430 yaşayış evi və bir neçə inzibati binanı su basıb

Rusiya Federasiyasının Adıgeya Respublikasında davam edən şiddətli yağış və daşqın nəticəsində 430 yaşayış evi və bir neçə inzibati binanı su basıb. “İnterfaks” agentliyinin verdiyi məlumata görə, ən çox Adıgeyanın paytaxtı Maykop və ətraf rayonlara ziyan dəyib. Maykopda 221, ətraf ərazilərdə isə 209 evi su basıb. Sel suları 8 avtomobil və piyada körpüsünü dağıdıb. Suyun küçə və həyətlərdən çəkilməsi üçün əraziyə texnika və canlı qüvvə cəlb olunub. Hazırda dəyən zərərin həcmi müəyyənləşdirilir. Bununla belə, sinoptiklər yaxın günlərdə yağıntının davam edəcəyini bildiriblər.xeber100.com

İstanbulun fəth edilməsinin 563-cü ildönümü…

İstanbulun fəth edilməsinin 563-cü ildönümü ilə bağlı şəhərin Yenikapı bölgəsində izdihamlı mitinq keçirilib. Dövlət və hökumət rəhbərlərinin qatıldıqları mitinqdə ölkə ictimaiyyətinin ayrı-ayrı təbəqələrindən olan on minlərlə vətəndaş iştirak edib. Prezident Rəcəb Tayyib Ərdoğan, Baş nazir Binəli Yıldırım və Türkiyə Böyük Millət Məclisinin sədri İsmayıl Kahraman mitinqdə çıxış ediblər. Çıxışlarda Türkiyə xalqının şanlı dövlətçilik tarixi, o cümlədən Türkiyə dövlətinin müasir inkişaf istiqamətləri, həmçinin Osmanlı padşahı Fateh Sultan Mehmetin şərəfli döyüş yolu barədə fikirlər səslənib. Mitinqdə Türkiyə bayraqları ilə yanaşı, Azərbaycan bayraqları da dalğalandırılıb. Rəsmi hissədən sonra “Türk yıldızları” İstanbul səmasında möhtəşəm uçuşlar nümayiş etdiriblər. Sonra İstanbulun hərbi fəthinə aid döyüş səhnələrini tərənnüm edən bədii hissə olub.xeber100.com

Suriya ilə bağlı müzakirə aparılıb

Bu gün ABŞ tərəfinin təşəbbüsü ilə Rusiya xarici işlər naziri Sergey Lavrov və ABŞ dövlət katibi Con Kerri arasında telefon danışığı olub. Rusiya Xarici İşlər Nazirliyinin verdiyi məlumata görə, S. Lavrov və C. Kerri Suriyada vəziyyəti müzakirə ediblər. S. Lavrov yenə də Suriya-Türkiyə sərhədinin bağlanmasının zəruri olduğunu, həmin yerlərdən terrorçuların sızdığını iddia edib. Tərəflər Suryia ilə bağlı səylərini gücləndirmək barədə razılığa gəliblər. Danışıqlar zamanı Ukrayna problemi və ikitərəfli münasibətlərə dair digər məsələlər də müzakirə olunub.xeber100.com

