Tacikistanda referendum keçirilir…

Bu gün Tacikistanda ölkə Konstitusiyasına düzəliş və əlavələrlə bağlı referendum keçirilir. Azərtac-ın verdiyi məlumata görə, əgər düzəliş və əlavələr ümumxalq səsverməsi yolu ilə qəbul olunarsa, Tacikistan Prezidenti Emoməli Rəhmon istənilən qədər prezident seçilə biləcək. Yeni düzəlişə görə, prezidentliyə namizədin yaş senzi 35-dən 30-a endiriləcək. Əsas qanuna edilən əlavəyə əsasən Konstitusiya Şurası ləğv olunacaq, dini xarakterli partiyanın yaradılması qadağan ediləcək. Tacikistan Konstitusiyası 1994-cü il noyabrın 6-da ümumxalq səsverməsi yolu ilə qəbul edilib. 1999-cu və 2003-cü illərdə Konstitusiyaya düzəliş və əlavələr olunub. Xatırladaq ki, Tacikistan Prezidentinin indiki səlahiyyət müddəti 2020-ci ildə başa çatır. Azərbaycan Milli Məclisinin deputatları İqbal Məmmədov, Rüfət Quliyev və Mərkəzi Seçki Komissiyasının nümayəndələri referendumda müşahidəçi kimi iştirak edirlər.xeber100.com

Poroşenko Ümumdünya Humanitar Sammitində iştirak edəcək

Bu gün Ukrayna prezidenti Petr Poroşenko Türkiyəyə işgüzar səfərə gələcək. Bu barədə Ukrayna prezidentinin mətbuat xidməti məlumat yayıb. P. Poroşenko İstanbulda keçiriləcək Ümumdünya Humanitar Sammitində iştirak edəcək. Ukrayna prezidenti sammitdə plenar iclasda çıxış edəcək, eyni zamanda siyasi liderlərin münaqişələrin qarşısının alınması sahəsində rolu ilə bağlı Dəyirmi Masada iştirak edəcək. Səfər 2 gün davam edəcək.xeber100.com

Ədalət və İnkişaf Partiyasının (AKP) II fövqəladə qurultayı Ankarada öz işinə başlayıb

Bu gün 14 ildən bəri Türkiyədə hakimiyyətdə olan Ədalət və İnkişaf Partiyasının (AKP) II fövqəladə qurultayı Ankarada öz işinə başlayıb. Apa-nın məlumatına görə, qurultayın başlamasından əvvəl sədrliyə namizəd Binali Yıldırım salonu dolaşaraq nümayəndələri salamlayıb. B. Yıldırımdan sonra salona gələn AKP-nin bu günə qədərki sədri və baş nazir Əhməd Davudoğlu isə salonu dolaşaraq qurultay nümayəndələriylə vidalaşıb. Qurultayı açmaq söz alan AKP sədrinin təşkilat məsələləri üzrə müavini Mustafa Ataş, partiya sədrliyinə yeni namizədlərin göstərilməsi üçün qurultay iştirakçılarına 5 dəqiqə vaxt verib, ancaq AKP sədrliyinə B. Yıldırımdan başqa namizəd göstərilməyib. M. Ataş partiyanın qurucu lideri olan prezident Ərdoğanın adını çəkərkən salondan alqış səsləri yüksəlib. AKP sədrinin müavini M. Ataş deyib ki, bu müqəddəs yürüşdə bir çox qadın və gənclərin imzası var: “Bu müqəddəs əmanəti 26 avqust 2014-cü ildə qurucu liderimizdən təhvil alaraq vəzifəsinin öhdəsində ləyaqətlə gələn Əhməd Davudoğluna təşəkkür edir, sədrliyə namizədimiz Binali Yıldırıma uğurlar diləyirəm”. M. Ataş qurultayın Rəyasət Heyətinin sədrliyinə ədliyyə naziri Bəkir Bozdağın namizədliyini irəli sürüb. Təklif yekdilliklə qəbul edilib. B. Bozdağ qurultayın proqramını oxuyandan sonra AKP-nin bu qurultayının da Türkiyənin demokratik həyatı üçün örnək olacağını vurğulayıb: “AKP-nin tək lideri var, o da prezidentimiz Rəcəb Tayyib Ərdoğandır". B. Bozdağ baş nazir Ə. Davudoğluya təşəkkürünü bildirib. AKP-nin II fövqəladə qurultayında məclisdə təmsil edilən və edilməyən partiyaların, QHT-lərin, araşdırma mərkəzlərinin təmsilçiləri iştirak edirlər.xeber100.com

