Anadolu agentliyinin məlumatına görə…

Rusiya təbii qazını Türkiyəyə çatdıracaq “Türk axını” qaz boru kəmərinin (Turkish Stream) tikintisinə 2017-ci ildə başlanılması planlaşdırılır. Layihənin ilk hissəsinin 2019-cu ildə tamamlanması üçün hər hansı bir gecikmə gözlənilmir. Anadolu agentliyi xəbər verir ki, bu fikri Türkiyənin enerji və təbii sərvətlər naziri Berat Albayrak səsləndirib. Nazir bildirib ki, “Türk axını” üzrə ikinci boru kəməri Avropa bazarının aqibəti ilə əlaqəlidir. “Türk axını” Türkiyənin xüsusilə Qərb ilə yaşana biləcək böhranların aradan qaldırılmasını təmin etmək üçün əhəmiyyətli bir layihədir. Rusiyanın xarici işlər naziri Sergey Lavrov isə ötən gün ölkəsinin öz təbii qazını zəruri zəmanət təmin olunacağı təqdirdə “Türk axını” qaz boru kəməri ilə Avropaya çatdırmağa hazır olduğunu deyib. Bildirib ki, inşa ediləcək bir boru kəmərinin Yunanıstandan keçməklə Avropaya çatdırılması planlaşdırılır. Rusiyanın enerji nəhəngi “Gazprom”un idarə heyətinin sədri Aleksey Miller qeyd edib ki, son proseslər çərçivəsində “Türk axını” üzrə planlaşdırılan iki boru kəmərinin tikintisi işlərinin 2019-cu ilin sonunda tamamlanması nəzərdə tutulur.xeber100.com

Avropa İttifaqı yeni danışıqlar mərhələsinə başlayacaq

Cari ilin dekabr ayında İran ilə Avropa İttifaqı (Aİ) arasında yeni danışıqlar mərhələsi başlayacaq. Bu barədə ənənəvi həftəlik mətbuat konfransında İranın Xarici İşlər Nazirliyinin mətbuat katibi Bəhram Qasemi məlumat verib. O deyib ki, danışıqların yeni mərhələsində əsas müzakirə mövzusu insan hüquqlarının qorunması olacaq. İran ilə Aİ arasında müzakirə ediləsi məsələ çoxdur. Lakin insan hüquqları aparıcı mövzu olacaq. B.Qasemi bildirib ki, İran ilə Aİ-nin insan hüquqları haqqındakı təsəvvürləri, bu hüquqlara münasibətləri və yanaşma tərzləri müxtəlifdir. Lakin buna baxmayaraq rəsmi Tehran Aİ-nin insan hüquqları ilə bağlı irəli sürdüyü iddiaları dinləmək niyyətindədir. Bununla yanaşı, İran insan hüquqları ilə bağlı öz mövqeyini də bildirəcək.xeber100.com

“Saderat” bankının fəaliyyəti bərpa olunub

İranın “Saderat” bankının London şöbəsinin fəaliyyəti bərpa olunub və hesabları aktivləşib. İran mətbuatı Böyük Britaniyanın Maliyyə Nazirliyinin bəyanatına əsaslanaraq bildirir ki, İran ilə Qərb dövlətləri arasında əldə edilən Nüvə anlaşmasından 9 ay sonra rəsmi London “Sədarət” bankının şöbəsinin açılmasına icazə verib və ədalətsizliyi aradan qaldırıb. Bəyanatda deyilir ki, İranın əsasən ixrac əməliyyatlarının maliyyələşməsini təmin edən “Sədarət” bankının London şöbəsi olan “Sədarət PLC”nin fəaliyyəti qadağan olunmuş bankların siyahısından çıxarılıb. Bankın maliyyə aktivləri azad edilib.xeber100.com

“Bank VTB” birgünlük istiqrazların yerləşdirilməsinə başlayıb

Rusiya maliyyə bazarında debüt baş tutub: “Bank VTB” birgünlük istiqrazların yerləşdirilməsinə başlayıb.  “Vestifinance.ru” xəbər verir ki, tələb cəmi 3 milyard rubl təşkil etsə də, bank investorlara 25 milyard rubl (405 milyon dollar) həcmində birgünlük istiqraz təklif edib. İstiqraz üzrə illik gəlirlilik 10,26 faiz olub. “Bank VTB”, ümumiyyətlə 5 trilyon rubl həcmində birgünlük istiqraz yerləşdirməyi planlaşdırır. Yerləşdirmə hər gün həyata keçiriləcək, lakin bankın hər gün bazara çıxmaq kimi öhdəliyi yoxdur. Başqa sözlə, bank cari likvidliyinə əsaslanaraq emissiyanı istədiyi vaxt həyata keçirəcək.xeber100.com

Times of Malta qəzeti yazır…

Göyərtəsində Avropa İttifaqının xarici sərhədlərin təhlükəsizliyi üzrə agentliyinin (Frontex) əməkdaşları olan yüngül motorlu təyyarə Maltada qəzaya uğrayıb.  Times of Malta qəzetinin yaydığı məlumata görə, qəza nəticəsində beş nəfər həlak olub. Lüksemburqa məxsus təyyarənin Frontex agentliyi tərəfindən icarəyə götürüldüyü bildirilir. Adanın cənubundakı Luka şəhəri aerodromundan Liviyaya istiqamət götürən Metroliner təyyarəsi havaya qalxdıqdan bir qədər sonra qəzaya uğrayıb.xeber100.com  

Böyük Britaniyanın bankları ölkəni tərk edə bilər?!

