“Portu” futbol klubu futbolçusu ilə müqaviləni yeniləyib

"Portu" klubu futbolçusu Pepe ilə müqaviləni yeniləyib. Bu barədə klubun saytı məlumat yayıb. Qırx yaşlı müdafiəçi ilə 2024-cü ilədək müqavilə imzalanıb. Pepe karyerasına 2004-cü ildə “Portu”da başlayıb, 2007-ci ildə “Real”a keçib. Müdafiəçi 2019-cu ildə "Portu"ya qayıdıb. O, bu klubla 4 dəfə Portuqaliya çempionu olub, 2 dəfə ölkə kubokunu, 1 dəfə Superkubokunu qazanıb.xeber100.com

Azərbaycan Şahmat Federasiyasının məlumatına görə…

Yunanıstanın Rodos şəhərində təşkil edilən məktəblilər arasında şahmat üzrə dünya çempionatına yekun vurulub. Azərbaycan Şahmat Federasiyasından bildirilib ki, çempionatda ölkəmizi təmsil edən Süleyman Süleymanlı 17 yaşadək məktəblilərin yarışında gümüş medal qazanıb. Həmyerlimiz 7 xalla yaşıdları arasında ikinci olub. Bu yaş kateqoriyasında 7,5 xal toplayan Adar Tarhan (Türkiyə) qalib adına sahib olub. Rumıniya təmsilçisi Andrey Filip 6,5 xalla bürünc medala layiq görülüb. Qeyd edək ki, mötəbər yarışda 51 ölkə iştirak edib.xeber100.com

Futzal turnirinin yarımfinal mərhələsi yekunlaşıb

Ali və orta ixtisas təhsili müəssisələrinin tələbələri arasında Ümummilli Lider Heydər Əliyevin anadan olmasının 100-cü ildönümünə həsr edilmiş futzal turnirinin yarımfinal mərhələsi yekunlaşıb. Yarımfinal oyunlarının nəticələrinə əsasən, Gəncə Dövlət Universiteti və Bakı Dövlət Universiteti üçüncü, Azərbaycan Dövlət Bədən Tərbiyəsi və İdman Akademiyası və Azərbaycan Dövlət Neft və Sənaye Universiteti birinci yer uğurunda mübarizə aparacaqlar. Oyunlar mayın 3-də Bakı İdman Sarayında keçiriləcək. Yarış ilk üç yeri tutan komandalar diplom, kubok və qiymətli hədiyyələrlə mükafatlandırılacaqlar. Çempionatda fərqlənən üç tələbə futbolçu isə “Ən yaxşı qapıçı”, “Ən məhsuldar oyunçu”, “Ən gənc oyunçu” nominasiyaları üzrə xüsusi mükafatla təltif olunacaq. Qeyd edək ki, yarış Elm və Təhsil Nazirliyinin, Azərbaycan Həmkarlar İttifaqları Konfederasiyasının, Azərbaycan Futbol Federasiyaları Assosiasiyası, Azərbaycan Tələbə Futbol Federasiyası İctimai Birliyinin təşkilatçılığı ilə keçirilir. Aprelin 1-dən start verilən oyunlarda 33 ali və orta ixtisas təhsili müəssisəsinin komandaları mübarizə aparıblar.xeber100.com  

İdman gimnastika üzrə dünya kuboku yarışları keçiriləcək

Aprelin 28-30-da Misirin paytaxtı Qahirədə idman gimnastika üzrə dünya kuboku yarışları keçiriləcək. Turnirdə Azərbaycan milli komandası da iştirak edəcək. Ölkəmizin idman şərəfini Nikita Simonov, İvan Tixonov, Nazənin Teymurova və Samirə Qəhrəmanova qoruyacaqlar. Qeyd edək ki, Qahirədə təşkil olunacaq turnir dünya kubokunun dördüncü mərhələsi olacaq.xeber100.com

Voleybol üzrə “Heydər Əliyev kuboku” təşkil olunacaq

Ulu Öndər Heydər Əliyevin anadan olmasının 100 illiyinə həsr olunmuş voleybol üzrə “Heydər Əliyev kuboku” təşkil olunacaq. Azərbaycan Voleybol Federasiyası xəbər verir ki, aprelin 25-də start götürəcək yarışda həm qadın, həm də kişi idmançılar mübarizə aparacaqlar. Qadınların mübarizəsində Birinci Liqada ilk dörd pilləni tutmuş üç komanda – “Ryuga”, Murov-2”, “Xarı bülbül” və Yüksək Liqada çıxış edən UNEC, “Azərreyl”, “Abşeron”, “Murov” komandaları yarışacaqlar. Kişilərin yarışında isə Birinci Liqada ilk dörd pilləni tutmuş üç komanda – “Təhsil”, “Express”, “Xarı bülbül-2” və Yüksək Liqada çıxış edən MOİK, “Murov”, “Neftçi”, “Xarı bülbül” komandaları mübarizə aparacaqlar Dörd gün davam edəcək turnir Olimpiya sistemi ilə keçiriləcək və məğlub komandalar mübarizəni dayandıracaqlar. Qaliblər yarımfinalda üz-üzə gələcəklər. Aprelin 28-də isə kubok yarışlarının final görüşləri baş tutacaq. Qarşılaşmalar Azərbaycan Voleybol Federasiyasının idman zalında, “Murov” klubunun idman zallarında və Voleybol Mərkəzində təşkil olunacaq.xeber100.com  

