Ukraynada sərt karantin rejimi tətbiq edilə bilər

Kiyevin hakimiyyət orqanları xəbərdarlıq ediblər ki, paytaxtda koronavirusun sürətlə yayılacağı təqdirdə sərt karantin rejimi tətbiq edilə bilər. Ötən gün Kiyevdə COVID-19 xəstəliyinə 180 yeni yoluxma faktı qeydə alınıb.Azərtac xəbər verib ki, bu barədə Kiyev şəhərinin meri Vitali Kliçko bəyan edib.O, vətəndaşları koronavirusa yoluxma təhlükəsinə ciddi yanaşmağa çağırıb.Kliçko deyib: “Əgər xəstəlik sürətlə yayılarsa, o halda yenidən ciddi məhdudiyyətlərə qayıtmalı olacağıq. Bunun baş verib-verməməsi bu gün hər birimizdən asılıdır, ən sadə qaydalara nə dərəcədə riayət etməyimizdən, öz sağlamlığımıza necə diqqətlə yanaşmağımızdan asılıdır”.Xatırladaq ki, Ukraynada artıq iki gündür ardıcıl olaraq yeni yoluxmaların sayında antirekord müşahidə edilir, avqustun 5-də 1318 nəfərin bu xəstəliyə yoluxması faktı təsdiqlənib.Avqustun 5-nə olan vəziyyətə görə, Ukraynada 12 region karantinin yumşaldılmasına hazır deyil, onların arasında Kiyev də var. Ölkə paytaxtında xəstəliyin dinamikasının göstəricisi həddini aşıb.xeber100.com

Hökumətlərarası İnkişaf Təşkilatının bəyanatına əsasən…

Cari ilin sonunda Afrikanın şərqində 50 milyondan çox insan aclıq təhlükəsi ilə üzləşəcək. Azərtac xəbər verir ki, bu barədə qitənin 8 ölkəsini birləşdirən Hökumətlərarası İnkişaf Təşkilatı (IGAD) bəyanat yayıb.IGAD Zimbabve başda olmaqla Şərqi Afrika ölkələrinin hökumətlərini, habelə BMT-nin Ərzaq Proqramını gözlənilən aclığın qarşısını almaq üçün təcili tədbirlər görməyə çağırıb. Təşkilatın bəyanatında qeyd edilib ki, COVID-19 pandemiyası, quraqlıq və iqtisadiyyatın çökməsi sözügedən regionda böyük humanitar fəlakətə səbəb ola bilər. IGAD üzv ölkələrin hökumətlərinə və tərəfdaşlarına müraciət edərək, onları təcili texniki və maliyyə yardımı göstərməyə çağırıb.Təşkilatın icraçı direktoru Vorkneh Gebeyehu bildirib ki, qarşıdakı aylarda Şərqi Afrika ölkələrində əhalinin yoxsul təbəqələrinə ərzaq yardımları üçün vahid strategiya hazırlanmalıdır. Eyni zamanda, həmin dövlətlər ticarəti canlandırmaq üçün sərhədlərini açmalıdır.Ümumdünya Səhiyyə Təşkilatının son məlumatına əsasən, Afrikada yeni növ koronavirusa yoluxanların sayı 972 minə çatıb, daha 20 min 600 nəfər isə həyatını itirib.xeber100.com

