“Avropa İttifaqı daxili nəzarəti gücləndirməlidir”…

Çexiyanın maliyyə naziri Andrey Babiş “Právo” qəzetinə müsahibəsində bildirib ki, Avropa İttifaqı terrorçuların hücum təhlükəsini azaltmaq məqsədi ilə öz xarici sərhədlərini ciddi qorumalı, insanların yerdəyişməsi, mallar, xidmətlər, habelə kapital üçün vahid azad məkan olan Şengen ərazisində daxili nəzarəti gücləndirməlidir. Maliyyə naziri hesab edir ki, yenidən cinayət törətməyə meyilli olan və “asanlıqla radikal müsəlman qruplarının təsiri altına düşən köçkünlər” də müşahidə altında olmalıdır. Onun fikrincə, NATO-nun müdafiə paktı dəyişikliyə uğrayaraq, terrorçulara qarşı fəal mübarizə aparan qüvvəyə çevrilməlidir.xeber100.com

Mərakeşin dövlət xəbər agentliyinin məlumatına görə…

Mərakeşin Kralı VI Mohammed 32 il əvvəl ayrıldıqları Afrika Birliyi Təşkilatına yenidən üzv olmaq barədə qərar qəbul etdiklərini açıqlayıb.  Mərakeşin dövlət xəbər agentliyinin (MAP) məlumatına görə, VI Mohammedin 27-ci Afrika Birliyi sammiti üçün Ruandanın paytaxtı Kiqaliyə göndərdiyi məktubda deyilir: “Afrika Birliyinə qayıtmaq bizim üçün çətin bir qərar olsa da, Mərakeş bu tarixi qərar ilə bütün bölünmələrin öhdəsindən gəlmək üçün birliyin daxilində birgə işə davam edəcək. 1984-cü ildə birlikdən ayrılma qərarımız özəl səbəblərdən ötəri idi. Bundan sonrakı müddətdə birlik daxilində üzərimizə düşən məsuliyyətləri yerinə yetirmə üçün daha inamla hərəkət edəcəyik”. Qeyd edək ki, Mərakeş 1984-cü ildə Poisario Təşkilatının "Qərbi Səhra Respublikası" adı ilə Afrika Birliyinə üzv olmasından sonra bu təşkilatdan ayrılmağa qərar vermişdi.xeber100.com

179 daxili və xarici uçuş ləğv edilib

“Türk Hava Yolları” iyulun 15-də ölkədə hərbi çevriliş cəhdi səbəbindən 179 daxili və xarici uçuşunu ləğv edib. “Türk Hava Yolları” sərnişinlərini özünün rəsmi saytı vasitəsi ilə və “qaynar xətt”lə məlumatlandırır. Qeyd edək ki, hərbi qiyamçıların qanunsuz müdaxiləsi səbəbindən İstanbul Atatürk Hava Limanı da daxil olmaqla, ölkənin aeroportlarında pozulmuş normal fəaliyyət bərpa olunmaqdadır.xeber100.com

Nazirlər Kabinetinin iclası keçirilir

İyulun 18-də Baş nazir Binəli Yıldırımın rəhbərliyi ilə Türkiyənin Nazirlər Kabinetinin iclası keçirilir. Türkiyə mətbuatının verdiyi məlumata görə, Çankaya köşkündə keçirilən iclasda bu ölkədə baş vermiş dövlət çevrilişinə cəhdlə bağlı məsələ müzakirə edilir.xeber100.com

Almaniya Türkiyədə demokratik və hüquqi dövləti dəstəklədiyini bildirib

Almaniya Kansleri Angela Merkel Türkiyədə dövlət çevrilişinə göstərilən cəhdi hökuməti adından ən sərt şəkildə pislədiyini bildirib. Almaniyanın Türkiyədə demokratik və hüquqi dövləti dəstəklədiyini bildirən Kansler xalqın iradəsinin ifadəsinə hörmət edilməsinin vacibliyini vurğulayıb. O, Türkiyənin xalq tərəfindən seçilmiş hökumətini və prezidentini zor tətbiq edərək devirmə cəhdini sərt şəkildə qınadığını, hakimiyyət dəyişikliyinin yalnız və yalnız demokratik qaydalara əsasən mümkün ola biləcəyini diqqətə çatdırıb.xeber100.com

