UEFA Çempionlar Liqasında yarımfinal mərhələsinin ilk oyunlarına yekun vurulacaq

Bu gün UEFA Çempionlar Liqasında yarımfinal mərhələsinin ilk oyunlarına yekun vurulacaq. Yarımfinalın ikinci matçında İtaliya təmsilçiləri üz-üzə gələcəklər. “Milan” klubu “İnter”i qəbul edəcək. “San Siro” stadionunda keçiriləcək görüşü ispaniyalı Xesus Xil Mansano idarə edəcək. Matç Bakı vaxtı ilə saat 23:00-da başlayacaq. Komandalar arasında cavab matçı mayın 16-da keçiriləcək. Qeyd edək ki, yarımfinalın ilk oyununda İspaniyanın “Real Madrid” komandası öz meydanında İngiltərənin “Mançester Siti” klubu ilə heç-heçəyə razılaşıb – 1:1.xeber100.com

Ümummilli Lider Heydər Əliyevin 100 illiyinə həsr olunan şahmat seansı təşkil edilib

Ümummilli Lider Heydər Əliyevin 100 illiyinə həsr olunan şahmat seansı təşkil edilib. Gənclər və İdman Nazirliyi, Azərbaycan Şahmat Federasiyasının təşkilatçılığı ilə Dənizkənarı Milli Parkda tanınmış şahmatçılar eyni anda 100 lövhədə seansda iştirak edib. Seans zamanı üçqat Avropa çempionu, gənclər arasında ikiqat dünya çempionu Şəhriyar Məmmədyarov, üçqat Avropa çempionu, dünya kuboku yarışlarının qalibi Teymur Rəcəbov, üçqat qitə çempionları Rauf Məmmədov, Qədir Hüseynov, eyni zamanda müxtəlif yaş qrupları üzrə dünya, Avropa çempionatının qalib və mükafatçıları Abdulla Qədimbəyli, Zeynəb Məmmədyarova və Gülnar Məmmədova balaca və yeniyetmə şahmatçılara qarşı mübarizə aparıblar. İki saata yaxın davam edən seansda 15 partiya heç-heçə başa çatıb, iki oyunda yeniyetmələr qələbə qazanıblar. Tədbirin sonunda yeniyetmə şahmatçılara Azərbaycan Şahmat Federasiyasının xatirə hədiyyələri təqdim olunub. Ümummilli Lider Heydər Əliyevin 100 illiyinə həsr olunan eyni anda 100 lövhədə seanslar növbəti aylarda digər regionlarda təşkil olunacaq.xeber100.com

UEFA Çempionlar Liqasında yarımfinal mərhələsinə start veriləcək

Bu gün UEFA Çempionlar Liqasında yarımfinal mərhələsinə start veriləcək. İlk oyun günündə bir qarşılaşma keçiriləcək. Turnirin son qalibi İspaniyanın "Real Madrid" klubu İngiltərənin “Mançester Siti” komandasını qəbul edəcək. “Santyaqo Bernabeu” stadionunda oynanılacaq görüş Bakı vaxtı ilə saat 23:00-da start götürəcək. Matçı portuqaliyalı FIFA referisi Artur Diaş idarə edəcək. Komandalar arasında cavab oyunu mayın 17-də keçiriləcək. Yarımfinalın digər matçında İtaliya təmsilçiləri "Milan" və "İnter" qarşılaşacaqlar. Görüş mayın 10-da keçiriləcək.xeber100.com

Taekvondo üzrə dünya çempionatına gerisayım başlayıb

Mayın 29-dan iyunun 4-dək Bakıda keçiriləcək taekvondo üzrə dünya çempionatının başlamasına 20 gün qalıb. “Öz gücünü alovlandır” şüarı altında sayca 26-cı dəfə təşkil olunacaq yarış Dünya Taekvondo Federasiyasının 50 illiyinə və Ümummilli Lider Heydər Əliyevin 100 illiyinə təsadüf edəcək. Bu münasibətlə çempionat çərçivəsində silsilə tədbirlər və yubiley konserti baş tutacaq. Yeddi gün davam edəcək çempionatda ölkəmizi Səyyad Dadaşov (54 kq), Qaşim Maqomedov (58 kq), Xanoğlan Kərimov (63 kq), Cavad Ağayev (68 kq), Eltac Qafarov (74 kq), Əliəskər Əliyev (80 kq), Taleh Süleymanov (87 kq), Həmidrza Bədriəliabadi (+87 kq), Minayə Əkbərova (46 kq), Patimat Abakorava (49 kq), Səmərrux Osmanova (53 kq), Fatimə Məcidova (62 kq) və Fəridə Əzizova (67 kq) təmsil edəcəklər. İdmançılar “Baku Crystal Hall”da qələbə uğrunda mübarizə aparacaqlar. Xatırladaq ki, mundiala paytaxtımızın ev sahibliyi etmək hüququ bir il əvvəl verilib.xeber100.com

