Stolüstü Tennis Federasiyasının məlumatına görə…

İyunun 25-də Çində yeniyetmələr arasında stolüstü tennis üzrə beynəlxalq turnir start götürüb.Azərbaycan Stolüstü Tennis Federasiyasından Azərtac-a verilən məlumata görə, beynəlxalq turnirdə qızlardan ibarət komandamızın üzvlərindən Arzu Aslanova, Mərziyyə Nürmətova, Ləman Abdülhəmidova, Mehriban Dadaşova iştirak edirlər. Oğlanların yarışında isə Adil Əhmədzadə, Hüseyn Eylazov, Emin Məmmədov, Kənan Pənahov mübarizə aparırlar.Turnir iyunun 27-dək davam edəcək.xeber100.com

“Minsk 2019” Avropa Oyunlarında güləş yarışlarına start verilib

İyunun 25-də - “Minsk 2019” ikinci Avropa Oyunlarında kişilər arasında sərbəst güləş yarışlarına start verilib.Azərtac xəbər verir ki, yarışların birinci günündə Azərbaycanın dörd güləşçisi mübarizəyə səkkizdəbir final mərhələsindən qoşulub.Güləşçilərimizdən ilk olaraq xalça üzərinə Mahir Əmiraslanov (57 kq) çıxıb. Azərbaycan pəhləvanı səkkizdəbir finalda bolqarıstanlı Georgi Vangelova 6:5 hesabı ilə qalib gələrək dörddəbir finala yüksəlib. Güləşçimiz dörddəbir finalda Şimali Makedoniya təmsilçisi Vladimir Yeqorov ilə qarşılaşacaq.Aleksandr Qostiyev (86 kq) də mübarizəyə qələbə ilə başlayıb. Sərbəst güləşçimiz Moldova təmsilçisi Denis Balaur üzərində 7:1 hesablı qələbə qazanıb. Pəhləvanımız dörddəbir finalda Gürcüstan təmsilçisi Sandro Aminaşvili ilə görüşəcək.Cəmaləddin Maqomedov (125 kq) səkkizdəbir finalda Belarus idmançısı Vitali Piasniak ilə üz-üzə gəlib. İdmançımız rəqibinə 6:0 hesabı ilə qalib gələrək dörddəbir finala yüksəlib. Dörddəbir finalda pəhləvanımızın rəqibi macarıstanlı Daniel Ligeti olacaq.Hacımurad Qadcıyev (74 kq) isə türkiyəli Söner Demirtaşa 3:4 hesabı ilə uduzub.Xatırladaq ki, “Bakı 2015” birinci Avropa Oyunlarında Azərbaycan güləşçiləri ümumilikdə 15 medal, o cümlədən 6 qızıl, 2 gümüş və 7 bürünc medal qazanıblar. Sərbəst güləşçilərimiz isə 2 qızıl, 1 gümüş və 3 bürünc medala sahib olublar.xeber100.com

Stolüstü Tennis Federasiyasının məlumatı

İyunun 25-27-də Çində yeniyetmələr arasında stolüstü tennis üzrə beynəlxalq turnir keçiriləcək.Azərbaycan Stolüstü Tennis Federasiyasından Azərtac-a verilən məlumata görə, beynəlxalq turnirdə qızlardan ibarət komandamızın üzvlərindən Arzu Aslanova, Mərziyyə Nürmətova, Ləman Abdülhəmidova, Mehriban Dadaşova iştirak edəcəklər. Oğlanların yarışında isə Adil Əhmədzadə, Hüseyn Eylazov, Emin Məmmədov, Kənan Pənahov mübarizə aparacaqlar.Stolüstü tennisçilərimiz iyunun 12-dən 22-dək Çində təlim-məşq toplanışında iştirak ediblər.xeber100.com