Miqrantlara iş icazəsi verilməsi proseduru mürəkkəbləşdirilə bilər

Rusiyada miqrantlara iş icazəsi verilməsi proseduru mürəkkəbləşdirilə bilər.Azərtac xəbər verir ki, bu barədə Təhlükəsizlik Şurasının sədr müavini Dmitri Medvedev məlumat verib. O qeyd edib ki, əcnəbi vətəndaşlara işəgötürəndən təsdiq gəldiyi halda Rusiyada işləmək icazəsi verilməsi məsələsi müzakirə olunur. D.Medvedev ərəb ölkələrinin bu sahədə təcrübəsindən faydalanmağı təklif edib. Belə ki, bu ölkələrdə işə götürən tərəf əcnəbi vətəndaşa görə tam məsuliyyət daşıyır.Pandemiya ilə əlaqədar Rusiyada miqrantların 40 faizinin işini itirdiyini qeyd edən Təhlükəsizlik Şurasının sədr müavini belə şəraitdə kriminal durumun pisləşməsi təhlükəsindən ehtiyat etdiyini vurğulayıb. Onun fikrincə, əmək müqaviləsində işəgötürənin miqrantın davranışına, həm də fors-major vəziyyətlərdə onun maddi durumuna görə məsuliyyət daşıması bəndi yer almalıdır.xeber100.com

Londonun “Heathrow” aeroportu yeni layihəyə start verəcək

Londonun “Heathrow” aeroportu yay turizm mövsümünü xilas etmək üçün yaxın günlərdə sərnişinlərin koronavirus testindən keçirilməsi üzrə layihəyə start verəcək.Azərtac xəbər verir ki, bu barədə Böyük Britaniyanın ən iri hava limanının icraçı direktoru Con Holland-Key “The Daily Telegraph” qəzetinə müsahibəsində bildirib.Onun sözlərinə görə, iki həftədən sonra “Heathrow” ölkəyə daxil olan sərnişinlərin iş rejimində testdən keçirilməsinə başlaya bilər. Bir testin qiyməti 150 avro təşkil edəcək. Əgər testin cavabları mənfi nəticələnsə, 5-8 gündən sonra təkrar test keçiriləcək. Beləliklə, insan orqanizmində koronavirus aşkarlanmasa, Birləşmiş Krallıq hökumətinin müəyyən etdiyi iki həftəlik karantin rejimi iki dəfə azaldıla bilər.Con Holland-Key ölkə hökumətinin də bu prosesi başlamaqda maraqlı olduğunu deyib.İyulun 25-də Böyük Britaniyanın Nəqliyyat Nazirliyi İspaniyadan gələnlər üçün yenidən iki həftəlik məcburi karantin rejiminin tətbiq olunacağını elan edib. Birləşmiş Krallıq koronavirus pandemiyası dövründə Avropanın sərhədləri bağlamayan azsaylı dövlətlərindən biridir. Bununla yanaşı, xaricdən ölkəyə daxil olan şəxslər 14 günlük izolyasiya rejiminə əməl etməlidir.xeber100.com

“South China Morning Post” qəzetinin məlumatı

XR Dövlət Şurasının Baş Nazirinin müavini Lyu He və ABŞ-ın ticarət danışıqlarındakı nümayəndəsi Robert Laythayzer avqust ayında Çin-Amerika ticarət sazişinin ilk mərhələsi üzrə əldə edilən aralıq nəticələri və gələcək addımları müzakirə etməyi planlaşdırır.“South China Morning Post” qəzetinə istinadla xəbər verir ki, danışıqlar yarım ildə bir dəfə yüksək səviyyədə keçiriləcək mütəmadi məsləhətləşmələr barədə sazişə uyğun hazırlanır. Tərəflər sənədin imzalandığı dövrdən bəri əldə olunan irəliləyişi qiymətləndirəcək.Bir müddət öncə ABŞ Prezidenti Donald Tramp pandemiya fonunda Pekinlə ikitərəfli ticarət sazişinin əhəmiyyətinin azaldığını bildirib. O, eyni zamanda, Çinin Amerika istehsalı olan kənd təsərrüfatı məhsullarını rekord həcmdə almağa başladığını qeyd edib.Rəsmi statistikaya əsasən, yanvar ayından iyunadək ÇXR və Birləşmiş Ştatlar arasında ticarət dövriyyəsi illik əmsalda 9,7 faiz azalaraq 233,98 milyard dollar təşkil edib. Çindən ABŞ-a ixrac həcmi 11.1 faiz aşağı düşərək 177,55 milyard dollara, Amerika məhsullarının idxalı isə 4,8 faiz azalaraq 56,43 milyard dollara enib.Qeyd edək ki, yanvarın 15-də Vaşinqtonda ABŞ və Çin arasında ticarət sövdələşməsinin ilk fazası üzrə saziş əldə olunub. Sənədi Birləşmiş Ştatlar Prezidenti Donald Tramp və Çin Baş Nazirinin müavini Lü He imzalayıb. Donald Trampın sözlərinə görə, saziş ticarət defisitini aradan qaldırmağa imkan verəcək.xeber100.com

