“Qarabağ” futbol klubu ilk transferini reallaşdırıb

Ağdamın “Qarabağ” futbol klubu yeni mövsüm üçün ilk transferini reallaşdırıb.Azərtac klubun saytına istinadla xəbər verir ki, klub ispaniyalı hücumçu Xayme Romero Rodriges ilə üç illik müddətə müqavilə imzalayıb. Futbolçu komandada 9 nömrəli formada çıxış edəcək.Karyerasına İspaniyanın “Albasete” klubunda başlayan 28 yaşlı futbolçu “Saraqosa”, “Real B”, İtaliyanın “Bari” və “Udineze” klublarının şərəfini qoruyub. “Deportivo Luqo”da da icarə əsasında forma geyinən futbolçu sonuncu dəfə “Kordoba” klubunda çıxış edib.Xayme Romero Rodriges transferlə bağlı təəssüratlarını bölüşərək deyib: “Qarabağ” kimi güclü kluba gəldiyim üçün çox sevinirəm. Bu, mənim üçün yeni təcrübədir. Ümid edirəm ki, hər şey istədiyim kimi olacaq. Təbii ki, klub haqda məlumatlıyam. Azərbaycanın ən güclü komandasına gəldiyimi bilirəm. “Qarabağ”ın son illərdə ardıcıl bir neçə dəfə Azərbaycan çempion olması, avrokubokların qrup mərhələsində iştirakı, həmçinin klubun peşəkar idarəçiliyi qərarıma müsbət təsir göstərdi. Oyunlarda öz bacarığımı göstərməyi və komandama kömək etməyi səbirsizliklə gözləyirəm. Belə güclü komandada bir mövqe uğrunda rəqabətin olması normaldır. Futbolçu gəldikdə bu rəqabətə hazır olur. Rəqabət isə həm futbolçunun, həm də komandanın inkişafına təkan verir. Azarkeşlərin mənə inamını doğrultmaq üçün əlimdən gələni edəcəyəm”.xeber100.com

“Paris Sen-Jermen”in futbolçusu “Barselona”ya dönmək istədiyini bildirib

Fransanın “Paris Sen-Jermen” klubunun ulduz futbolçusu Neymar komandanın prezidenti Naser El-Halaifiyə komandanı tərk edəcəyini və “Barselona”ya dönmək istədiyini bildirib. O deyib: “Mən artıq burada qalmaq istəmirəm. Tezliklə öz evimə (“Barselona”) dönmək istəyirəm. Oranı heç vaxt tərk etməməli idim”.Azərtac xəbər verir ki, bu xəbərdən sonra Naser El-Halaifi futbolçunu təşkil olunmuş mətbuat konfransında tənqid edib. O bildirib ki, komandaya hörmət etməyən və öz işinə peşəkarcasına yanaşmayan şəxslər klubdan gedə bilər.Neymar “Barselona” klubunda 2013-2017-ci illə mövsümündə çıxış edib. 2017-ci ildə “Paris Sen-Jermen” klubuna rekord məbləğdə 222 milyon avroya transfer olunub.Futbolçunu “Barselona” ilə yanaşı, “Real Madrid”ə heyətinə qatmaqda maraqlıdır.xeber100.com

