Dünya kuboku yarışlarının təqvimi açıqlanıb

Fevralın 15-16-da Milli Gimnastika Arenasında keçiriləcək batut gimnastikası və tamblinq üzrə dünya kuboku yarışlarının təqvimi açıqlanıb.Azərtac Azərbaycan Gimnastika Federasiyasına istinadla xəbər verir ki, turnirin birinci günündə tamblinq və batut gimnastikasi üzrə fərdi təsnifat yarışları baş tutacaq. Həmçinin batut üzrə sinxron cütlüklər arasında təsnifat yarışları təşkil olunacaq. Dünya kubokunun ikinci günündə isə təsnifat yarışlarında uğurla çıxış edən gimnastlar final mərhələsində mübarizə aparacaqlar. Turnirdə ən yüksək icra xalını toplamış gimnastlara ənənəvi “AGF Trophy” Kuboku da təqdim olunacaq.Tokio Olimpiya Oyunlarına lisenziya xarakteri daşıyan turnirdə 30 ölkə iştirakını təsdiqləyib. Təxminən 150 gimnast yarışda birincilik uğrunda mübarizə aparacaq.Xatırladaq ki, ötən il Bakıda baş tutmuş batut gimnastikası üzrə dünya kuboku da Olimpiadaya təsnifat xarakteri daşıyırdı. 2018-ci ildə isə paytaxtımız 26 ölkənin iştirakı ilə gimnastikanın bu növü üzrə ilk dəfə Avropa çempionatına ev sahibliyi edib. Gələn il Azərbaycanda ilk dəfə batut gimnastikası üzrə dünya çempionatı keçiriləcək.xeber100.com

Azərbaycan Premyer Liqasında XVI turun daha bir oyunu keçirilib

Fevralın 8-də futbol üzrə Azərbaycan Premyer Liqasında XVI turun daha bir oyunu keçirilib.Azərtac xəbər verir ki, “Sumqayıt” komandası doğma meydanda - “Kapital Bank Arena”da “Zirə” klubunu 2:1 hesabı ilə məğlub edib.Görüşdə hesab 13-cü dəqiqədə açılıb. “Sumqayıt”ın heyətində Elvin Cəfərquliyev fərqlənib. Qonaqlar 35-ci dəqiqədə hesabı bərabərləşdiriblər. Ağabala Ramazanov çərçivəni dəqiq nişan alıb. Lakin cəmi iki dəqiqə sonra qonaq komandanın yarımmüdafiəçisi İlkin Muradov ikinci sarı vərəqəni alaraq komandasını meydanda azlıqda qoyub. Birinci hissə bu hesabla yekunlaşıb – 1:1.Görüşün 66-cı dəqiqəsində Sumqayıt təmsilçisinin yarımmüdafiəçisi Xəyal Nəcəfov komandasını yenidən hesabda önə keçirib. Bu, oyunda vurulan sonuncu qol olub. Görüşün 68-ci dəqiqəsində “Zirə”nin daha bir futbolçusu - Ağabala Ramazanov qırmızı vərəqə alaraq meydandan kənarlaşdırılıb.Qeyd edək ki, XVI tura “Qarabağ” – “Neftçi” matçı ilə yekun vurulacaq. Çempionatın XVI turunun ilk iki matçında “Sabah” doğma meydanda “Qəbələ”ni (3:2), “Səbail” isə səfərdə “Keşlə”ni (0:1) məğlub edib.Hazırda turnir cədvəlinə 34 xalla “Qarabağ” klubu başçılıq edir. Aktivində 26 xal olan “Keşlə” və “Neftçi” klubları müvafiq olaraq ikinci və üçüncü pillədə qərarlaşıblar. Digər pillələrdə “Sumqayıt” (22), “Zirə” (20), “Sabah” (16), “Səbail” (15) və “Qəbələ” (13) yer alıblar.xeber100.com