“Grand Chess Tour 2019” seriyasının ikinci mərhələsi keçiriləcək

İyunun 26-dan iyulun 9-dək Xorvatiyanın paytaxtı Zaqrebdə "Grand Chess Tour 2019" seriyasının ikinci mərhələsi keçiriləcək.Azərtac xəbər verir ki, turnirdə Azərbaycanı beynəlxalq qrossmeyster Şəhriyar Məmmədyarov iştirak edəcək. Yarışlarda Ş.Məmmədyarovdan başqa dünya çempionu, norveçli Maqnus Karlsen, amerikalılar Fabiano Karuana, Hikaru Nakamura və Vesli So, fransalı Maksim Vaşe-Laqrav, çinli Dinq Liren, rusiyalı şahmatçılar Yan Nepomnyaşi və Vladimir Kramnik, ermənistanlı Levon Aronyan, hollandiyalı Aniş Giri və hindistanlı keçmiş dünya çempionu Vişvanatan Anand mübarizə aparacaqlar.Ümumi mükafat fondu 1 milyon 750 min ABŞ dolları olan turnir 8 yarışdan ibarətdir. Yarışın birinci seriyası mayın 6-dan 13-dək Fil Dişi Sahilinin paytaxtı Abicanda keçirilib. Blitz və rapid üzrə keçirilmiş turnir dünya çempionu Maqnus Karlsenin qələbəsi ilə nəticələnib. Turnirin sonrakı mərhələləri - iyulun 26-dan avqustun 2-dək Paris, avqustun 8-dən 15-dək və 16-dan 30-dək Sent-Luis, noyabrın 4-dən 11-dək Buxarest, 20-dən 27-dək isə Kəlkətə şəhərlərində baş tutacaq. Yarışların final seriyası isə noyabrın 30-dan dekabrın 10-dək Londonda keçiriləcək.xeber100.com

Voleybol üzrə hazırlıq xarakterli təlim-məşqlərə start verilib

Voleybol üzrə qadınlardan ibarət millimiz Braziliyada təşkil olunacaq Olimpiya təsnifat mərhələsinə hazırlıq xarakterli təlim-məşqlərə start verib.Azərtac xəbər verir ki, millimiz iki komanda formatında təlim-məşqlər təşkil edib. Olimpiya təsnifat mərhələsində iştirak edəcək voleybolçuları milli komandanın baş məşqçisi Ciovanni Kaparara hazırlıq prosesi keçən hər iki komandadan seçəcək.Qeyd edək ki, Qızıl Avropa Liqasında mübarizəni dayandırdıqdan sonra voleybolçulara bir həftəlik istirahət verilmişdi. Braziliyada millimiz D qrupunda Dominikan Respublikası, Kamerun, Braziliya yığmaları ilə bir qrupda mübarizə aparacaq.xeber100.com  

“Qarabağ” futbol klubu ilk transferini reallaşdırıb

Ağdamın “Qarabağ” futbol klubu yeni mövsüm üçün ilk transferini reallaşdırıb.Azərtac klubun saytına istinadla xəbər verir ki, klub ispaniyalı hücumçu Xayme Romero Rodriges ilə üç illik müddətə müqavilə imzalayıb. Futbolçu komandada 9 nömrəli formada çıxış edəcək.Karyerasına İspaniyanın “Albasete” klubunda başlayan 28 yaşlı futbolçu “Saraqosa”, “Real B”, İtaliyanın “Bari” və “Udineze” klublarının şərəfini qoruyub. “Deportivo Luqo”da da icarə əsasında forma geyinən futbolçu sonuncu dəfə “Kordoba” klubunda çıxış edib.Xayme Romero Rodriges transferlə bağlı təəssüratlarını bölüşərək deyib: “Qarabağ” kimi güclü kluba gəldiyim üçün çox sevinirəm. Bu, mənim üçün yeni təcrübədir. Ümid edirəm ki, hər şey istədiyim kimi olacaq. Təbii ki, klub haqda məlumatlıyam. Azərbaycanın ən güclü komandasına gəldiyimi bilirəm. “Qarabağ”ın son illərdə ardıcıl bir neçə dəfə Azərbaycan çempion olması, avrokubokların qrup mərhələsində iştirakı, həmçinin klubun peşəkar idarəçiliyi qərarıma müsbət təsir göstərdi. Oyunlarda öz bacarığımı göstərməyi və komandama kömək etməyi səbirsizliklə gözləyirəm. Belə güclü komandada bir mövqe uğrunda rəqabətin olması normaldır. Futbolçu gəldikdə bu rəqabətə hazır olur. Rəqabət isə həm futbolçunun, həm də komandanın inkişafına təkan verir. Azarkeşlərin mənə inamını doğrultmaq üçün əlimdən gələni edəcəyəm”.xeber100.com