Hindistan Federal Səhiyyə Nazirliyinin açıqlamasına əsasən…

Hindistanda ötən sutka ərzində COVID-19 səbəbindən 757 ölüm qeydə alınıb. Bununla da ölkədə COVID-19 qurbanlarının sayı 31 min 358-ə çatıb.Azərtac Hindistanın Federal Səhiyyə Nazirliyinin açıqlamasına istinadla xəbər verir ki, ötən sutka ölkədə yeni növ koronavirusa 48 min 916 yoluxma faktı aşkarlanıb. Son 3 sutkada gündəlik yoluxma sayı 45 mindən çox olub.Bildirilir ki, Hindistanda indiyədək 1 milyon 336 min 861 nəfər virusa yoluxub. Onların təxminən 63 faizi sağalıb.Qeyd edək ki, Hindistan COVID-19 virusuna yoluxanların sayına görə, ABŞ və Braziliyanın ardından 3-cü sıradadır. Ən pis vəziyyət Maharaştra və Tamil Nadu ştatlarında, paytaxt Dehlidədir. Bu bölgələrin hər birində ümumi yoluxma sayı 100 mindən yuxarıdır.xeber100.com

İran ilə Rusiya arasında yeni müqavilə hazırlanır

İran ilə Rusiya arasında qarşılıqlı əlaqələrin inkişafı haqqında yeni müqavilənin hazırlanması prosesi davam edir.Azərtac xəbər verir ki, bu sözləri Moskvada səfərdə olan İranın Xarici İşlər naziri Məhəmməd Cavad Zərif deyib.O, Rusiyalı həmkarı Serqey Lavrov ilə birgə mətbuat konfransında onu da bəyan edib ki, dövlətlər arasındakı iqtisadi əlaqələr yüksələn xətlə inkişaf edir. Yeni müqavilə imzalandıqdan sonra təsdiq üçün hər iki ölkənin parlamentinə təqdim ediləcək. Yeni müqavilə uzunmüddətli olmaqla yanaşı, əməkdaşlıq üçün bütün sahələri əhatə edəcək.Nəzərə çatdırılıb ki, birgə iqtisadi komissiyanın növbəti iclası payızda Moskvada keçiriləcək.İranlı nazır qeyd edib ki, İran ilə Rusiya arasındakı münasibətlər strateji xarakter daşıyır.Nazirlərin görüşündə regional və qlobal siyasi proseslər və təhlükəsizlik məsələləri də müzakirə edilib.xeber100.com

