Boks üzrə beynəlxalq turnir keçiriləcək

İyulun 8-də Batumidə boks üzrə yeniyetmə və kadetlər arasında beynəlxalq turnir keçiriləcək.Azərtac xəbər verir ki, yarışlarda Azərbaycanı Əməkdar məşqçi Rəhim Allahverdiyevin rəhbərliyi ilə 1 saylı Respublika İxtisaslaşdırılmış Olimpiya Ehtiyatları Uşaq Gənclər İdman Məktəbinin (RİOEUGİM) və “Qızıl Əlcək” idman klubunun yetirmələri təmsil edəcəklər.Klubun və 1 saylı RİOEUGİM-in baş məşqçisi R.Allahverdiyev müsahibəsində yetirmələrinin Batumi turnirinə ciddi hazırlaşdıqlarını bildirib: “Komandamız turnirə hazırlıq məqsədilə təlim-məşq toplanışı keçib. Yarışda 25 boksçu çıxış edəcək. Batumi turniri kadetlər arasında keçiriləcək Avropa birinciliyinə hazırlıq xarakteri daşıyır”.Beynəlxalq turnir iyulun 11-də başa çatacaq.xeber100.com

Milli Karate Federasiyasının məlumatına görə…

yirmi bir yaşadək gənclərdən ibarət karate üzrə Azərbaycan milli komandasının üzvləri Murad Hacızadə (84 kq-dan yuxarı) və Fidan Teymurova (50 kq) Dünya Karate Federasiyasının WKF Kuboku turnirinin mükafatçıları olublar.Azərbaycan Milli Karate Federasiyasından Azərtac-a bildiriblər ki, iyulun 4-5-də Xorvatiyanın Umaq şəhərində keçirilən yarışda M.Hacızadə qızıl, F.Teymurova isə bürünc medal qazanıblar. Yuxarı yaş dərəcəsində daha iki idmançımızın nəticəsi iyulun 5-də məlum olacaq.Bu turnirdən əlavə, iyulun 5-7-də Umaqda WKF-in Gənclər Liqası yarışı da keçirilir. Kumite üzrə yeniyetmə və gənclərdən ibarət komandamızın baş məşqçisi Anar Allahverdiyevin rəhbərlik etdiyi heyətdən daha 14 idmançı turnirə qatılacaq.Kata üzrə baş məşqçi Vahid Ayvazov isə 14-15 yaşlı yeniyetmələr və 16-17 yaşlı gənclərin hər bir yaş dərəcəsində iki idmançısının iştirakına üstünlük verib.Beynəlxalq hakimlər Cahangir Babayev və Vüqar Kərimov WKF-in Gənclər Liqasını idarə edən hakimlər arasındadır.Yarışda 70 ölkədən 2577 idmançı iştirak edir.xeber100.com

“Qəbələ” futbol komandası növbəti transferini gerçəkləşdirib

2019-2020-ci illər mövsümünün hazırlıqlarını davam etdirən “Qəbələ” futbol komandası növbəti transferini gerçəkləşdirib.Azərtac klubun saytına istinadla xəbər verir ki, “qırmızı-qaralar” Fil Dişi Sahilindən olan futbolçu Kristian Kouakou ilə anlaşıb.İyirmi səkkiz yaşlı hücumçu ilə 1+1 illik müqavilə imzalanıb. Kristian futbol həyatına “Toumodi” klubunda başlayıb. O, 2007-ci ildə “Anderlext” Futbol Akademiyasına transfer olub və üç il gənclər komandasında top qovub. 2010-cu ildə “Anderlext”dən ayrılan forvard “Muanqtonq Yunayted”lə (Tailand) müqavilə bağlayıb. K.Kouakou burada keçirdiyi 53 oyunda 22 qol vurub. Uğurlu oyunu ilə fərqlənən Kristian Fransanın “Tours” klubuna transfer edilib. Həmin komandanın uğurları üçün üç mövsüm oynayan hücumçu 94 oyunda 26 dəfə fərqlənməyi bacarıb.Sonra K.Kouakou Fransada “Kaen” və “Nimes Olimpik” kollektivlərinin formasını geyinib. Forvardın sonuncu komandası Çexiyanın “Karvina” klubu olub.Xatırladaq ki, “Qəbələ” klubu daha əvvəl Fernan Ferreyra Lopes, Merab Qiqauri, Kamal Mirzəyev və Sadiq Quliyevi heyətinə qatıb.xeber100.com

“Bakı yayı” beynəlxalq şahmat festivalı davam edir

Bakıda keçirilən ənənəvi “Bakı yayı” beynəlxalq şahmat festivalı davam edir.Beynəlxalq dərəcəli hakim, Əməkdar məşqçi İlqar Bacarani Azərtac-a bildirib ki, qrossmeyster və beynəlxalq usta normalı yarışlarda 9 oyundan 5,5 xal toplayan “Qross expert” komandası turnir cədvəlinə liderlik edir. Komandanın heyətində Məhəmməd Muradlı (Bakı) 3 və iranlı Məsud Mosadeqpur 1,5 xal toplayıblar. Usta qrupunda isə “Şətrənc” ve “Ekspertlər” komandaları hərəyə 5,5 xal toplayıblar. Şəxsi hesabda isə 3 qələbə ilə Vüqar Manafov və Müşfiq Əsgərov turnir cədvəlinin ilk pilləsində qərarlaşıblar.Şeveningen sistemi üzrə keçirilən A turnirində Azərbaycan şahmatçılarından başqa, Türkiyə, Gürcüstan, İran, İraq, Belarus təmsilçiləri də iştirak edirlər. Onlardan altısı qrossmeyster, dördü beynəlxalq usta, doqquzu FIDE ustasıdır.xeber100.com