“RİA Novosti”nin verdiyi xəbərə görə…

Rusiya nüvə silahsızlaşdırılmasında maraqlı olduğunu kifayət qədər nümayiş etdirmir. “RİA Novosti”nin verdiyi xəbərə görə, bunu Yaponiyaya səfəri ərəfəsində NHK telekanalına müsahibəsində ABŞ prezidenti Barak Obama deyib. Qeyd edək ki, 26-27 may tarixlərində Tokioda “Böyük Yeddilik” sammiti keçiriləcək. ABŞ prezidenti xatırladıb ki, hakimiyyətdə olduğu dövrdə Moskva ilə hücum silahlarının azaldılması haqqında (HSA-3) yeni sazişin imzalanmasına müvəffəq olub. Onun sözlərinə görə, bu saziş hər iki dövlətin nüvə potensialının azaldılmasına imkan yaradıb. “Düşünürəm ki, biz daha irəli gedə bilərik. Lakin Rusiya bu məsələdə daha böyük iş görməkdə maraqlı olduğunu nümayiş etdirməyib”, - deyə Obama qeyd edib. ABŞ prezidenti 1945-ci ildə Xirosimaya endirilən nüvə zərbəsinə görə üzr istəmək fikrində olmadığını bildirib. “Hər bir rəhbər, xüsusilə, müharibə dövründə, çox çətin qərarlar verir”, - deyə Obama qeyd edib.xeber100.com

“Yves Saint Laurent Marrakech” adlı muzey açılacaq

Mərakeşdə fransız əsilli dünya şöhrətli kutyurye İv Sen Loranın yaradıcılığına həsr olunmuş “Yves Saint Laurent Marrakech” adlı muzey açılacaq. Azərtac buro247.az saytına istinadla xəbər verir ki, rəssam dizaynerin adını daşıyan küçədə yerləşəcək muzeydə 500 geyim əşyası, 15 min aksessuar, on minlərlə eskiz və rəssamın sevimli əşyaları sərgilənəcək. Muzeydə, həmçinin 130 yerlik tamaşaçı zalı, kitab mağazası, terraslı restoran və 5000-dək kitabın olduğu kitabxana yer alacaq. Sahəsi 4 min kvadratmetrdən çox olan və zahirən parça saplarını xatırladacaq muzeyin konsepsiyasını dünya şöhrətli memarlar Olivye Marti və Karl Furner hazırlayıb. Qeyd edək ki, muzeyin 2017-ci ilin payızında istifadəyə verilməsi planlaşdırılır.xeber100.com

G7 sammitində təhlükəsizliyin təmin olunmasına 23 minədək polis əməkdaşı cəlb ediləcək

Yaponiya Milli Polis İdarəsinin yaydığı məlumata görə, İse-Şimada keçiriləcək G7 sammitində təhlükəsizliyin təmin olunmasına 23 minədək polis əməkdaşı cəlb ediləcək. Xəbər verdiyimiz kimi, dünyanın sənaye cəhətdən inkişaf etmiş dövlətlərinin liderlərinin Yaponiyanın bu istirahət zonasında iki gün davam edəcək sammiti mayın 26-da başlayacaq. Sammit başa çatdıqdan sonra ABŞ Prezidenti Barak Obamanın Hiroşimaya səfəri nəzərdə tutulur. Polis İdarəsindən bildiriblər ki, sammitin keçiriləcəyi ərazidə, ətraf rayonlarda, həmçinin G7 ölkələrinin liderlərini qəbul edəcək Çubu aeroportunda təhlükəsizliyi 23 min polis əməkdaşı təmin edəcək. Məlumatda qeyd edilir ki, 4600 polis əməkdaşı Hiroşimaya göndəriləcək. Həmin şəhərə polis bölmələri həm sammitin keçirildiyi ərazidən, həm də digər yerlərdən cəlb ediləcək.xeber100.com

Dnepropetrovsk şəhərinin adı dəyişdirilib…

Ukrayna Ali Radası Dnepropetrovsk şəhərinin adının dəyişdirilərək Dnepr adlandırılması barədə qərar qəbul edib. RİA "Novosti” agentliyinin verdiyi xəbərə görə, qərarın lehinə 247 deputat səs verib.İnqilabçı Qriqori Petrovskun adını daşıyan şəhər kommunizm elementlərinin ləğv edilməsi ilə bağlı qanun nəticəsində bu aqibətlə üzləşib.Şəhər 1926-cı ildə Dnepropetrovsk adını alıb. Öncə Yekaterinoslav adlandırılan şəhər 1796-1802-ci illərdə Novorossiysk adlandırılıb, daha sonra isə ad yenidən Yekaterinoslav olaraq dəyişdirilib. Bu silsilədən daha 900 yaşayış məntəqəsinin adının dəyişdiriləcəyi bildirilir. Artıq 700 inzibati və əraz vahidinin adı dəyişdirilib. Rusiya XİN-in rəsmi nümayəndəsi Mariya Zaxarova ukraynalı deputatları “yarımbeyinli zombilər” adlandıraraq Radanın qərarına reaksiya verib. “Əgər kommunizmin elementlərini ləğv etmək istəyirdilərsə, gərək əsl adı - Yekaterinoslavı geri qaytaraydılar. Ən pis halda Novorossiyski... Deputat deyil, 247 yarımbeyinli zombidir”, - deyə Rusiya XİN-in rəsmi nümayəndəsi “Facebook” səhifəsində bildirib.xeber100.com