“Novosti-Kazaxstan” agentliyinin məlumatına əsasən…

Bu gün Türkmənistanda Türkmən Xalça Günü qeyd edilib. “Novosti-Kazaxstan” agentliyinin məlumatına əsasən, Xalça Günündə bütün ölkədə kütləvi gəzintilər, konsertlər, xalça sərgiləri təşkil edilir, Türkmənistan prezidenti tərəfindən ixtisaslı xalçaçılar dövlət mükafatları və qiymətli hədiyyələrlə təltif edilirlər. Bu gün Aşqabadda Türkmənistan Xalçalarının Beynəlxalq Sərgisi və Ümumdünya Türkmən Xalçaları Qiymətləndiriciləri Assosiasiyasının XVI konfransı keçiriləcək. Xalça Gününün qeyd edilməsində əsas məqsəd Türkmənistan xalçalarının dünyada məşhurlaşdırılmasıdır. Türkmənistan prezidenti Qurbanqulu Berdıməhəmmədov Türkmən Xalça Günü münasibəti ilə sərgi və konfrans iştirakçılarını təbrik edib. Q. Berdıməhəmmədov türkmən xalçaları türkmənlərin “ürəyinin musiqisi” kimi səciyyələndirib. Qeyd edək ki, Türkmənistan xalçaları dünyada ən qədim xalçalardan sayılır. Tarixçilər türkmən xalçalarının 2 min ildən çox yaşı olduğunu bildirirlər.xeber100.com

“Assoşieyted Press”in verdiyi xəbərə görə…

İtaliya Hərbi-Dəniz Qüvvələri və Sahil Mühafizə Xidməti İrlandiya və Almaniyaya məxsus gəmilərin dəstəyi ilə Aralıq dənizində qəzalı vəziyyətdə olan qayıqlardan 668 miqrantı xilas ediblər. “Assoşieyted Press”in verdiyi xəbərə görə, son həftə ərzində Aralıq dənizində xilas olunmuş miqrantların sayı 13 minə çatıb. İtaliyanın Sahil Mühafizə Xidmətinin Əməliyyat Mərkəzinin məlumatına görə, yalnız mayın 26-da Aralıq dənizində həyata keçirilmiş 22 müxtəlif əməliyyatlar nəticəsində 4 mindən çox miqrant xilas edilib. Beynəlxalq Miqrasiya Təşkilatının məlumatına görə, ilin əvvəlindən bu vaxtadək Avropaya ümumilikdə 194 min 611 miqrant daxil olub. 1475 mühacir ölüb və ya itkin düşüb. Ən çox qaçqın və miqrant Yunanıstana daxil olur, belə ki, yanvar-may ayları ərzində bu ölkəyə 156 min 157 nəfər gəlib. İtaliya ərazisindən 37 min miqrant istifadə edib. İspaniyaya – 1000, Kiprə isə 28 daxil olub.xeber100.com

Avropaya daxil olan qaçqınların sayı 13 minə çatıb

Aİ donanması Aralıq dənizində 600-dən çox liviyalı qeyri-leqal miqrantı xilas etdikdən sonra, həftə ərzində dəniz yolu ilə Avropaya daxil olan qaçqınların sayı 13 minə çatıb. Bu barədə BBC İtaliyanın rəsmi qurumlarına istinadən məlumat yayıb. Məlumata görə, Aralıq dənizində ən çox miqrant xilas etmiş İtaliya, Almaniya və İrlandiyaya məxsus hərbi gəmilərdir. Havanın temperaturunun yüksəlməsi son günlər Afrikadan Avropaya dəniz marşrutu ilə qaçqın axınının xeyli artmasına səbəb olub. BBC qeyd edir ki, Aİ və Türkiyə arasında saziş əldə olunduqdan sonra dəniz yolu miqrantlar üçün əsas marşruta çevrilib. Bundan əvvəl miqrantların xeyli hissəsi Türkiyə ərazisindən Avropaya keçməyə cəhd edirdi.xeber100.com

Ukrayna-Aİ münasibətləri…

NATO-nun sabiq baş katibi Anders Foq Rasmussen bildirib ki, Ukrayna prezidenti Pyotr Poroşenkonun müşaviri qismində bu ölkədə təhlükəsizliyin təmin olunması üçün əlindən gələni edəcək.  “RİA Novosti”-nin verdiyi xəbərə görə, bu sözləri Rasmussen “Facebook” səhifəsində yazıb. Ukraynada çalışacağını səbirsizliklə gözlədiyini bildirib. “Mən böyük məmnuniyyətlə təyinatı qəbul etdim və Ukraynada təhlükəsizliyin və islahatların tətbiqinin təmin olunması, Ukrayna-Aİ münasibətlərinin möhkəmləndirilməsi üçün əlimdən gələni edəcəm”, - deyə Anders Foq Rasmussen bildirib. NATO-nun sabiq baş katibi Ukrayna hakimiyyəti ilə işləməyi səbirsizliklə gözlədiyini bildirib. Qeyd edək ki, Poroşenko mayın 27-də Anders Foq Rasmusseni özünə ştatdan kənar müşavir təyin olunması barədə fərman imzalayıb. Anders Foq Rasmussen 2009-2014-cü illərdə NATO-ya rəhbərlik edib.xeber100.com