“Paris Sen-Jermen”in futbolçusu “Barselona”ya dönmək istədiyini bildirib

Fransanın “Paris Sen-Jermen” klubunun ulduz futbolçusu Neymar komandanın prezidenti Naser El-Halaifiyə komandanı tərk edəcəyini və “Barselona”ya dönmək istədiyini bildirib. O deyib: “Mən artıq burada qalmaq istəmirəm. Tezliklə öz evimə (“Barselona”) dönmək istəyirəm. Oranı heç vaxt tərk etməməli idim”.Azərtac xəbər verir ki, bu xəbərdən sonra Naser El-Halaifi futbolçunu təşkil olunmuş mətbuat konfransında tənqid edib. O bildirib ki, komandaya hörmət etməyən və öz işinə peşəkarcasına yanaşmayan şəxslər klubdan gedə bilər.Neymar “Barselona” klubunda 2013-2017-ci illə mövsümündə çıxış edib. 2017-ci ildə “Paris Sen-Jermen” klubuna rekord məbləğdə 222 milyon avroya transfer olunub.Futbolçunu “Barselona” ilə yanaşı, “Real Madrid”ə heyətinə qatmaqda maraqlıdır.xeber100.com

Dünya çempionatının səkkizdəbir final mərhələsində

Fransanın ev sahibliyi etdiyi qadın futbolçular arasında dünya çempionatının səkkizdəbir final mərhələsinə iyunun 22-də start verilib.Azərtac xəbər verir ki, səkkizdəbir finalın birinci günündə Almaniya seçməsi Nigeriya yığmasının qapısından üç cavabsız top keçirib. Digər oyunda isə Norveç və Avstraliya milliləri qarşılaşıblar. Norveç millisi əsas vaxtı 1:1 hesabı ilə başa çatan oyunda qalibi müəyyənləşdirmək üçün təyin edilən 11 metrlik cərimə zərbələri seriyasında üstün olub - 4:1.Səkkizdəbir finalın iyunun 23-də keçiriləcək görüşlərində İngiltərə yığması Kamerun, ev sahibi Fransa millisi isə Braziliya seçməsi ilə qarşılaşacaqlar. Bu mərhələ çərçivəsində iyunun 24-də İspaniya-ABŞ və İsveç-Kanada, iyunun 25-də isə İtaliya-Çin və Niderland-Yaponiya görüşləri oynanılacaq.Xatırladaq ki, dünya çempionatında 24 komanda altı qrupda mübarizəyə qoşulub. A qrupunda Fransa, Cənubi Koreya, Norveç və Nigeriya milliləri yer alıblar. Almaniya, Çin, İspaniya və Cənubi Afrika seçmələri B, Avstraliya, İtaliya, Braziliya və Yamayka yığmaları C qrupunda mübarizə aparıblar. Çempionatın D qrupundan səkkizdəbir finala vəsiqə uğrunda İngiltərə, Şotlandiya, Argentina və Yaponiya, E qrupundan isə Kanada, Kamerun, Yeni Zelandiya və Hollandiya futbolçuları yarışıblar. Sonuncu - F qrupunda isə ABŞ, Tailand, Çili və İsveç seçmələri yer alıblar.Mundialın görüşlərinə Fransanın 9 şəhəri - Paris, Le Havr, Valensien, Reyms, Renn, Lion, Monpelye, Nitsa, Qrenobl ev sahibliyi edir. Qrup mərhələsinə iyunun 20-də yekun vurulub. Dörddəbir final görüşləri iyunun 27-29-da keçiriləcək. Yarımfinal qarşılaşmaları iyulun 2-3-də, üçüncü yer uğrunda görüş isə iyulun 6-da oynanılacaq. Final matçı iyulun 7-də Lion şəhərində keçiriləcək.xeber100.com  

