2020/2021-ci illər mövsümü üçün transfer çalışmaları davam edir

2020/2021-ci illər mövsümü üçün transfer çalışmalarını davam etdirən “Sumqayıt” futbol klubu növbəti futbolçunu heyətinə cəlb edib. Belə ki, son klubu İsfahanın “Sepahan” komandası olan Azərbaycan əsilli futbolçu Əli Qurbani ilə 1+1 illik müqavilə imzalanıb.“Sumqayıt” Futbol Klubunun mətbuat xıdmətindən Azərtaac-a bildirilib ki, 29 yaşlı hücumçu komanda da “9” nömrəli formada çıxış edəcək.Cənubi azərbaycanlı olan Əli Qurbani “Nassaji” klubunun yetirməsidir. 2010-2011-ci illər mövsümündə adıçəkilən klubun əsas komandasının da formasını geyinib (18 oyun, 3 qol). Əli son klubu olan “Sepahan”la yanaşı (39 oyun, 4 qol) “Gahar” (23 oyun, 7 qol), “Shahr Khodro” (17 oyun, 3 qol), “Naft Tehran” (61 oyun, 16 qol), “İstiqlal” (55 oyun, 13 qol) və “Spartak Trnava” (9 oyun, 2 qol) klublarında da oynayıb.xeber100.com

Ümumdünya Şahmat Olimpiadasının oyunları keçirilib

Avqustun 14-də Ümumdünya Şahmat Olimpiadasının ikinci divizionunda ilk günün oyunları keçirilib.Azərtac xəbər verir ki, A qrupunda Almaniya (12 xal), B qrupunda Slovakiya və Rumıniya (hərəyə 13 xal), C qrupunda İspaniya (13,5 xal), D qrupunda Türkiyə (15,5 xal), E qrupunda Macarıstan (10 xal) komandaları liderliyi ələ alıblar. Qeyd edək ki, bu mərhələdə 5 qrupda 50 komanda mübarizə aparır.İkinci divizionun oyunları avqustun 16-dək davam edəcək. Olimpiada çərçivəsində artıq baza, dördüncü və üçüncü divizionların oyunları keçirilib.Turnirə 163 komanda qatılıb. Olimpiadanın güclü komandalarından sayılan Azərbaycan yığması avqustun 21-də top divizionda mübarizəyə başlayacaq. Bu nüfuzlu yarışda ölkəmizi Şəhriyar Məmmədyarov, Teymur Rəcəbov, Günay Məmmədzadə, Gülnar Məmmədova, Vüqar Əsədli və Xanım Balacayeva təmsil edirlər. Ehtiyat oyunçular siyahısına isə Rauf Məmmədov, Qədir Hüseynov, Türkan Məmmədyarova, Ülviyyə Fətəliyeva, Aydın Süleymanlı və Gövhər Beydullayevanın adları daxil edilib. Komandamızın kapitanı Eltac Səfərli və Rəhim Qasımovdur.Olimpiada avqustun 30-dək davam edəcək.xeber100.com

UEFA Almaniya-İspaniya oyununun ən yaxşı futbolçusunun adını açıqlayıb

UEFA “Bavariya” (Almaniya)-“Barselona” (İspaniya) oyununun ən yaxşı futbolçusunun adını açıqlayıb.Azərtac xəbər verir ki, bu ada münxenlilərin futbolçusu Tomas Müller layiq görülüb. Otuz yaşlı forvard 8:2 hesablı qələbədə 90 dəqiqə meydanda olub, iki qol və 1 məhsuldar ötürmə ilə yadda qalıb.xeber100.com

Sivasspor” futbol klubu baş məşqçisi ilə müqaviləni yeniləyəcək

Türkiyənin “Sivasspor” futbol klubu baş məşqçisi Rıza Çalımbayla müqaviləsinin müddətini uzatmaqla bağlı razılıq əldə edib.Azərtac xəbər verir ki, tərəflər arasında uzun müddət davam edən danışıqlar müsbət nəticə verib. Əlli yeddi yaşlı mütəxəssislə müqavilənin imzalanma mərasimi “4 Eylül” stadionunda keçiriləcək.Qeyd edək ki, R.Çalımbay bundan əvvəl 2010-2012-ci illərdə də “Sivasspor”un sükanı arxasında olub.xeber100.com

“Criterium Du Dauphine” veloyürüşü davam edir

Fransada “Criterium Du Dauphine” veloyürüşü davam edir. İştirakçılar yarışın ikinci mərhələsində 135 kilometr məsafə qət ediblər.Azərtac xəbər verir ki, sloveniyalı velosipedçi Primoj Roqliç finiş xəttini rəqiblərindən tez keçib.O, 3 saat 39 dəqiqə 40 saniyəlik nəticə göstərib. Fransa idmançısı Tibo Pino ikinci olub. O, finiş xəttini liderdən 8 saniyə gec keçib. İlk üçlüyü isə almaniyalı Emmanuel Buxman tamamlayıb. Mərhələnin qalibi olan P.Roqliç ümumi yarış cədvəlində liderliyi ələ keçirib.Beş mərhələdən ibarət veloyürüşə avqustun 16-da yekun vurulacaq.xeber100.com

