmək mümkündür. Bu, yeni qabaqcıl qurğunun “Galaxy S8” adlandırılmasının, eləcə də “Galaxy Note 7” smartfonunda olduğu kimi, gözün qüzehli qişası skanerinin mövcudluğunun təsdiqi ola bilər. Həmçinin “Galaxy S8”də “Mali-G71” qrafik sürətləndirici ilə yeni “Exynos 8895” prosessorundan istifadə ediləcəyi barədə məlumatlar yayılıb.xeber100.com

Bolqarıstanda “sarı” təhlükə kodu elan edilib

Bolqarıstanın Milli Meteorologiya və Hidrologiya İnstitutunun məlumatına əsasən, Sofiya şəhərində, Sofiya, Pernik, Kustendil, Blaqoevqrad, Pazardjik və Smolyan rayonlarında 35 l/m2 həcmində yağan güclü yağışlar səbəbindən “sarı” təhlükə kodu elan edilib.xeber100.com

5,7 bal gücündə zəlzələ baş verib

Oktyabrın 12-də Papua-Yeni Qvineya sahillərində 5,7 bal gücündə zəlzələ baş verib. Bu barədə ABŞ Geoloji Xidməti məlumat yayıb. Yeraltı təkanların episentri Taron yaşayış məntəqəsindən 111 kilometr cənub-şərqdə, ocağı 21,9 kilometr dərinlikdə yerləşib.xeber100.com

“RİA Novosti”nin məlumatına əsasən…

Gürcüstanın sabiq prezidenti Mixail Saakaşvilinin qurucusu olduğu müxalif Vahid Milli Hərəkat partiyası  ölkədəki parlament seçkilərinin ikinci turunu boykot etməməyi və seçkilərdə iştirak etməyi qərara alıb. "RİA Novosti”nin verdiyi xəbərə görə, bu barədə partiya lideri David Bakradze bildirib. “Bizim partiya yeganə qərbyönümlü qüvvədir. Biz ölkədə birpartiyalı idarəçiliyin yaranmasına yol verməyəcəyik. Məhz bu səbəbdən qəbul etdiyimiz qərara əsasən, seçkilərin saxtalaşdırılmasına baxmayaraq,  partiya proporsional siyahılar üzrə parlamentdə təmsil olunmalı və seçkilərin ikinci turunda iştirak etməlidir”, - deyə Bakradze qeyd edib. Onun sözlərinə görə, komandanın daxilində bu məsələ ilə bağlı fikir ayrılığının olmasına baxmayaraq, qərar səs çoxluğu ilə qəbul olunub. Qeyd edək ki,  Gürcüstan MSK-sının məlumatına görə, parlamentə üç partiya keçib - hakim “Gürcü arzusu” partiyası (48,67%),   Vahid Milli Hərəkat  partiyası 27,11% və Vətənpərvərlər Alyansı (5,01%). MSK-nın xəbərinə görə, ikinci turun 50 seçki dairəsində keçiriləcəyi  gözlənilir.xeber100.com

London “Sərt Brexit” variantını seçərsə…

Böyük Britaniyanın Aİ-nin Gömrük İttifaqından çıxması ölkə iqtisadiyyatına  25 mlrd. funt sterlinqə başa gələcək. “RİA Novosti”nin verdiyi xəbərə görə, bu barədə Böyük Britaniya hökumətinin ölkənin Aİ-dən çıxması prosesi üzrə müşaviri Raul Ruparel bildirib. Ruparel qeyd edib ki, Böyük Britaniyanın Aİ-nin Gömrük İttifaqından çıxması ölkə ÜDM-nin uzaq perspektivdə 1-1,2 faiz aşağı düşməsinə gətirib çıxaracaq. “Times” nəşri bundan əvvəl Maliyyə Nazirliyinin sənədlərinə istinadən qeyd edib ki,  London “Sərt Brexit” variantını seçərsə, ölkə hər il 66 mlrd. funt sterlinq itirəcək.  Məlumata görə, lazımi tədbirlər görülməyəcəyi təqdirdə, Böyük Britaniyada ÜDM-in həcmi 5,4%-9,5%  aşağı düşəcək.xeber100.com  

“BBC”nin verdiyi xəbərə görə…

ABŞ prezidenti Barak Obama Respublikaçılar partiyasının nüfuzlu üzvlərini prezidentliyə namizəd Donald Trampı dəstəkləməkdən rəsmi şəkildə imtina etməyə çağırıb.  “BBC”nin verdiyi xəbərə görə,  Obama bildirib ki, Tramp Birləşmiş Ştatları beynəlxalq arenada təmsil etməyə yaramır. “O, nə təbiətinə, nə hazırlıq və bilik səviyyəsinə, nə biliklərə yiyələnmək istəyinə, nə də səmimiyyətinə görə prezidentliyə yaramır”, - deyə ABŞ prezidenti qeyd edib. Qeyd edək ki, Demokratlar partiyasından prezidentliyə namizəd Hillari Kilintona dəstək mitinqində çıxışı zamanı Trampın prezidentliyə yaramadığını dəfələrlə vurğulasa da, onun adını bir dəfə də səsləndirməyib. ABŞ prezidenti həmçinin qeyd edib ki, Tramp tolerantlıq, hüquqi proseduralara riayət olunması və qarşılıqlı hörmət kimi dəyərləri şübhə altına qoyur: “Bizim demokratiyamız bu cür işləmir”.xeber100.com

