Litvada qırıcıların yanacaqla təmin olunması sınaqdan keçiriləcək

Litvada NATO-nun təlimləri keçirilir.Azərtac xəbər verir ki, illik planlara əsasən təşkil olunan təlimin məqsədi NATO müttəfiq qüvvələri tərəfindən hava məkanına nəzarətin və monitorinqin aparılması, hərbi hava qüvvələrinin və regional hava qüvvələrinin güclərinin sınanmasıdır. Təlimlərdə 20-dən çox təyyarə iştirak edəcək.Uçuşlar zamanı axtarış və xilasetmə əməliyyatlarının həyata keçirilməsi, habelə qırıcıların havada yanacaqla təmin olunması sınaqdan keçiriləcək.Təlimlərdə Macarıstana, İspaniyaya, Böyük Britaniyaya, Polşaya, Finlandiyaya, Almaniyaya, İsveçə və Norveçə məxsus qırıcılar iştirak edir.

“To Vima” qəzetinin apardığı sorğuya əsasən…

Yunanıstanın “To Vima” qəzetinin apardığı sorğuya əsasən, ölkənin müxalif konservativ partiyası “Yeni demokratiya” hakim “Siriza” partiyasını parlament seçkilərinə 2 həftə qalmış 9 faiz səslə üstələyir. Kiriakos Mitsotakisin “Yeni demokratiya” partiyası 38,5 faiz, Baş Nazir Aleksis Tsiprasın “Siriza” partiyası isə 29,5 faiz səs qazana bilər.“Yeni demokratiya” “Siriza”nı Avropa Parlamentinə seçkilərdə 10 faiz üstələyərək qalib gəlib. Bu, Baş Nazir Aleksis Tsiprası növbədənkənar seçkilərin keçirilməsinə vadar edib. A.Tsiprasın mandatı sentyabrda bitməli idi. Sorğuya əsasən, üçüncü yeri “PASOK” sosialist partiyası və sabiq Baş Nazir Qeorqi Papandreu tərəfindən yaradılmış Dəyişiklik üçün Hərəkat Birliyi tutacaq.xeber100.com

Tbilisidə müxalifətin kütləvi etiraz aksiyası yenidən başlayıb

Gürcüstanın paytaxtı Tbilisidə müxalifətin kütləvi etiraz aksiyası iyunun 24-də yenidən başlayıb.Azərtac xəbər verir ki, bu gün günorta saatlarında Birinci Respublika Meydanından başlayan yürüş-mitinq Daxili İşlər Nazirliyinin binası qarşısında başa çatıb.Müxalifət liderləri tələbləri tam yerinə yetirilənədək etiraz aksiyasını davam etdirəcəklərini bildiriblər. Aksiya parlamentin binası qarşısında saat 19:00-da yenidən başlayıb. Mitinqdə yüzlərlə insan iştirak edib.Təşkilatçıların sözlərinə görə, bu gün də Daxili İşlər naziri Qeorqi Qaxariyanın istefası, iyunun 20-də keçirilmiş aksiyada saxlanılan 300-dən çox insanın azadlığa buraxılması tələb olunacaq.Təşkilatçılar iğtişaş və qarşıdurmaya bacardıqca yol verməyəcəklərini bildirirlər.Qeyd edək ki, etiraz aksiyası iyunun 20-də Tbilisidə keçirilən Pravoslav Parlament Assambleyasının iclasında Rusiyadan olan deputatların iştirakına etiraz olaraq başlayıb. Həmin gün gecə polislə aksiya iştirakçıları arasında qarşıdurma yaranıb. Nümayişçilər parlamentin binasını ələ keçirməyə cəhd ediblər. Polis gözyaşardıcı qazdan, rezin güllələrdən və su şırnağından istifadə edərək mitinqi dağıdıb. Qarşıdurma zamanı 80-ni polis, 31-i jurnalist olmaqla, ümumilikdə 240 nəfər yaralanıb, 300-dən çox nümayişçi polis tərəfindən saxlanılıb.Baş verən hadisələrə görə artıq parlamentin sədri İrakli Kobaxidze istefa verib.xeber100.com