“Qarabağ” futbol klubu qollu oyunlar seriyasını 16-ya çatdırıb

“Qarabağ” klubu Azərbaycan Premyer Liqasında qollu oyunlar seriyasını 16-ya çatdırıb. XXXI turda “Zirə”ni qəbul edən Qurban Qurbanovun yetirmələri 2:2 hesablı heç-heçəyə imza atıblar. XV turda məhz bu rəqiblə qolsuz heç-heçə etdikdən sonra Ağdam klubu hər qarşılaşmada qol sevinci yaşayıb. On altı oyunluq qol seriyası son üç mövsümün mütləq rekordudur. “Qarabağ” 2021-ci ildə ardıcıl 15 matçda rəqib qapısına yol tapan “Neftçi” və “Zirə”ni geridə qoyub. Qeyd edək ki, sonuncu dəfə daha uzun qol seriyasına 2019-cu ildə təsadüf olunub. 2018-2019-cu və 2019-2020-ci il mövsümlərini əhatə edən vaxtda ağdamlılar 17 matçda meydanı qolsuz tərk etməyib.xeber100.com

Bakı Şəhər Halqasının əhatəsi boyunca tamamlanma işləri başlayır

Aprelin 23-dən 24-nə keçən gecə Bakı Şəhər Halqasının əhatəsi boyunca tamamlanma işləri başlayacaq. Bununla əlaqədar aprelin 24-ü gecə saat 01:00-dan etibarən Bakı Şəhər Halqasının əhatə etdiyi prospekt və küçələrdə nəqliyyatın hərəkəti məhdudlaşdırılacaq. Həyətlərdən çıxışların qapanmasını nəzərə alaraq avtomobil idarə edən sakinlərdən xahiş olunur ki, qeyd edilmiş vaxtdan əvvəl avtomobillərini həyətlərdən çıxarsınlar. Bu yollarda nəqliyyatın hərəkəti mayın 2-si saat 08:00-dan etibarən bərpa olunacaq. BŞH göstərdikləri anlayışa görə vətəndaşlara təşəkkür edir.xeber100.com

Bədii gimnastika üzrə dünya kuboku yarışlarında mükafatçılar müəyyənləşib

Paytaxtımızda keçirilən bədii gimnastika üzrə dünya kuboku yarışlarında gürzlərlə proqramda mükafatçılar müəyyənləşib. Bütün rəqiblərini qabaqlayan Bolqarıstan gimnastı Stiliana Nikolova 34,150 xalla qızıl medal qazanıb. Ukraynalı Viktoriya Onopriienko 32,650 xalla ikinci, Almaniya gimnastı Darya Varfolomeev 32,550 xalla üçüncü olub. Ənənəyə uyğun olaraq, yarışda ən çox icra xalını toplamış gimnast və qrup komandasına “AGF Trophy” kuboku təqdim olunacaq. Qeyd edək ki, bu, ölkəmizdə bədii gimnastika üzrə təşkil olunan onuncu dünya kuboku yarışlarıdır. Paytaxtımız 2005-ci və 2019-cu illərdə bu növ üzrə dünya çempionatına ev sahibliyi edib.xeber100.com

Amerika Birləşmiş Ştatlarında “Legasy Judo Tournament” adlı turnir keçirilib

Amerika Birləşmiş Ştatlarında (ABŞ) “Legasy Judo Tournament” adlı turnir keçirilib. Naxçıvan Muxtar Respublikası Gənclər və İdman Nazirliyindən bildirilib ki, Kaliforniya ştatının Santa Klara şəhərində reallaşan yarışda Amerikada yaşayan həmyerlimiz Oğuzxan Quliyev də iştirak edib. O, d10-12 yaşlı oğlanlar arasında 38 kiloqramdan aşağı çəki dərəcəsi üzrə Azərbaycanı təmsil edib. İdmançımız ilk görüşündə Cənubi Koreya təmsilçisi Hajoon Lee, ardınca isə ABŞ-dən olan rəqibi Asher Hiat üzərində qələbə qazanaraq qızıl medala layiq görülüb.xeber100.com

Aprelin 23-də Vyanada ənənəvi şəhər marafonu keçirilib

Aprelin 23-də Vyanada ənənəvi şəhər marafonu keçirilib. Sayca 40-cı dəfə təşkil olunan marafonda dünyanın 130-dan artıq ölkəsindən 35 mindən artıq peşəkar və həvəskar idmançı iştirak edib. Yubiley marafonu tam, yarım və estafetli marafon nominasiyalarında keçirilib və marafona qoşulanların təxminən 9 mini isə tam məsafəni qaçan atletlər arasında yer alıb. Builki şəhər marafonunun qalibi kişilər arasında keniyalı Samvel Mailu olub. O, marafon məsafəsini 2:05:08 saata qət edərək, birinciliyi əldə edib. O, bu göstərici ilə efiopiyalı Qetu Felekenin doqquz il bundan əvvəl müəyyən etdiyi rekordu (2:05:41) təzələyib. Qadınlar arasında finiş xəttinə keniyalı Maqdaline Masai (2:24:12) çatıb. Ənənəvi olaraq bu il də marafona Azərbaycan nümayəndəsi qatılıb. Azərbaycan Respublikasının Silahlı Qüvvələrinin Avstriyadakı səfirliyi nəzdindəki hərbi nümayəndəsi, polkovnik Azər Heybətli ATƏT yanında akkreditə olunmuş hərbi nümayəndələrdən ibarət komandalardan birinin tərkibində marafonda iştirak edib. Hər il olduğu kimi, bu il də marafonçuları dəstəkləyən insanlar xoş məram nümayiş etdirərək “Make-A-Wish” xeyriyyə cəmiyyətinin hesabına pul köçürüblər.xeber100.com