Futbol üzrə İngiltərə kuboku yarışlarının final oyunu təxirə salına bilər

Futbol üzrə İngiltərə kuboku yarışlarının final oyunu təxirə salına bilər. Buna səbəb “Mançester Siti”nin UEFA Çempionlar Liqasının finalına yüksəlməsidir. Mançester təmsilçisi iyunun 10-da həlledici qarşılaşmada “İnter”lə üz-üzə gələcək. Rəhbərlik komandanın görüşə yaxşı hazırlaşması üçün iyunun 3-dəki ölkə kubokunun başqa vaxta keçirilməsini istəyir. Qeyd edək ki, “Mançester Siti”nin İngiltərə kuboku yarışlarının finalında “Mançester Yunayted”lə qarşılaşacaq.xeber100.com

Canni İnfantino futbol üzrə dünya çempionatının şüarı açıqlanıb

FIFA-nın prezidenti Canni İnfantino 2026-cı ildə keçiriləcək futbol üzrə dünya çempionatının şüarını açıqlayıb. Xarici mətbuat xəbər verir ki, mundial “Biz – 26” şüarı ilə keçiriləcək. FIFA-nın prezidenti qeyd edib ki, dünya çempionatına 16 şəhər ev sahibliyi edəcək. Bu şəhərlər əyləncəli məkanları və qonaqpərvər insanları özündə cəmləşdirir. İnanırıq ki, 2026-cı il dünya çempionatının oyunları azarkeşlərə unudulmaz anlar bəxş edəcək. Dünya çempionatı 2026-cı il iyunun 11-dən iyulun 19-dək ABŞ, Meksika və Kanadada təşkil olunacaq. Mundiallar tarixində ilk dəfə 48 milli komanda birincilik uğrunda mübarizə aparacaq. Əvvəllər dünya çempionatlarında 32 komanda çıxış edirdi. Hazırkı dünya çempionu Argentina millisidir.xeber100.com

“Əziz Şuşa” beynəlxalq velosiped yarışı keçiriləcək

Gənclər və İdman Nazirliyi və Azərbaycan Velosiped Federasiyasının birgə təşkilatçılığı ilə iyunun 7-dən 11-dək Ümummilli Lider Heydər Əliyevin anadan olmasının 100 illik yubileyinə həsr olunmuş "Əziz Şuşa” beynəlxalq velosiped yarışı keçiriləcək. Federasiyadan bildiriblər ki, şose velosipedinin qrup ötüşməsi növü üzrə təşkil ediləcək veloturda dünyanın 16-dək ölkəsindən 18-dək komandanın tərkibində 100-dən çox idmançı medallar uğrunda mübarizə aparacaq. Beynəlxalq Velosipedçilər İttifaqının (UCI) 2023-cü il üçün müəyyənləşdirdiyi təqvim planına daxil edilən 2.2 kateqoriyalı 5 mərhələli yarışa iyunun 7-də Bakı şəhərinin Səbail rayonunda yerləşən Veloparkdan start veriləcək. İlk mərhələdə velosipedçilər 150 kilometr məsafə qət edərək Şamaxı rayonunda finiş xəttini keçəcəklər. İdmançılar iyunun 8-də Qəbələ - Şəki - Qəbələ marşrutu üzrə 176,2, ertəsi gün Qəbələdən Gəncə şəhərinin mərkəzinədək 170, ayın 10-da Gəncədə təyin olunmuş marşrut üzrə dövrə vurduqdan sonra Göygöl Milli Parkınadək 102,9, iyunun 11-də isə Beyləqandan Şuşayadək 134,9 kilometr məsafədə yarışacaqlar. Qeyd edək ki, nüfuzlu yarışın nəticələrinə əsasən, velosipedçilər “Paris-2024” Yay Olimpiya Oyunlarına lisenziya xalları qazana biləcəklər.xeber100.com