Cüdo yarışlarının ikinci gününə start verilib

“Minsk 2019” II Avropa Oyunlarında bu gün cüdo yarışlarının ikinci gününə start verilib.Azərtac xəbər verir ki, Azərbaycan təmsilçilərindən Rüstəm Orucov (73 kq) mübarizəyə qələbə ilə başlayıb. 28 yaşlı idmançı 1/16 finalda monakolu Sedrik Bessini məğlubiyyətə uğradıb. O, rəqibini 57 saniyəyə ipponla üstələyib. Azərbaycanın "Minsk 2019"dakı bayraqdarının növbəti rəqibi 2016-cı il Rio-de-Janeyro Yay Olimpiya Oyunlarında 66 kq çəkidə qızıl medal qazanmış italiyalı Fabio Bazile olub. Bu qarşılaşmada da Orucov 3 dəqiqə 27 saniyəyə qalib gələrək, adını 1/4 finala yazdırıb. Onun növbəti rəqibi isə ermənistanlı Ferdinand Karapetyan olub. Bu dəfə Orucov Karapenyana vaza-ari xalı ilə qalib gələrək, yarımfinala adlayıb. Azərbaycan təmsilçisi yunanıstanlı Georgios Azoidisə 1 dəqiqə 51 saniyəyə qalib gələrək, adını finala yazdırıb.Bu çəkidəki daha bir cüdoçu Hidayət Heydərov isə 1/16 finalda macarıstanlı Mikloş Unqvarini vaza-ari xalı ilə məğlubiyyətə uğradıb. Onun növbəti rəqibi israilli Din Yaakov Gemer olub. Bu dəfə 3 dəqiqə 31 saniyəyə ipponla qalib gələn H.Heydərov 1/4 finala yüksəlib. 22 yaşlı cüdoçunun rəqibi yunanıstanlı Georgios Azoidis olub. Heydərov 46 saniyəyə ipponla məğlub olub. O, bürünc medal uğrunda təsəlliverici görüşdə ermənistanlı Ferdinand Karapetyanla qarşılaşıb. Heydərov da Orucov kimi Karapetyanı üstələyib. Əlavə vaxtda ipponla qələbə qazanan Azərbaycan təmsilçisi bürünc medal görüşünə çıxıb.Qadınların yarışında isə Nuriyyə Axundova (63 kq) 1/16 finala təsadüf edən ilk görüşündəcə rumıniyalı Stefania Adelina Dobreyə 1 dəqiqə 46 saniyəyə uduzaraq, mübarizəni dayandırıb.Qeyd edək ki, ilk yarış günündə Azərbaycanın 7 təmsilçisinin hamısı medalsız qalıb.xeber100.com

Atletika üzrə Azərbaycan çempionatına yekun vurulub

Azərbaycan Dövlət Bədən Tərbiyəsi və İdman Akademiyasının stadionunda 2002-2003-cü il təvəllüdlü yeniyetmələr arasında atletika üzrə Azərbaycan çempionatına yekun vurulub. Gənclər və İdman Nazirliyinin, Azərbaycan Atletika Federasiyası (AAF) ilə birgə təşkil etdiyi turnirdə 120-yə yaxın atlet birincilik uğrunda mübarizə aparıb.AAF-dan Azərtac-a bildiriblər ki, Yarışda paytaxt klublarından başqa Sumqayıt, Gəncə, İsmayıllı, Bərdə və Xızıdan olan atletlər də iştirak edib.Ölkə çempionatının birinci günündə oğlanlar arasında uzunluğa tullanma yarışında Kəsgin Abbaszadə, hündürlüyə tullanmada Aydın Bədəlov və nüvəitələmədə Yusif Nəzərov qalib adını qazanıb. Qızların yarışında isə uzunluğa tullanmada Ülviyyə Cabbarova, nüvəitələmədə isə Günel Hüseynova birinci yerə layiq görülüb.Oğlanlar arasında qaçış yarışlarında Əli Abdıyev (200 m), Vahid Kərimov (800 m) və Eldar Qurbanlı (3000 m) birinci olub. Qızların mübarizəsində isə Lamiyə Vəliyeva (200 m) və Günel Manafova (800 m) fəxri kürsünün ən yüksək pilləsinə qalxıb.Qaliblər federasiya və nazirlik tərəfindən diplom və medallarla təltif olunublar.xeber100.com