RİA Novosti informasiya agentliyinin məlumatına görə…

Filippin parlamenti prezident seçkilərində səslərin hesablanması prosesini başa çatdırıb. Seçkinin son nəticəsinə əsasən, dövlətin yeni başçısı Rodriqo Duterte olub. RİA Novosti informasiya agentliyi xəbər verir ki, rəsmi məlumata görə, Dutertenin namizədliyinə 16,6 milyondan çox seçici səs verib. Onun ən yaxın rəqibi Leni Robredo isə 14,4 milyon səs toplayaraq ölkənin vitse-prezidenti seçilib. Rodriqo Duterte 22 ildən çox Davao şəhərinin meri vəzifəsində çalışıb. Bir müddət əvvəl o, ölkədə ölüm hökmünü bərpa edəcəyini və cinayətkar qrup üzvlərinin, həmçinin həbs olunarkən silahlı müqavimət göstərənlərin güllələnməsi əmrini verəcəyini deyib. Qeyd edək ki, Filippində prezident səlahiyyətlərinin müddəti 6 ildir.xeber100.com

Cənubi Osetiyanın Rusiyaya birləşməsi ilə bağlı referendum keçiriləcək

2017-ci ildə separatçı Cənubi Osetiya Respublikasının Rusiya Federasiyasının tərkibinə daxil olması ilə bağlı referendum keçiriləcək. “RİA Novosti" agentliyinin verdiyi məlumata görə, müvafiq sənədi Cənubi Osetiya prezidenti Leonid Tibilov və parlamentin sədri Anatoli Bibilov imzalayıblar. Sənəd prezident yanında Siyasi Şuranın iclasında qəbul edilib. “Cənubi Osetiya xalqının maraqlarını rəhbər tutaraq, respublikanın 2017-ci ildə Rusiya Federasiyasının tərkibinə keçirilməsi barədə referendumun 2016-cı ilin 26 may tarixində keçirilməsini məqsədəuyğun bilirik”, - deyə imzalanan bəyanatda qeyd olunub.xeber100.com

“RİA Novosti”nin verdiyi xəbərə görə…

Minsk razılaşmaları tam icra olanadək Rusiyaya qarşı sanksiyalar qüvvədə qalacaq və lazım gəldikdə daha da sərtləşdiriləcək. “RİA Novosti”nin verdiyi xəbərə görə, bu barədə “Böyük yeddilik” (G7 ) ölkələrinin liderlərinin Yaponiyada keçirilmiş sammitinin bəyannaməsində deyilir. “Biz təsdiqləyirik ki, Rusiyaya qarşı sanksiyaların uzadılması Moskvanın Minsk sazişlərinin tam icrasına və Ukraynanın ərazi bütövlüyünə hörmətlə yanaşılmasına dair hərəkətləri ilə əlaqədardır. Rusiya üzərinə götürdüyü öhdəlikləri tam icra etdikdən sonra sanksiyalar ləğv oluna bilər. Rusiyanın hərəkətləri bunu vadar edərsə, biz ona qarşı əlavə sanksiyalar tətbiq edəcəyik”, - deyə sammitin bəyannaməsində bildirilir. Bununla belə, G7 Ukrayna böhranının nizamlanması üçün Moskva ilə dialoqun davam etdirilməsinin vacibliyini qeyd edib.xeber100.com