Tennisçilər arasında beynəlxalq turnir davam edir

ABŞ-ın Leksinqton şəhərində qadın tennisçilər arasında beynəlxalq turnir davam edir. Mükafat fondu 225 min ABŞ dolları olan WTA seriyalı turnirdə dörddəbir finalçıları müəyyənləşib.Azərtac xəbər verir ki, bu mərhələdə amerikalı Uilyams bacılarının dueli diqqət çəkib. Görüş 2 saat 21 dəqiqə çəkib. Mübarizəyə daha yaxşı başlayan Vinus ilk setdə 6:3 hesabı ilə qələbə qazanıb. Sonradan təşəbbüsü ələ alan Serena Uilyams eyni hesabla qalib gələrək tarazlığı bərpa edib. Sonuncu setdə 6:4 hesabı ilə rəqibini məğlub edən Serena dörddəbir finala yüksəlib.Turnirə avqustun 16-da yekun vurulacaq.xeber100.com

İngiltərə kuboku yarışlarının reqlamentində dəyişiklik edilib

Futbol üzrə İngiltərə kuboku yarışlarının reqlamentində dəyişiklik edilib.Azərtac xəbər verir ki, yeni qaydaya əsasən, koronavirus pandemiyası fonunda təqvimdə yarana biləcək sıxlığı aradan qaldırmaq üçün 2020/2021-ci il mövsümündə heç-heçə başa çatan matçlar təkrarlanmayacaq. Qalib əlavə vaxtda və ya ehtiyac olarsa, penaltilər seriyasında müəyyənləşəcək.Kubokun püşkatması sentyabrın 1-də olacaq. Final matçının 2021-ci il mayın 15-də “Uembli” stadionunda keçiriləcəyi planlaşdırılıb.xeber100.com

“Konyaspor” komandası heyətini yeni futbolçu ilə gücləndirib

Türkiyənin "Konyaspor" komandası heyətini yeni futbolçu ilə gücləndirib.Azərtac klubun rəsmi saytına istinadla xəbər verir ki, Superliqa komandası "Ərzurumspor"la müqaviləsi başa çatan İbrahim Şehiçi transfer edib.Bosniya və Herseqovina yığmasının qapıçısı ilə 3+1 illik müqavilə imzalanıb.Qeyd edək ki, İ.Şehiç "Erzurumspor"a 2018-ci ildə "Qarabağ"dan keçib. O, 2015- 2018-ci illərdə Ağdam təmsilçisinin heyətində çıxış edib.xeber100.com

Azərbaycan Premyer Liqasının 2020-2021-ci il mövsümündə

Azərbaycan Premyer Liqasının 2020-2021-ci il mövsümü sayca 29-cu ölkə çempionatı olacaq.Azərtac Peşəkar Futbol Liqasının (PFL) saytına istinadla xəbər verir ki, 1992-ci ildən keçirilən turnirin əvvəlki 28 mövsümündən ikisi yaz-payız, digərləri payız-yaz sistemi ilə keçirilib. Biri başa çatmayan 28 mövsümdə ümumilikdə 60 komanda oynayıb. Qarşıdakı mövsümdə debütant olmayacağından bu rəqəm dəyişməyəcək.Altmış iştirakçıdan yalnız ikisi bütün çempionatlarda mübarizə aparıb. Bunlar “Neftçi” və “Qarabağ”dır. Ölkə çempionatları tarixinin ümumi cədvəlinə başçılıq edən bakılılar ötən mövsümün gedişində zirvəni əldən versə də, yenə Ağdam təmsilçisindən 1 xal öndə qərarlaşıblar. Üçüncü pillədə “Keşlə”, dördüncü sırada “Kəpəz”, beşinci yerdə isə “Turan” klubudur.xeber100.com

Beynəlxalq Şahmat Federasiyası şahmatçılara maliyyə dəstəyi göstərib

Beynəlxalq Şahmat Federasiyası (FİDE) veteran şahmatçılara maliyyə dəstəyi göstərib.Azərtac FIDE-nin rəsmi saytına istinadla xəbər verir ki, veteran şahmatçılara ayrılan illik vəsaitdən daha 21 min avro şahmatın inkişafına töhfə verən veteran idmançılar arasında bölüşdürülüb. Bunların arasında Rusiya, Ukrayna, Almaniya, Argentina, İngiltərə, Bolqarıstan və digər ölkələrin nümayəndələri yer alıb.Qeyd edək ki, bu ilin aprelində veteran şahmatçılara 35 min avro maliyyə dəstəyi göstərilmişdi.xeber100.com