Hökumətə etimadsızlıq votumu parlamentin müzakirəsinə çıxarılıb

Bolqarıstan Milli Məclisi (parlament) iyulun 21-də keçirilən iclasında Boyko Borisovun rəhbərlik etdiyi Nazirlər Kabinetinə etimadsızlıq votumunu qəbul etməyib.Azərtac bu barədə Bolqarıstan parlamentinin saytına istinadla xəbər verir.İyulun 15-də Bolqarıstan sosialist partiyası müxalifətin korrupsiyada ittiham etdiyi hökumətə etimadsızlıq votumunu beşinci dəfə parlamentin müzakirəsinə çıxarıb və səsvermə iyulun 21-nə təyin olunub. Səsvermə zamanı 102 deputat etimadsızlıq votumunun lehinə, 124 deputat əleyhinə səs verib, 11 qanunverici isə bitərəf qalıb. Votumun qəbul edilməsi üçün parlament üzvlərinin yarıdan çoxunun – 121 deputatın səsi lazım idi.Bundan sonra etimadsızlıq votumu üzrə yeni təklif minimum altı aydan sonra parlamentə çıxarıla bilər.İyulun 20-də hökumətin istefasını tələb edən nümayişçilər paytaxt Sofiyanın mərkəzində yolu bağlayaraq polisin qoruduğu parlament binasını mühasirəyə almağa çalışıb. İyulun 9-dan başlayaraq davam edən etiraz aksiyalarında iştirak edən minlərlə vətəndaş hələ fevral ayında hökumətə inamının qalmadığını deyən Bolqarıstan Prezidenti Rumen Radevə dəstəyini nümayiş etdirir.xeber100.com

Böyük Britaniyada “5G” şəbəkəsi qurulacaq

Böyük Britaniya hökuməti Çin texnologiyalarından istifadədən imtina etdikdən sonra ölkədə beşinci nəsil mobil rabitə şəbəkəsinin (“5G”) yaradılmasına kömək üçün Yaponiyaya müraciət edib.Xarici KİV xəbər verir ki, Böyük Britaniyada yeni nəsil mobil rabitə şəbəkəsinin yaradılmasında Çin istehsalçısını Yaponiyanın “NEC” və “Fujitsu” şirkətləri əvəz edə bilər. Hazırda iki Yaponiya şirkəti “5G” baza stansiyaları bazarında 1 faizlik paya sahibdir. Lakin Böyük Britaniya ilə əməkdaşlığın onlara dünya səviyyəsinə çıxmağa kömək edəcəyi gözlənilir. Dünya “5G” bazarının təxminən 80 faizinə “Huawei”, “Ericsson” və “Nokia” şirkətləri nəzarət edir.Bildirilir ki, iyulun 14-də Böyük Britaniya hökuməti “Huawei” şirkətinə ölkə ərazisində “5G” şəbəkələrinin inkişafı ilə məşğul olmasının qadağan edilməsi ilə bağlı qərar qəbul edib. Yerli şirkətlərə 2021-ci ildən etibarən indiyədək əsas tədarükçü qismində çıxış edən Çin şirkətindən avadanlıq almaq qadağan olunacaq.Qərar üçün əsas kimi “5G” şəbəkəsi istifadəçilərinin fərdi məlumatlarının Çinin xüsusi xidmət orqanlarına ötürülmə ehtimalı göstərilir. Ötən il ABŞ tərəfindən analoji ittihamlar “Huawei” şirkəti üçün sanksiyalara və onunla Birləşmiş Ştatlar korporasiyalarının əməkdaşlığının qadağan edilməsi ilə nəticələnib.xeber100.com

Yonhap agentliyinin məlumatı əsasında…

Koreya Xalq Demokratik Respublikasının (KXDR) alimləri yeni növ koronavirusa (COVID-19) qarşı peyvənd üzərində çalışırlar.Yonhap agentliyi xəbər verir ki, KXDR-in Dövlət Elm və Texnologiya Komitəsi belə açıqlama yayıb. Komitənin rəsmi internet səhifəsində yerləşdirilən hesabatda bildirilir ki, KXDR Tibb Elmləri Akademiyasının nəzdindəki biologiya institutu mütəxəssislərin hazırladıqları peyvəndin heyvanlar üzərində sınaqları uğurla başa çatıb. Bu aydan isə peyvəndin kliniki sınaqları başlayıb. Peyvənd hazırlanmasında koronavirus üçün hüceyrə reseptoru olan ACE-2 genindən (angiotenzin çevirən ferment) istifadə olunub.Qeyd edək ki, rəsmi məlumata əsasən, KXDR-də COVID-19 infeksiyasına yoluxma qeyd alınmayıb.xeber100.com