Hərbçilərlə müxalifət arasında saziş imzalanıb

Minlərlə sudanlı ölkədə hərbçilərlə müxalifət arasında hakimiyyət bölgüsünə dair sazişin imzalanmasını bayram etmək üçün paytaxt Xartumun küçələrinə çıxıb. Ölkədə sivil hökumətin tərəfdarları demokratiya şüarları səsləndirib, bu sahədə islahatlar keçirilməsini tələb ediblər. Azərtac BBC telekanalının saytına istinadla xəbər verir ki, paytaxt Xartumla yanaşı, ölkənin əyalətlərində də izdihamlı mitinqlər keçirilib.Sudanda keçid dövrünün Hərbi Şurası və Azadlıq və İslahatlar Şurası arasında bir neçə gündür davam edən danışıqlar avqustun 3-də keçid dövründə müvəqqəti hökumət yaradılmasına dair Konstitusiya Bəyannaməsinin imzalanması ilə başa çatıb. Tərəflər yeni Nazirlər Şurasının tabeliyində təhlükəsizlik orqanları və Çevik Dəstək Qüvvələri yaradılması barədə də razılıq əldə ediblər.Xatırladaq ki, bu ölkədə cari il aprelin 11-dən – otuz il ərzində Sudana rəhbərlik edən Prezident Ömər Bəşirin hərbçilər tərəfindən vəzifəsindən kənarlaşdırılmasından sonra iğtişaşlar başlayıb. Əhali hərbçilərdən ölkədə sivil hökumətin qurulmasını və azad seçkilərin keçirilməsini tələb edirdi.xeber100.com

7,54 bal gücündə zəlzələdən sonra sunami təhlükəsi elan edilib

Avqustun 2-də İndoneziyanın Yava adasında yerli vaxtla saat 12:03-də baş vermiş Rixter cədvəli üzrə 7,54 bal gücündə zəlzələdən sonra sunami təhlükəsi elan edilib. Reuters agentliyi xəbər verir ki, ölkənin Banten, Lampunq, Qərbi Yava və Bengkulu rayonlarında sunami təhlükəsi ilə əlaqədar əhalinin təxliyəsinə başlanılıb. Adalara gəlmiş turistlərin də ərazini tərk etdikləri bildirilir.Məlumatda qeyd olunur ki, yeraltı təkanların episentri Sumur-Bantendən 174 kilometr cənub-qərbdə yerin 10 km dərinliyində olub. Zəlzələ ölkənin paytaxtında da hiss edilib. Dağıntılar və itkilər haqqında məlumat verilmir.xeber100.com

Seçkiqabağı debatların ikinci turunun növbəti mərhələsi keçirilib

İyulun 31-də Miçiqan ştatının Detroyt şəhərində ABŞ prezidenti vəzifəsinə Demokratlar Partiyasının namizədləri arasında seçkiqabağı debatların ikinci turunun ikinci mərhələsi keçirilib.Azərtac xəbər verir ki, Demokratlar Partiyasının nümayəndələri 2020-ci ildə ABŞ prezidenti vəzifəsinə seçkilərdə Donald Tramp ilə mübarizə aparacaq namizədi seçməlidirlər. Debatlar iki gün keçirilir. Debatların ikinci turunun ikinci mərhələsində 10 namizəd - Co Bayden, Kamala Harris, Kori Buker, Xulian Kastro, Kirsten Cillibrend, Tulsi Qabbard, Cey Aynsli, Maykl Bennet, Endrü Yanq və Bill de Blazio iştirak ediblər.Debatların moderatorları CNN kanalının nümayəndələri olub. Aparıcılar debatlar üçün ayrılmış vaxtın çox hissəsini qarşıdakı illərdə ölkə iqtisadiyyatının inkişafı, minimum əməkhaqqının artırılması, tibbi sığorta və immiqrasiya sahələrində islahatlar mövzusunda diskussiyalara həsr ediblər. İqlim dəyişmələri problemi, pulsuz təhsil, əməyin ödənilməsində gender fərqləri və ABŞ-ın xarici siyasəti məsələləri də müzakirə edilib.xeber100.com