ABŞ-ın Kaliforniya ştatının şimalında zəlzələ olub

İyunun 23-də ABŞ-ın Kaliforniya ştatının şimalında 5,6 bal gücündə zəlzələ olub.TASS agentliyi xəbər verir ki, bu barədə məlumatı ABŞ Geoloji Xidməti yayıb.Yerli vaxtla saat 03:53-də baş verən zəlzələnin ocağı Petroliya yaşayış məntəqəsindən 5 kilometr cənub-qərbdə, 9,5 kilometr dərinlikdə yerləşib.Dağıntılar və xəsarət alanlar barədə məlumat verilmir.xeber100.com

Bu gün Estoniyada Qələbə Günü kimi qeyd olunur

Düz yüz il əvvəl eston ordusu Latviya yaxınlığında baltik almanlarının qoşunlarını məğlubiyyətə uğradaraq azadlıq əldə edib. Bu gün Estoniyada Qələbə Günü kimi qeyd olunur.Azərtac xəbər verir ki, iyunun 23-də Estoniyanın Tartu şəhərində Qələbə Günü münasibətilə təntənəli parad keçirilib. Paradda ölkə başçısı Kersti Kalyulayd, həmçinin bütün qoşun növlərinin nümayəndələri iştirak ediblər.Həmçinin məhz həmin gün eston ordusuna kömək edən xarici dəstələrin təmsil etdikləri ölkələrin, o cümlədən Finlandiya, Polşa, İsveç və Ukraynanın bayraqları dalğalandırılıb. NATO üzvü olan ölkələrin nümayəndələri də parada qatılıblar.Estoniyada Qələbə Günü ilk dəfə 1934-cü ildə qeyd olunub. 1919-cu ildə baş vermiş Vonn savaşı Estoniya azadlıq mübarizəsinin həlledici döyüşü kimi tarixə düşüb.Qeyd edək ki, bu parad hər il ölkənin müxtəlif şəhərlərində təşkil olunur.xeber100.com

Fövqəladə vəziyyət rejimi daha bir ay uzadılıb

Şri-Lanka prezidenti Maytripala Sirisena ölkədə silsilə terror aktlarından sonra elan edilən fövqəladə vəziyyət rejimini daha bir ay uzadıb."Ada Derana” internet-nəşri xəbər verir ki, dövlət başçısının imzaladığı deklarasiya prezident dəftərxanası tərəfindən dərc edilib. Sənəd iyunun 22-də qüvvəyə minib.Şri-Lankanın hakimiyyət orqanları terror aktları seriyasından sonra polisə və orduya xüsusi səlahiyyət vermək üçün aprelin 22-də ölkədə fövqəladə vəziyyət rejimi tətbiq etmişdi. May ayının sonlarında rejimin müddəti uzadılmışdı.Xatırladaq ki, aprelin 21-də pasxa bayramı zamanı Şri-Lankada törədilən silsilə partlayışlar nəticəsində təxminən 250 nəfər həlak olmuş, 500-dən çox insan yaralanmışdı. Hakimiyyət orqanları terror aktlarının məsuliyyətini “Tövhid camaatı” qruplaşmasının üzərinə qoymuşdu. Hücumların məsuliyyətini öz üzərinə götürən İŞİD qruplaşması isə bununla bağlı heç bir sübut təqdim etməmişdi.Rəsmi məlumata əsasən, hazırda ada dövlətinin ərazisində İŞİD terror qruplaşmasının 130-140 üzvü fəaliyyət göstərir.xeber100.com

Yeni Zelandiyanın şimal-şərqində 6,4 bal gücündə zəlzələ olub

İyunun 19-da Yeni Zelandiyanın şimal-şərq adaları silsiləsi yaxınlığında 6,4 bal gücündə zəlzələ olub. Azərtac xəbər verir ki, bu barədə ABŞ Geoloji Xidməti məlumat yayıb.Yerli vaxtla axşam saat 19:01 radələrində baş verən zəlzələnin episentri L'Esperans qayalıqlarının 140 kilometr şimal-şərqində, ocağı 10 kilometr dərinlikdə yerləşib.Havay adalarında yerləşən Sakit okean Sunami Xəbərdarlığı Mərkəzi sunami xəbərdarlığı elan etməyib.Qayalığın daxil olduğu Kermadek adaları silsiləsində son günlər yüksək geoloji fəallıq müşahidə edilməkdədir. Belə ki, həmin ərazidə iyunun 16-da iki, 17-də isə daha bir güclü zəlzələ qeydə alınıb.xeber100.com

