Avropa İttifaqına üzv ölkələrdə yeni avtomobillərin satışı azalıb

Sentyabrda Avropa İttifaqına (Aİ) üzv ölkələrdə yeni avtomobillərin satışı ötən ilin eyni ayına nisbətən 23,1 faiz azalıb. Ay ərzində qitə ölkələrində avtomobil satışlarının ən çox azaldığı ölkə isə İtaliya olub. Azərtac xəbər verir ki, Avropa Avtomobil İstehsalçıları Birliyinin (ACEA) məlumatına görə, keçən ay Aİ-də yeni avtomobillərin satışı əvvəlki ilin sentyabr ayına nisbətən 23,1 faiz azalaraq 718 min 598 ədəd təşkil edib. Belə ki, 2020-ci ilin sentyabrında 934 min 39 ədəd yeni avtomobil satılmışdı.Aİ ölkələrindən İtaliyada avtomobil satışları 32,7 faiz, Almaniyada 25,7 faiz, Fransada 20,5 faiz və İspaniyada 15,7 faiz azalıb. İttifaqa üzv 27 ölkə arasında sentyabr ayında ən çox yeni avtomobil isə Almaniyada satılıb. Belə ki, ötən ay Almaniyada 196 min 972, Fransada 133 min 830, İtaliyada 105 min 175 və İspaniyada 59 min 641 yeni avtomobil qeydiyyata alınıb“Volkswagen Group” sentyabrda 156 min 228 ədəd olmaqla Aİ-də ən çox yeni avtomobil satan konsern olub. Sonrakı yerlərdə “Peugeot”, “Fiat”, “Citroen” və “Opel” kimi markaların daxil olduğu “Stellantis Group” (148 min 283 avtomobil) və “Renault Group” (86 min 159 avtomobil) qərarlaşıb.xeber100.com

Birləşmiş Millətlər Təşkilatının Baş Assambleyasının seçkilərində

Birləşmiş Millətlər Təşkilatının (BMT) Baş Assambleyasının Nyu-Yorkda keçirilən seçkilərində Litva 2022-2024-cü illər üçün BMT İnsan Hüquqları Şurasına üzv seçilib.Litva mətbuatı xəbər verir ki, bu barədə məlumatı ölkənin Xarici İşlər Nazirliyi yayıb.Bildirilib ki, BMT-yə üzv olan 178 ölkə Litvanın üzvlüyünün lehinə səs verib. Qeyd olunub ki, bu vaxta qədər Şuradakı fəaliyyətini müşahidəçi qismində həyata keçirən Litva 2022-ci il yanvarın 1-dən etibarən üç il ərzində ilk dəfə olaraq tamhüquqlu üzv olacaq.Nazirlik qeyd edib ki, Litvanın üzvlük dövrü ərzində prioritetləri əsasən uşaqların və xəstə insanların hüquqlarının müdafiəsinə, insan hüquqları müdafiəçilərinin təhlükəsizliyinə, münaqişə bölgələrində insan hüquqlarının təmin edilməsinə və insan haqlarının pozulması hallarına vaxtında cavab verilməsinə yönəlib. Bundan sonra qadın və qızların hüquqlarının, söz azadlığının, dinc toplaşma və birləşmə, jurnalistlərin təhlükəsizliyi, din və məzhəb azadlığının müdafiəsi üzrə fəal iş davam etdiriləcək.xeber100.com

Serbiyada “Bars-2021” birgə taktiki təlimləri başlayıb

Serbiya və Rusiyanın hərbi pilotları Serbiyada “Bars-2021” birgə taktiki təlimlərə başlayıblar.Təlimlər zamanı hər iki ölkənin uçuş heyəti döyüş manevrləri, “MiG-29” qırıcılarının aşağı sürətli hədəflərə hücumları, havadan hücum əməliyyatları, evakuasiya və akrobatik təlimlər keçəcək.Təlimlərdə “MiG-29” təyyarələrini, “Mi-8” və “Mi-35” helikopterlərini iradə edən iki ölkənin birgə komandaları iştirak edir.xeber100.com