Polşa hökuməti 2 milyon vətəndaşını gəlir vergisindən azad edib

Polşa hökuməti iyulun 30-dan etibarən bu ölkədə yaşayan və çalışan 2 milyona yaxın gənc vətəndaşını gəlir vergisindən azad edib. Buna səbəb gənc kadrların sürətlə ölkəni tərk etməsidir.Azərtac xəbər verir ki, 26 yaşadək olan gənc polyaklar ildə orta hesabla 85 min 528 zlotı (22 min 547 dollar) qazanır. Artıq avqustun 1-dən etibarən gənclər yeni ay üçün əməkhaqlarından tutulan aylıq 18 faiz vergidən azad olacaqlar.Bu məsələ ilə bağlı parlamentdə çıxış edən Baş Nazir Mateus Moraveskiy bildirib ki, son 15 ildə Polşanı 1,7 milyon gənc mütəxəssis tərk edib. Bu rəqəm Varşavanın əhalisi qədərdir və ölkə iqtisadiyyatına, habelə demoqrafik artıma ciddi zərbə vurur.Lakin ölkənin bəzi siyasi qüvvələri bu qərardan narazılıqlarını ifadə ediblər. Belə ki, onlar güzəştin 26 yaşdan sonra ləğv olunacağı halda baş verəcəklərdən narahatlıqlarını dilə gətiriblər.Polşalı miqrantların ən çox üz tutduqları ölkə isə Böyük Britaniyadır. Bu ölkədə təxminən 1 milyon polyak yaşayır.xeber100.com

Federal Ehtiyat Sisteminin uçot dərəcəsi azaldılacaq

ABŞ Federal Ehtiyat Sisteminin (FED) son 10 ildə ilk dəfə uçot dərəcəsini aşağı salacağı nəzərdə tutulur.Azərtac xəbər verir ki, bazar proqnozları FED-in bu həftə keçiriləcək iclasında uçot dərəcəsinin 0,25 faiz azaldılacağı istiqamətindədir.Ekspertlər beynəlxalq bazarlar tərəfindən də diqqətlə izləniləcək FED-in iclasında zəifləyən qlobal iqtisadi vəziyyət və artan ticari gərginliklər fonunda bankın 2008-ci ildəki qlobal iqtisadi böhrandan bəri ilk dəfə uçot dərəcəsini azaldacağını gözləyirlər.Uçot dərəcəsinin azaldılması qlobal iqtisadiyyatın 1854-cü ildən indiyədək ən böyük uzunmüddətli artım göstərdiyi, işsizliyin rekord aşağı səviyyədə olduğu və birjaların dəyərinin maksimuma çatdığı bir vaxtda baş verəcək.xeber100.com

Beynəlxalq Valyuta Fondunun hesablamalarına əsasən…

Latviya 2025-ci ilə qədər əmək qabiliyyətli əhalinin üçdəbirini itirə bilər.Azərtac Beynəlxalq Valyuta Fondunun (İMF) hesablamalarına istinadla xəbər verir ki, hazırda demoqrafiya Latviyanın ən böyük problemlərindən biridir. Əgər bunun qarşısı alınmazsa, ölkə növbəti 30 il ərzində əsas işçi qüvvəsini itirəcək. Bu isə təxminən 400 min nəfər deməkdir.Fondun nümayəndələrinin Latviyaya səfəri zamanı aparılan hesablamalarda məlum olub ki, hər il əhalinin sayı 1 faiz azalır. Buna əsas səbəb isə gənc və orta yaşlıların iş ilə bağlı daha inkişaf etmiş ölkələrə emiqrasiyasıdır. Bu, əmək qabiliyyətli əhalinin sayına və məhsuldarlığına ciddi təsir edir.xeber100.com

