Asiya İnkişaf Bankı Tacikistana 25 milyon dollar vəsait ayırıb

Asiya İnkişaf Bankı vaksin alınması üçün Tacikistana 25 milyon dollar vəsait ayırıb.Azərtac xəbər verir ki, bu haqda jurnalistlərə Tacikistanın maliyyə naziri Fayziddin Kaxxorzoda bildirib. O deyib ki, bu vəsait peyvənd, şprislər və vaksini saxlamaq üçün soyuducular alınmasına xərclənəcək.Qeyd edilib ki, ötən ayın sonunda ölkəyə 300 min doza Çin vaksini gətirilib, bu, dost ölkənin hədiyyəsidir. "COVAX" proqramı çərçivəsində Dünya Səhiyyə Təşkilatı da ölkəyə192 min doza “AstraZanesa” vaksini göndərib.Qeyd olunub ki, indiyədək Tacikistanda 205 min insan peyvənd edilib.Xatırladırıq ki, Tacikistanda mütləq vaksinasiya elan olunub.xeber100.com

İsveç parlamentində etimadsızlıq votumu üzrə səsvermə keçirilib

İyunun 21-də İsveç parlamentində hazırkı Baş nazir Stefan Leuvenə etimadsızlıq votumu üzrə səsvermə keçirilib.Azərtac xarici KİV-lərə istinadla xəbər verir ki, parlament üzvlərinin yarıdan çoxu - 349 deputatından 181-i hökumət başçısına etimadsızlıq ifadə edib.Etimadsızlıq votumu barədə maddə İsveçin 1974-cü ildə qəbul edilən konstitusiyasında öz əksini tapıb. İsveç parlamentinin indiyədək bununla bağlı keçirdiyi on bir səsvermənin hamısı mənfi nəticələnib. Beləliklə, Stefan Leuven ölkə tarixdə etimadsızlıq göstərilən ilk Baş nazir olub.Qeyd edək ki, iyunun 17-də İsveçin demokratlar partiyası Baş nazirə etimad votumu barədə parlamentdə səsvermə keçirilməsini tələb edib. Bir qədər əvvəl sol partiyanın lideri Nuşi Dadqostar hökumətin yeni evlərin kirayəsinə bazar qiymətlərinin tətbiq edilməsi barədə təklifinə görə Stefan Leuvenə etimad göstərmədiyini bildirib. Xristian-demokratlar və mülayim koalisiya partiyaları da parlamentdə baş nazirin əleyhinə səs veriblər.Səsvermədən sonra Stefan Leuven ya istefa verməli, ya da növbədənkənar seçkilər təyin etməlidir.xeber100.com

Azadlıq Günü ABŞ-da federal bayram elan edilib

ABŞ-da hər il iyunun 19-da qeyd edilən “Juneteenth” və ya belə adlandırılan “Azadlıq Günü” Birləşmiş Ştatlarda köləliyə həqiqətən son qoyulması deməkdir.Azərtac xəbər verir ki, bu həftə ABŞ Senatı həmin günün federal bayram elan edilməsi haqqında qanunu yekdilliklə qəbul edib.1865-ci il aprel ayında ABŞ-da Vətəndaş müharibəsi başa çatandan sonra, iyunun 19-da İttifaq ordusunun generalı Qordon Qreyncer Texas ştatında köləliyin ləğv olunduğunu elan edib. Bu hadisə emansipasiya (asılılıqdan azadlıq) elan olunandan təqribən iki il sonra baş verib. İndiyə qədər bu bayram 47 ştatda və Kolumbiya dairəsində qeyd olunurdu, indi isə milli səviyyədə qeyd ediləcək.Senatda çoxluq təşkil edən demokratların lideri Çak Şumer belə bir qanun qəbul edilməsi təklifini irəli sürüb və senatorlardan heç biri buna etiraz etməyib. Keçən il bu qanun layihəsinin qəbul edilməsinə imkan verməmiş senator Ron Conson iyunun 15-də öz etirazını geri götürüb. Conson bu barədə bəyanatında deyib: “Çox qəribədir, indi vergi ödəyiciləri köləliyə son qoyulmasını bayram etmək üçün federal qulluqçulara ödənişli məzuniyyət verməlidirlər, lakin aydındır ki, Konqres bu məsələnin müzakirəsini davam etdirmək istəmir. Buna görə mən etiraz etməyə hazırlaşmıram”.Qanun layihəsi Senatdan Nümayəndələr Palatasına daxil olacaq. Burada qəbul ediləcəyi halda sənəd Bayden tərəfindən imzalanacaq və iyunun 19-u ABŞ-da 11-ci federal bayram olacaq.xeber100.com