Yaponiya hökuməti seçkilərin keçirilməsi barədə qərar qəbul edib

Yaponiya hökuməti parlamentin aşağı palatasının buraxılması və vaxtından əvvəl ümumi seçkilərin keçirilməsi barədə qərar qəbul edib.Azərtac xəbər verir ki, bu barədə qərar Nazirlər Kabinetinin oktyabrın 14-də səhər saatlarında keçirilən iclasında qəbul edilib. Parlamentin aşağı palatasının buraxılması barədə təklif Baş nazir Fumio Kişida tərəfindən irəli sürülüb. Bu təklif hökumət üzvləri tərəfindən qəbul olunub. Yaponiya Konstitusiyasına əsasən, parlamentin aşağı palatasının buraxılması barədə təklif İmperator Naruhito tərəfindən də təsdiq edilməlidir.Bundan bir neçə saat sonra toplanacaq aşağı palata buraxılmış elan olunacaq. Həmin elandan sonra yenidən toplanan Nazirlər Kabineti parlament seçkilərinin tarixini elan edəcək.Qeyd edək ki, Yaponiya parlamentinin aşağı palatasına əvvəlki seçkilər 2017-ci il oktyabrın 22-də keçirilib. Buna görə də deputatların dörd il davam edən səlahiyyət müddəti oktyabrın 21-də başa çatır. Bu ərəfədə F.Kişida seçkilərin oktyabrın 31-də keçiriləcəyini, seçkiöncəsi kampaniyanın isə oktyabrın 19-da başlanacağını elan edib. Hazırda parlamentin aşağı palatasındakı 465 yerdən 305-i hakim Liberal Demokratik Partiyaya (LDP) və onun koalisiya tərəfdaşı Komey-to Partiyasına məxsusdur.Xatırladaq ki, Yaponiya parlamenti oktyabrın 4-də LDP-nin sentyabrın 29-da seçilən yeni lideri Fumio Kişidanı böyük səs çoxluğu ilə ölkənin Baş naziri vəzifəsinə təsdiq edib.xeber100.com

İraqda növbədənkənar parlament seçkiləri keçirilir

Bu gün İraqda növbədənkənar parlament seçkiləri keçirilir. İraqın 40 milyon əhalisinin 24 milyonunun səsvermə hüququ var. İraq parlamentindəki 329 yer uğrunda 3 min 249 namizəd mübarizə aparacaq.Seçkilərlə əlaqədar olaraq İraq hökuməti yüksək təhlükəsizlik tədbirləri həyata keçirib. Polis və xüsusi xidmət orqanlarının nümayəndələri seçki prosesinə qarışmadan məntəqələri ciddi nəzarətə götürüblər. Şübhəli adamlar saxlanılaraq sənədləri yoxlanılır və hər ehtimala qarşı üzərinə baxış keçirilir. Koronavirus pandemiyası ilə əlaqədar olaraq səs verməyə gələnlər tibbi protokola əməl edərək maska taxmalı, əllərini dezinfeksiya etməlidir. Seçicilərin məntəqəyə mobil telefonla da daxil olması qadağan edilib. Paytaxt Bağdadda və digər şəhərlərdəki hava limanları, dəmir yolu vağzalları, eyni zamanda, gömrük-keçid məntəqələri səsvermə başa çatana qədər fəaliyyət göstərməyəcək.Seçkiləri 877 yerli və xarici müşahidəçi izləyəcək, prosesi 300-dən çox yerli və xarici mətbuat nümayəndəsi işıqlandıracaq.Səhər saatlarında İraq Prezidenti Bəhram Salehi Bağdadın “Yaşıl vadi” deyilən rayonunda təşkil olunan seçki məntəqəsinə gələrək səsvermədə iştirak edib. Mətbuat nümayəndələrinə qısa açıqlama verən Prezident nəzərə çatdırıb ki, növbədənkənar parlament seçkiləri İraq xalqının tələbi idi. O bildirib ki, ölkəsinin gələcəyini düşünən hər bir səsvermə hüququ olan iraqlı seçkidə iştirak etməlidir.İraqın Baş naziri Mustafa Əl-Kazimi də səsvermədə iştirak edib. O da səsvermədən sonra mətbuata açıqlama verərək bildirib ki, bu parlament seçkiləri fövqəladə vəziyyət rejimində keçirilməyən ilk seçkidir.xeber100.com  

İtaliyada COVID-19-a qarşı aparılan geniş peyvənd kampaniyası çərçivəsində

İtaliyada son 24 saatda COVID-19-a yoluxanların sayı 2748 nəfər artaraq ümumilikdə 4 milyon 698 min 38-ə çatıb.Ötən sutka ərzində ölkədə COVID-19-un qurbanlarının sayı isə 46 nəfər artaraq 131 min 274-ə yüksəlib.2020-ci il dekabrın 27-dən İtaliyada COVID-19-a qarşı aparılan geniş peyvənd kampaniyası çərçivəsində bu vaxtadək 86 milyon 201 min 755 doza vaksin vurulub. Ölkədə cari il avqustun 6-da qüvvəyə minən qaydaların, oktyabrın 16-dan isə bütün dövlət və özəl sektorda çalışan işçilər üçün məcburi olacaq “Yaşıl keçid kartı”nın (“Green pass” və ya vaksin sertifikatı) tətbiqinin vaksinasiya kampaniyasını sürətləndirdiyi bildirilir.Səhiyyə Nazirliyinin qərarı ilə sentyabrın 20-dən etibarən ölkədə yaşı 80-dən yuxarı və xroniki xəstəlikləri olanlar üçün üçüncü doza peyvəndin tətbiqinə başlanılıb. İndiyədək 296 min 624 nəfər üçüncü doza peyvənd edilib.xeber100.com