Atletika üzrə beynəlxalq xatirə turniri keçiriləcək

İyulun 6-7-də Qazaxıstanın Almatı şəhərində Qusman Kosanovun xatirəsinə həsr olunan atletika üzrə beynəlxalq xatirə turniri keçiriləcək. Turnirdə Azərbaycan atletləri də iştirak edəcəklər.Azərbaycan Atletika Federasiyasından Azərtac-a bildiriblər ki, beynəlxalq turnirdə tullanma növlərində Yekaterina Sarıyeva, Yelena Pextereva, Sabrina Zralova, Yadulla İbrahimov, qaçış növündə isə Cavid Məmmədov mübarizə aparacaqlar.xeber100.com

“Qarabağ” futbol klubu yeni müqavilə imzalayıb

“Qarabağ” klubu daha bir futbolçunun transferini başa çatdırıb.Azərtac klubun “Facebook”dakı səhifəsinə istinadla xəbər verir ki, sol cinah müdafiəçisi Ailton Ferreyra Silva ilə anlaşma əldə olunub. Müqaviləyə əsasən, Almaniyanın “Ştutqart” klubuna məxsus olan 24 yaşlı braziliyalı futbolçu bir illik icarəyə götürülüb.“Qarabağ” daha əvvəl hücuma meyilli yarımmüdafiəçi Xayme Rodrigesi transfer edib.xeber100.com

UEFA Avropa Liqasının ilk oyunları çərçivəsində

Azərbaycanlı referi Rauf Cabbarov UEFA Avropa Liqasının oyununa təyinat alıb.AFFA-dan Azərtac-a bildiriblər ki, o, UEFA Avropa Liqasının I təsnifat mərhələsinin ilk oyunları çərçivəsində iyulun 11-də keçiriləcək “Fola” (Lüksemburq) – “Çixura” (Gürcüstan) qarşılaşmasının baş hakimi olacaq. Ona Akif Əmirəli və Yaşar Abbasov kömək edəcəklər. Dördüncü hakim funksiyasını İnqilab Məmmədov yerinə yetirəcək.xeber100.com

XXX Ümumdünya Yay Universiadasının açılış mərasimi keçirilib

İtaliyanın Neapol şəhərində XXX Ümumdünya Yay Universiadasının açılış mərasimi keçirilib.Azərtac xəbər verir ki, rəsmi açılış mərasimi “Napoli” futbol klubunun ev oyunlarını keçirdiyi “San Paolo” stadionunda təşkil olunub. Tədbirdə idmançılar, beynəlxalq federasiyaların rəhbərləri, Beynəlxalq Tələbə İdman Federasiyasının (FISU) nümayəndələri iştirak ediblər. Oyunların məşəlini “Napoli” komandasının futbolçusu Lorenzo İnsinye alovlandırıb.Üç saata yaxın davam edən açılış mərasimində Azərbaycan komandasının bayraqdarı cüdoçu Murad Fətiyev olub.İyulun 14-dək davam edəcək yarışlarda idmanın 18 növü üzrə 220 dəst medal uğrunda mübarizə aparılacaq. Universiadada ölkəmizi bədii gimnastika, idman gimnastikası, cüdo, taekvondo, atletika, qılıncoynatma yarışlarında 22 idmançı təmsil edəcək.Xatırladaq ki, Çinin Taypey şəhərində təşkil olunan XXIX Ümumdünya Yay Universiadasında Azərbaycan idmançıları 3 qızıl, 1 gümüş və 4 bürünc medal qazanaraq komanda hesabında 24-cü yerdə qərarlaşmışdı.xeber100.com

Güləş Federasiyasının məlumatına görə…

Azərbaycanın sərbəst güləşçiləri İstanbulda təlim-məşq toplanışına start veriblər.Azərtac Azərbaycan Güləş Federasiyasının saytına istinadla xəbər verir ki, baş məşqçi Saypulla Absaidovun və böyük məşqçi Zəlimxan Hüseynovun rəhbərliyi ilə 14 güləşçi iyulun 10-dək İstanbulda hazırlıq keçəcək. Sonra komandamız iyulun 11-dən 14-dək İstanbulda təşkil olunacaq reytinq xarakterli Yaşar Doğunun xatirə turnirində qüvvəsini sınayacaq.xeber100.com

Beynəlxalq şahmat festivalı davam edir

Bakıda, Respublika Şahmat Mərkəzində ənənəvi “Bakı yayı” beynəlxalq şahmat festivalı davam edir.Azərtac xəbər verir ki, festival çərçivəsində keçirilən blitz turnirinin qalibi və mükafatçıları müəyyənləşib. Yarışın favoriti Ülvi Bacarani (Bakı) 9 xalla turnirin qalibi olub. Murad İbrahimli (Sumqayıt) 7 xalla ikinci, Şəhriyar İsgəndərov (Quba) 6,5 xalla üçüncü yeri tutublar. Turnirdə 51 şahmatçı iştirak edib.Qeyd edək ki, festivalda şahmatçılar A (master), B (açıq), C (uşaq turniri U-12), D (rapid) turnirlərində mübarizə aparırlar. Festival iyulun 10-da başa çatacaq.xeber100.com