Gimnastikanın müxtəlif növləri üzrə beynəlxalq turnir keçiriləcək

Cari ildə Bakıda gimnastikanın müxtəlif növləri üzrə 8 beynəlxalq turnir keçiriləcək. İlin ilk beynəlxalq yarışı batut gimnastikası və tamblinq üzrə dünya kuboku turniridir.Azərtac xəbər verir ki, bu sözləri Azərbaycan Gimnastika Federasiyasının baş katibi Nurlana Məmmədzadə fevralın 8-də jurnalistlərə müsahibəsində deyib.Baş katib bildirib ki, fevralın 15-16-da keçiriləcək dünya kuboku yarışlarında iştirak edəcək Qazaxıstan, Gürcüstan və Yeni Zelandiya komandaları artıq Bakıdadır. Bu komandalar Bakıda təlim-məşq toplanışında iştirak edirlər.Milli Gimnastika Arenasının dünya kuboku yarışlarına tam hazır olduğunu deyən N.Məmməzadə bildirib ki, turnirdə 30 ölkədən 150 idmançı iştirak edəcək. Turnirin batut gimnastikası yarışlarında Olimpiya Oyunları mükafatçılarının iştirakı gözlənilir. Ötən il olduğu kimi, builki yarış da “Tokio-2020” Yay Olimpiya Oyunlarına lisenziya xarakteri daşıyacaq.Xatırladaq ki, dünya kuboku turnirində ölkəmizi batut gimnastikası yarışlarında Selcan Maqsudova, tamblinqdə isə Fərid Mustafayev təmsil edəcəklər.xeber100.com

Azərbaycan Yüksək Liqasında növbəti görüşlərin vaxtı dəqiqləşib

Kişi voleybolçular arasında Azərbaycan Yüksək Liqasında növbəti görüşlərin vaxtı və yeri dəqiqləşib.Azərtac Azərbaycan Voleybol Federasiyasına istinadla xəbər verir ki, birinci dövrədə keçiriləcək matçlar fevralı 8-də və 12-də oynanılacaq.Fevralın 8-də meydana əvvəlcə “Neftçi” və MOİK klubları çıxacaqlar. Qarşılaşma saat 14:00-da başlayacaq. Saat 16:00-da “Xilasedici” komandası “Sərhədçi”ni sınağa çəkəcək. Hər iki görüş Fövqəladə Hallar Nazirliyinin (FHN) İdman-Sağlamlıq Kompleksində oynanılacaq.Dörd gün sonra – fevralın 12-də “Sərhədçi” Olimpiya İdman Mərkəzində “Sərhədçi” və “Neftçi” komandaları üz-üzə gələcəklər. Bu matçdan sonra isə “Xilasedici” və “Murov” komandaları qarşılaşacaqlar. Bu oyun da FHN-in İdman-Sağlamlıq Kompleksində keçiriləcək. Birinci matç saat 14:00-da, ikinci görüş isə saat 16:00-da start götürəcək.xeber100.com

Azərbaycan kuboku turnirinin final qarşılaşmaları keçiriləcək

Fevralın 7-də şahmat üzrə Azərbaycan kuboku turnirinin final qarşılaşmaları keçiriləcək.Azərtac xəbər verir ki, böyüklər arasında yarışın final partiyası Aydın Süleymanlı ilə Ülvi Sadıqov arasında oynanılacaq. On iki yaşadək şahmatçıların yarışında isə Şahin Vəliyev və Tunar Davudov mübarizə aparacaqlar.Böyüklər kateqoriyasında üçüncü yer uğrunda görüşdə Nicat Abasov və Xəzər Babazadə, 12 yaşadək şahmatçıların yarışında isə Həsən Orucov və İsmayıl Süleymanlı qarşılaşacaqlar.Fevralın 4-də start götürən Azərbaycan kuboku turniri Respublika Şahmat Mərkəzində keçirilir.xeber100.com