Futbolçulardan ibarət milli komandamız son oyununu keçirib

On yeddi yaşadək futbolçulardan ibarət Azərbaycan milli komandası Albaniyanın paytaxtı Tiranada təşkil olunmuş UEFA inkişaf turnirində son oyununu keçirib. Moldovanın müvafiq yaş qrupundan ibarət komandası ilə oyun 3:2 hesabı ilə rəqibin xeyrinə nəticələnib. Millimizin qollarını 26-cı dəqiqədə Həsən Nəzərli və 39-cu dəqiqədə Ziya Şəkərxanov vurublar. Yığmamız ilk oyununda Farer adaları yığmasına 2:0 hesabı ilə gəlib.xeber100.com

Cüdoçular arasında Avropa kuboku turnirinə yekun vurulub

Fransanın paytaxtı Parisdə keçirilən gənc cüdoçular arasında Avropa kuboku turnirinə yekun vurulub. Azərbaycan cüdoçuları yarışın ilk günündə 1 qızıl və 1 bürünc medal qazanıblar. Turnirin ikinci günündə isə Ömər Rəcəbli (81 kq) gümüş, Kənan Nəsibov (100 kq-dan yuxarı) qızıl medal əldə ediblər. Cüdoçularımız turnirdə ümumilikdə 2 qızıl, 1 gümüş və 1 bürünc medal qazanaraq oğlanlar arasında ikinci, ümumi komanda hesabında üçüncü yeri tutublar.xeber100.com

Azərbaycan Premyer Liqasında XXXIII tura yekun vurulacaq

Bu gün futbol üzrə Azərbaycan Premyer Liqasında XXXIII tura yekun vurulacaq. Turun sonuncu oyununda “Qarabağ” klubu “Qəbələ”ni qəbul edəcək. “Azersun Arena” oynanılacaq matç saat 20:00-da başlayacaq. Qarşılaşmanın baş hakimi Rəvan Həmzəzadə olacaq. Ağdam klubu 81 xalla turnir cədvəlinin liderdir. "Qəbələ" 48 xalla dördüncü pillədə qərarlaşıb. Qeyd edək ki, turun əvvəlki görüşlərində "Sabah" "Kəpəz"i, "Zirə" "Şamaxı"nı 3:0 hesabı ilə üstələyib. "Turan Tovuz" "Neftçi"ni (4:0), "Səbail" isə "Sumqayıt"ı (3:1) məğlub edib.xeber100.com

Heydər Əliyev Fondunun təşəbbüsü ilə “Bakı Marafonu 2023” keçirilib

Mayın 7-də Heydər Əliyev Fondunun təşəbbüsü ilə “Bakı Marafonu 2023” keçirilib. 2016-cı ildən etibarən ənənəvi olaraq təşkil edilən Bakı Marafonu idmanın inkişafına dəstək göstərmək, sağlam həyat tərzini təbliğ etmək məqsədi daşıyır və hər il də kütləviliyi, yaşından asılı olmayaraq müxtəlif ölkələrdən iştirakçıları ətrafında toplaması ilə seçilir. “Heydər Əliyev İli” çərçivəsində təşkil edilən builki Bakı Marafonu Ümummilli Liderin 100 illik yubileyinə həsr olunub. Yarışda 18 yaşdan yuxarı şəxslər iştirak ediblər. Budəfəki marafonda iştirak etmək üçün 19 min 500 nəfər qeydiyyatdan keçib. Marafonda iştirak etmək üçün Azərbaycan vətəndaşları ilə yanaşı, ölkəmizdə yaşayıb çalışan əcnəbilər, eləcə də digər ölkələrdən iştirakçılar da qeydiyyatdan keçiblər. Bunların sırasında bu il ABŞ, Belarus, Böyük Britaniya, Çin, Fransa, Gürcüstan, İran, İtaliya, Qazaxıstan, Qırğızıstan, Özbəkistan, Polşa, Rusiya, Türkiyə, Ukrayna və digər ölkələrdən iştirakçılar olublar. Bakı Marafonunda bir sıra tanınmış şəxslər də fəxri iştirakçı kimi yarışıblar. “Bakı Marafonu 2023”ün eksklüziv tərəfdaşı “Azercell Telekom” şirkətidir. Marafon Elm və Təhsil Nazirliyi, Rəqəmsal İnkişaf və Nəqliyyat Nazirliyi, KOBİA, SOCAR, Dənizkənarı Bulvar İdarəsi, “Regional İnkişaf” İctimai Birliyinin (RİİB), Azerlotereya, m10, Hyundai, Badamlı, Baltika 0 dəstəyi ilə təşkil olunub. “Bakı Marafonu 2023”ün səhnə proqramı və əyləncə tərəfdaşı “Xəzər FM”, “Araz FM” və Xəzər TV-dir. Layihənin icrasını isə Sport Marketing Group (SMG) şirkəti həyata keçirib.