Parlamentlərarası Pravoslav Məclisinin 26-cı iclası keçiriləcək

İyunun 19-22-də Tbilisidə Parlamentlərarası Pravoslav Məclisinin (PPM) növbəti 26-cı iclası keçiriləcək.Azərtac xəbər verir ki, tədbirdə dünyanın 4 qitəsinin 23 ölkəsindən nümayəndələrin gələcəyi gözlənilir.Tədbirin təşkilatçılarından biri, hakim “Gürcü arzusu-demokratik Gürcüstan” partiyasının deputatı Zaxariya Kutsnaşvili jurnalistlərə bildirib ki, təşkilatın əsas məqsədi pravoslav dininin təbliği və kilsə sərhədlərini müdafiə etməkdir.O deyib: “Bu gün İslam dünyada daha güclüdür. Bəzi qitələrdə pravoslav xristianları çətinliklər yaşayır və azalırlar”. Onun sözlərinə görə, Gürcüstan bu toplantıya 6 ildir hazırlaşır. Bu toplantı miqyasına görə, ATƏT-in və NATO-nun tədbirlərindən sonra üçüncü olacaq.Deputat deyib ki, Gürcüstan dini turizm üçün də əlverişli bölgədir və tədbir bu baxımdan da bizim üçün əlverişli olacaq.Məlumat üçün qeyd edək ki, Parlamentlərarası Pravoslav Məclisi 1993-cü ildə Yunanıstan parlamentinin təşəbbüsü ilə təsis olunub. Yunanıstan və Rusiya Assambleyada liderlik edirlər.Parlamentlərarası Pravoslav Məclisinin mənzil qərargahı Afinada yerləşir.PPM-in işində Rusiya, Gürcüstan, Ermənistan, Polşa, Yunanıstan, Ukrayna, İordaniya da daxil olmaqla 25 ölkə iştirak edir.PPM-in Baş Assambleyası ildə bir dəfə keçirilir. Sonuncu Baş Assambleya 2018-ci ilin iyununda Afinada keçirilib.xeber100.com

Dünya Bankı energetika sisteminə kredit ayırıb

Dünya Bankı Gürcüstanın energetika sisteminin inkişafı üçün maliyyə vəsaiti ayırıb. Bununla bağlı bank ilə Gürcüstanın Maliyyə Nazirliyi arasında müvafiq sənəd imzalanıb.Azərtac xəbər verir ki, sənədə əsasən, Dünya Bankı Gürcüstanın enerji sisteminin inkişafı üçün 62 milyon dollar kredit ayırıb.Layihənin məqsədi Gürcüstanın qərbində enerji təminatının etibarlılığının artırılması və Gürcüstanın Dövlət elektrosisteminin maliyyə sağlamlığının təmin olunmasıdır.xeber100.com

“Türk Hava Yolları” yeni aviareyslərə başlayır

“Türk Hava Yolları” (THY) yeni istiqamətlərdə aviareyslərə başlayır.Aviaşirkətdən Azərtac-a bildirilib ki, bu il İstanbul Hava limanından Mərakeş, Şarja, Port-Sudan, Luksor şəhərləri istiqamətində aviareyslərə start verilib. Növbəti istiqamət isə Bali, Mexiko, Kankun və Rovaniemi şəhərləridir. Belə ki, iyul ayının 17-dən etibarən THY İstanbul ilə İndoneziya adası Balini birləşdirəcək. Uçuşlar həftədə 3 dəfə olmaqla həyata keçiriləcək. Avqust ayının 8-dən etibarən isə aviareys gündəlik reallaşdırılacaq.Həmçinin yay aylarında aviaşirkətin uçuş şəbəkəsinə Mexiko və Kankun şəhərləri də qatılacaq. İstanbul-Mexiko-Kankun aviareysi həftədə 3 dəfə olmaqla reallaşdırılacaq. Sərnişinlər yeni istiqamətdə “Boeing B787-9” təyyarəsi ilə uçacaqlar.xeber100.com