Türkiyə-Rusiya əməkdaşlığı

Türkiyə prezidenti Rəcəb Tayyib Ərdoğan ABŞ-da çıxışı zamanı regional problemlərin həlli üçün Türkiyə-Rusiya əməkdaşlığının bərpasının vacib olduğunu bildirib. Türkiyə mətbuatının məlumatına görə, bu barədə Ərdoğan Vaşinqtona səfəri çərçivəsində Brukinq Universitetində çıxışı zamanı bildirib: “Təəssüf ki, 24 noyabrdan sonra bizim Rusiya ilə münasibətlərimizdə çətin dövr yaşanır. Bu münasibətlər SSRİ-nin süqutundan sonra uğurla inkişaf edib, lakin Rusiya rəhbərliyinin son illər apardığı siyasət ucbatından  təyyarə insidentindən xeyli əvvəl pisləşməyə başlayıb. Moskvanın anlamağa çətinlik çəkdiyimiz sərt reaksiyasına baxmayaraq, regional problemlər bizim əməkdaşlığımızın bərpa edilməsini zəruri edir, çünki Rusiya və Türkiyə coğrafiyamızın mühüm ölkələridir.  Rusiya həmkarlarımızın bunu anlayacağını və bu zəruriliyi qiymətləndirəcəyini gözləyirik”. Türkiyə prezidenti həmçinin Ukraynadakı böhranın bu ölkənin ərazi bütövlüyünün saxlanılması şərti ilə Minsk sazişləri əsasında nizamlanmasının vacib olduğunu  qeyd edib. Xatırladaq ki, Rusiya-Türkiyə münasibətləri 2015-ci ilin noyabrın 24-dən sonra, Türkiyəyə məxsus təyyarənin Rusiyanın SU-24 təyyarəsini vurmasından sonra pisləşib.  

Ukraynaya 335 mln dollar ayrılacaq

ABŞ  Ukraynaya Silahlı Qüvvələri, Milli Qvardiya və Dövlət Sərhəd Xidməti daxil olmaqla təhlükəsizlik sahəsinin islahatlaşdırılması üçün əlavə  335 mln dollar ayıracaq. “Gazeta.ru”nun verdiyi xəbərə görə, bu barədə Ukrayna prezidenti Pyotr Poroşenko ABŞ-ın vitse-prezidenti Co Baydenlə keçirdiyi danışıqların yekunlarına dair “Feysbuk” səhifəsində yazıb.  O həmçinin Ukraynaya hərtərəfli dəstək göstərdiklərinə görə Baydenə və ABŞ-ın dövlət katibi Con Kerriyə minnətdarlığını bildirib.    

ABŞ-Türkiyə münasibətləri

ABŞ prezidenti Barak Obama Vaşinqtonda keçirilən nüvə təhlükəsizliyi sammiti çərçivəsində türkiyəli həmkarı Rəcəb Tayyib Ərdoğanla görüşüb. “RİA Novosti”-nin verdiyi xəbərə görə, bu barədə Ağ Evin yaydığı məlumatda bildirilir. Məlumata görə, görüşdə təhlükəsizlik məsələləri, habelə, terrorçuluq və qanunsuz miqrasiya ilə mübarizə məsələləri müzakirə olunub. Barak Obama martın 31-də Diyarbəkirdə törədilən terror aktı nəticəsində həlak olanlarla bağlı Ərdoğana başsağlığı verərək, ABŞ-ın Türkiyənin təhlükəsizliyinin təmin olunmasına və terrorçuluqla ümumi mübarizəyə verdiyi dəstəyin davam etdiriləcəyini təsdiqləyib. İki ölkə lideri həmçinin İŞİD-lə mübarizə məsələlərini də müzakirə ediblər. Qeyd edək ki, sammit ərəfəsində mətbuatda Obama-Ərdoğan görüşünün baş tutmayacağı barədə məlumatın yayılması intriqaya səbəb olub. Müşahidəçilər bunun ABŞ-Türkiyə münasibətlərinin soyuması ilə əlaqələndiriblər. Lakin, ABŞ administrasiyası sonradan prezidentlər arasında görüşün baş tuta biləcəyi barədə açıqlama verib.  