Qazaxıstan Energetika Nazirliyinin məlumatı əsasında…

Qazaxıstan “OPEC+” razılaşması çərçivəsində neft hasilatını artıracaq. Bu barədə oktyabrın 4-də “OPEC+” sazişində iştirak edən ölkələrin nazirlər görüşünün videokonfrans formatında qərar verilib.Bu barədə Qazaxıstanın Energetika Nazirliyi məlumat yayıb.İclasda Qazaxıstanı energetika naziri Maqzum Mirzaqaliyev “OPEC+” çərçivəsində imzalanan Sazişə sadiq və öhdəliklərini yerinə yetirməyə hazır olduğunu təsdiqlədi. Bundan başqa nazir, qarşıdakı aylarda istehsalın tədricən artırılmasının tərəfdarı olduğunu qeyd edib.Görüşün nəticəsi olaraq, bir müddət “OPEC+” ölkələri tərəfindən hazırkı istehsal səviyyəsinin hər ay gündəlik 400 min barrel artırılması qərara alınıb.Beləliklə, oktyabr ayında Qazaxıstan üçün “OPEC+” kvotası gündəlik 1,524 milyon barrel təşkil edəcək və hər ay hasilat gündə orta hesabla 16 min barrel artacaq.xeber100.com

Rixter cədvəli üzrə 4.3 bal gücündə zəlzələ baş verib

Türkiyənin Muğla vilayətinin Datça rayonunda rixter cədvəli üzrə 4.3 bal gücündə zəlzələ baş verib.Məlumatı Türkiyənin Fövqəladə Halların İdarə olunması Agentliyi (AFAD) yayıb. Bildirilir ki, yeraltı təkanın episentri Egey dənizi sahilindən 8.09 kilometr aralıda olub. Dağıntı və tələfat barədə məlumat verilməyib.Qeyd edək ki, son günlər Egey dənizi bölgəsində seysmoloji gərginlikdə yenidən artım müşahidə olunur.xeber100.com

Reuters xəbər agentliyinin məlumatına görə…

Avropa İttifaqının (Aİ) üzvləri Balkan ölkələrinin İttifaqa qəbul olunacaqlarına dair verdiyi sözə əməl edə bilməyib.Reuters xəbər agentliyinin məlumatına görə, oktyabrın 6-da Aİ-Balkan sammitində 18 il əvvəl Qərbi Balkan ölkələrinin Avropaya daxil olma perspektivinin qeyd-şərtsiz dəstəklənməsinin bir daha təsdiqlənməsi planlaşdırılmışdı. Lakin danışıqlar Danimarka, Fransa və Niderlandın Balkan ölkələrinin Rumıniya və Bolqarıstan kimi İttifaqa sürətlə daxil olmasından ehtiyat etdiklərinə görə dayandırılıb. Eyni zamanda, Bolqarıstanın özü də dil mübahisəsinə görə Şimali Makedoniyanın Aİ-də üzvlüyünə qarşı çıxır.İttifaqın genişlənməsini dəstəkləyən Avstriya, İtaliya, Xorvatiya, Sloveniya və Baltikyanı ölkələr Almaniya və Fransanı Bolqarıstanın vetosunu açmaq istəməməkdə günahlandırırlar.Aİ artıq Monteneqro və Serbiya ilə üzvlük danışıqları aparır.xeber100.com

ZDF telekanalında yayımlanan ilkin ekzitpolun məlumatına görə…

Olaf Şoltsun rəhbərlik etdiyi alman sosial-demokratları bundestaqa (parlament) seçkilərində 26 faiz səslə liderlik edir. ZDF telekanalında yayımlanan ilkin ekzitpolun məlumatlarına görə, Almaniya Mühafizəkarlar Partiyası (Angela Merkelin bloku) Armin Laşetin liderliyi ilə 24 faiz səs toplayaraq ikinci yerdə gedir. Yaşıllar ittifaqı partiyası Annalena Berbokun başçılığı ilə 14,4 faiz səslə üçüncü sırada qərarlaşır. Həmçinin “sollar” 5 faiz səslə parlamentə keçir.Seçkilərin ilkin rəsmi nəticələri bazar sentyabrın 27-nə keçən gecə, yekun nəticələr isə təxminən iki həftə sonra dərc ediləcək.xeber100.com