Dünya çempionatının səkkizdəbir final mərhələsində

Fransanın ev sahibliyi etdiyi qadın futbolçular arasında dünya çempionatının səkkizdəbir final mərhələsinə iyunun 22-də start verilib.Azərtac xəbər verir ki, səkkizdəbir finalın birinci günündə Almaniya seçməsi Nigeriya yığmasının qapısından üç cavabsız top keçirib. Digər oyunda isə Norveç və Avstraliya milliləri qarşılaşıblar. Norveç millisi əsas vaxtı 1:1 hesabı ilə başa çatan oyunda qalibi müəyyənləşdirmək üçün təyin edilən 11 metrlik cərimə zərbələri seriyasında üstün olub - 4:1.Səkkizdəbir finalın iyunun 23-də keçiriləcək görüşlərində İngiltərə yığması Kamerun, ev sahibi Fransa millisi isə Braziliya seçməsi ilə qarşılaşacaqlar. Bu mərhələ çərçivəsində iyunun 24-də İspaniya-ABŞ və İsveç-Kanada, iyunun 25-də isə İtaliya-Çin və Niderland-Yaponiya görüşləri oynanılacaq.Xatırladaq ki, dünya çempionatında 24 komanda altı qrupda mübarizəyə qoşulub. A qrupunda Fransa, Cənubi Koreya, Norveç və Nigeriya milliləri yer alıblar. Almaniya, Çin, İspaniya və Cənubi Afrika seçmələri B, Avstraliya, İtaliya, Braziliya və Yamayka yığmaları C qrupunda mübarizə aparıblar. Çempionatın D qrupundan səkkizdəbir finala vəsiqə uğrunda İngiltərə, Şotlandiya, Argentina və Yaponiya, E qrupundan isə Kanada, Kamerun, Yeni Zelandiya və Hollandiya futbolçuları yarışıblar. Sonuncu - F qrupunda isə ABŞ, Tailand, Çili və İsveç seçmələri yer alıblar.Mundialın görüşlərinə Fransanın 9 şəhəri - Paris, Le Havr, Valensien, Reyms, Renn, Lion, Monpelye, Nitsa, Qrenobl ev sahibliyi edir. Qrup mərhələsinə iyunun 20-də yekun vurulub. Dörddəbir final görüşləri iyunun 27-29-da keçiriləcək. Yarımfinal qarşılaşmaları iyulun 2-3-də, üçüncü yer uğrunda görüş isə iyulun 6-da oynanılacaq. Final matçı iyulun 7-də Lion şəhərində keçiriləcək.xeber100.com  

Cüdo yarışlarının ikinci gününə start verilib

“Minsk 2019” II Avropa Oyunlarında bu gün cüdo yarışlarının ikinci gününə start verilib.Azərtac xəbər verir ki, Azərbaycan təmsilçilərindən Rüstəm Orucov (73 kq) mübarizəyə qələbə ilə başlayıb. 28 yaşlı idmançı 1/16 finalda monakolu Sedrik Bessini məğlubiyyətə uğradıb. O, rəqibini 57 saniyəyə ipponla üstələyib. Azərbaycanın "Minsk 2019"dakı bayraqdarının növbəti rəqibi 2016-cı il Rio-de-Janeyro Yay Olimpiya Oyunlarında 66 kq çəkidə qızıl medal qazanmış italiyalı Fabio Bazile olub. Bu qarşılaşmada da Orucov 3 dəqiqə 27 saniyəyə qalib gələrək, adını 1/4 finala yazdırıb. Onun növbəti rəqibi isə ermənistanlı Ferdinand Karapetyan olub. Bu dəfə Orucov Karapenyana vaza-ari xalı ilə qalib gələrək, yarımfinala adlayıb. Azərbaycan təmsilçisi yunanıstanlı Georgios Azoidisə 1 dəqiqə 51 saniyəyə qalib gələrək, adını finala yazdırıb.Bu çəkidəki daha bir cüdoçu Hidayət Heydərov isə 1/16 finalda macarıstanlı Mikloş Unqvarini vaza-ari xalı ilə məğlubiyyətə uğradıb. Onun növbəti rəqibi israilli Din Yaakov Gemer olub. Bu dəfə 3 dəqiqə 31 saniyəyə ipponla qalib gələn H.Heydərov 1/4 finala yüksəlib. 22 yaşlı cüdoçunun rəqibi yunanıstanlı Georgios Azoidis olub. Heydərov 46 saniyəyə ipponla məğlub olub. O, bürünc medal uğrunda təsəlliverici görüşdə ermənistanlı Ferdinand Karapetyanla qarşılaşıb. Heydərov da Orucov kimi Karapetyanı üstələyib. Əlavə vaxtda ipponla qələbə qazanan Azərbaycan təmsilçisi bürünc medal görüşünə çıxıb.Qadınların yarışında isə Nuriyyə Axundova (63 kq) 1/16 finala təsadüf edən ilk görüşündəcə rumıniyalı Stefania Adelina Dobreyə 1 dəqiqə 46 saniyəyə uduzaraq, mübarizəni dayandırıb.Qeyd edək ki, ilk yarış günündə Azərbaycanın 7 təmsilçisinin hamısı medalsız qalıb.xeber100.com