Azərbaycan Cüdo Federasiyasının məlumatına görə…

Orxan Səfərov əvvəlki formasında deyil və hazırda inkişaf etmir. Onun yığmadan uzaqlaşdırılması məsələsinə gəldikdə, hər şey ola bilər. İdmançının motivasiyası yüksək olmalıdır. Lakin biz artıq bunu onda görmürük. Bu sözləri Azərbaycan Cüdo Federasiyasının (ACF) baş katibi Rəşad Rəsullu mayın 18-də jurnalistlərlə görüşündə deyib. Milli komandamızın üzvü Hidayət Heydərovun çox istedadlı idmançı olduğunu bildirən baş katib qeyd edib ki, o dünya çempionatında zədələnsə də, bunu nə bizə, nə də hakimlərə bildirməyib. Lakin çempionatın səhəri günü onun belində ikinci dərəcəli yırtıq olduğu müəyyən edilib. Bu səbəbdən cüdoçu bir müddət məşqlərə davam edə bilməyəcək.xeber100.com

UEFA Çempionlar Liqasında yarımfinal mərhələsində

UEFA Çempionlar Liqasında yarımfinal mərhələsinin cavab oyunlarından sonra həftənin rəmzi komandası açıqlanıb. Rəmzi komandada qapıçı - Ederson ("Mançester Siti"), müdafiəçilər - Kayl Uolker, Manuel Akanci (hər ikisi "Mançester Siti"), Françesko Açerbi, Federiko Dimarko (hər ikisi "İnter"), Malik Tşau ("Milan"), yarımmüdafiəçilər - Kevin De Brüyne, Bernardu Silva (hər ikisi "Mançester Siti"), Hakan Çalhanoğlu ("İnter"), hücumçular - Xulian Alvares ("Mançester Siti") və Lautaro Martines ("İnter") yer alıblar. Qeyd edək ki, Çempionlar Liqasının finalında "Mançester Siti" və "İnter" klubları üz-üzə gələcəklər. Həlledici qarşılaşma iyunun 10-da İstanbuldakı Atatürk Olimpiya Stadionunda keçiriləcək.xeber100.com

“Barselona” klubu PSJ-nin futbolçusuna bir illik müqavilə təklif edib

“Barselona” klubu PSJ-nin futbolçusu Lionel Messiyə bir illik müqavilə təklif edib. Bu barədə İspaniya mətbuatı məlumat yayıb. Argentinalı hücumçu müqaviləni qəbul edəcəyi halda, ilinə 25 milyon avro qazanacaq. Kataloniya təmsilçisi 35 yaşlı oyunçunun təklifə müsbət cavab verəcəyinə inanır. Qeyd edək ki, Messinin Paris təmsilçisi ilə müqaviləsi yayda başa çatır. O, 2004-2021-ci illərdə "Barselona"nın əsas komandasında oynayıb.xeber100.com

Azərbaycan Premyer Liqasında XXXIV tura yekun vurulacaq

Bu gün futbol üzrə Azərbaycan Premyer Liqasında XXXIV tura yekun vurulacaq. Təxirə salınmış oyunda “Sumqayıt” komandası “Sabah”ı qəbul edəcək. Hazırda paytaxt klubu 77 xalla turnir cədvəlində ikinci, “Sumqayıt” isə 28 xalla səkkizinci pillədə qərarlaşıb. “Kapital Bank Arena”da keçiriləcək matç saat 19:30-da başlayacaq. Bu görüş “Sabah”ın Türkiyənin “Beşiktaş” komandası ilə keçirdiyi xeyriyyə matçına (3:3) görə təxirə salınıb. Xatırladaq ki, turun əvvəlki oyunlarında "Zirə" evdə "Kəpəz"lə, "Neftçi" "Şamaxı" ilə 1:1 hesablı sülhə razılaşıb, "Turan Tovuz" Qəbələdə eyniadlı komandanı 2:1, "Qarabağ" isə səfərdə "Səbail"i 3:0 hesabı ilə məğlub edib.xeber100.com