Böyük Britaniyanın iri bankları “Brexit” səbəbindən 2017-ci ilin əvvəlində ölkəni tərk edə bilər. “lenta.ru” saytı xəbər verir ki, kiçik maliyyə təşkilatlarının ölkəni tərk etməsi isə cari ilin sonuna gözlənilir. Bu barədə Böyük Britaniyanın Bankirlər Assosiasiyasının rəhbəri Entoni Braun proqnoz verib. “Birləşmiş Krallıq hazırda ictimai və siyasi debatları düzgün olmayan istiqamətdə aparır. “Brexit” yəqin ki daha çox bankların işinə təsir edəcək, nəinki iqtisadiyyatın başqa sahələrinə”, - deyə E.Braun qeyd edib.xeber100.com

Qanun layihələrinin müzakirələri sürətləndirilir

Yaponiyanın hakim partiyalarının üzvləri parlamentdə azad ticarət barədə Trans-Sakit okean Tərəfdaşlığı (TPP) üzrə qanun layihələrinin müzakirələrini sürətləndirəcəklərinə inanırlar. Ötən bazar günü keçirilən təkrar seçkilər zamanı parlamentin aşağı palatasındakı iki yerin saxlanması onları buna daha da ümidləndirib. Liberal Demokratik və Komey partiyalarının üzvlərinin qənaətinə görə, seçkilərin nəticəsi Baş nazir Şinzo Abenin iqtisadi siyasətinin və həmçinin TPP-nin reallaşmasının əhali tərəfindən dəstəkləndiyini deməyə əsas verir.xeber100.com

Hərbi hava təlimləri keçiriləcək

Yaponiyanın hərbi hava qüvvələri ilk dəfə Böyük Britaniyanın Kral hərbi hava qüvvələri ilə birlikdə təlimlər keçirəcəklər. NHK televiziya kanalının yaydığı məlumata görə, Britaniyanın dörd “Eurofighter Typhoon” qırıcı təyyarəsi və “Voyager” hava tankeri oktyabrın 22-də Yaponiyanın şimal-şərqində yerləşən Aomori prefekturasındakı Misava aviabazasına enib. Məlumatda qeyd edilir ki, Yaponiya özünümüdafiə qüvvələrinin tərkibinə F-15 qırıcı təyyarələrinin də daxil olduğu səkkiz təyyarəsi oktyabrın 24-də başlayacaq təlimlərə qatılacaqlar. Yaponiya və Böyük Britaniyanın hərbi təyyarələri Hokkaydo və Tohoku regionlarının Sakit okean sahilləri yaxınlığındakı hava məkanında məşq edəcəklər.xeber100.com

Moldova Mərkəzi Seçki Komissiyası xəbərdarlıq edib

Avropa Xalq Partiyasının (AXP) Moldova Respublikası prezidenti vəzifəsinə namizəd kimi Mayya Sanduya dəstəyi barədə bəyanat mətbuatda dərc ediləndən sonra Moldova Mərkəzi Seçki Komissiyası (MSK) xatırladıb ki, bu ölkənin vətəndaşı olmayanların seçkiqabağı təşviqat aparması qadağandır. Azərtac bu barədə məlumatı Moldova KİV-lərinə istinadla yayır. Moldova MSK-nın mətbuat üçün məlumatında vurğulanır ki, müəyyən namizədin seçkiqabağı təşviqatını aparan Avropa məmurları heç oktyabrın 30-da keçiriləcək seçkilərdə beynəlxalq müşahidəçilər kimi qeydə alınmayıblar. Bununla belə, milli qanunvericiliyə görə, onlar qərəzsiz olmalı və kimə üstünlük verdiklərini göstərməməlidirlər.xeber100.com

6,6 bal gücündə zəlzələ baş verib

Yaponiyanın qərbində yerləşən Tottori prefekturasında 6,6 bal gücündə zəlzələ baş verib. Təbii fəlakət nəticəsində dağıntıların və xəsarət alanların olduğu bildirilir. Rusiyanın NTV telekanalı xəbər verir ki, zəlzələnin ocağı prefekturanın mərkəzində yer səthindən 10 kilometr dərinlikdə yerləşib. Yeraltı təkanlar Yaponiyanın 47 prefekturasından 31-də hiss olunub. İlk güclü təkandan sonra 4,3–5 bal gücündə azı 5 afterşok qeydə alınıb. Seysmoloqlar sunami təhlükəsinin olmadığını bildirib. Təhlükəsizlik səbəbi ilə Tottori prefekturasında sürət ekspreslərinin hərəkəti dayandırılıb. Həmçinin 39,8 min ev elektrik enerjisiz qalıb. Yaponiya KİV-ləri prefektura ərazisində fəaliyyət göstərən atom elektrik stansiyalarında heç bir ştatdankənar vəziyyət müşahidə edilmədiyini yazır.xeber100.com