Azərbaycan Premyer Liqasının XVI turuna start veriləcək

Fevralın 7-də futbol üzrə Azərbaycan Premyer Liqasının XVI turuna start veriləcək.Azərtac Peşəkar Futbol Liqasının saytına istinadla xəbər verir ki, turun birinci oyun günündə iki görüş keçiriləcək. Açılış matçında “Sabah” və “Qəbələ” komandaları “Bank Respublika Arena”da qarşılaşacaqlar. Saat 19:00-da başlayacaq görüşü Rəvan Həmzəzadə idarə edəcək.Günün ikinci matçı isə “ASK Arena”da təşkil olunacaq. Çempionluğa iddialılardan olan - ikinci pillənin sahibi “Keşlə” autsayder “Səbail”i qəbul edəcək. Bakı vaxtı ilə saat 21:00-da start götürəcək qarşılaşmanın idarə edilməsi Əliyar Ağayevə həvalə olunub.Fevralın 8-də “Kapital Bank Arena”da “Sumqayıt”–“Zirə” oyunu keçiriləcək. Baş hakim Orxan Məmmədov idarə edəcəyi qarşılaşma 17:30-da başlayacaq.Premyer Liqanın XVI turuna həmin gün saat 20:00-da başlayacaq “Qarabağ”-“Neftçi” matçı ilə yekun vurulacaq. Tofiq Bəhramov adına Respublika stadionunda keçiriləcək oyunda ədaləti Rauf Cabbarov qoruyacaq.Bütün görüşlər “CBC Sport” kanalı ilə birbaşa yayımlanacaq.On beş turdan sonra turnir cədvəlinə 34 xalla “Qarabağ” klubu başçılıq edir. Aktivində 26 xalı olan “Keşlə” və “Neftçi” klubları müvafiq olaraq ikinci və üçüncü pillədə qərarlaşıblar. Digər pillələrdə müvafiq olaraq “Zirə” (20), “Sumqayıt” (19), “Sabah” (13), “Qəbələ” (13) və “Səbail” (12) yer alıblar.xeber100.com

Azərbaycan kubokunun 1/16 final mərhələsi çərçivəsində

Futzal üzrə Azərbaycan kubokunun 1/16 final mərhələsi çərçivəsində 5 oyun keçirilib.Azərtac xəbər verir ki, mərhələnin ilk matçı “Star-karqo”ların dueli olub. Görüş “Star-karqo-2”nin qələbəsi ilə başa çatıb – 6:4.İkinci matçda “Yasamal” və “Yurd” komandaları qarşılaşıblar. “Yasamal” ardıcıl 4 qol vursa da, ikinci hissədə toparlanan “Yurd” 5:4 hesabı ilə qələbə qazanmağı bacarıb.“Red Line”–“Borçalı” dueli də kifayət qədər gərgin idman mübarizəsi şəraitində keçib. Hər hissədə bir qol vuran Birinci Liqa təmsilçisi “Red Line” minimal hesablı qələbə sayəsində cavab matçına cüzi də olsa, üstünlüklə çıxacaq – 2:1.Günün növbəti matçında “Araz” komandası “Baker Huges” ilə qarşılaşıb. “Araz”ın rəqibini böyük hesabla yenəcəyi isə gözlənilən idi. İkinci matçı formallığa çevirən Yüksək Liqa təmsilçisinin heyətində debüt edən Eşaq Soorgali qol hesabını açıb. Qarşılaşma 17:2 hesabı ilə qələbə qazanıb.Günün sonuncu oyununda da qələbəni Yüksək Liqa təmsilçisi – “Marafon” qazanıb. Fasiləyə qədər cəmi bir qol vuran “Marafon” ikinci hissədə fərqi artırsa da, 26-cı dəqiqədə “Altay” sona qədər mübarizəsini davam etdirib. Nəticədə İkinci Liqa klubu fərqi minimuma endirməklə intriqanı ölməyə qoymayıb. Amma son dəqiqədə daha iki dəfə rəqib torunu silkələyən “Marafon” ikinci oyuna üstünlük qazanıb – 4:1.Fevralın 7-də “Premier Quba”–“Bibi-Heybət”, “Bakur Fire”–“Advokat”, “Neftçi”–“Gənclik”, “Record club”–“Hövsan”, “Baku Fans”–“Zəngilan”, ertəsi gün “Forza Neftçi”–“Badamlı”, “Bakı”–“Nəqşicahan”, EKOL–NTD, “Yasamal”–“Atletiko Baku”, “Standard”–“Dalğa” və “Xızı”–“Baker Tilly” oyunları təşkil olunacaq.xeber100.com

