Prezident seçkiləri oktyabrın 2-də keçiriləcək

Avstriyada təkrar prezident seçkiləri oktyabrın 2-də keçiriləcək. Konstitusiya Məhkəməsi mayın 22-də ölkədə keçirilmiş prezident seçkilərinin ikinci turunun nəticələrini ləğv etdikdən sonra, koalisiyalı hökumət parlamentə təkrar seçkilər üçün oktyabrın 2-ni təklif edib. İkinci turda olduğu kimi, təkrar seçkidə də mübarizə Yaşıllar Partiyasının keçmiş rəhbəri, müstəqil namizəd Aleksandr Van der Bellen və Avstriya Azadlıq Partiyasının namizədi Norbert Hofer arasında olacaqdır. Ölkə Prezidenti Haynts Fişerin səlahiyyət müddəti başa çatdığına görə, parlamentin sədarəti təkrar seçkilərədək prezidentin səlahiyyətlərini icra edəcəkdir. Sağçı-radikal Avstriya Azadlıq Partiyasının rəhbərliyi səsvermədə yenə qanunsuzluq aşkarlanacağı təqdirdə təkrar seçkilərin nəticələrinin ləğv olunması üçün məhkəməyə müraciət edəcəyini bildirib.xeber100.com

Məsləhətçilər Palatasına seçki keçirilir

Bu gün Yaponiyada parlamentin yuxarı palatasına (Məsləhətçilər Palatası) seçki keçirilir. TASS agentliyinin verdiyi məlumata görə, Yaponiya parlamentinin yuxarı palatasının 242 üzvü var və onların yarısı hər 3 ildən bir yenidən seçilməklə, 6 il müddətinə seçilirlər. Bu seçkilərdə son 70 ildə ilk dəfə seçicilər üçün yaş məhdudiyyəti 20 yaşdan 18 yaşa endirilib və bununla da seçicilərin sayı 2,4 milyon nəfər artıb. Hazırkı seçkilərdə 389 namizəd mübarizə aparır. Tərkibinə Liberal-Demokrat və “Yeni Komeyto” partiyalarının daxil olduğu hakim koalisiya parlamentin yuxarı palatasında tək çoxluğu saxlamaq yox, Konstitusiyaya dəyişikliklə bağlı qanun layihəsinin maneəsiz qəbulu üçün yerlərin 2/3-nə sahib olmağı qarşısına məqsəd qoyub. Yerli vaxtla saat 14:00-a (Bakı vaxtı ilə 09:00) qədər seçici fəallığı 22,54 faiz olub. xeber100.com

RİA Novosti agentliyinin məlumatına əsasən…

Filippində 5,2 bal gücündə zəlzələ baş verib. RİA Novosti agentliyinin məlumatına əsasən, yeraltı təkanların episentri Aurora əyalətindən 6 km şimalda, ocağı isə 10 km dərinlikdə yerləşib. Dağıntı və zərərçəkənlər barədə məlumat verilmir. Sunami təhlükəsi elan olunmayıb.xeber100.com

NATO-nun növbəti sammiti Belçikanın paytaxtı Brüsseldə baş tutacaq

NATO-nun növbəti sammiti 2017-ci ildə Belçikanın paytaxtı Brüsseldə baş tutacaq". Apa-nın məlumatına görə, bu barədə alyansın baş katibi Yens Stoltenberq keçirdiyi mətbuat konfransında deyib. "Bizim növbəti görüşümüz 2017-ci ildə Brüsseldəki mənzil-qərargahımızda baş tutacaq", - deyə baş katib qeyd edib.xeber100.com