İran İslam Respublikasında 13-cü prezident seçkiləri keçiriləcək

İyunun 18-də İran İslam Respublikasında 13-cü prezident seçkiləri keçiriləcək.Azərtac İran mətbuatına istinadla xəbər verir ki, qanuna əsasən, bu gün (17 iyun) ölkə üzrə sükut günüdür. COVID-19 pandemiyası səbəbindən səsvermə sosial məsafə və gigiyenik tədbirlər gözlənilməklə keçiriləcək. Səsvermə saat 07:00-da başlayacaq 00:00-da başa çatacaq. Əgər ehtiyac olarsa, Daxili İşlər Nazirliyinin nəzdində yaradılmış Seçki Qərargahı səsvermə prosesini gecə saat 02:00-dək uzada bilər.Rəsmi məlumata görə, İranda 59 milyondan çox seçici var. Bu il 1 milyon 400 min nəfər səsvermədə ilk dəfə iştirak edəcək. Bir sıra xarici ölkələrdə də seçki məntəqələri yaradılıb. İrandan kənarda yaşayan 3,5 milyon seçici ölkə xaricində səs verəcək.Prezidentlik postu uğrunda 4 namizəd mübarizə aparır - Məhkəmə Hakimiyyətinin sədri İbrahim Rəisi, Məsləhət Şurasının katibi Möhsün Rzai, deputat Əmirhüseyn Qazizadə-Haşimi və Mərkəzi Bankın sabiq direktoru Əbdünnasir Himməti.Səsverməni ilkin nəticələrinin iyunun 19-da açıqlanacağı gözlənilir. Namizədlər bərabər səs toplasalar, seçkilərin ikinci turu keçiriləcək.xeber100.com

Yerin müşahidəsi üçün 4 peyk eyni raketdaşıyıcı ilə orbitə çıxarılıb

Çin Yerin müşahidəsi üçün 4 peyki eyni raketdaşıyıcı ilə orbitə çıxarıb.Azərtac xəbər verir ki, peykləri orbitə çıxaran "Böyük yürüş-2C" (Long şəhərində March-2D) raketinin buraxılışı Tayyuan buraxılış məntəqəsindən iyunun 11-də saat 11:03-də baş tutub. Yerkin məsafədən zondlanması üçün nəzərdə tutulan “Beijing-3” kommersiya peyki ətraf mühitin monitorinqi, şəhər idarəetməsi, təbii fəlakətlərlə mübarizə məqsədi ilə istifadə olunacaq.Digər 3 peyk isə əsasən sahil və dayaz dəniz zonasında ekoloji vəziyyətin tədqiqi, ali təhsil ocaqlarında aerokosmik kadrların hazırlanmasına dəstək üçün nəzərdə tutulub.Qeyd edək ki, bu, "Long March" seriyasından 373-cü raket buraxılışı olub.xeber100.com

Ümumdünya Səhiyyə Təşkilatının məlumatına görə…

Avropada COVID-19 əleyhinə vaksinasiya səviyyəsi koronavirus infeksiyasına yoluxma hallarının təkrar artmasının qarşısını almaq üçün yetərli deyil.Azərtac xarici KİV-lərə istinadla xəbər verir ki, bu barədə Ümumdünya Səhiyyə Təşkilatının (ÜST) Avropa bürosunun direktoru Hans Klüqe mətbuat konfransında bildirib.O qeyd edib ki, hazırda regionda koronavirusa yoluxanların, xəstəxanada müalicə alanların və ölənlərin ümumi sayı azalsa da, hakimiyyət orqanları 2020-ci ilin yay aylarında olduğu kimi, məhdudiyyət tədbirlərini vaxtından əvvəl ləğv etməməlidir.“Ötən ilin yay fəsli ərzində nisbətən cavan yaş qrupları, sonra yaşlı insanlar arasında xəstələrin sayı tədricən çoxalmağa başladı. Bu da nəticə etibarilə payız və qış aylarında yoluxma hallarının kəskin artmasına, karantinlərə və çoxsaylı ölüm hallarına gətirib çıxardı”, - deyə Hans Klüqe vurğulayıb.xeber100.com

Təhlükəsizlik sahəsində əlaqələri möhkəmləndirmək barədə razılıq əldə edilib

Yaponiya və Avstraliya təhlükəsizlik sahəsində əlaqələri möhkəmləndirmək barədə razılığa gəliblər.Azərtac xəbər verir ki, bu barədə razılaşma iyunun 9-da nazirlərin iştirakı ilə “2+2” formatında keçirilən onlayn görüşdə əldə edilib.Yaponiyanın xarici işlər naziri Toşimitsu Moteqi və müdafiə naziri Nobuo Kişi avstraliyalı həmkarları Mariz Peyn və Piter Dattonla müxtəlif məsələləri müzakirə ediblər.Görüşün əvvəlində T.Moteqi bildirib ki, Hind-Sakit okean regionunda birtərəfli qaydada status-kvonun dəyişdirilməsinə cəhdlər səbəbindən strateji rəqabətin artması beynəlxalq qaydalarda ciddi problemlər yaradır. Buna görə iki ölkə arasında təhlükəsizlik və müdafiə sahəsində əməkdaşlığın genişləndirilməsi üçün müzakirələrə ciddi ehtiyac var.N.Kişi isə deyib ki, ümumi dəyərlərə və strateji maraqlara malik ölkələrin güclərini birləşdirməsi bu gün aktual xarakter alıb. Hind-Sakit okean regionunda sülhün və sabitliyin qorunması üçün Yaponiya özünümüdafiə qüvvələri və Avstraliya silahlı qüvvələri birlikdə inkişaf etməlidirlər.Görüşdə nazirlər Şərqi Çin və Cənubi Çin dənizlərində baş verən hadisələrlə bağlı da fikir mübadiləsi aparıblar.Tokio ilə Kanberra arasında müdafiə sahəsində əməkdaşlığı möhkəmləndirmək məqsədilə Avstraliya hərbçilərinin 2016-cı ildə Yaponiyada qüvvəyə minmiş qanuna müvafiq olaraq özünümüdafiə qüvvələri tərəfindən müdafiə edilən əcnəbi hərbi tərəfdaşlar siyahısına daxil edilməsi qərara alınıb.xeber100.com

