Amerika Neft İnstitutunun məlumatı əsasında…

Ötən həftə Birləşmiş Ştatların xam neft ehtiyatları artıb.Azərtac xəbər verir ki, bu barədə əsasən özəl sektorun maliyyələşdirdiyi Amerika Neft İnstitutu (API) məlumat yayıb. Bildirilir ki, keçən həftə ölkədəki neft ehtiyatları əvvəlki həftə ilə müqayisədə 4,45 milyon barrel artaraq 436,95 milyon barrel olub. Bazar proqnozları da ehtiyatların çoxalacağı istiqamətində idi. Ehtiyatlar əvvəlki həftə 10,5 milyon barrel artmışdı.Ölkədəki ehtiyatlarla bağlı rəsmi rəqəmlər ABŞ-ın Enerji İnformasiya Administrasiyası (EIA) tərəfindən açıqlanacaq.xeber100.com

Yaponiya və Fransa İrana 18 milyard dollar kredit vermək niyyətindədir

Yaponiya və Fransa qarşılıqlı razılıq əsasında İrana 18 milyard dollar kredit vermək niyyətindədir. Lakin İran krediti almazdan əvvəl nüvə proqramının bərpasını dayandırmalı və ABŞ ilə danışıqlara başlamalıdır.Azərtac xəbər verir ki, Fransa və Yaponiya mətbuatında çıxan bu xəbər İranda ciddi qəbul olunub. İran hökumətinin rəsmi nümayəndəsi Əli Rəbbi bildirib ki, rəsmi Tehran sanksiyalar qüvvədə qaldığı müddətdə ABŞ ilə heç bir danışıq aparmayacaq: “Əgər ABŞ danışıqlara başlamaq istəyirsə sanksiyaları aradan qaldırmalıdır və İran tərəfi isə bu xoş addıma müsbət cavab verər. Digər tərəfdən isə tək Fransa yox, “nüvə razılaşmasında” iştirak edən Avropa dövlətləri imzalanan sazişə və əldə olunan razılaşmaya əməl etmədiklərinə görə İrana kredit deyil, kompensasiya (təzminat) ödəməlidir”.Ə.Rəbbi deyib ki, sanksiyaların tətbiqi İrana milyardlarla dollar zərər vurub.İran mətbuatı yazır ki, rəsmi Vaşinqton İran iqtisadiyyatının ağır vəziyyətə düşdüyünü görərək müttəfiqləri vasitəsilə pul təklif edərək Tehranı danışıqlara məcbur etmək istəyir.xeber100.com

BMT Baş Assambleyasının növbəti iclasında

BMT Baş Assambleyasının iclasında təşkilatın İnsan Haqları Şurasına 14 yeni üzv ölkənin seçilməsi üzrə səsvermə keçirilib. Namizədlər regional qruplar tərəfindən irəli sürülüb və bir-biri ilə rəqabət aparıblar.Azərtac BMT-nin saytına istinadla xəbər verir ki, dünyada insan hüquqlarına əməl edilməsinə nəzarət edən Şurada Qərbi Avropa ölkələri üzrə bu funksiyanı Almaniya və Niderland yerinə yetirəcək. Afrika ölkələrindən isə Şuraya Liviya, Mavritaniya, Namibiya və Sudan seçilib. Asiya qitəsindən seçilən ölkələr İndoneziya, Yaponiya, Marşall adaları və Koreya Respublikasıdır. Latın Amerikası və Karib hövzəsi ölkələrini isə Braziliya və Venesuela təmsil edəcək. Hazırda Şərqi Avropanı Bolqarıstan, Xorvatiya, Çexiya, Macarıstan, Slovakiya və Ukrayna təmsil edirlər.BMT-nin İnsan Haqları Şurası 2005-ci ildə eyniadlı komissiyanın bazasında yaradılıb. Burada 47 ölkə təmsil olunur, onlardan 6-sı Şərqi Avropadan, 13-ü Asiya və Afrikadan, 8-i Latın Amerikası və Qərbi Avropa ölkələrindən, 7-si isə ABŞ, Kanada və İsraildən seçilir. Lakin Vaşinqton ötən ilin yayında Şuranın İsraili pisləyən qətnamə qəbul etməsindən sonra bu qurumda təmsil olunmaqdan imtina edib.Şuraya üzv ölkələr 3 il müddətinə seçilir və onların hər hansı biri insan hüquq və azadlıqlarını kobud şəkildə pozduğu təqdirdə Baş Assambleyanın üçdə iki çoxluğunun qərarı ilə üzvlük dayandırılır. Hazırda Şuranın tərkibində Suriya və Myanmada insan hüquqlarının pozulması ilə əlaqədar müvafiq komissiyalar fəaliyyət göstərir.xeber100.com