Hind Okeanı Azad İqtisadi Zonası ölkələrinin konfransı…

İranın Çabahar şəhərində Hind Okeanı Azad İqtisadi Zonasına daxil olan ölkələrin konfransı keçirilir. Apa-nın İran  bürosunun məlumatına görə, konfransda 21 ölkənin nümayəndəsi iştirak edir. Toplantıya həmçinin ABŞ,  Fransa, Almaniya, Misir, Çin, İngiltərə və Yaponiya müşahidəçi qismində qatılıb. İrana qarşı sanksiyalar aradan qaldırıldıqdan sonra Çabaharda keçirilən konfrans ilk böyük beynəlxalq tədbirdir. Konfrans çərçivəsində sərgi də təşkil olunub. Sərgidə 300-dən çox xarici şirkət iştirak edir. Qeyd edək ki, Çabahar İranın Hind Okeanına açılan yeganə limanıdır . Bu liman böyük okean gəmilərini qəbul edə bilir. Hindistan, Yaponiya, Rusiya və Nigeriya investorları  Çabaharda enerji layihələrinə və liman infrastrukturunun genişləndirilməsinə sərmayə yatırır. İran hökuməti Çabahar dəmir yolunun Mərkəzi  Asiya ölkələrinin dəmir yoluna birləşdirilməsi, qaz boru xəttinin inşası, neft-kimya zavodunun tikilməsi kimi layihələri icra edir.xeber100.com

İranın nüvə proqramı müzakirə olunacaq

Mayın 19-da Brüsseldə İranın nüvə proqramı müzakirə olunacaq. Apa-nın xəbərinə görə, bu barədə Avropa Xarici Siyasət Xidmətinin məlumatında deyilir. Görüşdə Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Federika Mogerini və ABŞ, Böyük Britaniya, Fransa və Almaniyanın XİN rəhbərləri iştirak edəcək. “Tərəflər nüvə razılaşması ilə bağı öhdəliklərin yerinə yetirilməsi, İrana qarşı beynəlxalq sanksiyaların ləğvi prosesini müzakirə edəcəklər”, məlumatda vurğulanır. Qeyd edək ki, bu gün Brüsseldə NATO Şurasının XİN rəhbərləri səviyyəsində iki günlük iclası başlayır.xeber100.com

Rusiya Rio-2016-dan uzaqlaşdırıla bilər…

Əgər Ümumdünya Antidopinq Agentliyinin (WADA) tədqiqatı Soçidə keçirilən oyunlarda kütləvi qanun pozuntularına yol verildiyini təsdiqləsə, bütün rusiyalı idmançılar Rio-de-Janeyroda keçiriləcək Yay Olimpiya Oyunlarından kənarlaşdırıla bilər. Bu barədə Beynəlxalq Olimpiya Komitəsinin (BOK) başçısı Tomas Bax xəbərdarlıq edib.Azərtac Rusiyanın NTV telekanalına istinadla xəbər verir ki, Tomas Bax Almaniyanın “Frankfurter Allgemeine Zeitung” qəzetinə müsahibəsində WADA-nın tədqiqatının nəticələrinə görə kollektiv və fərdi məsuliyyət barədə qərar çıxarılacağını bildirib. Hazırda yalnız rusiyalı yüngül atletləri bütün yarışlardan, o cümlədən Rio Olimpiadasından kənarlaşdırmaq barədə qərar verilib. Moskva antidopinq laboratoriyasının keçmiş başçısı Qriqori Rodçenkovun Soçi-2014-də dopinq nümunələrinin kütləvi dəyişdirilməsi barədə bəyanatından sonra bütün Rusiya yığmasının diskvalifikasiya olunması təhlükəsi yaranıb. Rusiyanın İdman Nazirliyi isə öz növbəsində Soçi Olimpiadasında müstəqil müşahidəçilərin daimi nəzarəti altında müxtəlif ölkələrin mütəxəssislərinin işlədiyini və bu səbəbdən dopinqlə bağlı kütləvi manipulyasiyanın qeyri-mümkün olduğunu bildirib.xeber100.com