Rusiyaya qarşı sanksiyalar

Rusiyaya qarşı sanksiyalar sərtləşdirilməlidir. Rusiya mətbuatının yaydığı məlumata görə, bunu Ukrayna prezidenti Petro Poroşenko Vaşinqtonda çıxış edərkən bəyan edib. Onun sözlərinə görə,  Ukraynanın ərazi bütövlüyü bərpa edilməyincə Rusiyaya qarşı tətbiq edilən sanksiyalar qüvvədə qalmalıdır. “Silahlı münaqişə nəticəsində Donetsk və Luqansk vilayətlərində 2014-cü ildən etibarən Ukrayna Silahlı Qüvvələrinin 2 700 hərbi qulluqçusu daxil olmaqla, 10 min insan həlak olub. İki milyonadək insan ölkənin digər bölgələrinə üz tutmağa məcbur olub. Ukrayna ərazisinin 7% işğal altındadır, ölkə iqtisadiyyatının 20%-i dağılıb”, deyə P.Poroşenko bildirib. O həmçinin Qərbi Ukraynaya hərbi yardım göstərməyə çağırıb.

Moldova-2018

  TASS agentliyinin məlumatına görə, Moldovanın Rumıniyaya birləşdirilməsinin tərəfdarları Milli Sarayda "Ölkə Şurası-2" qurultayını keçirirlər. Bu, 1918-ci il martın 27-də keçirilən və ölkənin Rumıniyaya birləşdirilməsinə səs verilmiş "Ölkə Şurası"nın analoqudur. Qurultay iştirakçıları "Ölkə Şurası"nın yeni tərkibini - parlamenti seçiblər. İctimai və siyasi xadimlərin daxil olduğu bu parlament 2018-ci ilin martına qədər iki ölkənin birləşməsi ilə bağlı strategiya və sənədləri hazırlamalıdır. Çünki həmin vaxt ölkələrin birləşməsinin 100 ili tamam olur. Tədbirin təşkilatçısı olan  "Actiunea-2012" (Hərəkat-2012) vətəndaş platforması qurultaydan sonra Kişinyovun mərkəzi magistralında çoxminli marş keçiriləcəyini elan edib və aksiya başlayıb. Bir neçə gün öncə Kişinyovun mərkəzində Moldovanın Rumıniyaya birləşməsinin əleyhinə olan Moldova Respublikası Sosialist Partiyası və ictimai təşkilatların tərəfdarları da toplanıb. Aksiyada ümumilikdə 1000 nəfərdən çox adam iştirak edib. Moldovanın Rumıniyaya birləşdirilməsinin tərəfdarları və əleyhdarları arasında toqquşmalara yol verilməməsi üçün Moldova hakimiyyəti yüksək təhlükəsizlik tədbirləri görüb və şəhərin mərkəzi bağlanıb.  

Təhlükəsizlik sammiti çərçivəsində

Avstraliya Ukraynaya atom elektrik stansiyasının tələbatları üçün uran tədarük edəcək. APA-nın “TASS”a istinadən verdiyi xəbərə görə, müvafiq sazişin yaxın günlərdə Vaşinqtonda Avstraliya XİN rəhbəri Culi Bişop və Ukrayna prezidenti Pyotr Poroşenkoarasında imzalanması gözlənilir.  Sazişin martın 31-dən aprelin 1-dək keçiriləcək nüvə təhlükəsizliyi sammiti çərçivəsində imzalanacağı gözlənilir.