“Huawei” telekommunikasiya korporasiyası yeni müqavilə imzalayıb

Çinin “Huawei” telekommunikasiya korporasiyasının carı ilin doqquz ayında satışlardan əldə etdiyi qazancı 24,4 faiz artaraq 610,8 milyard yuana (85,6 milyard dollar) çatıb.TASS informasiya agentliyi xəbər verir ki, bu barədə bəyanat kompaniyanın “WeChat” sosial şəbəkəsindəki rəsmi səhifəsində yayımlanıb.Məlumata əsasən, həmin dövr ərzində “Huawei” korporasiyasının xalis gəliri 8,7 faiz artıb. Kompaniya doqquz ay ərzində 185 milyon smartfon satıb ki, bu da 2018-ci ilin analoji dövrü ilə müqayisədə 26 faiz çoxdur.Hazırda “Huawei” digər dövlətlərlə qlobal beşinci nəsil mobil əlaqə şəbəkəsinin genişləndirilməsi üzrə 60-dan çox müqavilə imzalayıb.Əsası 1987-ci ildə qoyulan “Huawei” korporasiyası telekommunikasiya avadanlıqlarının, həmçinin istehlak qurğularının, smartfonların istehsalı ilə məşğul olur. Kompaniyanın məhsulları və xidmətləri dünyanın 170-dən çox ölkəsində təklif edilir. ABŞ və Avstraliyanın texniki casusluq və məxfi informasiya toplamaq barədə ittihamlarından sonra kompaniya beynəlxalq iqtisadi sanksiyalar təhlükəsi ilə üzləşib.Xatırladaq ki, mayın 15-də Prezident Donald Tramp ABŞ-ın informasiya-kommunikasiya infrastrukturunun xarici təhdidlərdən qorunması üçün fövqəladə vəziyyət rejiminin tətbiqi barədə fərman imzalayıb. Bununla bağlı Birləşmiş Ştatların Ticarət Nazirliyi milli təhlükəsizliyə təhdid səbəbindən “Huawei” kompaniyasını qara siyahıya salıb.xeber100.com

Brexit prosesi üzrə növbədənkənar sammit keçirilə bilər

Avropa İttifaqı bu ayın sonlarında Böyük Britaniyanın Aİ-nin tərkibindən çıxması məsələsi ilə bağlı növbədənkənar sammit keçirilməsini istisna etmir.BBC teleradio kompaniyası xəbər verir ki, Avropa İttifaqının hökumət və dövlət başçılarının oktyabrın 17-18-də Brüsseldə keçiriləcək sammitinin nəticələrinə əsasən, Britaniya və Aİ arasında danışıqlarda böyük irəliləyişə nail olunduğuna, lakin saziş barədə müzakirələrin davam etdirilməsinin vacibliyinə dair bəyanat verilə bilər.Xatırladaq ki, 2016-cı ilin iyununda keçirilən Brexit üzrə referendumun gedişində Böyük Britaniya vətəndaşlarının 51,9 faizi ölkənin Avropa İttifaqının tərkibindən çıxmasına səs vermişdi.Birləşmiş Krallıq Brexit qərarı ilə bağlı rəsmi bildiriş göndəriləndən iki il sonra – 2019-cu il martın 29-da Avropa İttifaqını tərk etməli idi. Lakin Britaniya parlamentinin İcmalar palatasının deputatları Brüssellə Tereza Mey arasında əldə olunan Brexit şərtləri barədə saziş layihəsini üç dəfə rədd ediblər. Nəticədə Avropa İttifaqı Brexit prosesini əvvəlcə aprel və ya may aylarına, sonra isə oktyabrın 31-nə təxirə salmağa razılaşıb. Vəziyyəti dalandan çıxara bilməyən Tereza Mey istefa verib.xeber100.com

İqtisadiyyat üzrə Nobel mükafatı laureatının adı elan olunacaq

Oktyabrın 14-də Stokholmda baş tutacaq xüsusi tədbirdə 2019-cu il üzrə Alfred Nobel xatirəsinə həsr olunan, iqtisadiyyat sahəsində Nobel mükafatı laureatının adı ictimaiyyətə elan olunacaq.Azərtac xəbər verir ki, laureatı hər il İsveç Kral Elmləri Akademiyası tərəfindən seçilən mükafat iqtisadi elmlər sahəsində ən nüfuzlu mükafat hesab olunur.Qeyd etmək lazımdır ki, digər sahələrdən fərqli olaraq iqtisadiyyat üzrə Nobel mükafatı Alfred Nobelin vəsiyyətində yer almayıb. Belə ki, bu mükafat, İsveç bankının 300 illiyi münasibətilə həmin bank tərəfindən təsis olunub və ilk dəfə 1969-cu ildə verilib.xeber100.com