Azərbaycan Futzal Federasiyasının məlumatı əsasında…

Futzal üzrə dünya çempionatının elit-raund mərhələsinə yekun vurulub.Azərtac Azərbaycan Futzal Federasiyasına istinadla xəbər verir ki, öz qruplarının qalibi olan İspaniya, Portuqaliya, Rusiya və Qazaxıstan mundiala birbaşa vəsiqə qazanıblar.Qalan iki vəsiqəni isə pley-off mərhələsində üz-üzə gələcək Xorvatiya-Çexiya və Serbiya-Finlandiya cütlüklərinin qalibi müəyyənləşdirəcək.Elit-raund mərhələsində mübarizə aparan Azərbaycan millisi Xorvatiya komandasına 0:2 hesabı ilə məğlub olub. Rusiya yığmasına 4:3 hesabı ilə qalib gələn millimiz Slovakiya seçməsi ilə heç-heçə edib – 3:3. Qrupda üçüncü olan millimiz mübarizəni dayandırıb.xeber100.com

Şahmat üzrə Azərbaycan kuboku turnirinin növbəti görüşləri keçiriləcək

Fevralın 6-da şahmat üzrə Azərbaycan kuboku turnirinin dörddəbir final və yarımfinal mərhələlərinin görüşləri keçiriləcək.Azərtac xəbər verir ki, turnirdə 12 yaşadək şahmatçılar və böyüklər əvvəlcə dörddəbir final mərhələsində mübarizə aparacaqlar. Qaliblərin mübarizə aparacaqları yarımfinal partiyalarından sonra finalçılar müəyyənləşəcək.Qeyd edək ki, Azərbaycan kuboku turnirində səkkizdəbir final yarışları fevralın 5-də keçirilib. Böyüklərin yarışında Nicat Abasov, Əhməd Əhmədzadə, Aydın Süleymanlı, Abdulla Qədimbəyli, Rəhim Qasımov, Ülvi Sadıqov, Xəzər Babazadə, Fərid Mustafayev dörddəbir finala yüksəliblər. On iki yaşadək şahmatçılar arasında isə Şahin Vəliyev, Əli Süleymanov, Xaqan Əhməd, Həsən Orucov, İsmayıl Süleymanlı, Tunar Davudov, Cahandar Azadəliyev və Paşam Əlizadə növbəti mərhələyə vəsiqə qazanıblar.Turnir Respublika Şahmat Mərkəzində keçirilir.xeber100.com

Formula 1 yarışlarının vaxtı dəyişdirilə bilər

Koronavirusun yayılması ilə əlaqədar Formula 1 yarışlarının Çində keçiriləcək Qran-Pri mərhələsinin vaxtı dəyişdirilə bilər.Azərtac xəbər verir ki, bunu “Motorsport” portalına Formula 1-in idman direktoru Ross Braun deyib.Qeyd edib ki, apreldə Çində yarışları təşkil etmək mümkün olmasa, turnir təxirə salınacaq və onun keçirilmə vaxtı dəyişdiriləcək. Formula 1-in Çin mərhələsi aprelin 17-dən 19-dək keçiriləcək.Bundan əvvəl Formula E çempionatının Çin mərhələsinin ləğv edilməsi ilə bağlı qərar qəbul edilib.xeber100.com