Anadolu agentliyinin məlumatına görə…

“Türk axını” qaz boru kəməri (Turkish Stream) layihəsi üzrə Rusiya ilə Türkiyə arasında hökumətlərarası saziş İstanbulda imzalana bilər. Anadolu agentliyi xəbər verir ki, bu barədə Rusiyanın energetika naziri Aleksandr Novak deyib. O bildirib ki, İstanbulda işinə başlayan XXIII Dünya Enerji Konqresi çərçivəsində oktyabrın 10-da Türkiyə Prezidenti Rəcəb Tayyib Ərdoğan ilə Rusiya Prezidenti Vladimir Putin görüşəcək. “Türk axını” layihəsi üzrə Rusiya ilə Türkiyə arasında hökumətlərarası saziş həmin görüşdə imzalana bilər. “Bu böyük bir layihədir və çox ətraflı iş tələb edir. Hazırda hökumətlərarası sazişin tamamlanması üçün işlər aparılır. Ərdoğan və Putin görüşündə bu sazişin hazır olmasını istəyirik”, - deyə nazir əlavə edib. Qeyd edək ki, “Türk axını” ilə Rusiya qazının Türkiyədən keçməklə Avropaya çatdırılması nəzərdə tutulur. Kəmərlə 16 milyard kubmetr qazın Avropanın, qalan hissəsinin isə Türkiyənin daxili tələbatının ödənilməsi üçün istifadə edilməsi planlaşdırılır. Layihə üzrə iki boru kəmərinin tikilməsi nəzərdə tutulur.

ABŞ prezidentliyinə namizədlər arasında ikinci teledebat keçirilib

ABŞ prezidentliyinə namizədlər – Demokratlar Partiyasının nümayəndəsi Hillari Klinton və Respublikaçılar Partiyasını təmsil edən Donald Tramp arasında ikinci teledebat keçirilib. Tədbir Missuri ştatının Sent-Luis şəhərindəki Vaşinqton Universitetində “town-holl” (“şəhər malikanəsi”) formatında təşkil edilib. Namizədlərə sualların yarısını onların qarşısında əyləşən auditoriyadakı adamlar, digər yarısını sosial şəbəkələr vasitəsilə moderatorlar və vətəndaşlar verirdi. Trampın 11 il bundan əvvəl audioplyonkaya yazılmış çıxışında qadınlar barəsində söylədiyi nalayiq sözlər, ölkənin sosial problemləri, ABŞ-da islamofobiya məsələsi, Suriyada və bütövlükdə Yaxın Şərqdə vəziyyət, Amerika-Rusiya münasibətləri, habelə ölkənin səhiyyə sistemi və iqtisadi sabitliklə bağlı məsələlər müzakirə edilib. Xatırladaq ki, bu debatlar ərəfəsində Amerika KİV-lərində 2005-ci ilə aid bir videoyazı yayılıb. Həmin materialda Donald Tramp qadınların ünvanına təhqiramiz ifadələr işlədib. Çoxsaylı vətəndaşlar, habelə Respublikaçılar partiyasının özünü təmsil edən siyasətçilər bu hadisəyə mənfi münasibət bildiriblər. Şərhçilərin çoxu Trampın bu davranışını seksual həyasızlıq adlandırıb.xeber100.com

Parlament seçkiləri başa çatıb

Xəbər verildiyi kimi, oktyabrın 8-də Gürcüstan parlamentinə və Acarıstan Muxtar Respublikasının Ali Sovetinə seçkilər keçirilib. Səsvermə səhər saat 8:00-da başlayıb, saat 20:00-da başa çatıb. İlkin məlumatlara görə, seçkilərdə seçicilərin 50 faizdən çoxu iştirak edib. Bununla da səsvermə baş tutmuş hesab olunur. Lakin bəzi majoritar dairələrdə ikinci turun keçiriləcəyi istisna edilmir. Səsvermənin ilkin nəticələri oktyabrın 9-da, tam nəticələr isə oktyabrın 19-da açıqlanacaq. Keçirilən “exit-pol”ların nəticələrinə görə, seçkilərdə ən çox səsi hakim “Gürcü arzusu” partiyası qazanıb.xeber100.com