UEFA Çempionlar Liqasında yarımfinal mərhələsinə yekun vurulacaq

Bu gün UEFA Çempionlar Liqasında yarımfinal mərhələsinə yekun vurulacaq. Bununla da ikinci finalçının adına aydınlıq gələcək. Yarımfinalın ilk oyununda İspaniyada "Real Madrid"lə 1:1 hesablı heç-heçə edən "Mançester Siti" bu dəfə eyni rəqiblə İngiltərədə qarşılaşacaq. "Etihad" stadionundakı qarşılaşma Bakı vaxtı ilə saat 23:00-da başlayacaq. Görüşü polşalı FIFA referisi Şimon Marçinyak idarə edəcək. Qeyd edək ki, bu cütün qalibi finalda İtaliyanın “İnter” klubuna rəqib olacaq.xeber100.com

Bədii gimnastika üzrə 39-cu Avropa çempionatı davam edir

Bakıda bədii gimnastika üzrə 39-cu Avropa çempionatı davam edir. Çempionatın birinci günündə gənc gimnastlardan ibarət komandalar mübarizə aparırlar. Beş top ilə təsnifat yarışlarında İsrail kollektivi birinci pillədə yer alıb. Komandanın çıxışı 31,100 xalla qiymətləndirilib. İlk üçlükdə İspaniya (28,700 xal) və Yunanıstan (26,550) yer alıblar. Gövhər İbrahimova, Səkinəxanım İsmayılzadə, Mədinə Aslanova, İlahə Bahadırova, Ayan Sadıqova və Zəhra Cəfərovadan ibarət komandamız B qrupunda mübarizə aparacaq. “Ulduz kimi parla” şüarı ilə keçirilən qitə çempionatında 38 ölkədən 315 gimnast (böyüklər – 191, gənclər 124) mübarizə aparacaq. Fərdi gimnastlar ayrı-ayrı alətlər (top, halqa, gürzlər lent), komanda hesabı və çoxnövçülük proqramında çıxış edəcəklər. Qrup hərəkətləri üzrə komandalar böyüklər arasında beş halqa, üç lent və iki top, gənclər arasında isə beş ip və beş top proqramında güclərini sınayacaqlar.xeber100.com

Ağır atletika üzrə 33-cü Afrika çempionatına start verilib

Tunisdə keçirilən ağır atletika üzrə 33-cü Afrika çempionatına start verilib. Yarışda Azərbaycan yığma komandasının üzvləri də iştirak edirlər. Azərbaycan Ağır Atletika Federasiyası xəbər verir ki, ilk olaraq millimizin üzvü Nazilə İsmayılova körpücük üzərinə çıxıb. O, 45 kiloqram çəki dərəcəsində mübarizə aparıb. Atletimiz uğurlu çıxışla yadda qalıb. Nazilə İsmayılova birdən qaldırma hərəkətində 60, təkanla qaldırma hərəkətində 72 kiloqram çəkini ram edib, toplam 132 kiloqram (60+72) nəticə göstərib. Bu göstərici ilə o, bu çəki dərəcəsində həm birdən, həm təkanla qaldırma hərəkətləri, həm də toplamda qalib olub. Azərbaycan yığmasının başqa qitənin çempionatında çıxışına səbəb bu ilin aprelində İrəvanda keçirilən Avropa çempionatında məlum səbəblərdən iştirak edə bilməməsidir. Tunisdə təşkil olunan yarış da “Paris-2024” Yay Olimpiya Oyunlarına lisenziya xarakteri daşıyır və Beynəlxalq Ağır Atletika Federasiyası tərəfindən Azərbaycan komandasına alternativ imkan kimi bu turnirdə qüvvəsini sınamaq təklif olunub. Azərbaycan Ağır Atletika Federasiyası bu təklifi qəbul edib. İrəvanda yarışa bilməyən idmançılarımız Tunisdə körpücük üzərinə çıxacaq və əldə etdikləri nəticələr Olimpiya təsnifat sistemində qeydə alınacaqdır.