Böyük Britaniya hökuməti ciddi hazırlığa başlayır

Böyük Britaniya hökuməti ölkənin Avropa İttifaqından çıxması ilə bağlı ciddi hazırlığa başlayır.Azərtac xəbər verir ki, bu barədə “Sunday Times” qəzetində dərc olunmuş məqaləsində Lankaster hersoqluğunun kansleri (de-fakto xüsusi tapşırıqlar üzrə nazir) Maykl Qouv bildirib.Maykl Qouv qeyd edib ki, yeni Baş Nazirlə, yeni hökumətlə, yeni və daha aydın missiya ilə Britaniya oktyabrın 31-də Avropa İttifaqından çıxacaq. Bundan sonra heç bir yubanma olmayacaq. Brexit artıq yaxınlaşır.xeber100.com

ABŞ Geoloji Xidmətinin məlumatı əsasında…

İyulun 27-də Filippində baş vermiş zəlzələ nəticəsində ən azı 7 nəfər ölüb, 60-dan çox adam yaralanıb. Azərtac AFP agentliyinə istinadla xəbər verir ki, bu məlumatı ölkənin rəsmiləri yayıblar.ABŞ-ın Geoloji Xidmətinin məlumatına görə, Filippinin şimalında yerləşən Batanes əyalətinin İtbayat bələdiyyəsinin ərazisində ard-arda dörd yeraltı təkan olub. Onlardan ən şiddətlisi Rixter cədvəli üzrə 5,7 bal təşkil edib. Bölgədə sunami təhlükəsi elan edilməyib. Zəlzələnin baş verdiyi ərazidə bir neçə tikilinin dağıldığı bildirilir.xeber100.com

“Uber” şirkəti bütün xidmətlərini müvəqqəti dayandırıb

“Uber” şirkəti Avstriyadakı bütün xidmətlərini müvəqqəti dayandırıb.Azərtac xəbər verir ki, məhkəmə qərarı əsasında fəaliyyətini dayandıran ABŞ konserni növbəti həftələrdə yenidən Avstriya bazarına geri qayıtmağı planlaşdırır.Vyanada taksi şirkətlərini birləşdirən təmsilçilik və “Uber” şirkəti arasında illərdən bəri davam edən məhkəmə çəkişməsində hələ ki, birinci tərəfin maraqları təmin olunub. Belə ki, Vyana Ticarət Məhkəməsinin qərarına əsasən, “Uber” şirkəti də digər oxşar xidmətlər kimi Avstriyada öz nümayəndəliyi ilə təmsil olunmalı və müvafiq lisenziya üçün rəsmi qurumlara müraciət etməlidir. Vyana ilə yanaşı, şirkətin Qrats, Zaltsburq və Lints şəhərlərindəki fəaliyyətinin pilot mərhələsi də dayandırılıb.Qeyd edilməlidir ki, Vyanada taksi xidmətlərində olduqca ucuz qiymətləri təqdim edən “Uber” ilə yerli taksi şirkətləri arasında çəkişmə bir neçə ildir ki, davam edir. Vyanada aparıcı taksi xidmətləri operatoru olan “40100” şirkəti ABŞ konserninə qarşı aparılan mübarizədə ön cərgədə dayanır.xeber100.com

“Dubki” adlı yeni sərhəd nəzarəti məntəqəsi açılacaq

Litva-Rusiya sərhədində “Dubki” adlı yeni sərhəd nəzarəti məntəqəsi açılacaq.Azərtac xəbər verir ki, yüklərin daşınmasına nəzarət edəcək məntəqədə Riqa-Kalininqrad-Qdansk dəhlizində hərəkət edəcək yük maşınları yoxlanacaq.Tikinti işləri cari ilin sonunadək yekunlaşacaq. Məntəqənin gələn ilin martında istifadəyə verilməsi nəzərdə tutulur. Burada nəqliyyat vasitələri üçün 4 xətli yol və keçid məntəqəsi olacaq. Məntəqə gün ərzində 4 min nəqliyyat vasitəsinə xidmət göstərəcək.xeber100.com