Atletika üzrə Azərbaycan çempionatına yekun vurulub

Azərbaycan Dövlət Bədən Tərbiyəsi və İdman Akademiyasının stadionunda 2002-2003-cü il təvəllüdlü yeniyetmələr arasında atletika üzrə Azərbaycan çempionatına yekun vurulub. Gənclər və İdman Nazirliyinin, Azərbaycan Atletika Federasiyası (AAF) ilə birgə təşkil etdiyi turnirdə 120-yə yaxın atlet birincilik uğrunda mübarizə aparıb.AAF-dan Azərtac-a bildiriblər ki, Yarışda paytaxt klublarından başqa Sumqayıt, Gəncə, İsmayıllı, Bərdə və Xızıdan olan atletlər də iştirak edib.Ölkə çempionatının birinci günündə oğlanlar arasında uzunluğa tullanma yarışında Kəsgin Abbaszadə, hündürlüyə tullanmada Aydın Bədəlov və nüvəitələmədə Yusif Nəzərov qalib adını qazanıb. Qızların yarışında isə uzunluğa tullanmada Ülviyyə Cabbarova, nüvəitələmədə isə Günel Hüseynova birinci yerə layiq görülüb.Oğlanlar arasında qaçış yarışlarında Əli Abdıyev (200 m), Vahid Kərimov (800 m) və Eldar Qurbanlı (3000 m) birinci olub. Qızların mübarizəsində isə Lamiyə Vəliyeva (200 m) və Günel Manafova (800 m) fəxri kürsünün ən yüksək pilləsinə qalxıb.Qaliblər federasiya və nazirlik tərəfindən diplom və medallarla təltif olunublar.xeber100.com

Misirin beynəlxalq stadionunda Afrika Kuboku keçirilir

İyunun 22-də Misirdə Afrika Kubokuna start verilib.Azərtac xəbər verir ki, paytaxt Qahirədə yerləşən beynəlxalq stadionunda baş tutan çempionatın açılış mərasimində Misirin prezidenti Əbdülfəttah əs-Sisi də iştirak edib.Açılış görüşündə A qrupunda yer alan Misir yığması Zimbabve millisi ilə qarşılaşıb. Gərgin idman mübarizəsi ilə yadda qalan görüş Misir seçməsinin qələbəsi ilə başa çatıb - 1:0. Oyunda yeganə qolun müəllifi Trezeqe olub.Qrupun digər oyunu iyulun 22-də Konqo və Uqanda milliləri arasında təşkil olunacaq.Qeyd edək ki, turnirdə ilk dəfə olaraq 24 komanda iştirak edir.xeber100.com

Azərbaycan Ağır Atletika Federasiyasının məlumatı

İyunun 30-dək Azərbaycanın bütün bölgələrini əhatə edən ağır atletika üzrə Respublika yarışlarının 3-cü seçmə mərhələ yarışları keçiriləcək.Azərbaycan Ağır Atletika Federasiyasından Azərtac-a bildiriblər ki, yarışlar Xırdalan, Lənkəran və Samux şəhərlərində keçiriləcək. Xırdalanda iyunun 22-23-də Sumqayıt, Xırdalan, Qobustan, Şamaxı, İsmayıllı və Bakıdan (bütün idman cəmiyyətləri) olan atletlər mübarizəyə qoşulacaqlar. İyunun 26-27-də Lənkəranda Cəlilabad, Neftçala, Lənkəran, Lerik və Astaranı, iyunun 29-30-da isə Samuxda Goranboy, Gəncə, Samux, Qazax, Yevlax, Şəki və Qaxı təmsil edən atletlər körpücük üzərinə çıxacaqlar.Yarış şəxsi xarakter daşıyır və iştiraka yalnız texniki cəhətdən hazırlıqlı, yaşı ən azı 12 olan idmançılar buraxılacaqlar. Mərhələ yarışlarında 2007, 2006, 2005, 2004, 2003, 2002, 2001-ci il və daha böyük təvəllüdlü kişilər və qadınlar müvafiq yaş qruplarında mübarizə aparacaqlar, qaliblər Sinkleyr cədvəli üzrə müəyyən ediləcək.Yarışın məqsədi regionlarda atletlərin hazırlıq durumlarının yoxlanılması, ehtiyat qüvvənin nəzərdən keçirilməsi, güclü idmançıların seçilməsi, ağır atletika idman növünün şəhər, rayon, qəsəbə və kəndlərdə təbliği və inkişafı, idmançılar və məşqçılər arasında dostluq əlaqələrinin möhkəmləndirilməsi, idmançıların ustalıq səviyyəsinin artırılması və təkmilləşdirilməsidir.xeber100.com