Yer kürəsini internetlə təmin edəcək yeni layihəyə start verildi

“Facebook” şirkəti Yer kürəsinin bütün guşələrini internetlə təmin edəcək yeni layihəni işə salıb.  “ictnews.az” xəbər verir ki, şirkət yeni simsiz rabitə sistemi hazırlayıb. “OpenCellar” adlanan qurğu planetin istənilən guşəsində şəbəkəyə çıxış nöqtəsi yaratmaqla bir sıra üstünlüklərə malikdir. Məsələn, qurğu lokal şəbəkənin yaradılmasından tutmuş, “2G” və “LTE” kimi şəbəkələrə çıxış kimi geniş kommunikasiya imkanlarına malikdir. “OpenCellar” qurğusunun əsas fərqləndirici cəhəti onun lazımi yenilənmə və yoxlama proqram təminatı ilə yanaşı, rabitə operatorlarına, sahibkar və avadanlıq istehsalçılarına platforma əsasında lokal şəbəkə yaradaraq, onu sazlamağa və uğurlu tətbiqinə imkan verən açıq texniki və başlanğıc şəbəkə kodlarına malik olmasındadır. “Facebook” və “Telecom Infra Project” (TIP) şirkətləri birlikdə gələcəkdə platformanı təkmilləşdirməyə kömək edəcək şəbəkə texnologiyaları ətrafında böyük birlik yaradaraq onu inkişaf etdirmək niyyətindədir. Qeyd olunub ki, 2015-ci ilin sonunda 4 milyarddan çox insan internetə qoşulmaq imkanından məhrum olub, Yer kürəsi əhalisinin 10 faizi isə mobil rabitə şəbəkəsinin əhatə dairəsindən kənarda qalıb. “Facebook” qurğuların ucuzluğu və komplekt hissələrini hər yerdə əldə etməyin mümkünlüyü sayəsində bu problemi həll etmək niyyətindədir.xeber100.com

“TASS” informasiya agentliyinin məlumatına əsasən…

Böyük Britaniyanın Mühafizəkarlar partiyasının rəhbəri və ölkənin baş naziri qadın olacaq. “TASS” informasiya agentliyinin məlumatına əsasən, belə nəticəyə mühafizəkar deputatların keçirdiyi səsvermənin ikinci raundunun yekunundan sonra gəlinib. Məlumata görə, partiya  liderinin müəyyənləşdirilməsi üzrə keçirilən kampaniyanın finalına iki qadın lider yüksəlib – 199 səs toplamış DİN rəhbəri Tereza Mey və 99 deputatın etimadını qazanmış energetika nazirinin müavini Andrea Lidsom. Böyük ehtimalla məhz Tereza Mey Böyük Britaniyanın növbəti baş naziri seçiləcək. Qeyd edək ki,  Böyük Britaniyanın tarixində bundan öncə baş nazir vəzifəsində çalışmış ilk qadın Marqaret Teççer olub (1979-1990). Böyük Britaniyanın yeni baş nazirinin adı sentyabrın 9-dək elan ediləcək.xeber100.com

Qaçqınların inteqrasiyasına dair qanun layihəsi qəbul edilib

Almaniya parlamentinin aşağı palatası mühacirlərin və qaçqınların inteqrasiyasına dair qanun layihəsi qəbul edib. Apa-nın “Röyters”ə istinadən verdiyi xəbərə görə, bu barədə Almaniyanın Daxili İşlər Nazirliyinin mətbuat xidmətindən bildirilib. Yeni qanun mühacir və qaçqınların əmək bazarına, eləcə də təhsil və inteqrasiya kurslarına çıxışını asanlaşdıracaq. Qanun layihəsində həmçinin inteqrasiyaya cəlb olunmaqdan boyun qaçıranlara, məsələn, alman dilini öyrənməkdən imtina edənlərə qarşı sanksiyalar da nəzərdə tutulub. “Bu qanun layihəsində burada qalmaq istəyənlər qarşısında bəzi tələblər qoymuşuq. Biz onlara həm  bəzi tələblər irəli sürür, həm də dəstək göstəririk. Tələbimiz ondan ibarətdir ki, alman dilini öyrənsinlər, öz xərclərini qarşılamaq üçün işləyib özləri qazansınlar və dövlət qanunlarına riayət etsinlər”, - deyə Almaniya daxili işlər naziri Tomas de Mezyer bildirib. Tomas de Mezyer sözlərinə görə, Avropaya gələn mühacirlərin əsas cəmləşdiyi yer Almaniyadır və 2015-ci ildən bu günə qədər Almaniyaya 1,1 milyon mühacir gəlib.xeber100.com

İranda 5,0 bal gücündə zəlzələ baş verib

TASS informasiya agentliyi xəbər verir ki, yeraltı təkanların episentri Bəndər-Abbas liman şəhərindən 56 kilometr şimalda olub. Yeraltı təkanların ocağı 10 km dərinlikdə yerləşib. Dağıntı və zərərçəkənlər barədə məlumat verilmir.xeber100.com