ABŞ Azərbaycanın ərazi bütövlüyünü dəstəkləyir

Amerika Birləşmiş Ştatlarının xarici siyasəti federal hökumət tərəfindən müəyyən edilir. ABŞ tərəfindən Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyi dəstəklənir. Bunu Trend-ə Havay ştatının nümayəndələr palatasında qəbul edilmiş qərarı şərh edən XİN-nin Mətbuat xidmətinin rəhbəri Hikmət Hacıyev bildirib. H.Hacıyev deyib: "Xatırlatmaq istərdim ki, ABŞ-dakı radikal erməni lobbisi 10 mart 2016-cı il tarixində bu məsələni ABŞ-ın Havay ştatının senatının gündəliyinə gətirməyə çalışsa da, uğursuzluqla üzləşdi. Belə ki, ştat senatı gündəliyə gətirilməsinə cəhd edilən anti-Azərbaycan xarakterli iki qətnaməni rədd etdi. Ştat Senatının rəhbərliyi 11 mart tarixində rəsmi bəyanat verərək, ABŞ siyasətinə uyğun olaraq Azərbaycanın ərazi bütövlüyünə açıq dəstək ifadə etdi və Havay ştat senatının bu qətnamələri qəbul etməyəcəyini diqqətə çatdırdı". XİN rəsmisi qeyd edib ki, bu uğursuzluqdan sonra təxribatçı və cılız əməllərini davam etdirən Ermənistan və ABŞ erməni lobbisi Havay ştatının yerli qanunverici orqanının nümayəndələr palatasına üz tutdu: "Bütün bunlar bir daha ona dəlalət edir ki, Ermənistanın danışıqlar prosesində iştirakı yalnız imitasiya və beynəlxalq ictimaiyyəti aldatmaq məqsədi daşıyır. Ermənistanın əsl məqsədi işğal olunmuş Azərbaycan ərazilərinin ilhaq edilməsidir".  

Xəbərdarlıq

ABŞ Dövlət Departamenti Türkiyədə terror aktları təhlükəsi ilə əlaqədar vətəndaşlarına bu ölkəyə səfərin təhlükəli olması barədə xəbərdarlıq edib, habelə diplomatların və digər işçilərin ailəsinin təxliyə edilməsi barədə məlumat yayıb. “RİA Novosti”nin verdiyi xəbərə görə, qurumun mətbuat xidmətinin yaydığı məlumata əsasən, müvafiq göstəriş ABŞ hökumətinin  Adanakı konsulluğunda, habelə İzmir və Muqla əyalətlərində çalışan əməkdaşlarının ailələrinə verilib. Məlumata görə, konsulluğun özü fəaliyyətini davam etdirəcək.

Hərbi-texniki əməkdaşlıq

2015-ci ildə Rusiya 14,5 milyard dollarlıq hərbi təyinatlı məhsullar ixrac edib. “RİA Novosti”nin verdiyi məlumata görə, bunu Rusiya prezidenti Vladimir Putin xarici ölkələrlə hərbi-texniki əməkdaşlığa dair prezident komissiyasının iclasında deyib. Onun sözlərinə görə, bu rəqəm nəzərdə tutulan göstəricidən çoxdur: “Rusiya döyüş silahlarının dünya bazarına çıxarılması baxımından dünya ölkələri arasında ikinci yeri tutur. Bununla yanaşı Rusiya özündən sonrakı ölkələrdən xeyli irəlidədir”.  

Regional mövzular ətrafında fikir mübadiləsi

Martın 31-də Vaşinqtonda ABŞ-ın vitse-prezidenti Cozef Bayden və Türkiyə prezidenti Rəcəb Tayyib Ərdoğan arasında görüş keçiriləcək. Bu barədə Baydenin mətbuat xidməti məlumat yayıb. Türkiyə prezidentinin nümayəndələrinin məlumatına görə, Ərdoğan nüvə təhlükəsizliyi sammitində iştirak etmək üçün bu gün ABŞ-a yola düşəcək. Məlumata görə, səfər aprelin 2-dək davam edəcək. İkitərəfli görüşlərdə nüvə təhlükəsizliyi ilə bağlı məsələlərlə yanaşı Paris, İstanbul, Ankara və Brüsseldə törədilmiş terror aktlarının müzakirə ediləcəyi, regional mövzular ətrafında fikir mübadiləsi keçiriləcəyi gözlənilir. Qeyd edək ki,  nüvə təhlükəsizliyi sammiti martın 31-dən aprelin 1-dək davam edəcək.