Azərbaycan Premyer Liqasının XXXIII turu çərçivəsində iki oyun keçirilib

Bu gün futbol üzrə Azərbaycan Premyer Liqasının XXXIII turu çərçivəsində iki oyun keçirilib. Günün ilk matçında “Turan Tovuz” komandası doğma meydanda “Neftçi”ni qəbul edib. Tovuz təmsilçisi rəqibini dörd cavabsız qolla məğlub edib. Oyunda Runi Eva het-trik edib, digər qolu Roderik Miller vurub. “Turan Tovuz” komandası 35 xalla turnir cədvəlində altıncı pillədə qərarlaşıb. “Neftçi”nin aktivində 61 xal var və komanda daha əvvəl bürünc mükafatı təmin edib. Günün digər oyununda “Sumqayıt” və “Səbail” komandaları üz-üzə gəliblər. Görüş “Səbail”in 3:1 hesablı qələbəsi ilə yekunlaşıb. Bakı təmsilçisinin heyətində Matiya Lyuyiç dubl edib, Franko Mazurek isə fərqlənib. “Sumqayıt”ın heyətində Todor Todoroski adını tabloya yazdırıb. Hesabındakı xalların sayını 25-ə çatdıran “Səbail” turnir cədvəlində doqquzuncu pilləyə yüksəlib. “Sumqayıt” 28 xalla səkkizinci pillədə yer alıb. Qeyd edək ki, turun əvvəlki oyunlarında “Sabah” “Kəpəz”i, “Zirə” “Şamaxı”nı səfərdə 3:0 hesabı ilə məğlub edib. Tura mayın 8-də keçiriləcək “Qarabağ” – “Qəbələ” görüşü ilə yekun vurulacaq.xeber100.com

“Prezident kuboku-2023” beynəlxalq reqatasına yekun vurulub

Ümummilli Lider Heydər Əliyevin 100 illik yubileyinə həsr olunan “Prezident kuboku-2023” beynəlxalq reqatasına Bakıda yekun vurulub. Bakı Su İdman Sarayının yaxınlığında təşkil olunan bağlanış mərasimində gənclər və idman naziri Fərid Qayıbov, nazir müavini Mariana Vasileva, Azərbaycan Kanoe və Avarçəkmə Federasiyasının (AKAF) prezidenti Vüqar Əhmədov, Milli Olimpiya Komitəsinin (MOK) vitse-prezidenti Çingiz Hüseynzadə, Azərbaycan Minifutbol Federasiyasının fəxri prezidenti Orxan Məmmədov, Beynəlxalq Kanoe Federasiyasının prezidenti Tomas Koneçko, Avropa Kanoe Assosiasiyasının rəhbəri Jan Zunqrana, idmançılar və qonaqlar iştirak ediblər. Mərasimdə çıxış edən rəsmi şəxslər yarışın yüksək səviyyədə təşkil olunduğunu bildiriblər. Daha sonra mükafatlandırma mərasimi olub. Qaliblərə medal və mükafatları nazir Fərid Qayıbov, nazir müavini Mariana Vasileva, Vüqar Əhmədov, Çingiz Hüseynzadə, MOK-un baş katibi Azər Əliyev, Tomas Koneçko, Jan Zunqrana, Ukraynanın Azərbaycandakı səfiri Vladislav Kanevski, Türkiyə Kanoe Federasiyasının prezidenti Alper Kabakçı, qardaş ölkənin Avarçəkmə Federasiyasının prezidenti Erhan Ertürk və digər rəsmi şəxslər təqdim ediblər. Ardınca tədbirin bədii hissəsinə start verilib. 3D effektli lazer şou, tanınmış rəqs qruplarının çıxışı, avarçəkənlərin nümunəvi keçidləri və möhtəşəm atəşfəşanlıqla yanaşı, Miri Yusifin solo ifası da olub. Qeyd edək ki, beynəlxalq reqatanın ilk mərhələsi Suqovuşanda, növbəti mərhələləri isə Mingəçevirdə keçirilib.xeber100.com