İtaliya hökuməti ölkə əhalisinin 80 faizini peyvəndləməyi hədəfləyir

İtaliya hökuməti 12-15 yaş arası uşaqlar da daxil olmaqla ölkədə 54,3 milyon nəfəri sentyabr ayına kimi koronavirus əleyhinə peyvənd olunmasını hədəf alıb.Azərtac xəbər verir ki, bu, ölkə əhalisinin 80 faizi deməkdir. Vaksinasiya kampaniyası üzrə məsul hökumət komissarı Françesko Paolo Fiqliuolo bildirib ki, bu məqsədə nail olmaq üçün resurslar, zaman və vəsaitlərdən düzgün istifadə olunmalıdır.Qeyd edilib ki, aktual pandemiya ssenarilərinə əsasən, ölkə sakinləri üçün peyvəndin üçüncü dozasına da ehtiyac yarana bilər. Bu tələbat bir sıra faktorlardan, xüsusilə də epidemioloji vəziyyətin inkişafından asılı olacaq.Koronavirus pandemiyasının Avropada ən ağır zərbələrdən birini vurduğu İtaliyada hazırda vaksinasiya kampaniyası tam sürətlə irəliləyir və ölkə üzrə tətbiq olunan peyvənd dozalarının gündəlik miqdarı 600 mini ötüb. Eyni zamanda, koronavirusa yoluxma halları da azalır və iyunun 7-də yeni yoluxma hallarının sayı 1273 olub. Bu, 15 sentyabr 2020-ci ildən bəri ən aşağı yoluxma göstəricisidir.İyunun 7-dən etibarən İtaliyanın 20 regionundan yeddisi “ağ zona” elan edilib və pandemiya ilə əlaqədar tətbiq edilən məhdudiyyətlər ən aşağı səviyyəyə endirilib. Digər regionlar isə iyunun 21-dək “sarı zona” olaraq qalacaqlar.xeber100.com

“Leqa” və “Forza İtalia” partiyaları əməkdaşlığa dair razılıq əldə ediblər

İtaliyada sağçı “Leqa” və mühafizəkar “Forza İtalia” partiyaları yaxın gələcəkdə sıx əməkdaşlığa dair razılıq əldə ediblər.Azərtac xəbər verir ki, “Leqa“ rəhbəri, keçmiş daxili işlər naziri Matteo Salvini və “Forza İtalia“ partiyasının sədri, keçmiş Baş nazir Silvio Berluskoni hazırkı Baş nazir Mario Draqinin rəhbərlik etdiyi hökumətin fəaliyyətini dəstəkləmək üçün sağ-mərkəzçi partiyaların federasiyasını yaradacaqlar. Onlar, eyni zamanda, İtaliya parlamentində birgə fraksiyanın yaradılması məsələsini də nəzərdən keçiriblər.Federasiyanın planları bu ilin oktyabr ayında keçiriləcək bələdiyyə seçkilərində ölkənin bir sıra regionlarında 1300 bələdiyyə üçün birgə namizədlərin müəyyən edilməsi, eyni zamanda, 2023-cü ildə keçiriləcək parlament seçkilərinə hazırlaşmaqdır. Bələdiyyə seçkilərində Roma, Milan, Neapol, Turin və Bolonya kimi mühüm şəhərlərdə yerli özünüidarəetmə orqanlarına seçkilər keçiriləcək.xeber100.com

ABŞ-ın Enerji İnformasiya Administrasiyasının məlumatı

ABŞ-ın xam neft ehtiyatları azalır.Azərtac xəbər verir ki, bu barədə ABŞ-ın Enerji İnformasiya Administrasiyasının (EIA) məlumatında deyilir. Bildirilir ki, ötən hesabat həftəsində ölkədəki neft ehtiyatları 5,1 milyon barel (1 faiz) azalaraq 479,3 milyon barel olub. Bazar proqnozları ehtiyatların 2,1 milyon barel azalacağı istiqamətində idi. Əvvəlki həftə neft ehtiyatları 1,7 milyon barel azalmışdı.ABŞ-ın strateji neft ehtiyatları da 600 min barel geriləyərək 627,8 milyon barel olub.Ölkənin benzin ehtiyatları isə hesabat həftəsində 1,5 milyon barel artaraq 234 milyon barel təşkil edib. Bazar proqnozları ehtiyatların artacağı istiqamətində idi. Benzin ehtiyatları əvvəlki həftə 1,7 milyon barel azalmışdı.xeber100.com