Sumo üzrə XXIII Avropa çempionatı başlayıb

Tallində sumo üzrə XXIII Avropa çempionatına start verilib.Azərbaycan Sumo Federasiyasından (ASF) Azərtac-a bildiriblər ki, yarışlarda ölkəmizi Camal Feyziyev (115 kq), Avropa çempionları Məhərrəm Eyvazov (60 kq) və Çingiz Səmədov (100 kq), qitə birinciliyinin mükafatçısı Cavid Feyziyev (115 kq) və Azərbaycan çempionu Nahid Vəliyev (60 kq) təmsil edirlər. İdmançılarımız federasiyanın prezidenti Samir Abdullayevin rəhbərliyi ilə mübarizə aparırlar.Çempionatda qarşılaşmaların idarə olunmasında Azərbaycanı beynəlxalq dərəcəli hakim Rəsul Həsənov təmsil edir.Qeyd edək ki, Avropa çempionatında 17 ölkədən 300-dən çox idmançı gücünü sınayır.xeber100.com

Karate 1 Premyer Liqa seriyasından turnir start götürüb

Aprelin 19-da Rabatda Karate 1 Premyer Liqa seriyasından turnir start götürüb.Azərtac xəbər verir ki, aprelin 21-dək davam edəcək nüfuzlu yarışda Azərbaycanı 14 idmançı təmsil edir. Kişilərdən ibarət yığma komandanın heyətində Firdovsi Fərzəliyev (60 kq), Rafiz Həsənov, Hümmət Baxşəliyev (hər ikisi 67 kq), Rafael Ağayev (75 kq), Ayxan Mamayev, Pənah Abdullayev, Turqut Həsənov (hər üçü 84 kq), Şahin Atamov və Asiman Qurbanlı (84+) yer alıblar. Qadınlar arasında yarışlarda Nuranə Əliyeva (50 kq), İlahə Qasımova (55 kq), Fəridə Abiyeva (61 kq) və İrina Zaretska (68 kq) mübarizə aparırlar. Roman Heydərov isə kata üzrə yarışda qüvvəsini sınayır.Turnirə 78 ölkədən 700-ə yaxın karateçi qatılıb.xeber100.com

UEFA Çempionlar Liqasının dörddəbir final mərhələsində

UEFA Çempionlar Liqasının dörddəbir final mərhələsinin cavab qarşılaşmalarının keçirildiyi həftənin ən yaxşı futbolçusu müəyyənləşib.Azərtac UEFA-nın saytına istinadla xəbər verir ki, “Barselona” klubunun argentinalı hücumçusu Lionel Messi azarkeşlər arasında aparılan sorğunun nəticələrinə əsasən həftənin ən yaxşı futbolçusu seçilib.Otuz iki yaşlı hücumçu bu nominasiyada Heunq-Min Son (“Tottenhem”), Roberto Firmino (“Liverpul”) və Frenk de Yonqu (“Ayaks”) qabaqlayıb.L.Messi “Barselona”nın dörddəbir final mərhələsinin cavab görüşündə doğma meydanda İngiltərənin “Mançester Yunayted” klubunu məğlub etdiyi matçda (3:0) iki qolla yadda qalıb.xeber100.com

Topaz Premyer Liqasının XXV turuna start verilir

Aprelin 18-də futbol üzrə Topaz Premyer Liqasının XXV turuna start verilir.Azərtac xəbər verir ki, tur iki gün davam edəcək. Turun birinci günündə iki oyun keçiriləcək. XXV tur saat 16:45-də “Sumqayıt” – “Səbail” oyunu ilə başlanacaq. “Kapital Bank Arena”da oynanılacaq görüşü Vüqar Həsənli idarə edəcək.Günün ikinci qarşılaşmasında çempionluğa iddialı “Qarabağ” komandası autsayder “Keşlə”ni qəbul edəcək. Əliyar Ağayevin idarə edəcəyi matç Tofiq Bəhramov adına Respublika stadionunda keçiriləcək. Oyun saat 19:00-da start götürəcək.Aprelin 19-da - turun ikinci günündə “Qəbələ” komandası doğma arenada “Zirə” ilə qarşılaşacaq. Qəbələ şəhər stadionunda oynanılacaq görüşü İnqilab Məmmədov idarə edəcək. Görüş saat 16:00-da başlanacaq.Tura saat 18:30-da “Sabah” – “Neftçi” oyunu ilə yekun vurulacaq. “Əlincə Arena”da keçiriləcək qarşılaşmanın baş hakimi Rövşən Rəcəbov olacaq.Turun bütün görüşləri “CBC Sport” kanalı ilə birbaşa yayımlanacaq.Xatırladaq ki, 24 turdan sonra turnir cədvəlinə aktivində 54 xal olan “Qarabağ” başçılıq edir. “Neftçi” 52 xalla ikinci, “Səbail” 35 xalla üçüncü, 33 xalı olan “Qəbələ” isə dördüncü yerdədir. Digər pillələrdə müvafiq olaraq, “Sabah” (26), “Zirə” (25), “Sumqayıt” (20) və “Keşlə” (19) yer alıblar.xeber100.com