Tunisdə keçirilən növbədənkənar prezident seçkilərinin ikinci turunda

Tunisdə keçirilən növbədənkənar prezident seçkilərinin ikinci turunda müstəqil namizəd Kais Səid inamlı qələbə qazanıb. Azərtac Əl Cəzirə telekanalının saytına istinadla xəbər verir ki, “exit-poll”ların ilkin nəticələrinə görə, Səid 72 faizdən çox səs toplayıb.Prezident seçkilərində digər namizəd - Nabil Karui isə seçicilərin cəmi 27,47 faizinin səsini toplayıb. O, seçkilərdən əvvəl korrupsiya ittihamı ilə saxlanıldığı həbsxanadan azad edilib. İctimai rəyin öyrənilməsi üzrə “Emrhod Consulting” mərkəzinin məlumatına görə, hüquq professoru olan Səidin seçkilərdə inamlı qələbə qazanması artıq şübhə doğurmur. Qeyd olunub ki, əhalinin seçkilərdə fəallığı da yüksək səviyyədə olub: ölkə üzrə 4500 seçki məntəqəsində 7,2 milyon seçici səs verib. Bu, 2010-2011-ci illər “ərəb baharı” adlanan proseslərdən sonra keçirilən ən fəal seçki hesab olunur.Seçkilərin yekun nəticələri Ali Müstəqil Seçki Komissiyası tərəfindən oktyabrın 15-də elan ediləcək.Qeyd olunur ki, 61 yaşlı hüquq professoru Kais Səidin zəngin siyasi təcrübəsi var. O, ölkədə korrupsiya əleyhinə mübarizə sahəsində liderlərdən biridir.

“American Airlines” aviaşirkəti uçuşları bərpa edəcək

ABŞ-ın “American Airlines” aviaşirkəti bəyan edib ki, 2020-ci il yanvarın 16-dan etibarən “Boeing 737 MAX” təyyarələri ilə aviareyslər bərpa ediləcək. Şirkətin təmsilçisi bildirib ki, bunun üçün proqram təminatının iki modifikasiyasının cari ilin sonunadək təsdiq olunması gözlənilir.Azərtac xəbər verir ki, “American Airlines” 2018-ci ilin oktyabrında və 2019-cu ilin martında iki “Boeing 737 MAX” təyyarəsinin qəzaya uğramasından sonra federal tənzimləyici orqanların bu təyyarələrlə uçmağı qadağan etdiyi üç Amerika şirkətindən (digər ikisi “United Airlines” və “Southwest” şirkətləridir) biridir. Həmin qəzalarda 346 sərnişin həlak olmuşdu.ABŞ-ın Federal Aviasiya İdarəsi “Boeing” şirkəti, habelə beynəlxalq təşkilatlar və aviasiya sahəsində texniki ekspertlər qrupu ilə “Boeing 737 MAX” təyyarələrinin istismara qaytarılması istiqamətində iş aparır. İyunda şirkətin rəhbərliyi həmin təyyarələrin proqram təminatının yenilənməsi və mühəndis-sınaq uçuşlarının həyata keçirilməsi barədə bəyanat yayıb.xeber100.com

Estoniya xalqı növbəti prezident seçkilərinə hazırlaşır

2021-ci ilin avqustunda Estoniya xalqı yeni prezidentini seçəcək.Azərtac xəbər verir ki, hazırkı Prezident Kersti Kalyulayd böyük ehtimalla namizədliyini irəli sürməyəcək. Belə ki, onun namizədliyini nə Mərkəzçilər, nə də qalib olan EKRE partiyaları dəstəkləməyəcəklərini bəyan ediblər. Parlamentdə təmsil olunan digər iki partiya - İslahatçılar və İSAMAA da məsələyə soyuq yanaşdıqlarını bildiriblər.Namizədliyi arzuolunan digər 3 nəfər isə sözügedən posta iddia etmədiklərini deyiblər. Ən çox şansı olan Siym Kallas (Avropa Komissiyasının vitse-prezidenti və nəqliyyat üzrə komissarı) hazırkı durumundan razı olduğunu bildirib.Avropa Parlamentinin deputatı olan Marina Kalyurand da siyasətçi kimi fəaliyyətini hazırkı vəzifəsində davam etdirəcəyini deyib.Fəaliyyətinin 9 ilini Estoniyanın Baş Naziri kimi çalışmış Andrus Ansip Estoniya üçün lazımi qədər işlədiyini bildirərək prezident postunda gənc siyasətçilərdən birini görmək istədiyini ifadə edib.Qeyd edək ki, prezident seçkiləri ilə eyni vaxtda parlament və yerli özünüidarəetmə orqanlarına da seçkilər keçiriləcək.xeber100.com

Parlament seçkiləri üçün səsvermə başa çatıb

Tunisdə keçirilən parlament seçkiləri üçün səsvermə başa çatıb.Azərtac xəbər verir ki, səsvermə 33 seçki dairəsində aparılıb. Bunlardan da 27-si ölkə ərazisində yerləşir. Ümumilikdə 217 yer uğrunda 15 mindən çox namizəd mübarizə aparıb. “Ümumilikdə 7 milyondan çox Tunis vətəndaşı dövlət başçısı postuna namizədlərə səs verə bilib.217 yerlik Xalq Nümayəndələri Assambleyasında deputat vəzifələrinə 15,3 mindən çox namizəd qeydə alınıb.Qeyd edək ki, “Ərəb baharı” prosesi zamanı Zeynel Abidin Bin Əlinin devrilməsindən sonra ölkədə üçüncü dəfə səsvermə prosesi təşkil olunub.xeber100.com