Atletika üzrə Azərbaycan çempionatına start verilib

İyunun 21-də Azərbaycan Dövlət Bədən Tərbiyəsi və İdman Akademiyasının stadionunda 2002-2003-cü il təvəllüdlü yeniyetmələr arasında atletika üzrə Azərbaycan çempionatına start verilib. Gənclər və İdman Nazirliyinin, Azərbaycan Atletika Federasiyasının (AAF) birgə təşkilatçılığı ilə baş tutan turnirdə qızlar və oğlanlar iştirak edir.AAF-dan Azərtac-a bildiriblər ki, çempionatda 120-yə yaxın atlet birincilik uğrunda mübarizə aparır. Yarışda paytaxt klublarından başqa Sumqayıt, Gəncə, İsmayıllı, Bərdə və Xızı rayonundan olan atletlər iştirak edir.Ölkə çempionatının birinci günündə oğlanlar arasında üçtəkanla tullanma yarışında Çingiz İsrafilov və lövhə atmada Yusif Nəzərov qalib adını qazanıb. Qızların yarışında isə üçtəkanla tullanmada Ülviyyə Cabbarova birinci yerə layiq görülüb.Oğlanlar arasında qaçış yarışlarında Əli Abdıyev (100 m), Teymur Salahzadə (400 m) və Eldar Qurbanlı (1500 m) birinci olub. Qızların mübarizəsində isə Ləman Hüseynova (100 m), Ayana Seyuşova (100 m, sədlərlə qaçış), Lamiyə Vəliyeva (400 m) və Məleykə Qurbanova (1500 m) fəxri kürsünün ən yüksək pilləsinə qalxıb.Qaliblər federasiya və nazirlik tərəfindən diplom və medallarla təltif olunacaqlar.xeber100.com

2022-ci ildə Qətərdə keçiriləcək dünya çempionatında…

Futbol üzrə iki dəfə dünya çempionu braziliyalı Kafu 2022-ci ildə Qətərdə keçiriləcək dünya çempionatının səfiri seçilib.Azərtac xəbər verir ki, 1994-cü və 2002-ci illərdə Futbol üzrə dünya çempionatlarının qalibi olmuş Kafuya rəmzi səfir köynəyinin təqdim edilməsi mərasimi keçmiş futbolçunun doğma şəhəri San-Pauluda keçirilib.2022-ci ildə keçiriləcək Futbol üzrə dünya çempionatının səfirləri arasında 2010-cu ilin dünya çempionu, iki dəfə Avropa çempionu ispaniyalı Xavi və Kamerun yığmasının keçmiş hücumçusu Samuel Eto’O da var.Sözügedən dünya çempionatı 2022-ci il noyabrın 21-dən dekabrın 18-dək Qətərin 7 şəhərində keçiriləcək. Qətər həmin dünya birinciliyinə ev sahibliyi edəcək ölkə kimi 2010-cu ilin dekabr ayında seçilib.xeber100.com

Üçüncü Avropa Oyunları Polşada keçiriləcək

2023-cü ildə keçiriləcək üçüncü Avropa Oyunlarına Polşanın Krakov şəhəri ev sahibliyi edəcək.TASS informasiya agentliyi xəbər verir ki, bu barədə Avropa Olimpiya Komitəsinin mətbuat xidməti məlumat yayıb.Yarışmaya ev sahibliyi edəcək şəhərin seçilməsi barədə qərar Avropa Olimpiya Komitəsinin Minskdə keçirilən Baş Assambleyasında qitənin 50 milli komitəsi tərəfindən açıq səsvermə yolu ilə qəbul olunub.Qeyd edək ki, Avropa Oyunları Avropa Olimpiya Komitəsinin idarəçiliyi ilə dörd ildən bir keçirilir. Yarışma ilk dəfə 2015-ci ildə Bakı şəhərində təşkil olunub. Həmin yarışda 5700 idmançı 31 növ üzrə 253 mükafat uğrunda mübarizə aparıb.İkinci Avropa Oyunları Belarusun paytaxtı Minskdə keçirilir. İyunun 30-dək davam edəcək yarışlarda 15 idman növündə 199 mükafatın sahibi müəyyənləşəcək. Oxatma, karate və stolüstü tennis idman növləri üzrə 2020-ci ildə Tokioda keçiriləcək Yay Olimpiya Oyunlarına birbaşa vəsiqə qazandıracaq.xeber100.com