Budapeştdə keçirilən şahmat üzrə turnir başa çatıb

Budapeştdə keçirilən şahmat üzrə yaz festivalı başa çatıb.Azərtac xəbər verir ki, turnirin qalibi 9 turdan 7 xal yığan rusiyalı Artyom Timofeyev olub. Liderdən bir xal geri qalan şahmatçımız Vüqar Əsədli turnir cədvəlinin 17-ci pilləsində qərarlaşıb. Digər təmsilçilərimiz Nail Bəşirli 5,5, Zaur Bayramov 5 xal toplayıblar.Yaz festivalında 36 ölkədən 150-yə yaxın şahmatçı mübarizə aparıb.xeber100.com

Azərbaycan Ağır Atletika Federasiyasının məlumatı

Aprelin 20-dən 28-dək Azərbaycanın bütün bölgələrini əhatə edən ağır atletika üzrə respublika yarışlarının ikinci seçmə mərhələsi keçiriləcək.Azərbaycan Ağır Atletika Federasiyasından Azərtac-a bildiriblər ki, yarışlar Xırdalan, Lənkəran və Samuxda keçiriləcək. Xırdalanda aprelin 20-21-də Sumqayıt, Qobustan, Şamaxı, İsmayıllı və Bakıdan olan atletlər mübarizəyə qoşulacaqlar. Aprelin 24-25-də Lənkəranda Cəlilabad, Neftçala, Lerik və Astaranı, ayın 27-28-də isə Samuxda Goranboy, Gəncə, Qazax, Yevlax, Şəki və Qaxı təmsil edən atletlər körpücük üzərinə çıxacaqlar.Yarış şəxsi xarakter daşıyır və iştiraka yalnız texniki cəhətdən hazırlıqlı, yaşı ən azı 12 olan idmançılar buraxılacaq. Mərhələ yarışlarında 2001-2007-ci il və daha böyük təvəllüdlü kişilər və qadınlar, müvafiq yaş qruplarında mübarizə aparacaqlar. Qaliblər “Sinkleyr” cədvəli üzrə müəyyən ediləcək.Yarışın məqsədi regionlarda atletlərin hazırlıq durumlarının yoxlanılması, ehtiyat qüvvənin nəzərdən keçirilməsi, güclü idmançıların seçilməsi, ağır atletika idman növünün şəhər, rayon, qəsəbə və kəndlərdə təbliği və inkişafı, idmançılar və məşqçilər arasında dostluq əlaqələrinin möhkəmləndirilməsi, idmançıların ustalıq səviyyəsinin artırılması və təkmilləşdirilməsidir.xeber100.com

Yay Olimpiya və Paralimpiya Oyunlarının ilk biletləri satışa çıxarılacaq

2020-ci ildə Tokioda keçiriləcək Yay Olimpiya və Paralimpiya Oyunlarının ilk biletləri mayın 9-da satışa çıxarılacaq.Azərtac xəbər verir ki, bu barədə Oyunların Yaponiya Təşkilat Komitəsi məlumat yayıb. Bildirilir ki, biletlərin ilk komplekti xüsusi lotereya da oynanılacaq. Bu biletləri əldə etmək istəyənlər Oyunların saytında qeydiyyatdan keçməli və bu barədə müraciət yerləşdirməlidirlər. Biletlərin potensial alıcıları Yaponiya ərazisində yaşamalıdırlar. Lotereyanın nəticələri iyunun 20-də elan ediləcək.Cari ilin payızında biletlərin satışının ikinci mərhələsi başlanacaq və bu mərhələdə ilk turda müraciət edən, lakin bilet uda bilməyənlər iştirak edəcəklər. Oyunlara biletlərin sərbəst satışına yalnız 2020-ci ilin yazında başlanacaq.xeber100.com