“San Fermin” festivalına start verilib

İspaniyanın şimalındakı Pamplona şəhərində öküzlərin insanlarla birlikdə küçədə qaçması ilə məşhur olan “San Fermin” festivalına start verilib. Anadolu xəbər agentliyi məlumat verir ki, 9 gün davam edəcək festivalın keçirilməsinə 2 milyon avroya yaxın vəsait ayrılıb. Festival son 10 ildə bölgə iqtisadiyyatına 740 milyon avrodan çox xeyir gətirib. “San Fermin”i 12 ölkədən 400-dək jurnalist işıqlandıracaq. Axşam arenaya çıxacaq öküzlər hər səhər şəhərin içindəki 850 metrlik yolda insanlarla birlikdə qaçacaq. 18 yaşdan aşağı olanların iştirakına icazə verilməyən bu qaçışlarda bu günə qədər 15 adam ölüb, 200-dən çoxu yaralanıb. Ötən il festivala 16 min 629 nəfərin qatıldığı bildirilir. İyulun 14-də başa çatacaq festivalda asayişi 3 mindən çox polis qoruyacaq.xeber100.com

Əfqanıstanda 8400 nəfərlik əsgəri qüvvənin saxlanılması ilə bağlı plan açıqlanıb

ABŞ prezidenti Barak Obama gələn il Əfqanıstanda 8400 nəfərlik əsgəri qüvvənin saxlanılması ilə bağlı planı açıqlayıb. Obama administrasiyası 2016-cı ilin sonuna qədər ölkədə ABŞ əsgərlərinin sayının 9800-dən 5000-ə qədər azaldılmasını nəzərdə tuturdu. Lakin Obama deyib ki, Əfqanıstanda təhlükəsizliklə bağlı vəziyyət hələ də qeyri-sabit olaraq qalır və o, administrasiyasının hakimiyyətdə müddəti başa çatdığı dövrdə nəzərdə tutulduğundan daha çox sayda əsgəri qüvvənin saxlanması haqda qərar verib. “Taliban təhlükə olaraq qalır. Onlar bəzi hallarda üstünlük əldə edib, hücumlar və əsas etibarilə Kabildə intiharçı bomab hücumları keçirib. Taliban mülki vətəndaşları hədəf aldığı üçün daha çox əfqan kişi, qadın və uşaq həyatını itirir və onlar qlobal qaçqın böhranına onlar çox vaxt unudulur”-deyə prezident Obama bildirib. ABŞ-ın Əfqanıstanda hərbi missiyası iki istiqamətdə iş aparır. Buraya Talibana qarşı mübarizə aparan Əfqanıstan hərbi qüvvələrinə yardım göstərilməsi və təlim verilməsi, eləcə də Əl-Qaidə ilə əlaqəsi olan ekstremistlər və ölkədə kök salmağa cəhd edən İŞİD-ə qarşı hərbi əməliyyatların keçirilməsi daxildir. “Qabiliyyətinin yaxşılaşmasına baxmayaraq, Əfqanıstan hərbi qüvvələri hələ də lazım olduğu qədər güclü deyil”-deyə prezident Obama bildirib. Obama deyib ki, o, Əfqanıstanda daha çox əsgəri qüvvə saxlanılması haqda qərarı ABŞ hərbi qüvvələrinin Əfqanıstanda yeni komandiri, ordu generalı Con Nikolson, ABŞ Müdafiə naziri Eş Karter, eləcə də hərbi və kəşfiyyat orqanlarının rəsmiləri ilə məsləhətləşmələrdən sonra verib. Prezidentin bildirdiyinə görə, o gələn həftə Polşada NATO-nun Varşava sammitində koalisiya qüvvələrinin Əfqanıstana daha çox dəstəyinə nail olmağa çalışacaq. Obama bildirib ki, Əfqanıstanda daha çox əsgəri qüvvənin saxlanması o hakimiyyətdən getdikdən sonra ABŞ-ın növbəti prezidentinə uzun zamandır sürən münaqişənin həllinin ən yaxşı yollarını tapmaq imkanları verəcək. Obamanın sözlərinə görə, əsgəri qüvvənin sayı ilə bağlı qərarın verilməsi Talibana ABŞ-ın və beynəlxalq ictimaiyyətin Əfqanıstanla bağlı üzərinə götürdüyü öhdəliklərə sadiq qaldığına dair mesaj göndərir.xeber100.com