Yunanıstan Türkiyəyə dəstək nümayiş etdirib

"Yunanıstan hökumətindən sığınacaq istəyən 8 qiyamçının Türkiyəyə təhvil verilməsi üçün nə lazımdırsa ediləcək". Bu fikri Yunanıstanın Baş naziri Aleksis Tsipras Türkiyə Prezidenti Rəcəb Tayyib Ərdoğan ilə telefon danışığı zamanı bildirib. Yunanıstanın Baş naziri Türkiyə hökumətinə dəstək nümayiş etdirib, demokratik cəmiyyətlərdə hərbi çevrilişə yer olmadığını vurğulayıb. Yunanıstan ilə sərhəd xəttində yerləşən Dədəağac şəhərindəki aerodromda eniş edən, içərisində 8 qiyamçının olduğu hərbi helikopterin Türkiyəyə qaytarılması üçün Yunanıstana xüsusi komanda göndərilib.xeber100.com

Məhkəmə-hüquq sistemində kütləvi ixtisarlar

Türkiyənin məhkəmə-hüquq sistemində işləyən və qiyamçılarla, habelə terror təşkilatı ilə əlaqəsi olduğu bildirilən hakim və prokurorların kütləvi şəkildə işdən çıxarılmasına və həbsinə başlanıb. Anadolu Agentliyinin məlumatına görə, Türkiyənin Məhkəmə-Hüquq Şurası barələrində Ankara Respublika Baş Prokurorluğu tərəfindən həbs qərarı çıxarılan 5 üzvün səlahiyyətlərini ləğv edib. Bundan başqa, ümumilikdə 2745 hakim işdən azad olunub.xeber100.com

Georgi Kvirikaşvili: “Türkiyənin demokratik inkişafı bizim üçün çox önəmlidir”

Türkiyə bizim üçün vacib dost, tərəfdaş ölkədir. Türkiyənin demokratik inkişafı bizim üçün çox önəmlidir. Bu bəyanatla Gürcüstanın Baş naziri Georgi Kvirikaşvili Milli Təhlükəsizlik Şurasının iyulun 16-da gecə saatlarında keçirilən iclasında çıxış edib. Baş nazir deyib ki, Türkiyədə sabitliyin qorunması Gürcüstan üçün çox vacibdir. Hər hansı demokratik ölkə üçün hərbi çevrilişin yolverilməz olduğunu vurğulayan Georgi Kvirikaşvili Türkiyədə baş verən hadisələrlə əlaqədar Gürcüstanın müvafiq strukturlarının məlumatlandırıldığını bildirib. Türkiyədə hərbi çevrilişə cəhdlə əlaqədar sərhəd-keçid məntəqələrində Gürcüstan vətəndaşlarının sərhədi keçməsində məhdudiyyətlər tətbiq olunur, hava uçuşları həyata keçirilmir.xeber100.com

Neft layihələrinin 70 faizi ləğv edilə bilər?!

Neftin qiymətinin ucuzlaşması və bu sahədə investisiyaların azalması ilə əlaqədar ABŞ-dakı neft layihələrinin 70 faizinin ləğv edilmə riski var. Aяэкефс xəbər verir ki, bu barədə mərkəzi ofisi Şotlandiyada yerləşən “Wood Mackenzie” araşdırma və konsaltinq şirkəti tərəfindən hazırlanan hesabat deyilir. Hesabata görə, ABŞ-da yekun investisiya qərarı alınmamış neft istehsalı layihələrinin ticarəti baxımdan həyata keçirilməsi üçün qlobal bazarlarda xam neftin qiyməti 60 dollar/barrel və ya daha çox olmalıdır. Qiymətlər hazırkı 50 dollardan aşağı olacağı təqdirdə isə qarşıdakı 10 ildə qlobal neft bazarında təklif azalmaları yarana bilər. Neftin qiymətinin ucuzlaşması və investisiyaların azalması ilə əlaqədar ABŞ-dakı neft layihələrinin 70 faizinin ləğv edilmə riski var. Həmin layihələrin çoxu istehsal xərci yüksək olan şist nefti layihələridir.xeber100.com

TASS informasiya agentliyinin məlumatına əsasən…

İŞİD qruplaşması iyulun 14-də Fransanın Nitsa şəhərində baş verən terror aktına görə məsuliyyəti öz üzərinə götürüb. Bu barədə TASS informasiya agentliyi məlumat yayıb. Qeyd edək ki, iyunun 14-də axşam saatlarında Fransanın Nitsa şəhərində sürücü yük avtomobilini milli bayram şənliyi ilə əlaqədar atəşfəşanlıqdan qayıdan minlərlə insanın üzərinə sürüb. Şahidlərin ifadəsinə görə, yük maşını dayanmadan ziqzaqvari hərəkət edərək təxminən 2 kilometr məsafədə insanları əzib. Bundan sonra terrorçu polis əməkdaşları ilə atışmağa başlayıb və öldürülüb. Hadisə nəticəsində 84 nəfər həlak olub, 200 nəfərə qədər insan yaralanıb. Həyatını itirənlər arasında xarici ölkə vətəndaşlarının da olduğu bildirilir.