“Yuvnetus” futbol klubunun “Ayaks”a cavab oyunundan sonra…

"Yuvnetus"un baş məşqçisi Massimiliano Alleqri Çempionlar Liqasının 1/4 finalının "Ayaks"la cavab oyunundan sonra UEFA-nın saytına açıqlamasında deyib: "Çempionlar Liqasını qazanmaq üçün komanda pik formada olmalıdır. Son aylarda xeyli zədəlimiz oldu. Hətta bu görüşdə də vacib oyunçularımızdan məhrum olmuşduq. Buna görə də əla oyun göstərə bilmədik". Milli.az klubun saytına istinadən bildirir ki, turnirdə 1:2 hesabı ilə uduzaraq ÇL-lə vidalaşdıqları matçı şərh edən italiyalı mütəxəssis rəqibin qələbəyə layiq olduğunu etiraf edib: "Ayaks" yaxşı futbol sərgiləyir. Qələbəyə layiq idilər. Əsasən də ikinci hissədə yaxşı oynadılar. Komanda əla oyunçulardan qurulub. "Real"a iki görüşdə 5 qol vuran komanda necə ola bilər?Turnirdən ən pis gedişimiz olduğunu deməzdim. "Yuventus"un həmişə bir məqsədi olub - hər turniri qazanmaq. Bəzən alınır, bəzən yox". xeber100.com

Güləşçilər arasında “Çempionlar” turniri keçiriləcək

Aprelin 18-dən 21-dək Türkiyənin Antalya şəhərində gənc güləşçilər arasında "Çempionlar" turniri keçiriləcək.Azərbaycan Güləş Federasiyasından Trend-ə verilən məlumata görə, ənənəvi yarışda ölkəmizi sərbəst və qadın güləşçilərimiz təmsil edəcək. Sərbəst güləş üzrə gənclərdən ibarət yığmamızın böyük məşqçisi Rövşən Hacıyev və məşqçi Abil İbrahimovun rəhbərliyi altında Azər Əhmədov, Mahir Məmmədzadə (hər ikisi 57 kq), İntiqam Vəlizadə (61 kq), Turan Bayramov, Vahid Əlizadə (hər ikisi 65 kq), Əşrəf Aşurov, Elmar Kazımov (hər ikisi 70 kq), Nəsib İsayev, Nadir Hacıyev (hər ikisi 74 kq), Abubakr Abakarov (79 kq), Fuad Mayılov (86 kq), Asxab Həmzətov (92 kq), Sənan Əliyev (97 kq) və İslam Abuyev (125 kq) qardaş ölkədə xalça üzərinə çıxacaq.Qadınların yarışında isə böyük məşqçi Həsrət Məmmədyarovun tapşırıqlarını Sevinc Əhədova, Yasəmən Məcidli (hər ikisi 50 kq), Ayşən Yusifova (53 kq), Birgül Sultanova (57 kq), Ceyla Nağızadə (65 kq) və Jalə Əliyeva (68 kq) yerinə yetirməyə çalışacaq.Qeyd edək ki, "Çempionlar" turnirində beynəlxalq dərəcəli hakim Tural Əliyev ədaləti qoruyacaq.xeber100.com

UEFA Çempionlar Liqasının ¼ final mərhələsidə

UEFA Çempionlar Liqasının ¼ final mərhələsinin cavab qarşılaşmaları keçirilib.Trend-in məlumatına görə, “Barselona” komandası “Kamp Nou”da İngiltərənin “Mançester Yunayted” klubunu qəbul edib.Oyun meydan sahiblərinin 3:0 hesablı qələbəsi ilə yekunlaşıb. Matçda hesabı 16-cı dəqiqədə kataloniyalıların hücumçusu Lionel Messi açıb. Cəmi 4 dəqiqə sonra Messi hesabda fərqi artırıb.Oyunun son qolunu 61-ci dəqiqədə uzaq məsafədən zərbə ilə Filipe Koutinyo vurub.Xatırladaq ki, komandalar arasında ilk oyun kataloniyalıların 1:0 hesabı ilə yekunlaşıb. Beləliklə, “Barselona” turnirin yarımfinal mərhələsinə vəsiqə qazanıb.Turnirin digər ¼ final oyunu İtaliyada keçirilib. “Yuventus” Hollandiyanın “Ayaks” klubunu qəbul edib.Matç qonaq komandanın 1:2 hesablı qələbəsi ilə yekunlaşıb. Kristiano Ronaldonun 28-ci dəqiqədə vurduğu qola, hollandiyalılar 34-cü (Van de Bek) və 67-ci (Matteys de Liqt) dəqiqələrdə cavab verib.Qeyd edək ki, komandalar arasında keçirilən ilk oyun 1:1 hesablı heç-heçə ilə yekunlaşıb. Beləliklə, iki oyunun nəticəsinə əsasən, "Ayaks" Çempionlar Liqasının yarımfinalına vəsiqə qazanıb.xeber100.com